សិស្សពុលអាហារកំពុងសម្រាកព្យាបាលនៅមន្ទីរពេទ្យ។ នគរបាល
Mon, 14 January 2019
ឡុង គីមម៉ារីតា
ភ្នំពេញប៉ុស្តិ៍
បន្ទាយមានជ័យៈ មានសិស្សចំនួន ១២ នាក់ក្នុងចំណោម ១៤២ នាក់ដែលមានអាយុពី ១២ ទៅ ១៦ ឆ្នាំនៅបឋមសិក្សាប៉ោយសំរោង ស្ថិតក្នុងឃុំស្រុកព្រះនេត្រព្រះនៅមិនទាន់ចេញពីមន្ទីរពេទ្យនៅឡើយទេ គិតមកដល់ថ្ងៃម្សិលមិញ បន្ទាប់ពីពួកគេ បានពុលចំណីអាហារ ដែលត្រូវបានចែកជូនដោយជនជាតិកូរ៉េ ១ ក្រុមកាលពីថ្ងៃសុក្រ។
អធិការរង ស្រុកព្រះនេត្រព្រះ លោក ហៀត ឈុនហៃ បានប្រាប់ភ្នំពេញប៉ុស្តិ៍ កាលពីម្សិលមិញថា រហូតមកដល់ថ្ងៃអាទិត្យ មានកុមារចំនួន ១២ នាក់ (ប្រុស ៩ នាក់) ក្នុងចំណោមក្មេង ១៤២ នាក់ កំពុងសម្រាកតាមដានសុខភាព នៅមន្ទីរពេទ្យបង្អែកស្រុក ព្រោះតែអាការជំងឺរបស់ពួកគេ មិនទាន់ធូរស្បើយ។
លោកថ្លែងថា៖ «ខាងសាលាហ្នឹង ក្រុមជនជាតិកូរ៉េ បានចុះមក មានបាយទទួលក្មេងៗគាត់ចុះខាងផ្នែកយេស៊ូហ្នឹង នៅពេលល្ងាចក៏ពុលភ្លាមៗ ប្រជាពលរដ្ឋផ្តល់ព័ត៌មានមក ក៏ខាងសមត្ថកិច្ចចុះទៅ ដឹកជញ្ជូនគាត់មកមន្ទីរពេទ្យ។
ពួកគាត់ (កុមារ ១៤២ នាក់) មានសភាពអស់ជាតិទឹកច្រើន គាត់ខ្សោយ គាត់រាកផងក្អួតផង»។
សមត្ថកិច្ចបានបញ្ចូនចំណីអាហារទាំងនោះ ទៅមន្ទីរពិសោធន៍ដើម្បីឲ្យអ្នកជំនាញធ្វើកោសល្យវិច័យខណៈការសន្និដ្ឋានដំបូងរបស់អាជ្ញាធរ ថាអាចបណ្ដាលមកពីពុលបន្លែមានជាតិគីមីក្នុងបាយដែលក្រុមជនជាតិកូរ៉េចុះផ្សព្វផ្សាយសាសនា បានចែកឲ្យពួកគេ។
តាមការផ្តល់ចម្លើយដល់សមត្ថកិច្ច ក្រុមជនជាតិកូរ៉េ និយាយថា ម្ហូបអាហារដែលពួកគេបានចែកជូនក្មេងៗ គឺមួយចំនួន បានទិញពីផ្សារ ក្នុងក្រុងសិរីសោភ័ណ និងមួយចំនួនបានចម្អិនដោយផ្ទាល់ រួចដាក់ក្នុងប្រអប់ស្នោ ដោយចែកជូនក្មេងៗ បរិភោគតែម្តង។
យ៉ាងណា សមត្ថកិច្ចមិនបានឃាត់ខ្លួនក្រុមជនជាតិកូរ៉េទាំងនោះទេ ដោយគ្រាន់តែហៅមកសាកសួរ ដើម្បីស្វែងរកប្រភពចំណីអាហារនោះតែប៉ុណ្ណោះ ហើយនៅពេលសាកសួរចប់ សមត្ថកិច្ចក៏បានឲ្យពួកគេត្រឡប់ទៅវិញ។ នេះបើតាម អធិការរងរូបនេះ។
លោក វ៉ាត់ វង់ នាយកសាលាបឋមសិក្សាប៉ោយសំរោង មិនអាចទាក់ទងសុំការអធិប្បាយបានទេ កាលពីម្សិលមិញ ប៉ុន្តែ លោកបានប្រាប់សារព័ត៌មានក្នុងស្រុកមួយថា នៅរសៀលថ្ងៃទី ១១ ខែមករា ឆ្នាំ ២០១៩ ជនជាតិកូរ៉េ ១ ក្រុមដែលកាន់សាសនាគ្រិស្ត បានចូលមកក្នុងសាលា ដើម្បីសុំផ្សព្វផ្សាយ សាសនា។
លោកបន្តថា៖ «នៅក្នុងនោះ ក្រុមជនជាតិកូរ៉េ ក៏មានរៀបចំល្បែងកម្សាន្តសម្រាប់ពួកក្មេងៗ រួមទាំងចែកស្ករគ្រាប់ បាយកញ្ចប់ ទឹកសុទ្ធ និងអាវយឺត។ ក្រោយពីចប់ ការលេងល្បែងកម្សាន្តក៏នាំគ្នាញ៉ាំអាហាររួមគ្នាទាំងសិស្ស គ្រូ និងក្រុមជនជាតិកូរ៉េ»។
លោក វ៉ាត់ វង់ បន្តថា ក្រោយពីញ៉ាំអាហាររួចក្មេងៗមួយចំនួន ក៏មានអាការទន់ដៃជើង ក្អួតចង្អោរ និងឈឺពោះ រួចក៏ត្រូវបញ្ជូនទៅកាន់មន្ទីរពេទ្យ។
កាលពីដើមឆ្នាំ ២០១៧ កន្លងទៅ សិស្សសាលាជាង ៣០០ នាក់ នៅឯស្រុកភ្នំក្រវាញ ខេត្តពោធិ៍សាត់ បានធ្លាក់ខ្លួនឈឺ និងត្រូវបានបញ្ជូនទៅសង្គ្រោះនៅមន្ទីរពេទ្យជាបន្តបន្ទាប់ បន្ទាប់ពីពួកគេ បរិភោគចំណីអាហារដែលត្រូវបានក្រុមការងារគណបក្សប្រជាជននៅឃុំសំរោងចែកជូន។ ស្រដៀងគ្នានេះ សិស្សសាលាជាង ៥០ នាក់ផ្សេងទៀត នៅឯអនុវិទ្យាល័យមួយ ក្នុងស្រុកស្ទោង ខេត្តកំពង់ធំ កាលពីថ្ងៃទី ៥ ខែវិច្ឆិកាឆ្នាំ ២០១៨ ក៏បានក្អួតចង្អោរ ទន់ដៃជើង ហើយក៏ត្រូវបានបញ្ជូនទៅសង្គ្រោះនៅមន្ទីរពេទ្យផងដែរ ក្រោយពីពួកគេ បរិភោគអាហារដែលលក់នៅក្នុងសាលារៀននោះ។
លោក ស៊ុំ ចាន់គា មន្ត្រីសម្របសម្រួលអង្គការអាដហុកប្រចាំខេត្តបន្ទាយមានជ័យបានលើកឡើងថា អាជ្ញាធរហាក់នៅមានភាពកម្សោយក្នុងការទប់ស្កាត់លើបញ្ហានេះ ខណៈលោកបារម្ភថា វានឹងនៅតែបន្តកើតមាន និងអាចប៉ះពាល់ដល់អាយុជីវិតពលរដ្ឋកាន់តែច្រើនទៅថ្ងៃអនាគត។
លោកសង្កត់ធ្ងន់ថា៖ «ការដុតដៃដុតជើង ទាល់តែកើតមានបញ្ហាកើតឡើងហើយ បាននាំគ្នាអន្តរាគមន៍ ដែលពីមុនមក មានបានយកចិត្តទុកដាក់ដែរអត់? ការជួយក្នុងពេលនេះ គឺជាការល្អមួយដែរ តែគួរតែមានការយកចិត្តទុកដាក់ និងធ្វើឲ្យបានមុនហ្នឹង»។
បើតាមរបាយការណ៍របស់ក្រសួងសុខាភិបាល ចាប់ពីឆ្នាំ ២០១៥ ដល់ឆ្នាំ ២០១៧ មានមនុស្សពុលអាហារ និងពុលស្រាបានស្លាប់ចំនួន ៤៧ នាក់ ក្នុងចំណោមអ្នកពុលប្រមាណ ៣៨២៤ នាក់ ដែលមូលហេតុនៃការពុលមានដូចជា ពុលនំបញ្ចុក ពុលចំណីអាហារចម្រុះ ត្រីក្រពត ដំឡូងឈើ និងស្រាដែលលាយសារជាតិមេតាណុលជាដើម៕
Contact author: ឡុង គីមម៉ារីតា