ដោយ ថន ថារ៉ូ
2018-12-15
ស្ដាប់ ឬទាញយកសំឡេង
យុទ្ធនាការម្រាមដៃស្អាត របស់អ្នកលេងហ្វេសប៊ុកមួយចំនួនថា មិនទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។ Screenshot
មន្ត្រីបក្សប្រឆាំងនៅខេត្តបាត់ដំបងចាត់ទុកលិខិតបង្គាប់ឲ្យបង់ប្រាក់ផាកពិន័យដោយគណៈកម្មាធិការជាតិរៀបចំការបោះឆ្នោត (គ.ជ.ប) ថា ជាការគំរាមកំហែងពួកគាត់ដើម្បីបង្ខំឲ្យចូលធ្វើនយោបាយ។ មន្ត្រីបក្សប្រឆាំងទាំងនោះលើកឡើងថា គ.ជ.បធ្វើតាមការចង់បានរបស់លោក ហ៊ុន សែន បន្ទាប់ពីធ្វើវិសោធនកម្មច្បាប់គណបក្សនយោបាយរបស់សភាឯកបក្សដែលបានអនុម័តច្បាប់នេះកាលពីថ្មីៗនេះ។
ប្រធានគណបក្សសង្គ្រោះជាតិ ខេត្តបាត់ដំបង ដែលរបបលោក ហ៊ុន សែន រំលាយលោក ជា ជីវ ថ្លែងប្រាប់អាស៊ីសេរីនៅថ្ងៃសៅរ៍ទី១៥ ធ្នូ ថា បើទោះបីជាមានលិខិតផាកពិន័យយ៉ាងនេះក្ដី ក៏លោកមិនដាក់ពាក្យស្នើសុំធ្វើនយោបាយទៅលោក ហ៊ុន សែន ដែរ ព្រោះលោកថាពួកគាត់មិនបានធ្វើខុសច្បាប់នោះទេ។ មន្ត្រីបក្សប្រឆាំងរូបនេះអះអាងទៀតថា បើសិនជាលោកចុះចូលគណបក្សកាន់អំណាចរឿងនេះនឹងត្រូវបញ្ចប់ ប៉ុន្តែលោកថាមិនចុះចូលនោះទេ ព្រោះបើសិនស្នើសុំធ្វើនយោបាយប្រៀបដូចជាការកំដរលោក ហ៊ុន សែន ឲ្យកាន់អំណាចទៅមុខទៀតដូច្នេះដែរ៖ «ឧត្ដមគតិខ្ញុំស្ថិតក្នុងគណបក្សសង្គ្រោះជាតិ ថ្មីត្បិតខ្ញុំពេលនេះមិនមានសិទ្ធិចូលរួមធ្វើនយោបាយជាមួយសង្គ្រោះជាតិមែន តែបេះដូងខ្ញុំស្រលាញ់តែបក្សសង្គ្រោះជាតិទេ ថ្វីត្បិតតែខ្ញុំក្លាយទៅអ្នកគាំទ្រ ក្លាយជាប្រជាពលរដ្ឋក្ដី ប៉ុន្តែខ្ញុំពេញចិត្តនឹងជឿជាក់ថា គណបក្សសង្គ្រោះជាតិគឺជាគណបក្សតែមួយគត់ដែលអាចផ្លាស់ប្ដូររបបដឹកនាំសព្វថ្ងៃនិងមានការប្ដូរជាវិជ្ជមាន»។
ប្រតិកម្មនេះក្រោយពី ប្រធានគ.ជ.ប លោក ស៊ិក ប៊ុនហុក បានចេញលិខិតបង្គាប់ឲ្យមន្ត្រីគណបក្សប្រឆាំងចំនួន ៣រូប ដែលជាប់ក្នុងសំណុំរឿងធ្វើយុទ្ធនាការម្រាមដៃស្អាតនៅបាត់ដំបង ប្រញាប់ទៅបង់ប្រាក់ផាកពិន័យនៅគណៈកម្មការរៀបចំការបោះឆ្នោតខេត្តបាត់ដំបង ឬនៅទីស្ដីការគ.ជ.ប យ៉ាងយូរ ៣០ថ្ងៃ គិតចាប់ពីថ្ងៃទទួលលិខិតនេះតទៅ។ ករណីមិនបានបង់ប្រាក់ផាកពិន័យតាមការកំណត់ គ.ជ.ប នឹងអនុវត្តការពិន័យនេះទៅតាមច្បាប់។
គ.ជ.បបានផាកពិន័យលោក ជា ជីវ ជាប្រាក់ ១០លានរៀល ចំណែកលោក ថោង សារឿន និងលោក គ្រុយ គឹមសាំង ពិន័យជាប្រាក់ម្នាក់ ៥លានរៀន។
មន្ត្រីគណបក្សប្រឆាំងស្រុកកំរៀងម្នាក់ទៀត ដែលជាប់បណ្ដឹងសំណុំរឿងនេះដែរគឺលោក គ្រុយ គឹមសាំង មានប្រសាសន៍ថា លោកមិនមានការភ្ញាក់ផ្អើលនឹងលិខិតនេះទេ ព្រោះលោកយល់ឃើញថា រឿងនេះជាចេតនានយោបាយរបស់បក្សកាន់អំណាច ដើម្បីបំភិតបំភ័យពួកគាត់ឲ្យភ័យខ្លាច ដោយសារពួកគាត់មិនចុះចូលជាមួយគណបក្សកាន់អំណាច៖ «ខ្ញុំនឹងតស៊ូទៅមុខទៀត ព្រោះកាលណាគេគាបសង្កត់យើងកន្លងមកបន្តបន្ទាប់នោះ ខ្ញុំគិតថាមិនចង់យកខ្មែរណាមកគុំកួនគ្នានោះទេ ប៉ុន្តែគាត់ចេះតែរុញឲ្យខ្ញុំដំណាក់កាលម្ដងហើយម្ដងទៀត ឈានមកដល់ផ្លូវនេះ គឺខ្ញុំមិនអាចចុះចូលជាមួយបក្សកាន់អំណាចបានទេ»។
លោកអះអាងថា លោកមិនទាន់មានប្រាក់បង់ការផាកពិន័យនេះនៅឡើយទេ ប៉ុន្តែលោកថា នឹងយកប្លង់ដីរបស់ខ្លួនទៅដាក់បញ្ចាំធនាគារដើម្បីខ្ចីប្រាកបង់ទៅគ.ជ.ប ឲ្យទាន់ពេលកំណត់៖ «នៅថ្ងៃច័ន្ទនេះ ខ្ញុំទៅធនាគាររកលុយបង់ជូនគាត់ ព្រោះបើសិនជាខ្ញុំមិនបង់ប្រាក់ឲ្យគេទេ ប្រហែលជាអាចគាត់មានវិធានការផ្សេងទៀតហើយ គាត់អត់យល់ខ្ញុំជាអតីតជាប្រធានប្រតិបត្តិស្រុកមែន ប៉ុន្តែវាផុតពីតួនាទីតំណែងយូរហើយ គាត់នៅតែមកតាមឈ្នានីសខ្ញុំជាប់រហូតទៀត»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី យល់ឃើញថា លិខិតរបស់គ.ជ.បនៅពេលនេះ គឺជាការគំរាមកំហែងដល់មន្ត្រីគណបក្សប្រឆាំងនៅថ្នាក់មូលដ្ឋានច្រើនជាងការអនុវត្តច្បាប់ ព្រោះយុទ្ធនាការម្រាមដៃស្អាតរបស់ពួកគាត់កន្លងមក គ្រាន់តែជាការសម្ដែងមតិរបស់ពលរដ្ឋ គឺពុំមែនជាការរារាំងអ្នកបោះឆ្នោតនោះឡើយ។ លោក យិន ម៉េងលី អះអាងទៀតថា ការចោទប្រកាន់នេះ គឺ គ.ជ.ប បានអនុវត្តខុសទាំងនីតិវិធីតាំងពីដំបូង ព្រោះពួកគាត់បានជួបជុំគ្នានៅឃុំអន្លង់វិលស្រុកសង្កែ ប៉ុន្តែត្រូវបានមន្ត្រីគណបក្សកាន់អំណាចប្ដឹងចាត់វិធានការនៅឃុំផ្សេង ដែលនៅក្នុងទីកន្លែងដែលពួកគាត់រស់នៅឯណោះទៅវិញ៖ «ខ្ញុំយល់ថានីតិវិធីចុងក្រោយនេះក៏អត់ស្របច្បាប់ដែរ ហើយពាក់ព័ន្ធរឿងគាត់មិនចូលរួមធ្វើនយោបាយគឺជាសិទ្ធិរបស់គាត់ ហើយមិនមែនជាបញ្ហាថ្មីទើបកើតឡើងទេ បញ្ហានេះធ្លាប់កើតមានម្ដងហើយនៅពេលលោក ហ៊ុន សែន បានអំពាវនាវថា អ្នកណាចង់បានមុខតំណែងរក្សាតួនាទីអីត្រូវចុះនោះ ហើយនេះក៏ជាសិទ្ធិរបស់ពួកគាត់ព្រោះមិនមានច្បាប់ណាមួយត្រូវតែចូលធ្វើនយោបាយនោះទេ»។
គ.ជ.ប បានសម្រេចផាកពិន័យមន្ត្រីទាំង ៣នាក់ដោយសារតែពួកគេបានបង្ហោះ រូបភាពលើកម្រាមចង្អុលដៃ ជានិមិត្តរូបនៃការធ្វើពហិការមិនទៅបោះឆ្នោតនៅតាមបណ្ដាញសង្គមហ្វេសប៊ុក (Facebook)។ អ្នកច្បាប់ចាត់ទុកថា ទង្វើនេះ ជាការអនុវត្តសិទ្ធិបញ្ចេញមតិរបស់ពលរដ្ឋ ដែលមានចែងក្នុងរដ្ឋធម្មនុញ្ញ មិនមានអ្វីខុសច្បាប់នោះទេ៕