ដោយ សេក បណ្ឌិត
2018-10-14
RFA
មន្ត្រីនាំពាក្យនៃក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៨ ខែវិច្ឆិកា ឆ្នាំ២០១៤។ Photo: RFA
ប្រជាពលករខ្មែរនៅប្រទេសកូរ៉េ និងជប៉ុន ដាក់ពាក្យប្ដឹងមន្ត្រីនៃរបបលោក ហ៊ុន សែន ដែលរៀបចំផែនការជួលក្រុមជនពាលឲ្យធ្វើបាបក្រុមប្រឆាំងនៅក្រៅទេស ក្រោមរូបភាពបង្កហិង្សា និងគ្រោះថ្នាក់ចរាចរណ៍។ មន្ត្រីសិទ្ធិមនុស្ស ចាត់ទុកថា បើករណីគំរាមកំហែងនោះជាការពិត គឺផ្ទុយពីច្បាប់ ដែលអាជ្ញាធរគួរតែស៊ើបអង្កេតចាត់ការតាមច្បាប់។
ប្រជាពលករខ្មែរនៅក្រៅប្រទេស បានប្រកាសថ្កោលទោស និងដាក់ពាក្យប្ដឹងប្រឆាំងចំពោះខ្សែអាត់ សំឡេងមួយដែលគេសង្ស័យថា ជាសំឡេងរបស់អ្នកនាំពាក្យក្រសួងការងារលោក ហេង សួរ រៀបចំ ផែនការកម្ចាត់ក្រុមប្រឆាំងនៅក្រៅប្រទេស។
តំណាងពលករនៅកូរ៉េ និងជាសកម្មជនបក្សសង្គ្រោះជាតិ លោក យឹម ស៊ីណន លើកឡើងថា ទោះបី ជាលោក ហេង សួរ បដិសេធមិនទទួលស្គាល់ខ្សែអាត់សំឡេងនោះក្តី ប៉ុន្តែលោកជឿជាក់សំឡេងនោះ គឺជាសំឡេងរបស់លោក ហេង សួរ ពិតប្រាកដ។ លោក ចាត់ទុកខ្សែអាត់សំឡេងនោះថា ជាសារគំរាមកំហែង ដ៏ឃោរឃៅមួយ ដែលធ្វើឲ្យមានការភិតភ័យដល់ប្រជាពលរដ្ឋខ្មែរនៅក្រៅប្រទេសដែលមិនគាំទ្ររបបលោក ហ៊ុន សែន។ លោក យឹម ស៊ីណន បញ្ជាក់ថា លោកបានបកប្រែ និងបញ្ជូនខ្លឹមសារ ព្រមទាំងសំឡេងទាំងនោះទៅកាន់អាជ្ញាធរកូរ៉េរួចហើយ ដើម្បីជួយធានាសុវត្ថិភាព និងដឹងលឺថា ចាប់ពីពេលនេះ នៅពេលអ្នកគាំទ្របក្សប្រឆាំង និងពលករខ្មែរណាម្នាក់ មានបញ្ហាអ្វីកើតឡើងនោះបញ្ជាក់ថា អ្នកបញ្ជាពីក្រោយខ្នងគឺច្បាស់ជាបុគ្គលក្នុងសំឡេងនោះឯង៖ «បើសំឡេងនេះជាសំឡេងលោក ហេង សួរ ពិតនោះ ខ្ញុំមានការសោកស្ដាយខ្លាំងណាស់ ព្រោះអីខ្ញុំជាមនុស្សម្នាក់ ដែលធ្លាប់អោយតម្លៃ ធ្លាប់គោរព ធ្លាប់ជួបគាត់និយាយ ការងារ និងរឿងបុគ្គលដើម្បីប្រទេសជាតិ។ ខ្ញុំហាក់ដូចជាមានការភ្ញាក់ផ្អើលក្រោយពីបានលឺសំឡេង ដ៏សាហាវជាង ប៉ុល ពត នេះ និយាយពីការរៀបចំមនុស្សដើម្បីកៀបសម្លាប់ ឬក៏រៀបចំអោយមានគ្រោះថ្នាក់ចរាចរណ៍ដល់មនុស្ស ឬអ្នកដែលប្រឆាំងខ្លួន គឺខ្ញុំគិតថា វាមិនសមជាសម្តីរបស់អ្នកចេះដឹង ដឹកនាំជាតិ»។
ជាមួយគ្នានេះ តំណាងពលករ និងសកម្មជនបក្សប្រឆាំងនៅប្រទេសជប៉ុន លោក ហៃ វណ្ណា ក៏បាន ប្រកាសដាក់ពាក្យប្ដឹងខ្សែអាត់សំឡេងដែលគេសង្ស័យថា ជាសំឡេងលោក ហេង សួរ នេះដែរ។ ក្នុងបណ្ដឹងនោះ លោក ហៃ វណ្ណា ស្នើសុំឲ្យរដ្ឋាភិបាលជប៉ុន ហាមម្ចាស់សំឡេងនោះ ចូលប្រទេសជប៉ុនតទៅទៀត៖ «ជាប្រជាពលរដ្ឋខ្មែរនៅប្រទេសជប៉ុនមួយរូប ក៏ជាគណៈកម្មការរៀបចំបាតុកម្មកន្លងទៅ គឺខ្ញុំនឹងយកខ្សែអាត់សំឡេងនិងជនសង្ស័យដើម្បីដាក់ពាក្យបណ្ដឹងទៅប៉ូលិសជប៉ុន ដើម្បីអោយគេធ្វើកោសល្យវិច័យលើសំឡេងនេះ។ យើងក៏នឹងប្រាប់ទៅរដ្ឋាភិបាលជប៉ុន អោយគេ ចាត់វិធានការលើបុគ្គលដែលនិយាយពាក្យនេះ ហាមមិនអោយចូលទឹកដីជប៉ុនបានទេ។ ខ្ញុំសូមឲ្យ បងប្អូនប្រជាពលរដ្ឋខ្មែរនៅទូទាំងពិភពលោក យកសំឡេងនោះទៅប្ដឹងក្រសួងការបរទេស ប្រទេស នីមួយដើម្បីចាត់ការលើបុគ្គលនិយាយពាក្យឧក្រិដ្ឋនេះ»។
ថ្មីៗនេះ មានខ្សែអាត់សំឡេងមួយមានរយៈពេលជាង ១នាទី បានបែកធ្លាយ និងត្រូវបណ្ដាញសង្គមហ្វេសប៊ុក ចែកចាយព្រោងព្រាត ដែលគេសង្ស័យថា ជាសំឡេងរបស់អ្នកនាំពាក្យក្រសួងការងារ លោក ហេង សួរ និយាយពីការរៀបចំផែនការជួលក្រុមជនពាល ឲ្យបង្កអំពើហិង្សា និងគ្រោះថ្នាក់ចរាចរណ៍ជាដើមលើក្រុមប្រឆាំងនៅក្រៅប្រទេស និងនៅក្នុងប្រទេសកម្ពុជា។ នេះជាខ្លឹមសារនៃខ្សែអាត់សំឡេងដូចតទៅ៖ «យើងមិនអាចលើកលែងទោសចំពោះពួកអ្នកដែលហ៊ានប្រមាថមេដឹកនាំយើងទេ។ ពិនិត្យមើល..យើងនៅហ្នុងមានស្គាល់បណ្ដាញខាងណា..អើ.ត្រូវចាប់ផ្ដើមធ្វើដូចនៅកូរ៉េ អ៊ីចឹង គឺរកពួកជើងកាងមួយចំនួន ..មើលមុខសញ្ញាណាដែលចាំបាច់ យកជើងកាងទៅវ៉ៃយវាទៅ ហើយជើងកាងត្រឡប់មកវិញយើងចិញ្ចឹម។ ធ្វើម៉េចអោយអាមួយហ្នឹងវាប្រកាច់ប្រកិននៅនោះចុះ។ ពួកអាជើងកាងគេមិនដែលចាប់ដាក់គុកនៅស្រុកគេទេ គេចាប់តែបន្តិចគេប្រលែងមកអោយជាប់គុកស្រុកយើង ហើយចាំពេលមកដល់ស្រុកយើងចាំយើងចិញ្ចឹម។ រឿងនេះមិនអាចលេងសើចបានទេ ច្រើនដង ហើយ ..លើកមុនយើងមិននេះទេ ប៉ុន្តែលើកនេះ ទៅគឺនៅចំពោះមុខ ហើយគេហ៊ានជាន់បែបនេះ គឺយើងមិនអាចលើកលែងអោយវាបានទេ ។ ហើយបងស៊េង ថ្ងៃមុនថា អោយមុខសញ្ញាអ្នកដែល ជាសកម្មជនពួកវាម៉ោហ្នឹងណា ..ឥឡូវនេះ គឺយើងត្រូវធ្វើកិច្ចការនេះបន្តិច ។ អានេះម៉ោអោយវា គ្រោះថ្នាក់ចរាចរណ៍នៅស្រុកខ្មែរនឹងទៅ»។
ទោះយ៉ាងណាក្តី លោក ហេង សួរ បានចេញមុខបដិសេធ និងអះអាងប្រាប់ប្រព័ន្ធឃោសនាលោក ហ៊ុន សែន ថា ខ្សែអាត់សំឡេងដែលបង្ហោះ លើបណ្ដាញសង្គមហ្វេសប៊ុកនោះ គឺជាការប្រឌិតរបស់ ក្រុមប្រឆាំង ដើម្បីវាយប្រហារលើរូបលោកប៉ុណ្ណោះ បន្ទាប់ពីលោកលើកឡើងពីរឿងប្រព័ន្ធអនុគ្រោះពន្ធទំនិញកម្ពុជា (EBA)។
អាស៊ីសេរីមិនអាចសុំការឆ្លើយតបពីអ្នកនាំពាក្យក្រសួងមហាផ្ទៃលោក ខៀវ សុភ័គ បានទេ ដោយទូរស័ព្ទចូលពុំមានអ្នកទទួល។ ចំណែកអគ្គស្នងការរង និងជាអ្នកនាំពាក្យ អគ្គស្នងការ នគរបាលជាតិ លោក គៀត ច័ន្ទថារិទ្ធ មិនអាចទាក់ទងបាន។
រីឯអ្នកនាំពាក្យទីស្ដីការគណៈរដ្ឋមន្ត្រីលោក ផៃ ស៊ីផាន មានប្រសាសន៍ថា លោកមិនបានដឹងថា សំឡេងនោះពិតឬមិនពិតនោះទេ ដោយលោកអះអាងថា ព្រោះសម័យកាលបច្ចេកវិទ្យានេះ ពិបាកយកការបានណាស់។ ទោះជាយ៉ាងណា លោកលោក ផៃ ស៊ីផាន ជំរុញឲ្យភាគីដែលគិតថា ខ្លួនអាចរងគ្រោះដោយសារសំឡេងនេះ ទាំងសងខាងដាក់បណ្ដឹងទៅតុលាការខ្លួនឯង ដើម្បីស្វែងរកការពិត ថា តើសំឡេងនោះ ខុសច្បាប់ឬយ៉ាងណា ចំណែក រដ្ឋាភិបាលមិនមានតួនាទីធ្វើការលើរឿងនេះទេ៖ «អ្នកសាមីខ្លួនដែលថា បានទទួលផលប៉ះពាល់ ពីសំឡេងនេះ អាចដាក់ពាក្យបណ្ដឹងទៅតុលាការទៅ ព្រោះតុលាការគេមានវិធាន នៅក្នុងការចាត់ការ ទៅតាមនីតិវិធី ឬច្បាប់របស់គេ។ ខ្ញុំជានីតិប្រតិបត្តិមិនអាច និយាយជំនួសតុលាការហើយអ្នកដែលភ័យព្រួយអ្នកដែលឃើញថា សំឡេងនេះ វាអាចប៉ះពាល់ដល់សន្តិសុខផ្ទាល់ខ្លួន គឺគេមានសិទ្ធិប្តឹងទៅតុលាការដែរ»។
រីឯអ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា លោកមិនទាន់ដឹងថា ខ្សែអាត់សំឡេងនោះ ពិតឬមិនពិតឡើយ ប៉ុន្តែបើជាការពិត វាគឺជាការគំរាមកំហែងធ្ងន់ធ្ងរ ដែលផ្ទុយពីច្បាប់កម្ពុជា៖ «បើសិនជារឿងនេះជារឿងពិត ជាការគំរាមកំហែងដ៏ធ្ងន់ធ្ងរណាស់ សម្រាប់សកម្មជននយោបាយ និងសកម្មជនផ្សេងៗទៀត ដែលធ្វើការតវ៉ាបញ្ចេញមតិរបស់ខ្លួន។ ប្រសិនបើការគំរាមបែបនេះ ហើយឈានដល់ការប្រព្រឹត្តនោះវាគឺជារឿងមួយដែលយើង ព្រួយបារម្ភអំពីសុវត្ថិភាពរាល់ការទាមទារតវ៉ា។ យើងឃើញហើយថា នៅក្នុងប្រទេសកម្ពុជា ការទាមទារតវ៉ានៅខាងក្នុងប្រទេសនេះ គឺកំពុងមានការរឹតត្បិតយ៉ាងខ្លាំង ហើយបែរជាការទាមទារសូម្បីនៅខាងក្រៅប្រទេស ក៏មានការត្រួតត្រាតាមដាន និងរហូតឈានដល់វាយប្រហារពាក្យសម្តីគំរាមកំហែងបែបនេះ។ ខ្ញុំយល់ថា វាជារឿងមួយកាន់តែមានភាពធ្ងន់ធ្ងរឡើង ពីសិទ្ធិសេរីភាពក្នុងការបញ្ចេញមតិ ឬក៏ការប្រមូលផ្តុំតវ៉ាដោយសន្តិវិធី គឺមិនមានការបើកឱកាសទាល់តែសោះ»។
មួយរយៈចុងក្រោយនេះ មានការបែកធ្លាយខ្សែអាត់សំឡេងជាញឹកញាប់ពីខាងមន្ត្រីនៃរបបលោក ហ៊ុន សែន និងពីខាងមន្ត្រីនៃគណបក្សសង្គ្រោះជាតិ។ ទោះយ៉ាងណាក្តី មជ្ឈដ្ឋានទូទៅ សង្កេត ឃើញថា ចំពោះខ្សែអាត់សំឡេងដែលបែកធ្លាយ គឺអាជ្ញាធរតែងតែអនុវត្តស្តង់ដារពីរ។ ប្រសិនបើមានសំឡេងបែកធ្លាយពីខាងគណបក្សប្រជាជនកម្ពុជា ឬមន្ត្រីរបបលោក ហ៊ុន សែន គឺអាជ្ញាធរមិនដែលចាត់វិធានការច្បាប់ឡើយ ថែមទាំងជួយការពារទៀតផង។ ផ្ទុយទៅវិញ ប្រសិនបើមានសារសំឡេង ដែលបែកធ្លាយពីខាងគណបក្សប្រឆាំងនោះ អាជ្ញាធរ តែងតែចាត់វិធានការយ៉ាងលឿននិង តឹងរ៉ឹងបំផុតដូចជាករណីប្រធានគណបក្សសង្គ្រោះជាតិ លោក កឹម សុខា ដែលគេសង្ស័យថា លោកបានសន្ទនាស្នេហាជាមួយនារីឈ្មោះ ខុម ចាន់តារាទី ហៅស្រីមុំ ជាដើម៕