ដោយ វ៉ា សំណព្វ
19/11/2018
RFI
រូបភាព៖ លោក ហ៊ុន សែន ក្នុងជំនួបជាមួយកម្មករ-កម្មការិនីជាង២ម៉ឺននាក់នៅក្នុងស្រុកបាទី ខេត្ត តាកែវ កាលពីថ្ងៃទី ០៧ ខែ វិច្ឆិកា ឆ្នាំ ២០១៨ ។ @facebook
@facebook
លោកនាយករដ្ឋមន្ត្រី ហ៊ុន សែន នៅថ្ងៃទី ១៩ វិច្ឆិកានេះ បានចេញមុខមកជម្រះមន្ទិលសង្ស័យនានាថា កម្ពុជាបានផ្តល់មូលដ្ឋានយោធាបរទេស នៅលើទឹកដីរបស់ខ្លួន។ ថ្លែងនៅមុនបើកកិច្ចប្រជុំគណៈរដ្ឋមន្ត្រីនៅថ្ងៃចន្ទនេះ លោកនាយករដ្ឋមន្ត្រីបានអះអាងថា កម្ពុជាមិនមានមូលដ្ឋានកងទ័ពបរទេសនៅលើទឹកដីរបស់ខ្លួនឡើយ ហើយថា កម្ពុជាក៏មិនអនុញ្ញាតឲ្យបរទេសណា យកកម្ពុជាធ្វើជាទីលាននៃការសាកល្បងមនោគមន៍វិជ្ជា ឬ អាវុធជាថ្មីនោះឡើយ។
ប្រតិកម្មរបស់លោកនាយករដ្ឋមន្ត្រី ហ៊ុន សែន គឺបន្ទាប់ពីសារព័ត៌មាន Asia Time ដែលមានមូលដ្ឋាននៅទីក្រុងហុងកុង បានចុះផ្សាយអត្ថបទមួយ កាលពីថ្ងៃព្រហស្បត្តិ៍សប្តាហ៍មុនថា កម្ពុជាកំពុងស្ថិតនៅចំណុចកណ្តាលនៃសង្គ្រាមត្រជាក់ថ្មីរវាងចិននិងសហរដ្ឋអាមេរិក។ តាមរយៈអត្ថបទនោះ Asia Time បានសរសេរថា នៅក្នុងពេលដ៏ឆាប់ខាងមុខនេះ លើទឹកដីកម្ពុជា ផែសុំចតទឹកជ្រៅមួយដែលវិនិយោគដោយចិន នឹងលេចខ្លួនឡើងនៅប្របមាត់សមុទ្រនៃខេត្តកោះកុង។ ហើយថា កំពង់ផែទឹកជ្រៅនេះ នឹងក្លាយជាមូលដ្ឋានយោធា ដែលចិនប្រើប្រាស់សម្រាប់សុំចតនាវាចម្បាំង។
ប៉ុន្តែលោកនាយករដ្ឋមន្ត្រី ហ៊ុន សែន នៅថ្ងៃចន្ទទី១៩ វិច្ឆិកានេះ បានទាត់ចោល ចំពោះព័ត៌មានខាងលើនេះ។ ថ្លែងនៅមុនពេលចាប់ផ្តើមបើកកិច្ចប្រជុំគណៈរដ្ឋមន្ត្រីនៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានអះអាងថា កម្ពុជាមិនមានមូលដ្ឋានកងទ័ពបរទេសនៅលើទឹកដីរបស់ខ្លួនឡើយ ហើយថា កម្ពុជាក៏មិនអនុញ្ញាតឲ្យបរទេសណា យកកម្ពុជាធ្វើជាទីលាននៃការសាកល្បងមនោគមន៍វិជ្ជា ឬ អាវុធ ដូចអតីតកាលទៀតនោះឡើយ។
លោកបានបន្ថែមថា កម្ពុជាមិនអនុញ្ញាតឲ្យកងទ័ពបរទេសណា បោះមូលដ្ឋានយោធានៅលើទឹកដីកម្ពុជាឡើយ ទោះបីជាកងទ័ពជើងទឹក ជើងគោក ឬជើងអាកាសក្តី។ លោកនាយករដ្ឋមន្ត្រីបានពន្យល់ថា រដ្ឋធម្មនុញ្ញរបស់កម្ពុជា មិនអនុញ្ញាតឲ្យមានមូលដ្ឋានយោធាបរទេស នៅលើទឹកដីរបស់ខ្លួន និងមិនអនុញ្ញាតឲ្យមានមូលដ្ឋានយោធារបស់ខ្លួន នៅបរទេសឡើយ លើកលែងតែនៅក្នុងក្របខណ្ឌរបស់អង្គការសហប្រជាជាតិ។ កម្ពុជាមិនត្រូវការទាល់តែសោះ ហើយមិនចាំបាច់ទាល់តែសោះដែលត្រូវការកងទ័ពបរទេសមកនៅលើទឹកដីរបស់ខ្លួន។ នេះបើតាមការបញ្ជាក់របស់ប្រមុខរដ្ឋាភិបាលកម្ពុជា។ បន្ថែមលើសេចក្តីថ្លែងការណ៍ផ្ទាល់មាត់នៅថ្ងៃនេះ ប្រមុខរដ្ឋាភិបាលកម្ពុជា លោក ហ៊ុន សែន នឹងសរសេរលិខិតផ្លូវការមួយច្បាប់ទៀត ផ្ញើទៅកាន់អនុប្រធានាធិបតីអាមេរិកលោក Mike pence ដើម្បីពន្យល់លំអិតពីករណីនេះ ដើម្បីឆ្លើយតបទៅនឹងការព្រួយបារម្ភរបស់សហរដ្ឋអាមេរិក។ ហើយតាមរយៈជំនួបជាមួយឯកអគ្គរដ្ឋទូតអាមេរិកប្រចាំនៅកម្ពុជាលោក William A. Heidt នៅថ្ងៃទី ២០ វិច្ឆិកាស្អែក លោកនាយករដ្ឋមន្ត្រីក៏មានគម្រោងលើកឡើងពីរឿងនេះដែរ។
គួរជំរាបជូនថា ចាប់តាំងពីថ្ងៃទី ១៧ វិច្ឆិកា មក ទាំងក្រសួងការពារជាតិកម្ពុជា និងទាំងក្រសួងការបរទេសផង បានចេញសេចក្តីថ្លែងការណ៍ច្រានចោលព័ត៌មានរបស់ Asia Time ផងដែរ។ សម្រាប់ អ្នកនាំពាក្យក្រសួងការពារជាតិ កម្ពុជាជារដ្ឋឯករាជ្យ អព្យាក្រឹតអចិន្រ្តៃយ៍ មិនចូលបក្សសម្ព័ន្ធ ដូច្នេះ កម្ពុជានឹងមិនផ្តល់ទីតាំងឲ្យបរទេសណាមួយ សម្រាប់យកធ្វើជាមូលដ្ឋានយោធានោះទេ។ ចំណែក លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជានៅឯកិច្ចប្រជុំកំពូលអាស៊ានលើកទី៣៣នៅសិង្ហបុរី កាលពីថ្ងៃទី ១៥ វិច្ឆិកាវិញ ក៏បានប្រាប់អនុរដ្ឋមន្ត្រីការបរទេសអាមេរិក លោក Jonh Sullivan ថា ព័ត៌មាននោះ គឺជាពាក្យចរចាមអារាម ប៉ុណ្ណោះ៕