ដោយ ថន ថារ៉ូ
2018-12-15
RFA
តំណាងអ្នកភូមិមានបញ្ហាទំនាស់ដីធ្លីមកពីស្រុកស្រែអំបិល ខេត្តកោះកុង អ្នកស្រី ផាវ ញ៉ឺង ផ្ដល់បទសម្ភាសន៍ក្នុងពេលតវ៉ារកដំណោះស្រាយនៅខុទ្ទកាល័យលោកនាយករដ្ឋមន្ត្រី ហ៊ុន សែន នៅព្រឹកថ្ងៃទី១៨ សីហា ឆ្នាំ២០១៧។ RFA/Sorn Chanratha
សមត្ថកិច្ចការពារពិធីបុណ្យសមុទ្របដិសេធថា មិនបានឃាត់រថយន្តឈ្នួល ដែលសកម្មជនដីធ្លី ជិះទៅចូលរួមលេងកម្សាន្តក្នុងពិធីបុណ្យសមុទ្រទេ។ ប្រតិកម្មនេះ ធ្វើឡើងក្រោយពេល ស្ត្រីជាសកម្មជនដីធ្លី នៅស្រុកស្រែអំបិលម្នាក់អះអាងថា សមត្ថកិច្ចខេត្តកោះកុង កាលពីថ្ងៃទី១៤ ធ្នូ បានឃ្លាំមើល សកម្មភាពរូបគាត់ តាំងពីចេញពីផ្ទះ រហូតដល់ចំណុចរូបសំណាកតំណាងខេត្តកោះកុង (រូបបេះដូង) ហើយបានឃាត់រថយន្តគាត់ជាច្រើនម៉ោង មិនឲ្យបន្តទៅមុខ។
ស្ត្រីសកម្មជនដីធ្លី នៅស្រុកស្រែអំបិល ខេត្តកោះកុង លោកស្រី ផាវ ញ៉ឹង អះអាងថា ក្រៅពីឃាត់ឡាននៅពេលយប់ ក៏មានសមត្ថកិច្ចបានទៅសួរនាំអ្នកបើកឡាន ដល់កន្លែងស្នាក់នៅ ពីដំណើររបស់អ្នកស្រី ក្នុងការទៅចូលរួមពិធីបុណ្យសមុទ្រកាលពីថ្ងៃទី១៤ ធ្នូ។ វិធានការនេះ ចំពេលតែមួយ ជាមួយវត្តមានមេដឹកនាំរបបក្រុងភ្នំពេញ ចូលរួមពិធីបើកកម្មវិធីបុណ្យសមុទ្រ។ លោកស្រី ផាវ ញ៉ឹង ចាត់ទុកថា សកម្មភាពបែបនេះ ជាការគំរាមកំហែងនិងរឹតត្បិតសេរីភាពរបស់ជនរងគ្រោះដីធ្លី៖ «វាឲ្យខ្ញុំអរគុណ សម្ដេចនាយករដ្ឋមន្ត្រី ហ៊ុន សែន អីណា តែដល់ពេលឥលូវ មកតាមដានមើលដូចខ្ញុំនឹងចោរអ៊ីចឹង បើលោកឯងខ្លាំងម៉េចមិនព្រមការពារដីពួកខ្ញុំដែលក្រុមហ៊ុនបំពាន ប្លន់ដីធ្លី ផ្ទះសម្បែងពួកខ្ញុំហ្ន! ហេតុអីមិនឃើញមុខ? មិនជួយមកយាមផ្ទះ ដីធ្លីពួកខ្ញុំ ឥលូវម៉េចនាំគ្នាមកអង្គុយយាមមុខផ្ទះខ្ញុំទៅវិញ នៅពេលដែល ព័ត៌មានបានចាក់ផ្សាយទៅ សូមលោកនាយករដ្ឋមន្ត្រីលោកមេត្តាស្ដាប់!»។
អ្នកស្រី ផាវ ញ៉ឹង ជាពលរដ្ឋមានជម្លោះដីធ្លីម្នាក់ជាមួយក្រុមហ៊ុនស្ករអំពៅ ឈ្មោះ កោះកុងស៊ូហ្គ័រ ភ្លេនថេសិន (Koh kong Sugar Plantation) លី យ៉ុងផាត់។ កាលពីចុងខែមិថុនា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានសម្រេចដោះស្រាយបញ្ចប់វិវាទដីធ្លី ឲ្យពលរដ្ឋទាំងនោះអស់ហើយ។ ប៉ុន្តែ អ្នកស្រី ផាវ ញ៉ឹង អះអាងថា តាំងពីកំឡុងនោះមក អាជ្ញាធរមូលដ្ឋាន និងសមត្ថកិច្ចស្រុកស្រែអំបិល បានចុះតាមដានសកម្មភាពរបស់អ្នកស្រីជាប់ជាប្រចាំ និងបានបោះតង់ ឬដាក់ប៉ុស្តិ៍ប៉ូលិសប្រចាំការមុខផ្ទះអ្នកស្រីតែម្ដង។
ប្រធានគណៈកម្មការការពារពិធីបុណ្យសមុទ្រ និងជាអគ្គស្នងការរងនៃអគ្គស្នងការនគរបាលជាតិ នាយឧត្ដមសេនីយ៍ ទូច ណារ៉ុថ ប្រាប់អាស៊ីសេរីថា សមត្ថកិច្ចមិនបានឃាត់រថយន្តរបស់ស្ត្រីសកម្មជនដីធ្លីទេ និងអះអាងថា ពលរដ្ឋទាំងអស់អាចចូលរួម និងដើរកម្សាន្ត ដោយសេរីក្នុងបុណ្យសមុទ្រ៖ «គ្រាន់តែគាត់មកដើរ លេងកម្សាន្តសប្បាយ ដើរលេងសប្ដិពិធីបុណ្យសមុទ្រ ខាងខ្ញុំគ្មានឃាត់គាត់អីណា អត់ឃាត់ទេ ពួកគាត់ដើរលេង ឲ្យសប្បាយទៅ ! អត់ឃាត់ទេ!»។
អ្នកសម្របសម្រួលស្ដីទីអង្គការសិទ្ធិមនុស្សលីកាដូ (LICADHO) ប្រចាំខេត្តកោះកុង លោក ហ៊ួរ អ៊ីន យល់ថា សមត្ថកិច្ចហាក់បារម្ភជ្រុលដោយគ្រាន់តែឃើញវត្តមានរបស់ស្ត្រីសកម្មជនដីធ្លី ទៅចូលរួមពិធីបុណ្យសមុទ្រ ស្របពេលវត្តមានមេដឹកនាំរបបក្រុងភ្នំពេញលោក ហ៊ុន សែន ក៏នៅក្នុងកម្មវិធីនោះ កាលពីថ្ងៃទី១៤ ធ្នូ។ សង្គមស៊ីវិលរូបនេះ ចាត់ទុកសកម្មភាពរារាំងពលរដ្ឋបែបនេះ ជាការធ្វើឲ្យប៉ះពាល់ដល់សតិអារម្មណ៍ពលរដ្ឋ៖ «សមត្ថកិច្ចហាក់បារម្ភជ្រុលពេកហើយ មានសិទ្ធិអីទៅរារាំងគាត់គ្រាន់តែគាត់ឡើងមកដើរលេងកម្សាន្តសោះ យើងមានតួនាទីការពារសណ្ដាប់ធ្នាប់ជូនពួកគាត់។ហេតុអីបានជាអាជ្ញាធរសួរនាំគាត់ រារាំងគាត់ពួកគាត់អ៊ីចឹង ពេលដែលពួកគាត់ ឡើងមកពីទីរួមខេត្តម្តងៗ?»។
លោកស្រី ផាវ ញ៉ឹង អះអាងថា លោកអ្នកស្រី មិនបានយកញត្តិទាមទារដីធ្លី ទៅដាក់ជូនមេដឹកនាំរបបក្រុងភ្នំពេញ លោក ហ៊ុន សែន ក្នុងកម្មវិធីបុណ្យសមុទ្រទេ គឺគ្រាន់តែទៅចូលរួមលេងកម្សាន្ត ដូចពលរដ្ឋដទៃប៉ុណ្ណោះ។ លោកស្រីទាមទារឲ្យប្រធានគណៈកម្មការការពារពិធីបុណ្យសមុទ្រ និងលោក ហ៊ុន សែន ពិនិត្យមើលករណីនេះ ឡើងវិញ និងទទូចឲ្យដកសមត្ថកិច្ចចេញពីមុខផ្ទះ អ្នកស្រី ហើយបញ្ឈប់សកម្មភាពឃ្លាំមើលអ្នកស្រីតទៅទៀត៕