ដោយ វ៉ែន សុមេធ
2018-10-21
RFA
ប៉ូលិសអន្តោប្រវេសន្តចាប់ជនជាតិដីគោកនៅបន្ទប់ជួលជាប់អូរព្រំដែន ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២ សីហា ឆ្នាំ២០១៧។ Photo provided
ប្រជាពលរដ្ឋនៅក្រុងប៉ោយប៉ែតមួយចំនួនបានត្អូញត្អែរថា ជនជាតិចិនបង្កជម្លោះអានាធិបតេយ្យនៅព្រំដែនខេត្តបន្ទាយមានជ័យ កាន់តែខ្លាំង ហើយរំខានដល់ការរស់នៅធ្វើឲ្យអ្នកភូមិ មានការភ័យខ្លាច។ ការត្អូញត្អែរ ដោយសារតែជនជាតិចិនមានជម្លោះដោយប្រើដំបងឈើ បំពង់ទីបនិងកាំបិតវាយដំគ្នានៅសង្កាត់ប៉ោយប៉ែតជាញឹកញាប់។
ប្រជាពលរដ្ឋនៅក្រុងប៉ោយប៉ែត លើកឡើងថា ពីមួយថ្ងៃទៅមួយថ្ងៃ កំណើនជនជាតិចិនទៅរស់នៅក្រុងនេះកាន់តែច្រើនឡើង ប៉ុន្តែ មិនផ្ដល់ប្រយោជន៍ដល់ពលរដ្ឋនៅតំបន់នោះទេ ផ្ទុយទៅវិញបានបង្កអសន្តិសុខនៅក្នុងសង្គម។
ពលរដ្ឋនៅក្រុងប៉ោយប៉ែតលោក គង់ វ៉ា ឲ្យដឹងនៅថ្ងៃទី២១ តុលា ថា មួយរយៈចុងក្រោយនេះជនជាតិចិននៅក្រុងប៉ោយប៉ែតបង្កជម្លោះកាន់តែខ្លាំង ជាពិសេសការរំខានតាមដងផ្លូវ ធ្វើឲ្យប្រជាពលរដ្ឋមានការភ័យខ្លាច និងមិនសូវហ៊ានដើរលេងពេលយប់ដូចពេលមិនទាន់មានកំណើនជនជាតិចិននោះទេ៖ «ភាគច្រើនវាឡូឡាដូចជាម្ចាស់បូរីអី គាត់ជួលផ្ទះឲ្យចិន ហើយអ្នកណានៅក្បែរចិនគឺនៅមិនបានទេ ដូច្នេះបើអ្នកធ្វើការឬអ្នករកស៊ីបើនៅក្បែរចិនត្រូវប្ដូរទីតាំងចេញ ដោយសាររស់នៅមានភាពរញ៉េរញ៉ៃពេកជួនកាលមានសំឡេងរំខានដល់អ្នកជិតខាង ហើយជូនកាលគាត់វាយគ្នា ហើយពលរដ្ឋរស់នៅមានការព្រួយបារម្ភ ហើយជួនកាលមានការកាប់ចាក់គ្នាធ្វើឲ្យភ័យខ្លាច»។
ចំណែក ពលរដ្ឋម្នាក់ទៀត លោក ឆេង ហាក់ អះអាងថា កំណើតជនជាតិចិននេះមិនល្អឡើយសម្រាប់ប្រជាពលរដ្ឋ ជាពិសេសគឺសុវត្ថិភាពការរស់នៅ។ ពលរដ្ឋរូបនេះអះអាងថា ជនជាតិចិនដែលមករស់នៅក្រុងប៉ោយប៉ែត ភាគច្រើនជាមនុស្សកោងកាច ហើយតែងដើរឡូឡារំខានដល់អ្នកស្រុកជាប្រចាំ៖ «ខ្ញុំដល់ពេលមានជនជាតិដទៃគេមករស់នៅច្រើនដូច្នេះខ្ញុំមានការព្រួយបារម្ភណាស់ បញ្ហាជនអន្តោប្រវេសន៍នេះ ព្រោះអីច្បាប់មានតើ ហើយខ្ញុំសុំឲ្យសមត្ថកិច្ចអនុវត្តឲ្យបានហ្មត់ចត់ទៅតាមផ្លូវច្បាប់ផង។ ដល់គេមករស់នៅតាមអំពើចិត្តមានបង្កអសន្តិសុខដូច្នេះប្រជាពលរដ្ឋមានការបារម្ភ និងភ័យខ្លាចណាស់ ព្រោះសូម្បីពេលយប់មានកាន់ដាវកាន់កាំបិតអូសតាមផ្លូវដូច្នេះអ្នកណាមិនខ្លាច»។
កាលពីយប់ថ្ងៃទី២០ តុលា សមត្ថកិច្ចក្រុងប៉ោយប៉ែតឃាត់ខ្លួនជនជាតិចិនបាន១៦នាក់ ដោយសារពួកគេកាន់ដំបងឈើ បំពង់ទីប និងកាំបិតដេញវាយគ្នាយ៉ាងអនាធិបតេយ្យនៅភូមិបាលិលេយ្យ១សង្កាត់ប៉ោយប៉ែត។
អធិការរងនគរបាលក្រុងប៉ោយប៉ែត ទទួលបន្ទុកផ្នែកអន្តោប្រវេសន៍លោក អេង លីហួ មានប្រសាសន៍ថា ជនជាតិចិនដែលសមត្ថកិច្ចឃាត់ខ្លួននេះ ពួកគេមានជម្លោះជាមួយជនជាតិចិនគ្នាឯង តែមិនបង្ករបួសស្នាមដល់ពលរដ្ឋខ្មែរទេ ហើយបច្ចុប្បន្នប៉ូលិសកំពុងសួរចម្លើយដើម្បីដោះស្រាយតាមផ្លូវច្បាប់។ អធិការរងរូបនេះអះអាងទៀតថា ជនជាតិដែលរស់នៅក្រុងប៉ោយប៉ែតមានច្បាប់ត្រឹមត្រូវ ក្នុងនោះមានអ្នកខ្លះស្នាក់នៅរយៈពេលខ្លី និងរយៈពេលវែង៖ «បើនិយាយទៅនៅក្រុងប៉ោយប៉ែតនេះទើបតែលើកទីមួយទេក្នុងស្ថានភាពបែបនឹង។ ហើយរាល់ថ្ងៃយើងបង្ការច្រើនជាងបង្ក្រាប ដោយសារយើងប្រើរូបមន្តបង្ការគឺយប់ឡើងយើងតែងតែជិះឡានល្បាតដោយវេនប្រចាំការ២៤ម៉ោង សម្រាប់រក្សាសន្តិសុខនៅក្រុងប៉ោយប៉ែត»។
មន្ត្រីសម្របសម្រួលសិទ្ធិមនុស្សអង្គការលីកាដូ (Licadho) ប្រចាំខេត្តបន្ទាយមានជ័យ លោក អ៊ិន គង់ជិត លើកឡើងថា បញ្ហាជនជាតិចិនបានបង្កអសន្តិសុខនៅក្រុងប៉ោយប៉ែត ក៏ដូចជានៅក្រុងព្រះសីហនុ ដោយសារសមត្ថកិច្ចអនុវត្តច្បាប់ធូររលុង ហើយបញ្ហានេះបានរំខានដល់ការរស់របស់ប្រជាពលរដ្ឋប្រាកដមែន។
របាយការណ៍ប៉ូលិសក្រុងប៉ោយប៉ែតឲ្យដឹងថា បច្ចុប្បន្នចំនួនជនជាតិចិនរស់នៅក្រុងប៉ោយប៉ែត មានប្រមាណ ២ពាន់នាក់ ក្នុងនោះមានអ្នកធ្វើការនៅតាមក្រុមហ៊ុននិងអ្នកធ្វើអាជីវកម្ម។ ប៉ុន្តែប្រជាពលរដ្ឋនៅអះអាងថា ចំនួនជនជាតិចិនរស់នៅក្រុងមួយនេះមានដល់ទៅជាង ៥ពាន់នាក់ ឯណោះ។
ចំណែករបាយការណ៍ប៉ូលិសអន្តោប្រវេសន៍វិញឲ្យដឹងថា បច្ចុប្បន្ននៅកម្ពុជាមានជនជាតិចិនរស់នៅមានជាង ២១ម៉ឺននាក់ ហើយចំនួននេះបានកើនឡើងខ្លាំងបើធៀបរយៈពេលដូចគ្នាក្នុងឆ្នាំ ២០១៧ ដែលមានជនជាតិចិនត្រឹមតែជាង ១០ម៉ឺននាក់ ប៉ុណ្ណោះ។ នៅក្នុងនោះជនជាតិចិនជិត ៧ម៉ឺននាក់រស់នៅខេត្តព្រះសីហនុ៕