ខ្មែរ​នៅ​អូស្រ្តាលី​ធ្វើ​បាតុកម្ម​ទាម​ទារ​ឲ្យ​ផ្តល់​សេរី​ភាព​ពេញ​លេញ​ដល់​ លោក​ កឹម​ សុខា

ដោយ អ៊ឹង ប៊ុនថន
15/09/2018
RFI

media
សកម្មភាព​តវ៉ា​របស់​ពលរដ្ឋ​ខ្មែរ​នៅអូស្រ្តាលី​ថ្ងៃទី១៥​កញ្ញា​ឆ្នាំ​២០១៨
@CBN


ពលរដ្ឋ​ខ្មែរ​រាប់​រយ​នាក់​បាន​ប្រមូល​ផ្តុំ​គ្នា​ជា​ថ្មី​ទៀត​នៅ​ទីក្រុង​ស៊ីដនី​ប្រទេស​អូស្ត្រាលី ​នៅថ្ងៃ​សៅរ៍នេះ​ ដោយ​ទាម​ទារ​ឲ្យ​រដ្ឋាភិបាល​ប្រទេស​នេះ​ពន្លឿន​ការ​ដាក់​ទណ្ឌកម្ម​លើ​មន្រ្តី​កម្ពុជា​មួយ​ចំនួន​​ដែល​ចូល​រួម​បំផ្លាញ​លទ្ធិ​ប្រជាធិបតេយ្យ​នៅ​កម្ពុជា​។​ ជាពិសេស​ ពួកគេ​បាន​ស្រែក​ទាម​ទារ​ឲ្យអាជ្ញាធរ​​ខ្មែរ​ ផ្តល់​សេរីភាព​ពេញ​លេញ​ ដល់​លោក​ កឹម​ សុខា​ ក្រោយ​ត្រូវ​បាន​ដោះលែង​ពី​ពន្ធនាគារ​មក​ឲ្យ​នៅ​ក្នុង​ផ្ទះ​ផ្ទាល់​ខ្លួន​កាល​ពី​ដើម​សប្តាហ៍​នេះ​។​

ក្រៅ​តែ​ពី​ទាម​ទារ​ឲ្យ​រដ្ឋាភិបាល​កម្ពុជា​​ផ្តល់​សេរី​ភាព​ដល់​លោក​ កឹម​ សុខា​ ឲ្យ​បាន​ពេញ​លេញហើយ​ ពលរដ្ឋ​ខ្មែរ​និង​អ្នក​គាំទ្រ​អតីត​គណ​បក្ស​ប្រឆាំង​ ក៏​បាន​ទាម​ទារ​ឲ្យ​​សហគមន៍​អន្តរ​ជាតិ​ ជា​ពិសេស​ប្រទេស​ចិន​ បញ្ឈប់​ការ​គាំទ្រ​ដល់​រដ្ឋាភិបាល​កម្ពុជា​។​ រដ្ឋាភិបាល​កម្ពុជា​ដែល​ក្រុមអ្នក​តវ៉ា​លើក​ឡើង​ថា​ ជា​រដ្ឋាភិបាល​កើត​ចេញ​ពី​ការ​បោះឆ្នោត​ក្លែង​ក្លាយ​ ដោយ​​សា​រ​​តែ​មិនអនុញ្ញាត​ឲ្យ​គណ​បក្ស​សង្រ្គោះ​ជាតិ​ចូលរួម​។

​ក្នុង​ចំណោម​ក្រុម​បាតុករ​ខ្មែរ​រាប់​រយ​នាក់​នោះ ​គេ​សង្កេត​ឃើញ​មាន​វត្តមាន​ លោក ​ម៉ៅ ​មុនីវណ្ណ ​និង​ លោក​ ងឹម​ ញ៉េង​ អតីត​តំណាង​រាស្ត្រគណ​បក្ស​ប្រឆាំង​​ចូល​រួម​ផងដែរ​ នៅ​ក្នុង​​ទីក្រុង​​ស៊ីដនី​។​ លោក​ ងឹម​ ញ៉េង ​ បាន​ថ្លែង​អំពាវ​នាវ​ឲ្យ​រដ្ឋាភិបាល​អូស្រ្តីលី​ដាក់​ទណ្ឌកម្ម​ឲ្យ​បានលឿន​ទៅ​លើ​ជន​ទាំង​ឡាយ​ណាដែល​​ចូល​រួម​​បំផ្លាញ​លទ្ធិ​ប្រជា​ធិបតេយ្យ​នៅកម្ពុជា​។​ ចំណែក​ លោក​ ម៉ៅ ​មុនីវណ្ណ ​បានថ្លែង​ថា ​ការ​ធ្វើ​បាតុកម្ម​នេះ​គឺ​ជា​សេរីភាព​របស់​ពលរដ្ឋខ្មែរ​នៅ​ក្រៅប្រទេស​ ខណៈ​ពលរដ្ឋ​ខ្មែរ​នៅក្នុង​​ស្រុក​​ ត្រូវ​បាន​រឹត​បន្តឹង​សេរីភាព​មិន​ឲ្យ​ធ្វើ​​បាតុកម្ម​នោះ​ទេ​នៅពេលនេះ​។

​សូម​បញ្ជាក់​ថា ​ក្រោយ​បោះឆ្នោត​ថ្ងៃ​ទី​២៩​​កក្កដា​ឆ្នាំ​២០១៨​ ពលរដ្ឋ​ខ្មែរ​​នៅ​ក្រៅ​ប្រទេស​បាន​ធ្វើបាតុកម្ម​ចំនួន​៣​ដង​ហើយ​ ដើម្បី​​ទាម​ទារ​​ឲ្យ​​ចិន​​បញ្ឈប់​គាំទ្រ​​រដ្ឋាភិបាល​ទី​ក្រុង​ភ្នំពេញ​។​ បាតុ​កម្ម​​លើក​ទី​១​ គឺ​មុខ​ស្ថាន​កុងស៊ុល​ចិន​ក្នុង​រដ្ឋ ​California ​លើក​ទី​២ ​នៅទី​ក្រុង​ប៉ារីស​ប្រទេសបារាំង​ និង​លើក​ទី​៣​នៅ​ទី​ក្រុង​ស៊ីដនី​ ប្រទេស​​អូស្រ្តាលី​។​

យ៉ាង​ណាក៏​ដោយ​ អ្នក​នាំ​ពាក្យ​រដ្ឋាភិបាល​កម្ពុជា​ លោក ​ផៃ ​ស៊ីផាន​ បាន​ចាត់​ទុក​ ការ​​ធ្វើ​​បាតុ​កម្ម​ទាម​ទារ​ឲ្យ​អូស្រ្តាលី​ដាក់​ទណ្ឌកម្ម​លើ​មន្រ្តី​រដ្ឋាភិបាល​កម្ពុជា​មួយ​ចំនួន​នេះ ​រាប់​ទាំងទាម​ទារ​កុំ​ឲ្យចិន​គាំទ្រ​រដ្ឋាភិបាល​កម្ពុជា​នោះ ​គឺ​មិន​មាន​ឥទ្ធិពល​អ្វី​ឡើយ​។​ ចំណែក​ ករណី​លោក​ កឹម ​សុខា ​អ្នក​នាំ​ពាក្យ​រូប​នេះ ​ទុក​ឲ្យ​តុលាការ​ជា​អ្នក​សម្រេច​។

​បើ​​តាម​​គម្រោង​ពលរដ្ឋ​ខ្មែរ​នៅ​សហ​រដ្ឋអាមេរិក ក៏​នឹង​ធ្វើ​បាតុ​កម្ម​ជា​ថ្មី​ទៀត​នៅ​ចុង​ខែ​កញ្ញា​ខាងមុខ​នេះ ប្រសិន​បើ​ប្រមុខ​រដ្ឋាភិបាល​ខ្មែរ ​ទៅ​ចូល​រួម​កិច្ច​ប្រជុំ​នៅ​អង្គការ​សហ​ប្រជាជាតិ។ លោក ហ៊ុន សែន ក៏​បាន​ប្រកាស​រួច​ហើយ​ថា លោក​នឹង​ទៅ​ចូល​រួម​កិច្ច​ប្រជុំ​នោះ ហើយ​បាន​ផ្គើន​ឲ្យ​អ្នក​គាំទ្រ​អតីត​បក្ស​ប្រឆាំង​ធ្វើ​បាតុ​កម្ម​ប្រឆាំង​រូប​លោក​ទៀត​ផង៕

What Next?

Recent Articles

2 Responses to "ខ្មែរ​នៅ​អូស្រ្តាលី​ធ្វើ​បាតុកម្ម​ទាម​ទារ​ឲ្យ​ផ្តល់​សេរី​ភាព​ពេញ​លេញ​ដល់​ លោក​ កឹម​ សុខា"

  1. Anonymous says:

    Mass demonstration will welcome Hun Sen when he comes at UN in New York City, are you ready?????

  2. Anonymous says:

    yes it will be shameful they will welcome him whit rotten egg . HUN SEN should not be there he can not buy any thing from the world. go back to live as your back ground you are not that kind of GOD. shame on you Mr. GOD bless Cambodia