ដោយ ទីន ហ្សាការីយ៉ា
2018-11-19
RFA
ទិដ្ឋភាពទីតាំងរោងចាំស្រែរបស់ជនជាតិវៀតណាមនៅចំណុចក្បែរបង្គោលព្រំដែនលេខ ២០០ ក្នុង ឃុំចន្ទ្រា ស្រុកចន្ទ្រា ខេត្តស្វាយរៀង ថតនៅថ្ងៃទី១៩ ខែវិច្ឆិកា ២០១៨។ រូបថតផ្ដល់ដោយប្រជាពលរដ្ឋ
ពលរដ្ឋនៅព្រំដែនខេត្តស្វាយរៀងអះអាងថា ជនជាតិវៀតណាមជាច្រើននាក់ បាននាំគ្នាចូលមកបោះជំរំធ្វើស្រែនៅលើដីខ្មែរជាប់ព្រំដែនក្នុងខេត្តស្វាយរៀង ដោយមិនមានអាជ្ញាធរណាមានវិធានការទប់ស្កាត់ ចំពោះរឿងនេះនៅឡើយទេ។ ពលរដ្ឋព្រួយបារម្ភការបោះជុំរុំយូរទៅធ្វើឲ្យបាត់បង់ដីនៅតាមព្រំដែនក្លាយទៅជាកម្មសិទ្ធិរបស់វៀតណាម។
ពលរដ្ឋនៅតំបន់ព្រំដែនស្រុកចន្ទ្រា ខែត្រស្វាយរៀង លោក ឃុត ថៃហេង ឲ្យដឹងនៅថ្ងៃទី១៨ វិច្ឆិកាថា ជនជាតិវៀតណាមចូលមកបោះជុំរុំបាន ដោយសារមេឃុំចន្ទ្រា និងមន្ត្រីមានអំណាចនៅព្រំដែនមួយចំនួនទៀតបានជួលដីឲ្យវៀតណាមចូលមកធ្វើស្រែ។ ពលរដ្ឋរូបនេះ បន្តទៀតថា ជនជាតិវៀតណាមចំនួន ១២គ្រួសារចូលមកបោះតង់ស្នាក់នៅ ចម្ងាយប្រហែល ២គីឡូម៉ត្រពីព្រំដែនដែនកម្ពុជាវៀតណាមនៅចំណុចបង្គោលព្រំដែនលេខ២០០ នៅក្នុងភូមិតែងម៉ៅ គោកតែក និងភូមិចន្ទ្រា ឃុំចន្ទ្រា ស្រុកចន្ទ្រា ខេត្តស្វាយរៀង៖ «រឿងការជួលដីនេះពិបាកមែនទែន ហើយខ្ញុំនិយាយយ៉ាងមិចក៏មិនឈ្នះគេដែរ ព្រោះគេមានអភិបាលរងខេត្តស្វាយរៀងនៅពីក្រោយខ្នង ហើយនៅមានការចូលមកធ្វើស្រែទៀត ខ្ញុំមានការព្រួយបារម្ភណាស់។សូមអាជ្ញាធរពាក់ព័ន្ធជួយទប់ស្កាត់ឲ្យបានរួសរាន់ផង ព្រោះរឿងនេះពលរដ្ឋនៅព្រំដែនស្រុកចន្ទ្រាមានការព្រួយបារម្ភណាស់»។
ឆ្លើយតបនឹងបញ្ហានេះមេឃុំចន្ទ្រា លោក សុខ ស៊ីថា បដិសេធចំពោះការចោទប្រកាន់របស់ពលរដ្ឋនេះថាជារឿងមិនពិតនោះទេ ព្រោះសព្វថ្ងៃពលរដ្ឋឈប់ជួលដីឲ្យវៀតណាម ចូលមកប្រមូលផ្ដុំគ្នាបោះតង់ស្នាក់នៅ ដូចជានៅក្នុងជុំរុំជនភៀសខ្លួន ដើម្បីធ្វើស្រែនៅលើដីខ្មែរ ដែលពួកគេបានជួល ដូចកាលពីមុនដែរ៖ «តែបើពាក់ព័ន្ធរឿងការទិញពូជស្រូវនិងទិញជីពីជនជាតិវៀតណាមតែប៉ុណ្ណឹងទេ ព្រោះពលរដ្ឋខ្មែរចង់បានជូនល្អយកមកធ្វើស្រែ ហើយពួកគាត់កុម្ម៉ង់ ពីគេមក ហើយវៀតណាមក៏ចុះមកពិនិត្យមើលដល់ដីស្រែតែម្ដង ព្រោះគេខ្លាចខ្មែរយើងធ្វើស្រែបានផលហើយមិនសងគេ ព្រោះអីកន្លងមកមានពលរដ្ឋខ្លះបានបោកវៀតណាមរួចមកហើយ»។
ចំណែកមន្ត្រីសម្របសម្រួលអង្គការ លីកាដូ (Licadho) ខេត្តស្វាយរៀងលោក នុត ប៊ូពិនណារ័ត្ន មានប្រសាសន៍ថា លោកពុំបានដឹងចំពោះការជួលដីនៅព្រំដែនស្រុកចន្ទ្រានោះទេ ប៉ុន្តែជនជាតិវៀតណាមធ្លាប់ចូលមកជួលដីពីពលរដ្ឋខ្មែរនៅតំបន់ព្រំដែនខេត្តនេះជាច្រើនកន្លែង ហើយបានធ្វើខ្ទមចាំស្រែរបស់ពួកគេជាហូរហែទៀតផង។ មន្ត្រីសង្គមស៊ីវិលរូបនេះអះអាងទៀតថា បើទោះបីជាមានការចូលមកបោះជុំរុំដូច្នេះក៏ដោយ ក៏ពួកគេមិនអាចយកដីខ្មែរបានដែរ ព្រោះការជួលភាគច្រើនមានធ្វើកិច្ចសន្យាជួលដីពីអាជ្ញាធរដែនដី ដោយមានកំណត់រយៈពេលច្បាស់លាស់៖ «តែគ្រាន់តែបានដឹងការជួលដីអីនឹងដោយសារជាប់កិច្ចសន្យាចាស់ ហើយពាក់ព័ន្ធនឹងការដែលពួកគាត់ចូលមកបោះជុំរុំអីគឺយើងពិបាកហាមពួកគាត់ណាស់ ព្រោះវៀតណាមគាត់មកការពារផលដំណាំដែលបានដាំដុះនៅលើដីជួល គាត់មកមើលខ្លាចមានគោស៊ីដំណាំគាត់ ហើយជាការព្រួយបារម្ភចេះតែព្រួយហើយ ប៉ុន្តែខ្ញុំគិតថាបើមានឯកសារផ្លូវច្បាប់ជួលហើយដូចមិនមានបញ្ហាអីទេ»។
លោក បន្ថែមទៀតថា ប្រសិនបើពលរដ្ឋមានការព្រួយបារម្ភអាចមកដាក់ពាក្យប្ដឹងទៅអាជ្ញាធរខេត្ត ឬមកទាក់ទងការិយាល័យអង្គការ លីកាដូ ខេត្ត ដើម្បីជួយរៀបចំសំណុំរឿងប្ដឹងទៅអាជ្ញាធរខេត្តបាន។
កន្លងមកឧបនាយករដ្ឋមន្ត្រីលោក ស ខេង បានចេញបញ្ជាហាមឃាត់មិនឲ្យពលរដ្ឋជួលដីតាមព្រំដែនទៅឲ្យបរទេសនោះទេ ទោះបីក្នុងរូបភាពណាក៏ដោយ គឺជាទង្វើខុសច្បាប់។ ប៉ុន្តែពលរដ្ឋហាក់គ្មានជំនឿនឹងបទបញ្ជានេះទេ ព្រោះដីនៅជាប់ព្រំដែនទាំងប្រទេសថៃ និងវៀតណាមនៅតែមានអ្នកជួលដីឲ្យបរទេសយកទៅធ្វើកសិកម្មដដែល ហើយគ្មានអាជ្ញាធរណាចាត់វិធានការផ្លូវច្បាប់នៅឡើយទេ។
លោក ឃុត ថៃហេង អះអាងថា សព្វថ្ងៃដីខ្មែរនៅស្រុកចន្ទ្រាចំនួនជាង ៤០០ហិកតារហើយ ដែលជនជាតិវៀតណាមបានជួលយកទៅធ្វើស្រែ ហើយក្នុងនោះ មានដីរបស់មេឃុំចន្ទ្រាផ្ទាល់ប្រហែល ៤០ហិកតារដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។