នេះជាការត្អួញត្អែររបស់អ្នកស្រី ប៊ី សោភា ភរិយាសកម្មជនសិទ្ធិមនុស្សម្នាក់ដែលធ្លាប់មានកេរ្តិ៍ឈ្មោះល្បីក្នុងការការពារសិទ្ធិមនុស្សលោក ចាន់ សាវ៉េត ដែលបានទទួលមរណភាពកាលពី៤ឆ្នាំមុន។
ប្រជាជនកម្ពុជាមិនច្រើនទេនាពេលបច្ចុប្បន្នដែលនៅចងចាំឈ្មោះ និងការលះបង់របស់អ្នកការពារសិទ្ធិមនុស្សដ៏ល្បីគឺលោក ចាន់ សាវ៉េត។ ពេញមួយជីវិតរបស់លោក សាវ៉េត លោកបានធ្វើការលះបង់ជាច្រើនដើម្បីបុព្វហេតុសិទ្ធិមនុស្សកម្ពុជា រហូតលោកត្រូវបានអ្នកធ្វើការផ្នែកសិទ្ធិមនុស្សដាក់នាមឲ្យលោកជាវីរៈជនសិទ្ធិមនុស្សទៀតផង។
ថ្វីត្បិតលោក ចាន់ សាវ៉េត លាកចាកលោកពិតមែនក្តីតែការលះបង់របស់លោកនៅតែធ្វើឲ្យក្រុមគ្រួសារលោក មានមោទនភាព ដោយចង់ឲ្យប្រជាជនខ្មែរដែលជាអ្នកស្រលាញ់សិទ្ធិមនុស្សនឹកឃើញលោកផង ដោយមិនចង់ឃើញការលះបង់របស់លោកត្រូវបានបាត់បង់តាមពេលវេលាដែលចេះកន្លងហួសនោះទេ។
លោក សាវ៉េត បានទទួលមរណភាព ដោយជំងឺលើសឈាម ចំថ្ងៃសិទ្ធិមនុស្សពិភពលោក ១០ ធ្នូ ២០១៤ដែលជាថ្ងៃចុងក្រោយដែលលោកបានចេញមុខការពារសិទ្ធិមនុស្សចុងក្រោយគេផងដែរតាមរយៈយុទ្ធនាការសិទ្ធិមនុស្ស១០ធ្នូ។ មរណភាពរបស់លោក សាវ៉េត បានបន្សល់ទុកកូនប្រុស២នាក់ និងស្រីម្នាក់ឲ្យប្រពន្ធរបស់លោកទទួលបន្ទុកមើលថែបន្ត។
ស្ថិតក្នុងផ្ទះជាន់ទី២ ក្នុងសង្កាត់បឹងកេងកង៣ ម្ដុំសារមន្ទីរប្រល័យពូជសាសន៍ទួលស្លែង ខណ្ឌចំការមន រាជធានីភ្នំពេញ សំឡេងម៉ាស៊ីនដេរបានលាន់រំពងផ្ទះដែលមានតាំងរូបថតលោកចាន់ សាវ៉េតផងនោះ ដោយកំពុងដេរភ្ជាប់កំណាត់សំពត់ភ្ជាប់គ្នា ក្រោមការផ្ចិតផ្ចង់របស់ស្ត្រីម្នាក់ដែលជាភរិយារបស់លោក ចាន់ សាវ៉េត គឺអ្នកស្រីប៊ី សោភា បានដកឃ្លាពីម៉ាស៊ីនដេររបស់អ្នកស្រីមកផ្តល់បទសម្ភាសន៍ជាមួយអ្នកសារព័ត៌មាន VOD ថាមកដល់ពេលនេះមានរយៈពេលជិត៤ឆ្នាំដែលអ្នកស្រីបានឃ្លាតពីប្តីរបស់អ្នកស្រី។
អ្នកស្រីបន្ថែមថា ការរស់នៅបន្ទាប់ពីបាត់បង់ប្តីដែលជាជំហរគ្រួសារបានធ្វើឲ្យអ្នកស្រីជួបការលំបាកជាខ្លាំង ដែលអ្នកស្រីត្រូវដេរជាមួយម្តាយមីងរបស់អ្នកស្រី ហើយនឹងត្រូវទៅធ្វើការខាងក្រៅជាអ្នកសំអាតដើម្បីរកប្រាក់មកជួយផ្គត់ផ្គង់កូន៣នាក់នៅក្នុងបន្ទុកគ្រួសារ។
ស្ថិតក្នុងវ័យ៥៣ឆ្នាំម្ដាយមីងបង្កើតរបស់អ្នកស្រី ប៊ី សោភា គឺអ្នកស្រី ហ៊ឺ លាងហ៊ន មានប្រសាសន៍ថា បន្ទាប់ពីបាត់បង់លោក សាវ៉េត មកដោយសារក្តីអាណិត ស្រលាញ់ក្រុមគ្រួសារលោក ដូចកូនចៅបង្កើតទើបអ្នកស្រីមិនចង់ឃើញពួកគេលំបាកនោះទេ។ អ្នកស្រីបន្ថែមថាបច្ចុប្បន្ន ខណៈដែលបន្ទុកចំណាយកាន់តែច្រើននោះវាធ្វើឲ្យអ្នកទាំងពីរមានការលំបាកផងដែរ។
បើទោះជាមានការលំបាកក្នុងការផ្គត់ផ្គង់ក្រុមគ្រួសារក៏អ្នកស្រី សោភា បានបន្តឲ្យកូនទាំង៣របស់អ្នកស្រីបន្តការសិក្សា ខណៈអ្នកស្រីក៏ចង់ឲ្យកូនអ្នកស្រីធ្វើការងារដូចឪពុករបស់ពួកគេផងដែរ។
កូនស្រីពៅរបស់លោក ចាន់ សាវ៉េត ដែលកំពុងសិក្សានៅថ្នាក់ទី៦ យុវតី ចាន់ សុលិកា ថាគាត់នៅតែមានការនឹករលឹកដល់លោកឪពុករបស់ខ្លួន ព្រោះនៅផ្ទះនេះគឺមានអនុស្សាវរីយ៍ដែលធ្លាប់មាននៅជាមួយគ្នាឪពុករបស់គាត់។
លោក ចាន់ សាវ៉េត កើតនៅឆ្នាំ១៩៦៣ ក្នុងភូមិកណ្ដាល ឃុំព្រៃរ៉ៃ ស្រុកល្វាឯម ខេត្តកណ្ដាល លោកបានចូលបំរើការងារក្នុងសមាគមអាដហុកក្នុងឆ្នាំ១៩៩៥ លោកបានរៀបអាពាហ៍ពិពាហ៍ជាមួយកញ្ញាប៊ី សោភា នៅក្នុងឆ្នាំ១៩៩៨ ចំណងអាពាហ៍ពិពាហ៍នេះ ទទួលបានកូនចំនួន៣នាក់ ក្នុងបន្ទុក កូនប្រុសទី១ឈ្មោះ ចាន់ សុវិសាល អាយុ២០ឆ្នាំ កូនប្រុសទី២ឈ្មោះ ចាន់ សុវុទ្ធី អាយុ១៧ឆ្នាំ និងកូនស្រីទី៣ឈ្មោះ ចាន់ សុលិកា អាយុ១៣ឆ្នាំ។ ពួកគេទាំងបីនាក់សុទ្ធតែកំពុងសិក្សា។ លោក ចាន់ សាវ៉េត បានលះបង់ពេលវេលា បម្រើប្រជាពលរដ្ឋកម្ពុជា ស្ទើរគ្រប់ករណីរំលោភសិទ្ធិមនុស្ស និងរឿងអយុត្តិធម៌សង្គម នៅក្នុងប្រទេសកម្ពុជា ចាប់ពីលោកចូលបម្រើក្នុងវិស័យសិទ្ធិមនុស្សនេះ រហូតដល់ថ្ងៃលោកលាចាកលោកនៅថ្ងៃសិទ្ធិមនុស្ស ១០ ធ្នូ ឆ្នាំ២០១៤ ក្នុងអាយុ៥១ឆ្នាំ៕