លោក ហ៊ុន សែន ប្រកាស​ថា មិនខ្លាចការគំរាមដាក់ទណ្ឌកម្ម​ពី​អន្តរជាតិ

| |
https://vodhotnews.com

លោក ហ៊ុន សែន ជួបជាមួយកម្មករ កម្មការិនីសរុបចំនួន ១៤,៧៩៩នាក់ មកពីរោងចក្រ សហគ្រាសចំនួន៦ ក្នុងខណ្ឌពោធិ៍សែនជ័យ (រូបភាព៖ FN)


ប្រមុខរដ្ឋាភិបាលកម្ពុជា លោក ហ៊ុន សែន អះអាងថា កម្ពុជាមិនឱនក្បាលចំពោះបរទេសណាមួយ និងមិន​យកអធិបតេយ្យភាពរបស់កម្ពុជា ទៅប្ដូរយកជំនួយឡើយ ដែលការថ្លែងបែបនេះ គឺបន្ទាប់ពីសហភាពអឺរ៉ុបបានជូនដំណឹងពីការចាប់ផ្ដើមដំណើរការដកប្រព័ន្ធអនុគ្រោះពន្ធពីកម្ពុជា។

ក្នុងពិធីជួបសំណេះសំណាលជាមួយក្រុមនិស្សិតខ្មែរនៅទីក្រុងតូក្យូ ប្រទេសជប៉ុននាថ្ងៃនេះ លោកនាយករដ្ឋមន្ដ្រី ហ៊ុន សែន មានប្រសាសន៍ថា លោកមិនចុះញ៉មនឹងការព្រមានដាក់ទណ្ឌកម្មពាណិជ្ជកម្មណាមួយឡើយ ដោយលោកថា កម្ពុជាត្រូវតែរឹងមាំដោយខ្លួនឯង ក្នុងនាមជាប្រទេសមានអធិបតេយ្យភាព និងមិនត្រូវពឹងផ្អែកលើជំនួយពីបរទេសណាឡើយ។

លោក ហ៊ុន សែន ថ្លែងថា ប្រទេសមានអំណាចតែងយកបញ្ហាសិទ្ធិមនុស្ស និងលទ្ធិប្រជាធិបតេយ្យធ្វើជាលេសដើម្បីជ្រៀតជ្រែកផ្ទៃក្នុងប្រទេសណាមួយ ប៉ុន្ដែ លោកបន្ដថា លោកមិនខ្លាចនឹងកម្ចាត់ក្រុមប្រឆាំងដែលចង់បំផ្លាញសន្ដិភាព និងបង្កើតសង្គ្រាមនៅក្នុងប្រទេសកម្ពុជាឡើងវិញនោះទេ។

លោក ហ៊ុន សែន ថ្លែងថា៖ «ខ្ញុំគ្រាន់តែកម្ចាត់អ្នកឯងប៉ុន្មាននាក់ ដើម្បីការពារប្រជាជនរាប់លាននាក់ រឿងអីខ្ញុំធ្វើមិនបាន។ ខ្ញុំនិយាយហើយ ​និយាយទៀត កុំយកអធិបតេយ្យជាតិ ទៅដូរយកជំនួយ កុំយកសន្ដិភាពរបស់ប្រទេស ទៅដូរយកជំនួយ។ ឥឡូវចង់នរណាចាត់ការកម្ពុជាតាមវិធីណា ចាត់ចុះ តែកម្ពុជាត្រូវរឹងមាំចំពោះគោលការណ៍ការពារឯករាជ្យ អធិបតេយ្យជាតិរបស់ខ្លួន [] ឥឡូវចង់ធ្វើអី ធ្វើទៅ ចង់ឲ្យបង់ពន្ធ បង់ពន្ធ។ ឱនក្បាលម្ដង ត្រូវជំពាក់គុណម្ដង ឱនពីរដង ជំពាក់ពីរដង ឱន​នឹងជំពាក់មួយជីវិត»។

ការថ្លែងបែបនេះរបស់លោក ហ៊ុន សែន គឺបន្ទាប់ពីគណៈកម្មការ​អឺរ៉ុប​បានជូនដំណឹងដល់កម្ពុជាកាលពីថ្ងៃសុក្រទី៥ ខែតុលាថា ខ្លួនចាប់ផ្ដើមដំណើរការការដកប្រព័ន្ធអនុគ្រោះ EBA ដោយចោទថា រដ្ឋាភិបាលកម្ពុជាបានប្រព្រឹត្តអំពើរំលោភសិទ្ធិមនុស្សធ្ងន់ធ្ងរ។

សហភាពអឺរ៉ុបលើកឡើងថា កម្ពុជាមិនបានធ្វើឲ្យប្រសើរឡើងនូវបញ្ហាសិទ្ធិមនុស្សរបស់ខ្លួនឡើយ​ បើទោះបីជាគណៈកម្មការស្វែងរកការពិតរបស់អឺរ៉ុបបានស្រាវជ្រាវ និងផ្តល់អនុសាសន៍ឲ្យមានការកែប្រែក៏ដោយ៕


រក្សាសិទ្វិគ្រប់យ៉ាងដោយ CCIM/VOD

គ្មានផ្នែកណាមួយនៃអត្ថបទនេះ អាចត្រូវបានផលិតឡើងវិញក្នុងការបោះពុម្ពផ្សាយ ការសរសេរឡើងវិញ ឬ ការចែកចាយឡើងវិញដោយគ្មានការអនុញ្ញាតជាលាយលក្ខណ៍អក្សរឡើយ។

What Next?

Recent Articles

2 Responses to "លោក ហ៊ុន សែន ប្រកាស​ថា មិនខ្លាចការគំរាមដាក់ទណ្ឌកម្ម​ពី​អន្តរជាតិ"

  1. Anonymous says:

    Yep’ you never scare anything because you are the killer ‘

  2. Anonymous says:

    100% the attitude of the killer ,,,,,, shame to be Cambodian because of this evil man