មន្ត្រី​ការពារជាតិ​អាមេរិក​បំពេ​ញ​ទស្សនកិច្ច​នៅ​កម្ពុជា ដើម្បី​ពង្រឹង​ទំនាក់ទំនង​យោធា​

ដោយ ហេង រស្មី
2019-01-15
RFA

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

លោក ចូសេហ្វ ហ្វែលធើ (Dr. Joseph H. Felter) (ឆ្វេង) ចាប់​ដៃគ្នាជាមួយ​លោក នាង ផាត (ស្តាំ) ក្នុង​ជំនួប​នៅ​ព្រឹក​ថ្ងៃ​ទី១៥ ខែ​មករា ឆ្នាំ២០១៩។ រូបថត​ដោយ​ស្ថាន​ទូត​អាមេរិក​ប្រចាំកម្ពុជា
លោក ចូសេហ្វ ហ្វែលធើ (Dr. Joseph H. Felter) (ឆ្វេង) ចាប់​ដៃគ្នាជាមួយ​លោក នាង ផាត (ស្តាំ) ក្នុង​ជំនួប​នៅ​ព្រឹក​ថ្ងៃ​ទី១៥ ខែ​មករា ឆ្នាំ២០១៩។ រូបថត​ដោយ​ស្ថាន​ទូត​អាមេរិក​ប្រចាំកម្ពុជា


មន្ត្រី​ជាន់ខ្ពស់​ផ្នែក​ការពារ​ជាតិ​មួយ​រូប​របស់​សហរដ្ឋ​អាមេរិក​មកបំពេញ​ទស្សនកិច្ចនៅ​កម្ពុជា​រយៈពេល​ពីរ​​ថ្ងៃ គឺ​នៅ​ថ្ងៃទី១៥ និង​ ១៦ ខែមករា ដើម្បី​ជជែក​គ្នា​ពី​រឿង​ពង្រឹង​កិច្ច​សហប្រតិបត្តិការ​យោធា​រវាង​ប្រទេស​ទាំងពីរ។ ​របបក្រុង​ភ្នំពេញស្វាគមន៍​ចំពោះកិច្ច​ពិភាក្សា​លើក​ស្ទូយ​​​វិស័យ​យោធា ក៏​ប៉ុន្តែ​មិន​ស្វាគមន៍​ឡើយ​ចំពោះ​​ការ​លើក​ឡើង​ពី​រឿង​នយោបាយ​ក្នុង​ស្រុក​របស់​កម្ពុជា។

ឧបការីរងរដ្ឋ​មន្ត្រី​ក្រសួង​ការពារ​ជាតិ​​អាមេរិក ​ទទួល​បន្ទុក​តំបន់​អាស៊ីខាង​ត្បូង និង​អាស៊ីអាគ្នេយ៍​ បណ្ឌិត​ ចូសេហ្វ ហ្វែលធើ (Dr. Joseph H. Felter) ​បាន​​​​ជួប​​ជាមួយ​រដ្ឋលេខាធិការ​ក្រសួង​ការពារជាតិ​កម្ពុជា​ លោក នាង ផាត នៅព្រឹកថ្ងៃទី ១៥ មករា ដើម្បី​ពិភាក្សា​​គ្នាអំពីចង្ខុ​វិស័យ​រួម ​​​ស្តីពី​តំបន់​ឥណ្ឌូប៉ាស៊ីហ្វិកមួយ​ដែល​​បើក​ចំហ និងមា​ន​ភាព​​សេរី ព្រម​ទាំង​ពិភាក្សា​ពី​របៀប​ដែល​ទំនាក់ទំនងល្អ​​លើ​វិស័យ​យោធា អាច​ជួយ​ឱ្យ​កម្ពុជា​រក្សានូវ​អធិបតេយ្យ​ភាព​របស់​​ខ្លួនបាន​ដោយ​ពេញ​លេញគ្មាន​ការ​បង្ខិត​បង្ខំ ​​ធានា​បាន​នូវ​សន្តិភាព​ជាតិ​ វិបុល​ភាព និង​ឯករាជ្យ​ភាព​សម្រាប់​មនុស្ស​ជំនាន់​ក្រោយ​។

សេចក្តីប្រកាស​ព័ត៌មាន​របស់​ស្ថានទូត​អាមេរិកនៅថ្ងៃទី ១៥ មករា ​​​ឱ្យ​ដឹង​ថា រឿង​សំខាន់​មួយ​ទៀតដែល​លោក​ ចូសេហ្វ ហ្វែលធើ (Dr. Joseph H. Felter) ត្រូវ​លើក​ឡើងនោះ គឺ​ការលើក​កម្ពស់​កិច្ច​សហប្រតិបត្តិ​ការ​យោធា​​រវាងប្រទេស​ទាំងពីរ​​តាម​រយៈការ​ទម្លាក់ចោល​បទចោទ​ប្រកាន់​ទាំងឡាយ​លើ​លោក​ កឹម សុខា និង​អនុញ្ញាត​ឱ្យ​សង្គម​ស៊ីវិល​ និង​ប្រព័ន្ធផ្សព្វផ្សាយ​អាច​ដំណើរការ​បាន​ដោយ​គ្មាន​ការរារាំង​ ខណៈដែល​កម្ពុជា​កំពុង​បន្ត​ពង្រឹងស្ថាប័ន​ជាតិ និង​អនុវត្ត​កំណែទម្រង់​ទាំង​ឡាយ។

នេះ​ជា​លើក​ទីមួយ​ហើយសម្រាប់​ឆ្នាំ ២០១៩ ដែល​មន្ត្រី​ការពារ​ជាតិ​អាមេរិក​មក​បំពេញ​ទស្សនកិច្ច​ផ្លូវ​ការ​នៅកម្ពុជា ខណៈទំនាក់​ទំនង​កម្ពុជា​អាមេរិក នៅលើវិស័យ​នយោបាយ និង​យោធា ហាក់​មិន​មាន​ដំណើរ​ការ​ល្អ​ប៉ុន្មាន​នោះឡើយ​ ដោយ​សារ​របបក្រុង​ភ្នំពេញ​បាន​បង្ហាញ​ជំហរ​លម្អៀងខ្លាំង​ទៅរក​មហាអំណាចចិន ដែល​ជា​គូប្រជែង​ដ៏​ធំ​របស់​អាមេរិក​​។

មន្រ្តី​នាំពាក្យ​របបក្រុង​ភ្នំពេញ​លោក ផៃ ស៊ីផាន ថ្លែង​ថា កម្ពុជា​ស្វាគមន៍​រាល់​ជំនួប​ជាមួយ​មន្ត្រី​ការពារជាតិ​អាមេរិក​ ក្នុង​គោល​បំណង​ពង្រឹង​ទំនាក់ទំនងយោធា​​រវាង​ប្រទេស​ទាំងពីរ និង​ការ​ជួយ​លើក​ស្ទួយ​ឯករាជ្យភាព​របស់​កង​ទ័ពកម្ពុជា​ ក៏​ប៉ុន្តែ​មិន​មែន​ជា​ជំនួប​និយាយ​ពី​រឿង​ដោះលែង​លោក កឹម សុខា នោះឡើយ៖ «ចំពោះ​នាយ​ទាហានជាន់​ខ្ពស់​អាមេរិក​ដែល​មក​ធ្វើ​ទស្សនកិច្ច​នៅ​កម្ពុជា​ ដែល​មាន​ហេតុ​ផល​ និង​ទិសដៅ​ចង់​ពង្រឹង​ឯករាជ្យ​ភាព​ និង​ថាម​ពល​របស់​កង​យោធពលខេមរ​ភូមិន្ទ​នេះ យើង​ស្វាគមន៍។ ក៏​ប៉ុន្តែ​អ្វី​ដែល​គាត់​លើក​ឡើង​ពាក់ព័ន្ធនឹង​ កឹម សុខា នេះ​ជា​រឿង​មួយ​ជ្រៀត​ជ្រែ​កក្នុង​​បញ្ហាធិបតេយ្យ​ភាព​របស់​កម្ពុជា ហើយក៏​ជ្រៀតជ្រែក​នៅក្នុង​កាតព្វកិច្ច​នៃ​ការ​ប្រ​ព្រឹ​ត្ត​ទៅ​របស់​កង​យោធា​ ពីព្រោះ​យោធាមិន​មែន​ស្ថិត​ក្នុង​រឿង​នយោបាយ​នោះ​ទេ។ អាហ្នឹង​យើង​ខ្ញុំ​សុំ​ទោស ហើយ​យើង​មិន​ទទួល​ជា​ដាច់​ខាត»

ដំណើរ​ទស្សនកិច្ចរបស់​មន្ត្រី​ការពារ​ជាតិ​អាមេរិក​នេះ ធ្វើ​ឡើង​បន្ទាប់​ពី​នាវា​ចម្បាំងចិន​ចំនួន​​ ៣ គ្រឿង ដែល​ផ្ទុក​កង​នាវិក​ជិត ៧០០ នាក់ បាន​ចូលចត​នៅ​កំពង់​ផែក្រុងព្រះសីហនុ កាល​ពី​សប្តាហ៍​មុន​ ជា​ទស្សន​កិច្ច​ដែល​របបក្រុង​ភ្នំពេញ​អះអាង​ថា ​ដើម្បី​រឹត​ចំណង​សាមគ្គីភាព និងបង្កើន​​កិច្ច​សហប្រតិបត្តិ​ការ​យោធារវាង​ប្រទេស​ទាំង​ពីរ។

អ្នក​វិភាគនយោបាយ លោក គឹម សុខ ជឿជាក់​ថា ទស្សនកិច្ច​របស់​មន្ត្រី​ជាន់ខ្ពស់​ការពារ​ជាតិ​អាមេរិក​នៅ​កម្ពុជា​នេះ គឺ​ជា​ផ្នែក​មួយ​នៃ​កិច្ច​ខិត​ខំ​ប្រឹង​ប្រែង​របស់​រដ្ឋាភិបាល​ក្រុង​វ៉ាស៊ីនតុនក្នុង​ការ​ជួយ​ស្តារស្ថានការណ៍​នយោបាយ​នៅកម្ពុជា និង​ទប់​ស្កាត់​កុំ​ឱ្យ​មាន​រឿង​ហេតុ​អាក្រក់កើត​ឡើង​នៅពេល​ខាង​មុខតាម​រយៈ​ការ​ឃុប​ឃិត​គ្នា​រវាងរបបក្រុងភ្នំពេញ​ និង​ប្រទេស​ចិន​កុម្មុយនីស្ត​នៅ​​លើ​វិស័យ​នយោបាយ សេដ្ឋកិច្ច និង​យោធា។ លោក​ជឿជាក់​ថា សហរដ្ឋ​អាមេរិក​មិនទាន់​អស់​ចិត្ត​នៅ​ឡើយទេ​​ទាក់ទង​នឹង​រឿង​ព័ត៌មាន​ស្តីពីការ​កសាង​មូល​ដ្ឋានកង​ទ័ពចិន​នៅលើ​ទឹក​ដី​កម្ពុជា ទោះបី​ជា​របប​ក្រុង​ភ្នំពេញ​បានបដិសេធ​រួច​ទៅហើយ​ក្តី ដូច្នេះ​លោក​អះអាងថា ទស្សនកិច្ច​របស់​មន្ត្រី​ការពារជាតិ​អាមេរិក​នេះ ក៏​ជា​ការ​ព្រមានដល់ក្រុម​មេដឹកនាំ​នៃ​​​របបក្រុង​ភ្នំពេញ​​ផង​ដែរ៖ «ល្បិចកល​ទាំងឡាយ​ដែល​លោក​ ហ៊ុន សែន​ កំពុង​តែ​ធ្វើ​ដោយ​ស្ងាត់ៗ​ជាមួយ​ចិន​ក្តី ដោយ​យុទ្ធសាស្ត្រ​ផ្ទៃក្នុង​បក្ស​ប្រជាជន​ ផ្ទៃក្នុង​ជាតិ​គំរាម​ពលរដ្ឋ​ឯង​ក្តី គឺ​គេ​ដឹង​ទាំងអស់។​ ម៉្លោះ​ហើយ​ដំណើរ​ទស្សនកិច្ច​របស់​មន្ត្រី​ការពារ​ជាតិ​ជាន់​ខ្ពស់​របស់​អាមេរិក​ ជា​ការ​រំឭក​ផង ជា​ការ​ព្រមាន​ផង ហើយ​ក៏​ចង់​ចូល​រួម​ដោះស្រាយបញ្ហា​ប្រទេស​កម្ពុជា​ផង នៅ​ក្នុង​លក្ខខណ្ឌ​ដែល​មាន​វិបត្តិធ្ងន់ធ្ងរ​អំពី​ប្រជាធិបតេយ្យ ដែលត្រូវ​​​ក្រុមលោក​ ហ៊ុន សែន ប្រើ​កណ្តាប់​ដៃដែក​ ស្ទើរ​តែ​សម្លាប់​ទាំងស្រុង​នៅ​ប្រទេស​កម្ពុជា​បច្ចុប្បន្ន​នេះ»

ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ របបលោក​ ហ៊ុន សែន បាន​បែរ​ខ្នង​ដាក់​អាមេរិក​​កាន់​តែខ្លាំង នៅ​​លើ​វិស័យ​យោធា ក្រោយ​របបនេះ​ទទួល​បាន​ជំនួយផ្នែក​ហិរញ្ញវត្ថុ និង​បច្ចេកទេស​ជា​ច្រើន​​សន្ធឹក​សន្ធាប់​ពី​របប​ក្រុង​ប៉េកាំង​។ របបនេះ​បានលុប​ចោល​សមយុទ្ធយោធា “ឆ្មាំអង្គរ” ជាមួយ​អាមេរិក​ កាល​ពី​ឆ្នាំ ២០១៧ កន្លង​ទៅ ដោយ​លើក​ហេតុ​ផល​ថា ជាប់​រវល់​​​រៀប​ចំ​​​សន្តិសុខ​សម្រាប់​ការ​​បោះឆ្នោត ក៏​ប៉ុន្តែ​ជាង ២ ឆ្នាំមក​នេះ របប​ក្រុង​ភ្នំពេញ​មិន​ដែល​បង្ហាញ​បំណង​ណាមួយ​ក្នុង​ការ​រៀប​ចំ​សមយុទ្ធយោធា​ជាមួយ​អាមេរិក​ជាថ្មី​ទៀតឡើយ​ ខណៈរបបនេះ​បាន​រៀបចំ​សមយុទ្ធយោធា​នាគមាស​ជាមួយ​ប្រទេសចិន​ពីរ​ដង​រួច​ទៅ​ហើយ និងកំពុង​​ត្រៀម​រៀប​ចំ​លំហាត់​នាគមាស​ជាមួយ​យោធាចិន​ ​ឱ្យ​បាន​ធំជាង​មុនទៀត​នៅ​ឆ្នាំ ២០១៩ នេះ។

ចំពោះ​ទស្សនកិច្ច​របស់​មន្ត្រី​​ជាន់​ខ្ពស់​​ផ្នែក​​ការពារ​​ជាតិ​​របស់​​សហរដ្ឋ​អាមេរិកនៅ​កម្ពុជារយៈពេលពីរ​ថ្ងៃនេះវិញ មន្ត្រីកិច្ច​ការ​សាធារណៈ និង​ជា​អ្នក​នាំពាក្យ​ស្ថានទូត​អាមេរិក​ប្រចាំកម្ពុជា លោក អេរេន ឆ្វាតចេស (Arend C. Zwartjes) ​​មិន​ធ្វើ​អត្ថាធិប្បាយ​បន្ថែម​ជុំ​វិញ​ជំនួប​របស់​​ ចូសេហ្វ ហ្វែលធើ (Dr. Joseph H. Felter) និង​លោក​ នាង ផាត នោះទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


What Next?

Recent Articles