តំណាង​អ្នក​ផលិត​ក្នុង​ឧស្សាហ​កម្មកាត់​ដេរ ស្វាគមន៍​ការព្រមាន​របស់​លោក ហ៊ុន សែន លើ​ក្រុម​អ្នក​តវ៉ា​សុំ​ប្រាក់​បំណាច់

សិទ្ធិ​មនុស្ស


រូបឯកសារ៖ លោក ខេន លូ អគ្គលេខាធិការ​របស់​តំណាង​សមាគម​រោងចក្រ​កាត់ដេរ​នៅ​កម្ពុជា​ហៅ​កាត់​ថា ​GMAC នៅ​ក្នុង​រោងចក្រ​មួយ​ក្នុង​ទីក្រុង​ភ្នំពេញ កាល​ពី​ថ្ងៃ​ទី​២៨ ខែ​កក្កដា​ ឆ្នាំ​២០១៦។ (VOA)


10 មករា 2019
ហ៊ុល រស្មី
វីអូអេខ្មែរ

តំណាង​អ្នក​ផលិត​សម្លៀក​បំពាក់​នៅ​កម្ពុជា​បាន​អរគុណ​មេដឹកនាំ​កម្ពុជា​លោក​នាយក​រដ្ឋ​មន្ត្រី​ហ៊ុន សែន​​ចំពោះសារ​ព្រមាន​ធ្ងន់ៗ​របស់​លោក​​ថា ​រោង​ចក្រ​កាត់​ដេរ​រាប់​រយ​នឹង​ប្រឈម​ការ​ក្ស័យ​ធន​ ប្រសិន​បើ​កម្មករ​ចង់​បាន​ប្រាក់​បំណាច់​អតីត​ភាព​ការងារ​សរុប​ពី​ឆ្នាំ​មុនៗ​ មុន​ឆ្នាំ​២០១៩។

តំណាង​អ្នក​ផលិត​ក្នុង​ឧស្សាហ​កម្មកាត់​ដេរ​នៅ​ប្រទេស​កម្ពុជា​ ​ឬ​ GMAC​ ​បាន​ថ្លែង​នៅ​ថ្ងៃ​ព្រហស្បតិ៍​នេះ​ថា​ ​ខ្លួន​នឹង​ធ្វើ​ទៅ​តាម​ប្រកាស​ថ្មី​របស់​រដ្ឋាភិបាល​ ដែល​បាន​តម្រូវ​ឲ្យ​ម្ចាស់​រោងចក្រ​ និង​សហគា្រស​ផ្សេង​ទៀត​ ​បើក​ប្រាក់​បំណាច់​អតីត​ភាព​ការងារ​ប្រចាំ​ឆ្នាំ​ពីរ​ដង​ក្នុង​មួយ​ឆ្នាំ​ ដោយ​ចាប់​ផ្តើមពី​ឆ្នាំ​២០១៩​នេះ។​

ការ​អធិប្បាយ​របស់​តំណាង​អ្នក​ផលិត​ក្នុង​ឧស្សាហ​កម្ម​កាត់​ដេរ​នេះ​បាន​ធ្វើឡើង​ នៅ​ក្រោយ​ពេលកម្មករ​រាប់ពាន់​នាក់​នៅតាម​រោងចក្រ​កាត់​ដេរ​មួយ​ចំនួន​ក្នុង​ទីក្រុង​ភ្នំពេញ​ និង​បណ្តា​ខេត្ត​មួយ​ចំនួន​ទៀត​ ក្នុង​នោះមាន​ទាំង​ខេត្ត​តាកែវ ​បាន​នាំ​គ្នា​តវ៉ា​ទាម​ទារប្រាក់​អតីត​ភាព​ការងារ​ប្រចាំ​ឆ្នាំ​សរុប​ពោល​គឺ​ពួក​គេ​ទាមទារបើក​ផ្តាច់​រាល់​ប្រាក់​អតីត​ភាព​ការងារ​មុន​ឆ្នាំ​២០១៩។​

ក្រុម​កម្មករ​បាន​ធ្វើ​ការ​ទាម​ទារ​យ៉ាង​ដូច្នេះ​ ​ដោយ​ពួកគេ​មាន​ការ​ភ័យ​ខ្លាច​ថា​ ថៅ​កែ​រោងច្រក​មិន​ទូទាត់ប្រាក់​អតីត​ភាព​ការងារប្រចាំ​ឆ្នាំ​មុន​ឆ្នាំ​២០១៩។​ ​តែទាំង​ថៅកែ​រោងចក្រ និង​មេ​ដឹកនាំ​កម្ពុជាបាន​អះអាង​ថា​ ការ​ត​វ៉ា​របស់​កម្មករ​គឺ​ផ្ទុយ​នឹង​ច្បាប់។​

លោក ខេន លូ​ ​(Ken Loo)​ ​អគ្គលេខាធិការ​សមាគម​រោង​ចក្រ​កាត់ដេរ​នៅ​កម្ពុជា ​ហៅ​កាត់​ថា​ GMAC​ ​បាន​ប្រាប់​ VOA ​នៅថ្ងៃ​ព្រហស្បតិ៍​នេះថា​ ម្ចាស់​រោងចក្រ​មិន​អាច​ធ្វើ​ទៅ​តាម​ការ​ចង់​បាន​របស់​កម្មករ​នោះ​ទេ​ ​តែ​ម្ចាស់​រោងចក្រ​នឹង​គោរព​ទៅ​តាម​ច្បាប់​របស់​កម្ពុជា។​

«រឿង​ រឿង​អតីត​ភាព​ចាស់ៗ យើង​បង់​តាម​ច្បាប់​តើ! ​យើង​…​បង់​តាម​ច្បាប់​មាន​ន័យថា​ ៦​ខែ​បង់​ម្តង ​៦​ខែ​បង់​ម្តង។​ ឥឡូវ​កម្មករ​ទាមទារ​បង់មួយ​កញ្ចប់​ អាហ្នឹង​ខុស​ច្បាប់​ទេ។​ ​ហើយ​សម្តេច​ហ៊ុន សែន ម្សិល​ម្ង៉ៃបាន​ ម្សិលមិញតើ ​បានបញ្ជាក់​ច្បាស់​លាស់​ហើយ»។​

ក្នុង​ជំនួប​ជាមួយ​កម្មករ​នៅ​ឯខេត្ត​តាកែវ​កាលពីថ្ងៃ​ពុធ​ម្សិលមិញ​នេះ​ ​លោក​ហ៊ុន សែនបាន​ហៅ​ការ​តវ៉ា​របស់​កម្មករ​ឲ្យ​បើក​ប្រាក់​បំណាច់​អតីត​ភាព​ការងារ​ទាំង​អស់​ មុន​ឆ្នាំ​២០១៩ថា ​ខុស​ពី​ច្បាប់​ថ្មី​របស់​រដ្ឋាភិបាល។​

លោក​ក៏​ព្រមាន​ថា​ ​រោងចក្រ​រាប់រយ​នឹង​ត្រូវ​បិទទ្វារ​ បើ​ក្រុម​កម្មករ​នៅ​បន្ត​ទាម​ទារ​នូវ​អ្វីដែល​លោក​យល់​ថា ​មិន​អាច​ទៅរួច​នោះ។​

«សុំ​ក្មួយៗ​មេត្តា​យោគយល់!​ មិន​អាច​ធ្វើ​ទៅ​រួច​ទេៗ​ ហើយ​បើ​ចង់​ចាប់​បង្ខំ​ធ្វើ​ ថៅ​កែ​ហ្នឹង​មាន​តែ​បិទ​ទ្វារ​រោង​ចក្រ​ ហើយ​ទី​ចុង​បំផុត​ក្មួយៗ​ មាន​តែ​អស់​ការងារ​ធ្វើ​តែ​ប៉ុណ្ណឹង​ អស់​ការងារ​ធ្វើ»។​

លោក​ហ៊ុន សែន​អះអាង​ថា​ ការ​បើក​ប្រាក់​អតីត​ភាព​ការងារ​ប្រចាំ​ឆ្នាំ​ពីឆ្នាំ​ចាស់​ពីរ​ដង​ក្នុង​មួយ​ឆ្នាំគឺ​ប្រៀបដូច​ជា​ការ​សន្សំ ​ហើយ​បើសិន​ជា​ក្នុង​ករណី​ថៅកែ​រោង​ចក្រ​ណាមួយ​មិន​អាច​បំពេញ​កាតព្វកិច្ច​នេះបាន​ទេ​ ហើយបង់​ប្រាក់​អតីតភាព​ការងារ​ប្រចាំ​ឆ្នាំ​ពីរ​ដង​ក្នុង​មួយ​ឆ្នាំ​នេះ​ ​នោះ​រដ្ឋាភិបាល​របស់​លោក​ជា​អ្នក​ទទួល​ខុស​ត្រូវ។​

«ឥឡូវ​នេះ​ ប្រាក់​ហ្នឹង​វា​អត់​ទៅ​ណា​ទេ​ តែ​គ្រាន់​តែ​សុំ​៦​ខែ​ បើក​យក​ម្តង ៦ខែ​បើក​យក​ម្តង។ ​នែ​នៅ​ទីចុង​បំផុត​ វា​ក៏នៅតែ​ជាប្រាក់​សន្សំ​របស់​យើងដដែល​ទេៗ ហើយ​ប្រសិន​បើ​កំពុង​តែ​ដំណើរ​ការ​ ម្ចាស់​រោងចក្រ​នោះ​រត់​ចោល​ទៅ​ទៀត​ បន្ទុក​នោះ​វាក៏គង់​តែ​ធ្លាក់​មក​លើ​រដ្ឋាភិបាលដដែល​ មិន​ដែល​ឲ្យ​ក្មួយៗ​ណា​ខាតទេ​ បាត់​បង់​ទេ​ បាត់​បង់​ទេ»។​

ភ្លាមៗ​ក្រោយ​ការ​ប្រកាស​របស់​លោក​ហ៊ុន សែន​នោះ សមាគម​រោង​ចក្រ​កាត់ដេរ​នៅ​កម្ពុជា​ ឬ​ហៅ​ថា​ GMAC​ បាន​ចេញ​សេចក្តី​ថ្លែង​អំណរគុណ​លោក​ហ៊ុន សែន​ ​និង​បាន​ចាត់​ទុក​ថា​ ការ​អធិប្បាយ​របស់​លោក​ហ៊ុន សែន​បាន​ឆ្លុះ​បញ្ចាំង​ពី​ស្ថាន​ភាព​ហិរញ្ញ​វត្ថុ​របស់​រោងចក្រ។​

លិខិត​ថ្លែង​អំណរ​គុណ​របស់​ GMAC​ ចុះ​ថ្ងៃទី​៩ខែ​មករា​ឆ្នាំ​២០១៩​ ​ដែល​ត្រូវ​បាន​ចេញ​ផ្សាយ​ដោយ​អង្គភាព​ព័ត៌មាន​ក្នុង​ស្រុក បាន​សរសេរ​ក្នុង​ន័យ​ដើម​ថា៖​

«សមាគម​រោងចក្រ​កាត់​ដេរ​នៅ​កម្ពុជា​សង្ឃឹម​យ៉ាង​មុតមាំ​ថា​ ប្រសាសន៍​ពន្យល់​ណែនាំ​ដ៏មាន​សារៈសំខាន់​នេះបាន​ធ្វើ​ឲ្យ​បងប្អូន​កម្មករ​និយោជិត​របស់​យើង​បាន​យល់​ច្បាស់​អំពី​លក្ខខណ្ឌ​ហិរញ្ញវត្ថុ​របស់​រោង​ចក្រ​ និង​បាន​យល់​ច្បាស់​ពី​គោល​ការណ៍​ច្បាប់​ដែល​ត្រូវ​អនុវត្ត​ ដែល​នាំ​ឲ្យ​ចៀស​វាង​បាន​នូវ​ការ​ទាម​ទារ​មិន​សម​ស្រប​នានា​ក្រោម​ការ​ញុះញង់​របស់​សហជីព​ និង​សកម្ម​ជន​ទុច្ចរិត​មួយចំ​នួន​តូច»។

GMAC​ ​បាន​បន្ត​ក្នុង​ន័យ​ដើម​ថា៖​

«សមាគម​សូម​គាំទ្រ​រាជ​រដ្ឋាភិបាល​ និង​ខិត​ខំ​បន្ត​នូវ​កិច្ច​សហការ​ផ្នែក​វិនិយោគ​ឲ្យ​កាន់​តែ​រឹង​មាំ​បន្ថែម​ទៀត​ សំដៅ​ធានា​ឲ្យ​បាន​នូវ​កំណើន​សេដ្ឋកិច្ច​ជាតិ​ និង​ការ​លើក​កម្ពស់​សុខុមាល​ភាព​របស់​ប្រជា​ពលរដ្ឋ​កម្ពុជាទូទៅ»។​

យ៉ាង​ណាក៏ដោយ​ ក្នុង​កូដកម្មតវ៉ា​ទាមទារ​ប្រាក់​អតីត​ភាព​ការងារ​ប្រចាំ​ឆ្នាំដែល​បាន​ផ្ទុះ​ឡើង​នៅ​តាម​ក្រុមហ៊ុន​យ៉ាងហោច​ណាស់​៦​ក្រុមហ៊ុន​នោះ​ មាន​ការ​បញ្ឈប់​កម្មករ​ប្រមាណ​១៦០០​នាក់​នៅ​រោងចក្រ​W&D Cambodia Co., LTD​ ដែល​ជា​សមាជិក​របស់​សមាគម​រោង​ចក្រ​កាត់​ដេរ​នៅ​កម្ពុជា​ ឬ​ហៅ​ថា​ GMAC។​ នេះ​បើ​យោង​តាម​ការ​បញ្ជាក់​របស់​ក្រុម​សហជីព​ដែល​បម្រើ​ប្រយោជន៍​កម្មករ។​

លោកអាត់ ធន់​ ​ប្រធាន​សហភាព​ការងារ​កម្ពុជា​ មាន​ប្រសាសន៍​ប្រាប់​ VOA​ នៅ​ថ្ងៃ​ព្រហស្បតិ៍​នេះ​ថា​ ​ ក្រុម​កម្មករ​នៅ​រោងចក្រ​ W&D Cambodia Co., LTD​ បាន​ស្វះ​ស្វែង​មក​រកការ​ជួយ​ពី​សហ​ជីព​លោក​ ដោយសារ​ពួក​គេ​ត្រូវបាន​ក្រុមហ៊ុន​បណ្តេញ​ចេញ​តាម​អំណាច​ស្រាល​ក្រម​របស់​តុលាការ។​

លោក​បន្តថា​ នៅ​ពេលនេះ​ ខាង​ភាគី​ក្រសួង​ការងារ ​និង​ថៅកែ​រោង​ចក្រ​ W&D Cambodia Co., LTD​ ​កំពុង​ធ្វើការ​ចរចា​គ្នាដើម្បី​បើក​ផ្លូវឲ្យកម្មករ​ដែល​ត្រូវ​បាន​បណ្តេញ​ចេញ​នោះ​ បាន​ត្រឡប់​ចូល​មក​ធ្វើការ​ដូច​ដើម​វិញ។​

«យើង​គ្រាន់​តែដឹង​ក្រៅ​ផ្លូវ​ការ​ថា​ ក្រុមហ៊ុន​ និង​ក្រសួង​ហ្នឹង​កំពុងតែ​សម្រួល​ដើម្បី​ឲ្យ​កម្មករ​ចូល​ធ្វើ​ការ​វិញ​ បន្ទាប់​ពី​ដាក់​ពាក្យ​បណ្តឹង​មក​យើង​រយៈពេល​មួយ​ថ្ងៃ​ ​ ហើយ​យើង​កំពុង​តែធ្វើការ​រឿង​ហ្នឹង។​ ឥឡូវ​យើង​ដាក់​បណ្តឹង​ទៅ​ក្រុម​ហ៊ុន ​ដាក់​ទៅ​ក្រសួង​ហ្នឹង​ ហើយ​ចង់​មាន​កិច្ច​ព្រមព្រៀង​មួយ​ច្បាស់​លាស់ជាមួយ​ក្រុម​ហ៊ុន​ ដើម្បី​កុំ​ឲ្យ​គេ​ដាក់​កម្មករ​ចូល​ទៅ​កិច្ច​សន្យា​ថ្មី​ ឬក៏​គ្មាន​កិច្ច​សន្យា​ច្បាស់​លាស់​ ដែល​អាច​បញ្ឈប់​គាត់​ថ្ងៃណា​មួយ​ រយៈ​ពេល​ខ្លី​ហ្នឹង​ ហើយ​កម្មករ​ហ្នឹងគឺកំពុង​តែ​នៅ​រង់​ចាំ​ការ​ដោះស្រាយ​របស់​យើង​ ដើម្បី​មាន​កិច្ច​ព្រម​ព្រៀង​ច្បាស់លាស់​ដែរ​បាទ»។​

លោក​ ​អាត់ ធន់​ ​អះអាង​ថា​ ការ​តវ៉ា​របស់​កម្មករ​ដើម្បី​ទាមទារ​ប្រាក់​អតីតភាព​ការងារ​ប្រចាំ​ឆ្នាំ​នេះគឺ​មិន​ផ្ទុយ​នឹង​ច្បាប់ស្តីពី​ការងារ​នោះ​ទេ។ ​លោក​ថា​ បើកម្មករទាមទារ​បាន​ពីថៅ​កែក៏មិន​ខុសឆ្គង ​ តែបើ​ថៅកែ​មិន​ឲ្យ​គឺ​ភាគីខាង​ថៅកែ​ជា​អ្នក​ខុស។​

មេ​ដឹកនាំ​សហជីព​រូបនេះ​បន្ថែម​ថា​ ​កម្មករ​មិន​សូវយល់​ពី​នីតិវិធី​នៃ​ការ​ទទួល​បាន​ប្រាក់​អតីត​ភាព​ការងារ​ប្រចាំ​ឆ្នាំ​ ពីរ​ដង​ក្នុង​មួយ​ឆ្នាំ​ ដែល​នឹង​ត្រូវ​អនុវត្ត​ពី​ឆ្នាំ​២០១៩​ ទើប​បណ្តាល​ឲ្យ​ពួក​គេ​ក្រោក​តវ៉ា។​ លោក​បញ្ជាក់​ទៀត​ថា​ ដើម្បី​បញ្ចប់​វិវាទ​នេះ ក្រសួង​ការងារ​ត្រូវផ្តើម​ពន្យល់​ក្រុម​កម្មករ​ឲ្យច្បាស់​អំពី​ប្រភេទ​កិ​ច្ច​សន្យា​ការងារ​ និង​ភាគី​និយោជក​ត្រូវពន្យល់​កម្មករ​ឲ្យ​បាន​ច្បាស់​ពីការ​ទូទាត់​ប្រាក់​បំណាច់​អតីត​ភាព​ការងារ​ប្រចាំ​ឆ្នាំ​នេះ។​

VOA ​មិនទាន់​អាច​សុំការ​អធិប្បាយ​ពី​លោក​ហេង សួរ​ អ្នក​នាំ​ពាក្យក្រសួង​ការងារបាន​ទេ​ នៅថ្ងៃ​ព្រហស្បតិ៍​នេះ។

លោកខេន លូ​ ​អគ្គ​លេខាធិការ​សមាគម​រោងចក្រ​កាត់ដេរ​នៅ​កម្ពុជា​ បាន​ប្រាប់​ VOA ​ថា ​ រោង​ចក្រ​ W&D Cambodia Co., LTD​ បាន​ធ្វើតាម​ច្បាប់​ក្នុង​ការ​បញ្ឈប់​កម្មករ​ តែ​លោក​ថា​ ​ខាង​សមាគម​កំពុង​សម្រប​សម្រួល​ឲ្យ​រោងចក្រ​នេះ​ ពិចារណា​ទទួល​យក​កម្មករ​វិញ​ ព្រោះ​រោង​ចក្រ​ក៏​ត្រូវ​ការ​កម្លាំង​កម្មករ​ផង​ដែរ។​

«ទទូល​ ឬ​មិន​ទទួល​កម្មករ​ចូលធ្វើការ​វិញ​ អាហ្នឹង​ស្ថិត​នៅ​លើ​រោងចក្រ​ទេ។​ យើង​គ្រាន់​តែ​បានប្រាប់​រោង​ចក្រថា​ ​ពិចារណា ព្រោះ​រោងចក្រ​ត្រូវ​ការ​កម្មករ​ដែរ។ ​ រោងចក្រ​អត់​មាន​កម្មករ ក៏​ដំណើ​រការ​អត់​កើត​ទេ»។​

VOA ព្យាយាម​សុំ​ការ​អធិប្បាយពី​ភាគី​រោងចក្រ​ W&D Cambodia Co., LTD​ តាម​លេខទូរស័ព្ទ​ដែល​មាន​នៅលើ​គេហទំព័រ​របស់​ GMAC ​ ​តែមិន​ទាន់​អាច​ទាក់​ទងបាន​ទេ​ នៅ​ថ្ងៃ​ព្រហស្បតិ៍​នេះ។​

ឧស្សាហ​កម្ម​កាត់​ដេរ​ ដែល​ជា​ឆ្អឹង​ខ្នង​សំខាន់​មួយ​សម្រាប់​ទ្រទ្រង់​កំណើន​សេដ្ឋ​កិច្ច​នៅ​ប្រទេស​កម្ពុជាបាន​ផ្តល់ការ​ងារ​ដល់​កម្មករ​ជាង​៧០​ម៉ឺន​នាក់​ដែល​ភាគ​ច្រើន​ជា​ស្ត្រី។ ​ឧស្សាហ​កម្ម​នេះត្រូវ​ក្រុម​អ្នក​វិភាគ​មើល​ឃើញ​ថា​ ​កំពុង​ស្ថិត​ក្នុង​ភាព​មិន​ប្រាកដ​ប្រជា​ ដោយសារ​តែ​ការ​គំរាម​ដក​ការ​អនុគ្រោះ​ពន្ធ​របស់​សហភាព​អឺរ៉ុប​មក​លើ​ការ​នាំ​ចេញ​ទំនិញ​របស់​កម្ពុជា​ចូលទីផ្សារអឺរ៉ុប។​ សហភាព​អឺរ៉ុប​គឺ​ជា​ទីផ្សារ​ដ៏បំផុត​ បន្ទាប់​ពីសហ​រដ្ឋ​អាមេរិក​សម្រាប់​ទំនិញ​កាត់​ដេរ​កម្ពុជា។​

ធនាគារ​ពិភពលោក​ក៏​បាន​ព្រមាន​កាល​ពី​ពេល​កន្លង​មក​ថា​ ​សេដ្ឋកិច្ច​កម្ពុជា​ក៏​នឹង​ត្រូវ​ប្រឈម​នឹង​ហានិភ័យ​ធំ​មួយ​ផង​ដែរ​ ក្នុង​ករណី​មាន​ការ​សើរើ​ឡើង​វិញ​នៃ​ការ​អនុគ្រោះ​ពន្ធ​ដល់​ទំនិញ​កម្ពុជា​ និង​ការ​ធ្លាក់​ស្រុត​ចុះ​របស់​សេដ្ឋ​កិច្ច​ប្រទេស​ចិន។​

សមាគម​រោងចក្រ​កាត់​ដេរ​នៅ​កម្ពុជា​ធ្លាប់បាន​លើក​ឡើង​ថា​ ​ការ​ផ្អាក​បណ្តោះ​អាសន្ន​នូវ​កម្ម​វិធី​អនុគ្រោះ​ពន្ធ​លើ​«គ្រប់​មុខ​ទំនិញ​ទាំង​អស់​លើក​លែង​តែ​សព្វាវុធ»​ ឬ​ហៅ​ថា​ ​EBA​ ​ឬ​ក៏​ការ​ដាក់​ទណ្ឌ​កម្ម​ឯកតោ​ភាគី​រយៈ​ពេល​ខ្លី​ណា​មួយ​ អាច​នឹង​មាន​ផល​ប៉ះ​ពាល់​រយៈពេល​វែង​លើ​ជីវិត​កម្មករ​ ​និង​គ្រួសារ​របស់​ពួក​គេ។

ដោយ​ឡែក​ លោក​អាត់ ធន់បាន​ឲ្យដឹង​ថា​ ចលនា​នៃ​ការ​តវ៉ា​មិន​បង់​ប្រាក់​អតីត​ភាព​ការងារ​ប្រចាំ​ឆ្នាំ​ពីរ​ដង​ក្នុង​មួយ​ឆ្នាំ​នេះ​ កំពុងតែ​កើត​ឡើង​នៅ​ក្នុង​វិស័យ​ផ្សេង​ទៀត​ ក្រៅពី​វិស័យ​កាត់​ដេរ​នេះ៕

What Next?

Recent Articles

One Response to "តំណាង​អ្នក​ផលិត​ក្នុង​ឧស្សាហ​កម្មកាត់​ដេរ ស្វាគមន៍​ការព្រមាន​របស់​លោក ហ៊ុន សែន លើ​ក្រុម​អ្នក​តវ៉ា​សុំ​ប្រាក់​បំណាច់"

  1. Anonymous says:

    Veitcong mafia dictator never care about nation or country’ all he care is power so this country will be bleeding like Venezeala ‘ because the dictators in the world against the people’s will and agianst the democracy,against the freedom we will see ‘people still suffer because of veitcong mafia dictator and his groups’ GOD will punish them soon