របប​ភ្នំពេញ​ថា ការសម្រេច​របស់​សភា​អឺរ៉ុប​ចំពោះ​កម្ពុជា​ជា​រឿង​លម្អៀង និង​មាន​ស្តង់ដារ​ពីរ

យន់ សាមៀន
2018-09-15
RFA

ស្ដាប់ ឬ​ទាញ​​យក​សំឡេង
ស្តាប់សំឡេងថតសំឡេង

លោក ហ៊ុន សែន ក្នុង​ពិធី​ជួប​កីឡាករ កីឡាការិនី នៅ​វិមាន​សន្តិភាព ព្រឹក​ថ្ងៃ​ទី​៦ ខែ​សីហា ឆ្នាំ ២០១៨។ Photo courtesy of Samdech Hun Sen, Cambodian Prime Minsister
លោក ហ៊ុន សែន ក្នុង​ពិធី​ជួប​កីឡាករ កីឡាការិនី នៅ​វិមាន​សន្តិភាព ព្រឹក​ថ្ងៃ​ទី​៦ ខែ​សីហា ឆ្នាំ ២០១៨។ Photo courtesy of Samdech Hun Sen, Cambodian Prime Minsister


ស្ថាន​បេសកកម្ម​កម្ពុជា​ប្រចាំ​សហភាព​អឺរ៉ុប​ចាត់ទុកថា សេចក្ដី​សម្រេច​របស់​សភា​អឺរ៉ុប​ឱ្យ​របប​ក្រុងភ្នំពេញ​ស្តារ​ប្រជាធិបតេយ្យ​ឡើងវិញ​នោះ ជា​រឿង​លម្អៀង និង​មាន​ស្តង់ដារ​ពីរ។ អ្នកឃ្លាំមើល​សង្គម​យល់ថា ការ​ទាមទារ​របស់​សភា​អឺរ៉ុប​នេះ គឺ​ដើម្បី​តែ​ផលប្រយោជន៍​របស់​កម្ពុជា​ប៉ុណ្ណោះ ហើយ​របប​ដឹកនាំ​បច្ចុប្បន្ន​ត្រូវតែ​យក​សំណើ​នេះ​ទៅ​ពិចារណា និង​ដោះស្រាយ មិនមែន​ជា​ការ​វាយបក​ទៅ​សភា​អឺរ៉ុប​បែបនេះ​ឡើយ។

តំណាង​របប​លោក ហ៊ុន សែន ប្រចាំ​សហភាព​អឺរ៉ុប បាន​ប្រើ​សំដី​ធ្ងន់ៗ និង​វាយប្រហារ​ថា សភា​អឺរ៉ុប គឺជា​ស្ថាប័ន​ដែល​តែងតែ​អនុម័ត​សេចក្ដី​សម្រេច​ចិត្ត​ប្រឆាំង​នឹង​អាជ្ញាធរ​កម្ពុជា​មិន​ដែល​ខាន ចាប់​តាំង​ពី​ត្រូវ​បង្កើត​ឡើង​ក្នុង​ឆ្នាំ១៩៧៩ នោះ​រួចមក ហើយ​សេចក្ដី​សម្រេច​ទាំងនោះ សុទ្ធតែ​បង្កប់​នូវ​របៀបវារៈ​នយោបាយ​ដែល​ជំរុញ​ដោយ​មហាអំណាច​បរទេស ឬ​ពួក​ក្រុម​ប្រឆាំង។

ស្ថាន​បេសកកម្ម​កម្ពុជា​ប្រចាំ​សហភាព​អឺរ៉ុប បាន​ចេញ​សេចក្ដីថ្លែងការណ៍​កាលពី​ថ្ងៃ​ទី​១៣ កញ្ញា ដោយ​សង្កត់​ធ្ងន់​ថា សេចក្ដី​សម្រេច​របស់​សភា​អឺរ៉ុប​នេះ ធ្វើឡើង​តាមតែ​ការ​ចង្អុល​បង្ហាញ​ពី​បុគ្គល​ប្រឆាំង​តែ​ម្នាក់​ប៉ុណ្ណោះ ដោយ​មិនបាន​ផ្ដល់​តម្លៃ​ដល់​គំនិត​ប្រជាធិបតេយ្យ​តាម​បែប​កម្ពុជា​ឡើយ។ តំណាង​របប​ក្រុងភ្នំពេញ​ដដែល​បន្ត​ថា របប​នេះ​មាន​ហេតុផល​ត្រឹមត្រូវ និង​ភស្តុតាង​គ្រប់គ្រាន់​ក្នុង​ការ​ចាត់​វិធានការ​តាម​ផ្លូវ​ច្បាប់​លើ​គណបក្ស​សង្គ្រោះជាតិ លោក កឹម សុខា និង​ថ្នាក់ដឹកនាំ​ផ្សេងទៀត​នៃ​គណបក្ស​នេះ។ ហេតុផល​នោះ គឺ​ការទប់ស្កាត់​មិន​ឱ្យ​មានការ​ផ្ដួល​រំលំ​រដ្ឋាភិបាល​ស្របច្បាប់ ដោយ​គណបក្ស​សង្គ្រោះជាតិ ដែល​របប​លោក ហ៊ុន សែន ចោទ​ថា មាន​សហរដ្ឋអាមេរិក​ជា​អ្នក​នៅ​ពី​ក្រោយខ្នង។ តំណាង​របប​លោក ហ៊ុន សែន បន្ត​ថា ខ្លួន​សោកស្ដាយ​ដែល​សភា​អឺរ៉ុប​បិទ​ភ្នែក​ធ្វើ​មិន​ដឹង​មិន​លឺ​ចំពោះ​រឿង​នេះ​ទៅវិញ។

កាលពី​ថ្ងៃ​ទី១៣ កញ្ញា កន្លងទៅ សភា​អឺរ៉ុប​បាន​អនុម័ត​សេចក្ដី​សម្រេច​ចុងក្រោយ ទាមទារ​ឲ្យ​អាជ្ញាធរ​កម្ពុជា ទម្លាក់​ចោល​រាល់​បទ​ចោទ​ប្រឆាំង​នឹង​មេដឹកនាំ​គណបក្ស​សង្គ្រោះជាតិ លោក កឹម សុខា និង​អំពាវនាវ​ឲ្យ​មានការ​ដោះលែង​រូបលោក​ឲ្យ​មាន​សេរីភាព​ឡើងវិញ​ជាបន្ទាន់ និង​ដោយ​ឥត​លក្ខខណ្ឌ។ សភា​អឺរ៉ុប​ក៏​អំពាវនាវ​ដូចគ្នា ចំពោះ​ករណី​អ្នកនយោបាយ​ដទៃ​ទៀត រួម​ទាំង​លោក សម រង្ស៊ី ផង​ដែរ។ សភា​អឺរ៉ុប​បាន​ស្នើ​ឲ្យ​នាយកដ្ឋាន​សេវា​កិច្ចការ​បរទេស​របស់​អឺរ៉ុប ( EEAS ) និង​គណៈកម្មការ​អឺរ៉ុប ( European Commission ) រៀបចំ​បញ្ជី​ឈ្មោះ​បុគ្គល ដែល​ទទួលខុសត្រូវ​ក្នុង​ការ​រំលាយ​គណបក្ស​សង្គ្រោះជាតិ និង​អំពើ​រំលោភ​សិទ្ធិ​មនុស្ស​ធ្ងន់ធ្ងរ​នៅ​កម្ពុជា ក្នុង​គោលដៅ​ឈាន​ទៅ​រក​ការ​ដាក់​ចេញ​នូវ​វិធានការណ៍​រឹតត្បិត​ទិដ្ឋាការ និង​បង្កក​ទ្រព្យសម្បត្តិ​របស់​ជន​ទាំងនោះ។

តំណាង​ក្រុមប្រឹក្សា​ឃ្លាំមើល​កម្ពុជា និង​ជា​អតីត​សមាជិក​គណៈកម្មាធិការ​ជាតិ​រៀបចំ​ការបោះឆ្នោត លោក រ៉ុង ឈុន បដិសេធ​ការ​លើក​ឡើង​របស់​តំណាង​កម្ពុជា។ លោក​ថា សភា​អឺរ៉ុប​មិនមែន​ស្ដាប់​តាម​បុគ្គល​ម្នាក់ ឬ​ពីរ​នាក់ រួច​សម្រេចចិត្ត​នោះ​ទេ។ លោក​បន្ត​ថា សភា​អឺរ៉ុប ឬ​សហភាព​អឺរ៉ុប​តែម្ដង បាន​ជួយ​ជ្រោមជ្រែង​ដល់​កម្ពុជា​ក្នុង​ការ​នាំ​ផលិតផល​របស់​ខ្លួន​ទៅ​លក់​នៅ​លើ​ទីផ្សារ​អឺរ៉ុប ហើយ​ដែល​ការ​រីកចម្រើន​នៃ​វិស័យ​នេះ​បាន​ជួយ​លើកស្ទួយ​ជីវភាព​ពលរដ្ឋ​ខ្មែរ​យ៉ាង​ច្រើន។ លោក​ជឿជាក់​ថា សភា​អឺរ៉ុប​គ្មាន​បំណង​អាក្រក់​អ្វី​មក​លើ​កម្ពុជា​ឡើយ ផ្ទុយទៅវិញ​នេះ​ជា​ចេតនា​ល្អ​របស់​សភា​អឺរ៉ុប​ទៅវិញ​ទេ ដែល​ចង់​ឱ្យ​កម្ពុជា​វិល​មក​រក​គន្លង​ប្រជាធិបតេយ្យ​ឡើងវិញ៖ «យើង​គិត​ថា ត្រូវតែ​យក​អ្វី​ដែល​គេ​លើកឡើង​យក​មក​ពិនិត្យ​ពិចារណា មិន​ត្រូវ​ថ្លែង​ការចោទប្រកាន់​សហភាព​អឺរ៉ុប​នោះ​ទេ ព្រោះ​យើង​ដឹង​ហើយ​សហភាព​អឺរ៉ុប គឺជា​ដង្ហើមរស់​របស់​កម្ពុជា។ ប្រសិនបើ​គេ​ដាក់ទណ្ឌកម្ម​អ្វី​ដូចដែល​គេ​ព្រមាន​ម្ដង​ហើយ​ម្តង​ទៀត អ្នក​ដែល​បាត់បង់​ផលប្រយោជន៍​គឺ​ជាតិខ្មែរ និង​ប្រជាពលរដ្ឋ និង​កម្មករ​-​កម្មការិនី ហើយ​អ្នក​ដែល​ទទួល​បាន​ផលប្រយោជន៍ គឺ​មនុស្ស​មួយ​ក្ដាប់​តូច អ្នក​ដែល​មាន​អំណាច ទើប​ទទួល​បាន​ផលប្រយោជន៍​បន្តិចបន្តួច»

លោក​បន្ត​ថា វិបត្តិ​នយោបាយ​នៅ​កម្ពុជា​បច្ចុប្បន្ន កើតឡើង​ដោយសារតែ​ការ​រំលាយ​គណបក្ស​សង្គ្រោះ​ជាតិ ការ​យក​អាសនៈ​សភា និង​ក្រុម​ប្រឹក្សាឃុំ​សង្កាត់​ជាង ៥​ពាន់​អាសនៈ ទៅ​ចែក​គ្នា​កាន់កាប់ ការ​ចាប់ខ្លួន​លោក កឹម សុខា និង​ការ​ហាម​ប្រាម​ថ្នាក់ដឹកនាំ​បក្ស​ប្រឆាំង​មិន​ឱ្យ​ធ្វើ​សកម្មភាព​នយោបាយ​រយៈ​ពេល ៥​ឆ្នាំ ដូច្នេះ​ដំណោះស្រាយ​ត្រូវតែ​ចាប់ផ្ដើម​ពី​ចំណុច​នេះ ដូច​អ្វី​ដែល​សហភាព​អឺរ៉ុប​កំពុង​ទាមទារ​យ៉ាង​ដូច្នេះ​ដែរ។

ទោះជា​យ៉ាងណា មន្ត្រី​នាំ​ពាក្យ​គណបក្ស​កាន់អំណាច​លោក សុខ ឥសាន អះអាង​ថា ការ​ដាក់​កំហិត​របស់​សភា​អឺរ៉ុប​នេះ ជា​រឿង​ដែល​មិន​អាច​ទៅ​រួច​ឡើយ​។ លោក​សរសេរ​ក្នុង​បណ្ដាញ​សង្គម​តេឡេក្រាម (Telegram) នៅ​ថ្ងៃទី១៥ កញ្ញា ថា សំណុំរឿង​លោក កឹម សុខា កំពុង​ស្ថិត​ក្នុង​ដៃ​តុលាការ ដូច្នេះ​ត្រូវ​ទុក​ឱ្យ​តុលាការ​បន្ត​រឿង​ក្តី​ឱ្យ​ចប់​សព្វគ្រប់ ចំណែក សិទ្ធិ​ធ្វើ​នយោបាយ​របស់​ថ្នាក់ដឹកនាំ​គណបក្សប្រឆាំង​ទាំង ១១៨ រូប​នោះ​វិញ ត្រូវ​រង់ចាំ​ទាល់តែ​អនុវត្ត​សាលដីកា​តុលាការ​កំពូល​គ្រប់ ៥ ឆ្នាំ​សិន។ លោក​បន្ត​ថា តំណែង​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ និង​ឃុំ​សង្កាត់​ដែល​បាន​ដកហូត​ពី​គណបក្សប្រឆាំង​នោះ មិន​អាច​ផ្ដល់​ទៅ​ឱ្យ​ពួកគេ​វិញ​បាន​ឡើយ ព្រោះ​តំណែង​ទាំងនោះ​ត្រូវ​បាន​របប​របស់​លោក​បែងចែក​គ្នា​អស់​ទៅ​ហើយ គ្មាន​ច្បាប់​ណា​ទៅ​ទាមទារ​យក​មក​វិញ​នោះ​ទេ។ ចំពោះ​ការ​ផ្តល់​សិទ្ធិ​អំណាច​ឱ្យ​សង្គម​ស៊ីវិល និង​អ្នកសារព័ត៌មាន​វិញ លុះត្រាតែ​ពួកគេ​គោរព​ច្បាប់ ក្រមសីលធម៌ និង​បំពេញ​កាតព្វកិច្ច​ជូន​រដ្ឋ​បាន​គ្រប់គ្រាន់។ អ្នកនាំពាក្យ​រូប​នេះ​បន្ត​ថា របប​របស់​លោក​មិន​ចង់​ប្រើ​អាវុធ​ចំពោះ​ជនល្មើស​ច្បាប់​ដើម្បី​ពង្រឹង​នីតិរដ្ឋ​ឡើយ ដោយ​នៅតែ​បន្ត​អនុវត្ត​វិធានការ​ច្បាប់​ដដែល។

មក​ទល់​នឹង​ពេលនេះ ក្រុម​ប្រទេស​ប្រទេស​ប្រជាធិបតេយ្យ​លោក​ខាងលិច រួមមាន សហរដ្ឋអាមេរិក សហភាព​អឺរ៉ុប និង​អូស្ត្រាលី​ជាដើម នៅតែ​ប្រកាន់​ជំហរ​មិន​ទទួលស្គាល់​ព្រឹត្តិការណ៍​ថ្ងៃទី២៩ កក្កដា ដែល​ពួកគេ​ចាត់ទុកថា ជា​ការ​បោះឆ្នោត​ក្លែងក្លាយ​ដែល​របប​លោក ហ៊ុន សែន​បាន​រៀបចំ​ធ្វើឡើង កាល​ពី​ពេល​កន្លងទៅ​នោះ​ឡើយ។ លើស​ពី​នេះ ក្រុម​ប្រទេស​ទាំងនេះ ក៏បាន​បញ្ចេញ​កាយវិការ​មិន​ទទួលស្គាល់​របប​ថ្មី​ដែល លោក ហ៊ុន សែន ទើបនឹង​បង្កើត​ឡើង​ដែរ គឺ​តាមរយៈ​ការ​មិន​បញ្ជូន​តំណាង​របស់​ខ្លួន​ឱ្យ​ទៅ​ចូលរួម​ក្នុង​ការ​បើក​សម័យប្រជុំ​ពេញអង្គ​លើកដំបូង​នៃ​សភា​ឯក​បក្ស​អាណត្តិ​ទី ៦ នេះ។ ក្រុម​ប្រទេស​ទាំងនេះ ក៏​កំពុង​បោះជំហាន​ទៅ​រក​ការ​ដាក់​ទណ្ឌកម្ម​លើ​របប​ថ្មី​ឯក​បក្ស​នេះ​ដែរ ហើយ​លក្ខខណ្ឌ​ចាំបាច់​ដែល​ពួកគេ​ស្នើ​ឡើង មុននឹង​សម្រេច​ដាក់ទណ្ឌកម្ម​នោះ គឺ​ការ​ដោះលែង​លោក កឹម សុខា ការ​បើក​ឱ្យ​គណបក្ស​សង្គ្រោះ​ជាតិ​រស់​ឡើងវិញ និង​ផ្ដល់​សិទ្ធិ​ធ្វើ​នយោបាយ​ដល់​ថ្នាក់ដឹកនាំ​គណបក្ស​នេះ​ចំនួន ១១៨​រូប ព្រមទាំង​បញ្ឈប់​ការ​ធ្វើ​ទុក្ខបុកម្នេញ​លើ​អង្គការ​សង្គម​ស៊ីវិល និង​អ្នកសារព័ត៌មាន​ឯករាជ្យ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "របប​ភ្នំពេញ​ថា ការសម្រេច​របស់​សភា​អឺរ៉ុប​ចំពោះ​កម្ពុជា​ជា​រឿង​លម្អៀង និង​មាន​ស្តង់ដារ​ពីរ"

  1. Anonymous says:

    no matter what you say but the truth will still be true no question to ask. it have been long time that they are warning you but you never listening to their request. we knew HUN SEN was always did some thing again the world community. HUN SEN though he can do any thing he wanted to his own nation but the world is not like what HUN SEN though. every nation around the world either communist or democratic the leader itself can not be isolated from world community. we note that some country having war because of the leader itself was a dictator. the people around the world knew what the dictator do to their own nation. as a Cambodian born I request that HUN SEN have to give up his intension to be a dictator. we Cambodian knew dictatorship can not become a democratic nation. HUN SEN should admitted himself of every thing he has done wrong to his own nation and the world community. I knew international community they are not care about HUN SEN but all they care was innocent Cambodian . HUN SEN has to choose one between two major problem>>peace or war<<I'm glad that EU put some condition to Cambodian's leader if not HUN SEN can walk on air and doing every wear to this poor nation. if HUN SEN choose war it will come if EU and the US put economic sanction to Cambodia. sorry HUN SEN you are driving yourself to the end road indeed. GOD bless Cambodia

  2. Anonymous says:

    You are so funny mr dictator’ you teach the world about two standard haha’ Your court never gave justice for opposition party or poor people but for the rich and your party or relative al way win in the court even yours committed crime or do something wrong ‘and you dissolve opposition party and jail mr so kha without any thing wrong you said the law is right and echoed by your communist boss countries ‘ now you accused western countries have two standard ‘haha what a problem with your head?? mr Veitcong mafia dictator’ you only want power and never feel a sham in the world and in U N ‘ because every countries in the world change their leaders’but you still coming up the shit ‘ same face ‘ same ugly politic