ដោយ វ៉ា សំណព្វ
21/09/2018
RFI
លោក សម រង្ស៊ី ដែលជាស្ថាបនិកចលនាសង្គ្រោះជាតិ
@សហការី
លោក សម រង្ស៊ី អតីតប្រធានអតីតគណបក្សសង្គ្រោះជាតិ នៅថ្ងៃទី ២០ កញ្ញា ម្សិលមិញនេះ បានចេញលិខិតចំហមួយ ដោយបានចោទប្រកាន់លោកនាយករដ្ឋមន្ត្រី ហ៊ុន សែន ថា កំពុងព្យាយាមបំបែកលោក កឹម សុខា ចេញពីលោក។ មិនតែប៉ុណ្ណោះ លោក សម រង្ស៊ី បានលើកឡើងថា លោក កឹម សុខា កំពុងប្រឈមគ្រោះថ្នាក់ដល់អាយុជីវិត។ ប៉ុន្តែអ្នកនាំពាក្យរាជរដ្ឋាភិបាលកម្ពុជា បានច្រានចោល និងបានបន្តការពារខ្លួនថា ការផ្ទេរការឃុំខ្លួនលោក កឹម សុខា ពីពន្ធនាគារត្រពាំងផ្លុង មកនៅក្នុងផ្ទះ គឺជារឿងមនុស្សធម៌។
លិខិតចំហរបស់លោក សម រង្ស៊ី អតីតប្រធានអតីតគណបក្សសង្គ្រោះជាតិ បានធ្វើឡើងកាលពីថ្ងៃទី ២០ កញ្ញា បន្ទាប់ពីលោកនាយករដ្ឋមន្ត្រី ហ៊ុន សែន អះអាងថា ការផ្ទេរការឃុំខ្លួនលោក កឹម សុខា ពីពន្ធនាគារត្រពាំងផ្លុងមកនៅក្នុងផ្ទះ គឺជារឿងមនុស្សធម៌សុទ្ធសាធ។ សម្រាប់លោក សម រង្ស៊ី ការបន្តឃុំខ្លួន លោក កឹម សុខា នៅក្នុងផ្ទះ ពីសំណាក់អាជ្ញាធរដ្ឋាភិបាលកម្ពុជានេះ គឺជាផ្នែកមួយនៃផែនការរបស់លោកនាយករដ្ឋមន្ត្រី ហ៊ុន សែន ក្នុងការប៉ុនប៉ងបំបែកសម្ព័ន្ធភាពរវាងលោក កឹម សុខា និងលោក សម រង្ស៊ី ចាប់តាំងពីឆ្នាំ ២០១៣ មកម្ល៉េះ។ ប៉ុន្តែលោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានច្រានចោលការចោទប្រកាន់នេះ និងបានថ្លែងការពារសេចក្តីសម្រេចរបស់តុលាការក្រុងភ្នំពេញ ពីការឃុំខ្លួនលោក កឹម សុខា នៅក្នុងផ្ទះនេះថា គឺជារឿងមនុស្សធម៌ប៉ុណ្ណោះ។
តាមរយៈលិខិតចំហដដែល លោក សម រង្ស៊ី បានបន្តចោទប្រកាន់ប្រមុខរដ្ឋាភិបាលកម្ពុជា លោក ហ៊ុន សែន ថា បានយកលោក កឹម សុខា ធ្វើជាចំណាប់ខ្មាំង តាមរយៈការបន្តឃុំខ្លួនលោក កឹម សុខា នៅក្នុងផ្ទះ ក្រោមបទចោទប្រកាន់ពីបទ «ក្បត់ជាតិ»។ លោក សម រង្ស៊ី ថែមទាំងបានសង្កត់ធ្ងន់ទៀតថា លោក កឹម សុខា កំពុងប្រឈមនឹងគ្រោះថ្នាក់ដល់អាយុជីវិត។
យ៉ាងណាក៏ដោយ អ្នកនាំពាក្យរាជរដ្ឋាភិបាលកម្ពុជាបានច្រានចោលចោទប្រកាន់របស់លោក សម រង្ស៊ី ទាំងក្នុងករណីសុវត្ថិភាពរបស់លោក កឹម សុខា និងករណីសម្ព័ន្ធភាពនៃមេដឹកនាំអតីតបក្សប្រឆាំងទាំងពីរ។ បើតាមលោក ផៃ ស៊ីផាន លោកនាយករដ្ឋមន្ត្រី ហ៊ុន សែន មិនបានព្យាយាមបំបែកលោក កឹម សុខា ចេញពីលោក សម រង្ស៊ី នោះឡើយ។
លោក កឹម សុខា ប្រធានអតីតគណបក្សសង្គ្រោះជាតិ ត្រូវបានអាជ្ញាធរកម្ពុជាចាប់ខ្លួន កាលពីយប់រំលងអាធ្រាត្រថ្ងៃទី ៣ កញ្ញា ឆ្នាំ ២០១៧ ក្រោមការចោទប្រកាន់ពីបទក្បត់ជាតិ ដោយឃុបឃិតជាមួយជនបរទេស ដើម្បីផ្តួលរំលំរដ្ឋាភិបាលកម្ពុជា។ បន្ទាប់ពីបានជាប់ឃុំនៅក្នុងពន្ធនាគារត្រពាំងផ្លុងអស់រយៈពេលជាង១ឆ្នាំរួចមក លោក កឹម សុខា ត្រូវបានអនុញ្ញាតឲ្យត្រឡប់មកគេហដ្ឋានរបស់លោកវិញ កាលពីថ្ងៃទី ១០ កញ្ញា ដោយដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ។
លោក សម រង្ស៊ី ដែលកំពុងរស់នៅដោយនិរទេសខ្លួននៅប្រទេសបារាំង បានអំពាវនាវឲ្យអាជ្ញាធរកម្ពុជា ដោះលែងលោក កឹម សុខា ជាបន្ទាន់ ខណៈដែលការស៊ើបអង្កេតលើករណីរបស់លោក កឹម សុខា នៅមិនទាន់រកឃើញអ្វីនៅឡើយ៕