មន្ត្រីបក្ស​ប្រឆាំង​ថា លោក ហ៊ុន សែន វាយ​ប្រហារ​បក្ស​ប្រឆាំង នៅ​ចំពោះ​មុខ​សិស្ស​ គ្រាន់​តែ​ចង់​កេង​ចំណេញ​នយោបាយ

2018-11-08
RFA

វេទិកា​ជំនួប​លោក ហ៊ុន សែន និង​សិស្ស​ពូកែ​ជាប់​និទ្ទេសA នៅ​វិមាន​សន្ដិភាព រាជធានីភ្នំពេញ ថ្ងៃ​ទី៨ ខែ​វិច្ឆិកា ឆ្នាំ ២០១៨។ រូបថត៖ ហ្វេសប៊ុក​នាយករដ្ឋមន្ត្រី ហ៊ុន សែន
វេទិកា​ជំនួប​លោក ហ៊ុន សែន និង​សិស្ស​ពូកែ​ជាប់​និទ្ទេសA នៅ​វិមាន​សន្ដិភាព រាជធានីភ្នំពេញ ថ្ងៃ​ទី៨ ខែ​វិច្ឆិកា ឆ្នាំ ២០១៨។ រូបថត៖ ហ្វេសប៊ុក​នាយករដ្ឋមន្ត្រី ហ៊ុន សែន


មន្ត្រីគណបក្សប្រឆាំង​ចាត់​ទុក​ការ​វាយ​ប្រហារ​របស់​លោក ហ៊ុន សែន ថា បក្ស​ប្រឆាំង មិន​ដែល​ចូលរួម​អបអរ​សាទរ​សិស្ស​ពូកែ កីឡាករ​ឆ្នើម ឬ​កិច្ច​ខិតខំ​ដាក់​បញ្ជូល​ប្រាសាទ​បុរាណ​ជា​សម្បត្តិ​វប្បធម៌​ពិភពលោក​នោះ គ្រាន់​តែ​ជា​ការ​កេង​ចំណេញ​នយោបាយ លើ​ក្រុម​សិស្សា​នុសិស្ស គ្រូ​បង្រៀន និង​កីឡាករ​តែ​ប៉ុណ្ណោះ។ សង្គម​ស៊ីវិល​ឃ្លាំមើល​វិស័យ​អប់រំ​យល់​ថា ក្នុង​ជំនួប​ជាមួយ​សិស្ស​ពូកែ ក្នុង​នាម​ជា​មេ​ដឹក​នាំ​ផុត​លេខ​នៃ​របប​មួយ គួរ​ផ្ដល់​ដំបូន្មាន ឬ​លើក​ទឹក​ចិត្ត​ឲ្យ​សិស្សា​នុសិស្ស​ឲ្យ​ខិតខំ​រៀន ជា​ជាង​យក​វេទិកា​ជួប​សិស្ស​ពូកែ​ទៅ​ប្រើប្រាស់ ដើម្បី​កេង​ចំណេញ ឬ​ដុត​បញ្ឆេះ​នយោបាយ។

ប្រធានចលនា​យុវជន​គណបក្ស សង្គ្រោះជាតិ លោក ហ៊ីង សុខសាន្ដ ថ្លែង​ថា លោក ហ៊ុន សែន មិន​បាន​បំពេញ​តួនាទី​ជា​មេ​ដឹក​នាំ​របប​ទេ តែ​បាន​ប្រើប្រាស់​ពេល​វេលា និង​ថវិកា​ជាតិ ថ្លែង​ក្នុង​នាម​មេ​គណបក្ស​នយោបាយ​មួយ​ទៅ​វិញ។ លោក ហ៊ីង សុខសាន្ដ មើល​ឃើញ​ថា ការ​បន្ទោស​បង្អាប់ ឬ វាយ​ប្រហារ​គណបក្ស​ប្រឆាំង នៅ​ចំពោះ​មុខ​សិស្ស​និទ្ទេសA ជា​ការ​ចង់​ទាក់ទាញ​ប្រជាប្រិយភាព​នយោបាយ​ពី​ក្រុម​សិស្ស លោកគ្រូ​អ្នកគ្រូ និង​កីឡាករ​តែ​ប៉ុណ្ណោះ៖ «»

មេដឹកនាំរបបក្រុងភ្នំពេញ លោក ហ៊ុន សែន បាន​ប្រើ​ពេល​ជាង ២ម៉ោង នៅ​ព្រឹក​ថ្ងៃ​ព្រហស្បតិ៍ ទី៨ វិច្ឆិកា ដើម្បី​ជួប​សំណេះសំណាល​ជាមួយ​សិស្ស​ពូកែ និទ្ទេសA ទូទាំង​ប្រទេស នៅ​វិមាន​សន្ដិភាព នៃ​គណៈរដ្ឋមន្ត្រី​របប​ក្រុង​ភ្នំពេញ។

លោក ហ៊ុន សែន ថា លោក​អន់​ចិត្ត​នឹង​ក្រុម​មន្ត្រី​គណបក្ស​ប្រឆាំង មិន​ដែល​សរសើរ​ពី​កិច្ច​ខិតខំ​របស់​របប​​លោក ក្នុង​ការ​លើក​កម្ពស់​វិស័យ​អប់រំ ដើម្បី​ធ្វើ​ឲ្យ​កូន​របស់​ក្រុម​អ្នក​នយោបាយ​គណបក្ស​ប្រឆាំង​​ទទួល​បាន​និទ្ទេសA កែ​ទម្រង់​ឲ្យ​កីឡាករ​ឈ្នះ​មេដាយ ការ​ដាក់​បញ្ចូល​ប្រាសាទ​បុរាណ​របស់​ខ្មែរ​​ជា​សម្បត្តិ​បេតិកភណ្ឌ​ពិភពលោក​ជា​ដើម។ លោក ហ៊ុន សែន អះអាង​ថា លោក​តែង​បាន​សរសើរ​​កូនៗ​ របស់​ក្រុម​បក្ស​ប្រឆាំង ពេល​រៀន​សូត្រ​ពូកែ។ ប៉ុន្តែ​ក្រុម​ប្រឆាំង មិន​ដែល​សរសើរ​កូន​របស់​លោក​ទេ ហើយ​ថែម​ទាំង​វាយ​ប្រហារ​កូន​លោក​ទៀត​ផង៖ «»

បើទោះជា​លោក ហ៊ុន សែន អួត​ថា តែង​សរសើរ​កូន​របស់​មន្ត្រី​គណបក្ស​ប្រឆាំង​ក្ដី ប៉ុន្ដែ ទាំង​លោក ហ៊ុន សែន និង​មន្ត្រី​នាំ​ពាក្យ​ក្រសួង​មហាផ្ទៃ លោក ខៀវ សុភ័គ្គ សុទ្ធតែ​ធ្លាប់​ព្រមាន​​ចាប់​ខ្លួន​កូន​ស្រី​លោក កឹម សុខា មេ​បក្ស​ប្រឆាំង។ ចំណែក​ការ​អះអាង​ថា អាណត្តិ​ទី៥ ជា​អាណត្តិ​នៃ​ការ​ធ្វើ​កំណែ​ទម្រង់​ជោគជ័យ ត្រូវ​បាន​ក្រុម​អ្នក​និយម​ប្រជាធិបតេយ្យ ចាត់​ទុក​ថា គ្រាន់​តែ​ជា​ការ​ឃោសនា​នយោបាយ។

លទ្ធផល​ប្រលង​មធ្យម​សិក្សា​ទុតិយភូមិ ឬ បាក់ឌុប (Bac-II) ឆ្នាំ២០១៨ ត្រូវ​បាន​ប្រកាស​លទ្ធផល ២ដង គឺ​ដោយ​​សារ​ មាន​ការ​តវ៉ា​ពី​ក្រុម​សិស្សានុសិស្ស ហើយ​ក្រសួង​អប់រំ​រក​ឃើញ​ថា មាន​កំហុស​ខាង​បច្ចេក​ទេស​​ មិន​បាន​បញ្ជូល​ពិន្ទុ​គណិត​វិទ្យា។ ក្រោយ​ការ​ប្រកាស​លទ្ធផល​ផ្លូវការ សិស្ស​ពូកែ​និទ្ទេសA នៅ​ទូទាំង​ប្រទេស មាន​ចំនួន​ ៤០៨នាក់។

ប្រធាន​សមាគមគ្រូប​ង្រៀន​កម្ពុជា​ឯករាជ្យ អ្នកស្រី អ៊ុក ឆាយាវី សង្កេត​ឃើញ​ថា មិន​មែន​ជា​លើក​ទី​១ ទេ ដែល​លោក ហ៊ុន​ សែន ប្រើប្រាស់​វេទិកា​ជួប​សិស្ស​ពូកែ ដើម្បី​វាយ​ប្រហារ​គណបក្ស​ប្រឆាំង និង​ក្រុម​អ្នក​រិះគន់។ គ្រូ​បង្រៀន​រូប​នេះ យល់​ថា ក្រុម​សិស្ស​និទ្ទេសA សុទ្ធតែ​ជា​សិស្ស​ពូកែ ហើយ​ពួក​គេ​សុទ្ធតែ​យល់​ច្បាស់​ពី​រឿង​នយោបាយ​ទាំង​នេះ គ្រាន់តែ​ពួក​គេ​មិន​ចង់​និយាយ។ ដូច្នេះ លោក ហ៊ុន សែន គួរ​តែ​ជំរុញ​ឲ្យ​ពួក​គេ​ខិតខំ​រៀន ជា​ជាង​ការ​យក​វេទិកា​បែប​នេះ ទៅ​វាយ​ប្រហារ​ដៃគូ​ម្ខាង​ទៀត៖ «»

លោក ហ៊ីង សុខសាន្ដ ពន្យល់​ថា ការ​លើក​តម្កើង និង​ផ្ដល់​កិត្តិយស ជូន​សិស្ស​ពូកែ អ្នក​មាន​ស្នាដៃ​ជូន​ជាតិ មិន​មែន​ជា​កាតព្វកិច្ច​របស់​គណបក្ស​នយោបាយ​ទេ ជា​កាតព្វកិច្ច​របស់​ស្ថាប័ន​រដ្ឋ ហើយ​បច្ចុប្បន្ន លោក ហ៊ុន សែន បាន​ច្បាម​ដណ្ដើម​យក​ការងារ​​របស់​រដ្ឋមន្ត្រី ក្នុង​ការ​ជួប​សិស្ស​ពូកែ ឬ ចែក​សញ្ញាប័ត្រ​តែ​ម្នាក់​ឯង គឺ​គ្រាន់​តែ​សង្ឃឹម​ថា នឹង​ទទួល​បាន​​ប្រជាប្រិយភាព​នយោបាយ​ផ្ទាល់​ខ្លួន​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


What Next?

Recent Articles

2 Responses to "មន្ត្រីបក្ស​ប្រឆាំង​ថា លោក ហ៊ុន សែន វាយ​ប្រហារ​បក្ស​ប្រឆាំង នៅ​ចំពោះ​មុខ​សិស្ស​ គ្រាន់​តែ​ចង់​កេង​ចំណេញ​នយោបាយ"

  1. Anonymous says:

    In this country all students dare not to ask anything because they are mafia groups

  2. Anonymous says:

    sorry to Cambodian young generation. I have been attending so many graduation I never hearing the word non sent from their representative. I think this highly educated HUN SEN was doing some thing wear. graduation’s ceremony is the job for education ministers not for HUN SEN came to preach his policy. HUN SEN should looking in to problem among this people and sovereignty . there are so many thing that this guy should do but instate he spending his time to wagging war of politic again whit some one. I’ telling to our young that I’m so shameful to have this highly educated jungle man to represented this poor nation . GOD bless KAMPOUCHEA

Leave a Reply

Submit Comment