2018-11-07
RFA
អនុប្រធានគណបក្សសង្គ្រោះជាតិ លោក កឹម សុខា (ឆ្វេង) និងលោកនាយករដ្ឋមន្ត្រី ហ៊ុន សែន។ RFA
លោក ហ៊ុន សែន បញ្ជាក់ថា គ្មានគម្រោងដោះលែងប្រធានគណបក្ស សង្គ្រោះជាតិ លោក កឹម សុខា ដូចការលើកឡើងរបស់លោក សម រង្ស៊ី នោះទេ។ អ្នកវិភាគយល់ថា ការប្រកាសរបស់លោក ហ៊ុន សែន នេះ គឺបង្ហាញថា ការឃុំខ្លួនលោក កឹម សុខា ជាចេតនានយោបាយសុទ្ធសាធមិនមែន ជាការអនុវត្តច្បាប់នោះទេ ហើយវាបានធ្វើប៉ះពាល់ផលប្រយោជន៍ជាតិ និងប្រជាជនយ៉ាងខ្លាំង។
ថ្លែងក្នុងពិធីជួបជាមួយកម្មករនៅខេត្តតាកែវ មេដឹកនាំរបបទីក្រុងភ្នំពេញ លោក ហ៊ុន សែន ប្រកាស ឌឺដងទៅលោក សម រង្ស៊ី ថា លុះត្រាតែសេះដុះស្នែង ទើបករណីដោះលែងលោក កឹម សុខា អាចកើតឡើង។ លោក ហ៊ុន សែន អះអាងបន្ថែមថា លោកគ្មានសិទ្ធិចុះហត្ថលេខាថ្វាយព្រះមហាក្សត្រលើកលែងទោសឲ្យលោក កឹម សុខា នោះ ទេ ព្រោះលោក កឹម សុខា នៅពេលនេះមិនទាន់ ត្រូវតុលាការកាត់ទោស ហើយសាលក្រមមិនទាន់ចូលស្ថាពរនៅឡើយ៖ «»
កាលពីថ្ងៃទី៦ ខែវិច្ឆិកា អតីតប្រធានគណបក្ស សង្គ្រោះជាតិ លោក សម រង្ស៊ី សរសេរបង្ហោះលើទំព័រហ្វេសប៊ុករបស់លោកថា ទទួលបានព័ត៌មានពីផ្ទៃក្នុងគណបក្ស ប្រជាជនកម្ពុជា ថា លោក ហ៊ុន សែន នឹងដោះលែងលោក កឹម សុខា នៅថ្ងៃទី២៩ ខែធ្នូ ២០១៨ ក្នុងឱកាសខួបទី២០ នៃ “នយោបាយឈ្នះៗ” ដែលលោក ហ៊ុន សែន តែងតែយកមកអួតអាង។ លោក សម រង្ស៊ី បន្ថែមថា ការពិតការដោះលែងលោក កឹម សុខា នេះ គឺធ្វើឡើងក្រោមសម្ពាធអន្តរជាតិសុទ្ធសាធ ហើយជាជំហានទី១ ដើម្បីចៀសវាងទណ្ឌកម្មពាណិជ្ជកម្មពីសហភាពអឺរ៉ុប។ ជំហានទី២ ដែលលោក ហ៊ុន សែន កំពុងតែទីទើនៅឡើយ គឺការបើកផ្លូវឲ្យគណបក្ស សង្គ្រោះជាតិ ដំណើរការឡើងវិញ។
ទាក់ទិនករណីនេះ មេធាវីការពារក្តីលោក កឹម សុខា អ្នកស្រី ម៉េង សុធារី និងលោក ផែង ហេង បដិសេធមិនឆ្លើយតបជាមួយអាស៊ីសេរីនោះទេ ដោយបង្វិលឲ្យទៅសួរមេធាវីមួយរូបទៀត គឺលោក ផាន់ ច័ន្ទសក្តិ ប៉ុន្តែលោកមិនទទួលទូរស័ព្ទ។
រីឯប្រធានក្រុមអ្នកវិភាគវ័យក្មេង កញ្ញា លី ស្រីស្រស់ យល់ថា ការប្រកាសរបស់លោក ហ៊ុន សែន ជាថ្មីនេះ គឺបង្ហាញកាន់តែច្បាស់ថា ការឃុំខ្លួនលោក កឹម សុខា គឺជាចេតនានយោបាយ មិនមែនជាចេតនាអនុវត្តច្បាប់នោះទេ ដែលបណ្តាលឲ្យប៉ះពាល់ដល់ផលប្រយោជន៍ជាតិ និងប្រជាជនយ៉ាងខ្លាំង។
ទោះយ៉ាងណាក្តីកញ្ញា ស្នើសុំឲ្យមេដឹកនាំនយោបាយខ្មែរមានឆន្ទៈ ដោះស្រាយនយោបាយពិតប្រាកដ ដូចជា ដោះលែងលោក កឹម សុខា ជាដើម ដើម្បីមានឱកាសចរចាជាមួយសហគមន៍អ៊ឺរ៉ុប ឲ្យបន្តប្រព័ន្ធអនុគ្រោះពន្ធសម្រាប់ជាប្រយោជន៍ដល់ប្រជាជន និងប្រទេសជាតិ៖ «»
លោក កឹម សុខា កំពុងស្ថិតនៅក្រោមការឃុំខ្លួននៅក្នុងផ្ទះ ក្រោមការចោទប្រកាន់ពីបទក្បត់ជាតិ បន្ទាប់ពីលោក ត្រូវបានអាជ្ញាធរកម្ពុជាចាប់ខ្លួន នៅពាក់កណ្តាលអាធ្រាត្រថ្ងៃទី៤ ខែកញ្ញា ឆ្នាំ ២០១៧ នឹងបានបញ្ជួនខ្លួនទៅឃុំឃាំងនៅឯពន្ធនាគារត្រពាំងផ្លុង ក្នុងខេត្តត្បូងឃ្មុំ អស់រយៈពេលជាង ១ឆ្នាំ។
សហគមន៍អន្តរជាតិ និងអង្គការសិទ្ធិមនុស្សជាច្រើនបានថ្កោលទោស ចំពោះការចាប់ឃុំខ្លួនអតីតប្រធានគណបក្សប្រឆាំងរូបនេះ។ សហរដ្ឋអាមេរិក និងសហគមន៍អ៊ឺរ៉ុប បានព្រមានថា បើពុំមានការ ការគោរពសិទ្ធិមនុស្ស និងការស្តារប្រជាធិបតេយ្យ តាមរយៈដោះលែងលោក កឹម សុខា និងឲ្យ គណបក្ស សង្គ្រោះជាតិ ដំណើការឡើងវិញនោះទេ គឺនឹងពង្រីកទណ្ឌកម្មកាន់ធ្ងន់ធ្ងរបន្ថែមទៀត ជាពិសេស នឹងដកប្រព័ន្ធអនុគ្រោះពន្ធលើ «គ្រប់មុខទំនិញទាំងអស់លើកលែងតែអាវុធ» ឬ EBAពីកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
នយោបាយរបស់ ហ៊ុនសែន នៅខ្សោយណាស់បើគ្មានកងទ័ពគាំទ្រទេនុះមិនដឹងធ្វើអ្វីកើតឡើង។អ្វីដែល សមរង្សុី និយាយប្រៀបប្រដូចទៅនឹងសុភាទន្សាយបានប្រាប់ទៅបងខ្លាថាបើបងខ្លាឯងចង់សម្លាប់ខ្ញុំសូមកុំបោកខ្ញុំទៅនឹងដុបស្បូវបាក់ឆ្អឹងបាក់ឆ្អែងខ្ញុំអស់ហើយបងខ្លាឯងបោកខ្ញុំនឹងគល់ឈើវិញត្រែងខ្ញុំអាចមានជីវិតទៅជួបជុំគ្រួសារ បងខ្លា(ហ៊ុនសែន)ឮដូច្នេះខឹងណាស់ក៏បោកសុភាទន្សាយ(សមរង្សុី)ទៅនិងដុបស្បូវប្រោកបងទន្សាយស្រែកអូយបាក់ឆ្អឹងអស់ហើយខ្ញុំ !បងទន្សាយប្រូចបាត់ឈឹង យល់ទេបងខ្លាអង្គេសុី(សែន)។មើលៗទៅដូចជាខ្មោចសង្រ្គោះជាតិលងមិនឈប់សោះតិចលូររុះសក់អស់ទៅ ហ៊ុនសែន ។