លោក​ ឈាង វុន ​ដេញ​លោកស្រី​ មូរ សុខហួរ ចេញពី​សភា​អឺរ៉ុប

លោក ឈាង វុន ​និង លោកស្រី​ មូរ សុខហួរ។ ហុង មិនា




ភ្នំពេញប៉ុស្តិ៍

ភ្នំពេញៈ តំណាងរាស្ត្រ​គណបក្ស​ប្រជាជន​កម្ពុជា​លោក ឈាង វុន ​កាលពី​ម្សិលមិញ​បាន​ការពារ​ «​ភាព​ស្របច្បាប់​» ​របស់​កម្ពុជា បន្ទាប់ពី​លោក​បញ្ចប់​បេសកកម្ម​ជាមួយ​គណៈប្រតិភូ​សភា​កម្ពុជា​ទៅ​ចូលរួម​កិច្ចប្រជុំសភា​អាស៊ី អឺរ៉ុប​នៅ​ប្រទេស​បែលហ្ស៊ិក​ទី​ដែល​លោក​បាន ​«​បណ្ដេញ​» ​លោកស្រី​ មូរ សុខហួរ ​ដែល​មក​សម្តែង​ការគួរសម​ចំពោះ​រូបលោក​ជា​អ្វី​ដែល​អតីត​តំណាងរាស្ត្រ​បក្ស​ប្រឆាំង​រូប​នេះ​បាន​សម្តែង​ «​ការសោកស្ដាយ​» និង​ចោទ​ថា ជា​ចរិត​របស់​ «​មនុស្ស​មិន​ស្រប​ច្បាប់​»​។

គណៈប្រតិភូ​កម្ពុជា​ដែល​មាន​សមាជិក​ចំនួន​ ៥ ​រូប​ពី​គណបក្ស​ប្រជាជន​កម្ពុជា​បាន​ទៅ​ចូលរួម​កិច្ចប្រជុំ​ភាព​ជា​ដៃគូ​នៃ​សភា​អាស៊ី-អឺរ៉ុប​លើក​ទី ១០ ដែល​ធ្វើ​ឡើង​នៅក្នុង​ទីក្រុង​ប្រ៊ុចសែល​ប្រទេស​បែលហ្ស៊ិក​ចាប់ពី​ថ្ងៃទី ២៧ និង ២៨ ខែ​កញ្ញា​ដែល​ផ្តោត​លើ​បញ្ហា​ប្រឈម​ផ្នែក​បរិស្ថាន សម្រាប់​តំបន់​អាស៊ី និង​អឺរ៉ុប​។

ភាពចម្រូង​ចម្រាស​បាន​កើតឡើង​នៅពេល​ដែល​អនុប្រធាន​នៃ​អតីត​គណបក្ស​សង្គ្រោះ​ជាតិ​គឺ​លោកស្រី​ មូរ សុខហួរ បាន​ទៅ​សម្តែង​ការគួរសម​ជាមួយ​លោក​ ឈាង វុន​។

លោកស្រី​ មូរ សុខហួរ បាន​ថ្លែង​តាម​វីដេអូ live នៅលើ​ទំព័រ​ហ្វេសប៊ុក​របស់​លោកស្រី​កាលពី​ម្សិលមិញ​ពី​ក្នុង​សាលប្រជុំ​សភា​អឺរ៉ុប​ថា​លោកស្រី​មាន​ «​ការសោកស្ដាយ​»​ បន្ទាប់ពី​គណៈប្រភិភូ​កម្ពុជា​ដែល​ក្នុង​នោះ​មាន​លោក ឈាង វុន បាន​ប្រើ​ភាសា និង​ឥរិយាបថ​មិន​សមរម្យ នៅពេល​លោកស្រី​ព្យាយាម​ទៅ​សម្តែង​ការគួរសម​ក្នុង​នាម​ជា​ខ្មែរ​ដូចគ្នា​ដែល​ជួបគ្នា​នៅឯ​ក្រៅ​ប្រទេស​។

លោកស្រី​ថ្លែង​ថា​៖ «​ខ្ញុំ​បាន​ទៅ​ជម្រាប​សួរ​គណៈប្រតិភូ​នៃ​ប្រទេស​កម្ពុជា ខ្ញុំ​ជម្រាប​សួរ​ឯកឧត្តម ឈាង វុន ក្នុង​នាម​ជា​ខ្មែរ​ដូចគ្នា​។ ខ្ញុំ​មាន​ការ​សោកស្ដាយ ដែល​ឯកឧត្តម​ ឈាង វុន មិន​សំពះ​ខ្ញុំ​វិញ​ផង ហើយ​សួរ​ខ្ញុំ​ថា តើ​ខ្ញុំ​មាន​សិទ្ធិ​អ្វី​មក​ក្នុង​សភា​អឺរ៉ុប?»​។

លោកស្រី​ថា​លោកស្រី​បាន​ទៅ​ក្នុង​នាម​ជា​អ្នក​តំណាង​ឲ្យ​ពលរដ្ឋ​ខ្មែរ​កន្លះ​ប្រទេស​ដែល​បាន​បោះឆ្នោត​ឲ្យ​អតីត​គណបក្ស​ប្រឆាំង ប៉ុន្តែ​ត្រូវ​បាន​លោក​ ឈាង វុន បណ្ដាញ​ចេញ​។

លោកស្រី​បន្ថែម​ថា​៖ «​គាត់​ថា “​ខ្ញុំ​ (​ឈាង វុន​) អត់​ទទួល​ស្គាល់​ មូរ សុខហួរ ​ទេ ដើរ​ចេញ​ទៅ​”​។ ខ្ញុំ​មាន​ការ​សោកស្ដាយ​ណាស់ ខ្ញុំ​មាន​កិត្តិយស​ណាស់ ដែល​ខ្ញុំ​មក​នៅ​ក្នុង​សភា​អឺរ៉ុប​នេះ មក​បង្ហាញ មក​ជម្រាប​វត្តមាន​យើង គឺជា​វត្តមាន​នៃ​ប្រជាពលរដ្ឋ​ពាក់កណ្ដាល​នគរ​»​។

លោកស្រី​ថា លោកស្រី​បាន​យក​បញ្ហា​លទ្ធិប្រជាធិបតេយ្យ សិទ្ធិ​សេរីភាព និង​សិទ្ធិ​បញ្ចេញមតិ​យក​ទៅ​ជជែក​។ ​«​ស្ដាយៗ ទេ​បងប្អូន​ដែល​មាន​តំណាង​យើង​នៅ​សភា​សហគមន៍​អឺរ៉ុប ដែល​ប្រើ​ភាសា​ដូច​ឯកឧត្តម ឈាង វុន ខ្ញុំ​មាន​ការសោកស្ដាយ​ណាស់​។ ដូច្នេះ​ការមិន​ស្រប​ច្បាប់​មនុស្ស​មិន​ស្រប​ច្បាប់​ចរិត​របៀប​នេះ ដែល​យើង​ខ្ញុំ​ជា​តំណាង​ប្រជាពលរដ្ឋ​ខ្មែរ​នៅ​ក្នុង​ប្រទេស​ប្រជាធិបតេយ្យ​នរណា​ក៏​មាន​សិទ្ធិ​ចូល​ក្នុង​សភា​ដែរ​»​។

អតីត​តំណាងរាស្ត្រ​គណបក្ស​ប្រឆាំង​រូប​នេះ​សង្កត់​ធ្ងន់​ថា​៖ «​ខ្ញុំ​មក​ជា​តំណាង​បងប្អូន​ប្រជាពលរដ្ឋ​ពាក់កណ្ដាល​នគរ​លើក​រឿង​ប្រជាធិបតេយ្យ សិទ្ធិសេរីភាព​សិទ្ធិ​បញ្ចេញ​មតិ​ដើម្បី​ប្រទេស​ជាតិ​។ សហគមន៍​អឺរ៉ុប​គឺជា​សហគមន៍​ប្រជាធិបតេយ្យ យុត្តិធម៌​នឹង​ឈ្នះ​»​។

កាលពី​ថ្ងៃ​ពុធ ​រដ្ឋសភា​កម្ពុជា​តាមរយៈ​ទំព័រ​ហ្វេសប៊ុក​របស់​ខ្លួន​បាន​ចេញ​វីដេអូ​ឃ្លីប​មួយ​ទាក់ទង​ដំណើរ​ទស្សនកិច្ច​របស់​គណៈប្រតិភូ​កម្ពុជា​ដោយ​ក្នុង​នោះ​លោក​ វុន ​បាន​ថ្លែង​នៅក្នុង​វីដេអូ​ថា គណៈប្រតិភូ​កម្ពុជា​បាន​ទទួល​ស្វាគមន៍​ពី​សភា​នៃ​ប្រទេស​អឺរ៉ុប​ដែល​ចូល​តាម​ច្រក​ទ្វារធំ​ហើយ​លោក​ចាត់ទុក​ដំណើរ​ទស្សនកិច្ច​នេះ​ថា​ជា​ «​ជោគជ័យ​របស់​សភា​កម្ពុជា​» និង​ជា​ជោគជ័យ​របស់​ពលរដ្ឋ​កម្ពុជា​ទាំងអស់​ដែរ​។

លោក​ថ្លែង​ក្នុង​វីដេអូ​ថា​៖ «​ដំណើរ​ដែល​យើង​មក​ប្រជុំ​នេះ​ក្នុង​រយៈពេល​ ២ ​ថ្ងៃ​សូម​បញ្ជាក់​ជាថ្មី​ម្ដង​ទៀត​ថា​ប្រទេស​នៅ​លើ​សកលលោក​តាមរយៈ​សភា​អាស៊ី-អឺរ៉ុប​នេះ​បញ្ជាក់​ថា​កម្ពុជា​យើង​កំពុង​តែ​ដើរ​នៅលើ​ផ្លូវ​ត្រូវ​។ យើង​មាន​មោទនភាព​ដែល​អង្គការ​សហប្រជាជាតិ​បាន​វាយតម្លៃ​លើ​ប្រទេស ៣៨ ដែល​រំលោភ​សិទ្ធិមនុស្ស​បញ្ជាក់​ថា​ក្នុង​នោះ​គ្មាន​ព្រះរាជាណាចក្រ​កម្ពុជា​ទេ​»​។

«​នៅ​ទី​នេះ​គេ​ស្វាគមន៍​យើង​ខ្លាំង​ណាស់ ដូច្នេះ​ហើយ​អ្នក​ដែល​ចង់​បោកប្រាស់​ប្រជាពលរដ្ឋ​របស់​យើង​ថា គេ​នៅ​ក្រៅ​ប្រទេស មិន​ស្វាគមន៍​កម្ពុជា​ទេ​នោះ​គឺជា​ការបោកប្រាស់​ធំ​ណាស់ ការបោកប្រាស់​ដែល​មិន​អាច​អត់ឱន​ឲ្យ​បាន​»​។

នៅពេល​ទាក់ទង​បន្ថែម​កាលពី​ម្សិលមិញ​លោក ឈាង វុន ទទួល​ស្គាល់​ថា លោក​ពិត​ជា​បាន​បណ្ដេញ​លោកស្រី សុខហួរ ចេញ​មែន​ដោយសារ​តែ​ប្រតិភូ​របស់​លោក​គឺជា​តំណាង​ស្របច្បាប់​តែ​ ១ ​គត់​របស់​កម្ពុជា​ដែល​ត្រូវ​បាន​គេ​អញ្ជើញ​ឲ្យ​ចូលរួម​ក្នុង​កិច្ចប្រជុំ​នេះ​។ «​តាមពិត​គាត់​ចង់​មក​បន្លំ​ខ្លួន​អង្គុយ​អាសនៈ​កម្ពុជា គាត់​ឲ្យ​គេ​ជូន​មក​ដល់​ខ្ញុំ​សួរ​គាត់​ថា គាត់​មក​ធ្វើ​អី​? គាត់​បែរ​ជា​ថា គាត់​មក​សម្តែង​ការគួរសម​ជាមួយ​ខ្ញុំ ខ្ញុំ​ថា ខ្ញុំ​អត់​ទទួល​ទេ​។ តំណាង​សភា​កម្ពុជា​គឺ​មាន​តែ​ ១ ​ទេ​»​។

លោក​ចោទ​ថា​ក្រុម​របស់​លោកស្រី មូរ សុខហួរ មិន​មាន​សិទ្ធិ​អ្វី​ទេ ដោយ​លោក​ចោទ​ថា​គ្រាន់តែ​ជា​ពួក​ «​ឧទ្ទាម​» ​ប៉ុណ្ណោះ​។ ​លោក​ចោទ​សួរ​ថា​៖ «​តើ​គាត់​ជា​តំណាងរាស្ត្រ​? គាត់​ជា​ឧទ្ទាម​! គាត់​មាន​សិទ្ធិ​ពី​ណា​មក​? ​គាត់​គ្មាន​សិទ្ធិ​អី​ទេ​ហើយ​គាត់​ធ្វើ​របៀប​ឡប់ៗ ឆ្កួតៗ​អ៊ីចឹង​។ យើង​មិន​អាច​ទទួល​ពួកនេះ​បាន​ទេ​»​។

លោក​សង្កត់​ធ្ងន់​ថា​៖ «​ខ្ញុំ​ដេញ​គាត់​ចេញ​ពី​សាល​គណៈសភា​កម្ពុជា​។ មិន​អាច​ឲ្យ​គាត់​ឈរ​នៅ​រ៉ែរ៉ រញ៉េរញ៉ៃ​កន្លែង​ហ្នឹង​។ មិន​ត្រឹមតែ​ប៉ុណ្ណឹង​ទេ គាត់​មក​នេះ​របៀប​ប្រុង​យក​អ្នក​ចាត់ចែង​ក្នុង​នេះ​មក​ដាក់​ទម្ងន់​លើ​ពួក​ខ្ញុំ​។ ខ្ញុំ​ដេញ​ទាំង​អាអ្នក​ហ្នឹង​ទៀត​…​នៅពេល​គាត់​ឮ​សូរ​ខ្ញុំ​មិន​ទទួល មូរ សុខហួរ គេ​ដើរ​ចេញ​លឿន​តែ​ម្ដង​»​។

លោក​ ឈាង វុន អះអាង​ថា​នៅពេល​ដែល​សភា​អឺរ៉ុប​អញ្ជើញ​គណៈប្រតិភូ​កម្ពុជា​ទៅ​ចូលរួម​មាន​ន័យ​ថា​ពួកគេ​ទទួល​ស្គាល់​សភា​កម្ពុជា ហើយ​លោក​មិន​អាច​ឲ្យ​ក្រុម​ប្រឆាំង​មក​រំខាន​គណៈប្រតិភូ​កម្ពុជា​ដែរ​។

លោក​ ឯម សុវណ្ណារ៉ា អ្នកវិភាគ​នយោបាយ​យល់​ថា​ជាទូទៅ​ភាគី​មួយ អាច​មាន​សិទ្ធិ​ធ្វើ​ពហិការ​មិន​ចូលរួម​កិច្ចប្រជុំ​មួយ​បាន ប៉ុន្តែ​គ្មាន​សិទ្ធិ​ក្នុង​ការដេញ​ភ្ញៀវ​ផ្សេង​ទៀត​នោះ​ទេ ទោះបី​ពេញចិត្ត​ ឬ​មិន​ពេញចិត្ត​ក្ដី​។ ​«​និយាយ​សាមញ្ញ អានេះ​យើង​ហែក​ខោអាវ​គ្នា​នៅ​មុខ​ផ្ទះ​គេ គឺ​ឈ្លោះ​គ្នា​នៅ​មុខ​បរទេស​។ បរទេស​គេ​អាច​មើលងាយ​យើង​។ ក៏ប៉ុន្តែ​ករណី​នេះ​អាស្រ័យ​លើ​ប្រទេស​សាមី​ដែល​គេ​រៀបចំ បើ​សិន​នៅ​ក្នុង​ក្របខ័ណ្ឌ​អង្គការ​សហភាព​អឺរ៉ុប​គឺ​គេ​ជា​អ្នកចាត់ចែង​ជា​គោលការណ៍​លោក ​ឈាង វុន ក៏​គ្មាន​សិទ្ធិ​ទៅ​ដេញ​គេ​ដែរ ព្រោះ​គាត់​ (​លោកស្រី​ មូរ សុខហួរ​) ​ក៏​ជា​ភ្ញៀវ​ដែរ​»​។ «​លោក​ (​វុន​) ​អាច​មាន​សិទ្ធិ​បដិសេធ​ក្នុង​ការ​ចូលរួម បើ​សិន​មាន​វត្តមាន​លោកស្រី មូរ សុខហួរ ប៉ុន្តែ​ការប្រើ​យន្តការ​ផ្សេង​គឺ​ខុស​នឹង​គោលការណ៍​នៃ​ច្បាប់​ការទូត​។ យើង​ទៅ​ផ្ទះ​គេ យើង​គ្មាន​សិទ្ធិ​ដេញ​ភ្ញៀវ​ម្នាក់​ទៀត​បាន​ទេ​»​។

តំណាង​ស្ថានទូត​នៃ​គណៈប្រតិភូ​សហភាព​អឺរ៉ុប​មិន​បាន​ឆ្លើយតប​នឹង​សំណើសុំ​ការបញ្ជាក់​ទេ​កាលពី​ម្សិលមិញ​៕


Contact author: បែន សុខហ៊ាន

What Next?

Recent Articles

2 Responses to "លោក​ ឈាង វុន ​ដេញ​លោកស្រី​ មូរ សុខហួរ ចេញពី​សភា​អឺរ៉ុប"

  1. Anonymous says:

    Please don’t be with this kind of illiterate behavior from hun sen group because they were taught from top to bottom to be different from human that has brain and class as human beings. Imagine if Vietnamese or Chinese walk in that meeting, this guy will kneel down and show respect like hun sen did to the dad Vietnam president recently in Vietnam.

  2. Anonymous says:

    no way this animal can’t do that instate he should not showing his ass in EU. the reason why?????? because his leadership is not legitimated government in Cambodia. I tell this guy that your name was stingy even those you use a ton of perfume it will still smell bad. GOD bless Cambodia