ដោយ មាន ឫទ្ធិ
2018-11-20
RFA
កិច្ចប្រជុំអង្គការសហប្រជាជាតិ។ រូប៖ ហ្វេសប៊ុក UN
កម្ពុជាបោះឆ្នោតមិនគាំទ្រសេចក្តីសម្រេចរបស់មហាសន្និបាតអង្គការសហប្រជាជាតិ ដែលថ្កោលទោសស្ថានភាពរំលោភសិទ្ធិមនុស្សនៅប្រទេសមីយ៉ាន់ម៉ា ឬភូមា។ ការបោះឆ្នោតនេះ រៀបចំឡើងដោយគណៈកម្មាធិការទី ៣ ផ្តោតលើបញ្ហាសង្គម មនុស្សធម៌ និងវប្បធម៌ នៃមហាសន្និបាតអង្គការសហប្រជាជាតិ កាលពីថ្ងៃទី ១៦ វិច្ឆិកាកន្លងទៅ។ សេចក្តីសម្រេចនេះ ត្រូវបានអនុម័ត ក្រោមសំឡេងឆ្នោត ១៤២ យល់ស្រប ទល់នឹងសំឡេងប្រឆាំង ១០ សំឡេង និង អនុប្បវាទ ២៦ សំឡេង។ ក្រៅពីកម្ពុជា ប្រទេសដែលបោះឆ្នោតប្រឆាំងនឹងសេចក្តីសម្រេចរបស់អង្គការសហប្រជាជាតិនេះ ភាគច្រើនមកពីប្លុកកុម្មុយនិស្ត រួមមាន ចិន រុស្ស៊ី វៀតណាម និងឡាវជាដើម។
សេចក្តីសម្រេចរបស់អង្គការសហប្រជាជាតិនេះ អំពាវនាវឲ្យបើកការស៊ើបអង្កេតឯករាជ្យមួយទៅលើករណីរំលោភសិទ្ធិមនុស្សធ្ងន់ធ្ងរ ប្រឆាំងនឹងជនជាតិមូស្លីមរ៉ូហ៊ីងយ៉ា ក្នុងប្រទេសមីយ៉ាន់ម៉ា ឬភូមា។ កន្លងមក កម្ពុជាតែងតែបោះឆ្នោតមិនគាំទ្រសេចក្តីសម្រេចទាំងឡាយណារបស់អង្គការសហប្រជាជាតិ ពាក់ព័ន្ធទៅនឹងករណីរំលោភសិទ្ធិមនុស្សនៅប្រទេសមីយ៉ាន់ម៉ា ឬភូមា។
អ្នកវិភាគ ធ្លាប់លើកឡើងថា ការបោះឆ្នោតមិនគាំទ្រសេចក្តីសម្រេចរបស់អង្គការសហប្រជាជាតិនេះ មានន័យស្មើនឹង កម្ពុជាកំពុងគាំទ្រឲ្យមាននូវអំពើរំលោភសិទ្ធិមនុស្សនៅប្រទេសមីយ៉ាន់ម៉ា ឬភូមា ដូច្នោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។