EU រក្សា​ជំហរ​ដក EBA បើ​ស្ថានភាព​នយោបាយ​មិន​ប្រសើរ​ឡើង

សេដ្ឋកិច្ច


រូបឯកសារ៖ បុរស​ម្នាក់​កាន់​ទង់ជាតិ​សហភាព​អឺរ៉ុប នៅ​ខាង​ក្រៅ​សភា​​អង់គ្លេស​ ក្នុង​ទីក្រុង ឡុងដ៏ កាល​ពី​ថ្ងៃ​ទី៨ ខែមករា ឆ្នាំ២០១៩។ (AP)


24 មករា 2019
ម៉ែន គឹមសេង
វីអូអេខ្មែរ

កិច្ចប្រជុំ​ថ្នាក់រដ្ឋមន្ត្រី​របស់​អាស៊ាន​និង​​សហភាពអឺរ៉ុប​​​បាន​បញ្ចប់​ទៅ​ដោយ​មានការយល់​ព្រម​បង្កើន​ទំនាក់​ទំនង​ដល់កម្រិត​ដៃគូយុទ្ធសាស្ត្រ​​ ប៉ុន្តែ​មិន​​បាន​​លើក​ឡើង​ពី​​បញ្ហា​កម្ពុជា​​តាម​ការ​ស្នើសុំ​​របស់​​អតីត​គណបក្ស​ប្រឆាំង​ ដែល​ចង់​ឱ្យ​យក​​ជាចំណុច​សំខាន់​មួយ​នៃ​ការពិភាក្សា​​គ្នា​នោះ​ទេ។ នេះ​បើតាម​ការបញ្ជាក់​របស់​មន្ត្រី​សហភាពអឺរ៉ុប។

ក្រុមរដ្ឋមន្ត្រី​ការបរទេស​អាស៊ាន​និង​សហភាព​អឺរ៉ុប​បាន​ជួប​ប្រជុំ​គ្នា​លើកទី​២២​ រយៈពេល​មួយ​ថ្ងៃនៅទីក្រុង ប៊្រុចសែល​ ប្រទេស​បែលហ្សិក​ កាលពីថ្ងៃច័ន្ទ​ ដោយ​ផ្តោតលើការពង្រឹង​ទំនាក់​ទំនងនិងសហ​ប្រតិបត្តិការលើ​គ្រប់វិស័យ​។

ក្នុងពេល​ដែល​កិច្ចប្រជុំ​នោះ​កើត​ឡើង​លោក សម រង្ស៊ី ​ប្រធាន​ស្តីទី​គណបក្ស​សង្គ្រោះ​ជាតិ​បាន​ចេញ​សេចក្តី​ថ្លែងការណ៍មួយថាក្នុងការពិភាក្សា​នោះ​«ប្រទេសកម្ពុជា​ត្រូវ​តែ​ស្ថិត​ក្រោម​ការ​ពិនិត្យ​មើល‍»​ផងដែរ ដោយ​លោក​បាន​លើកឡើង​ពីករណី​ធ្វើ​បាប​អតីត​អ្នកគាំទ្រ​គណបក្ស​សង្គ្រោះជាតិ​ ដូច​ជា​ករណី​លោក​គង់ ម៉ះ ត្រូវ​ចាប់​ខ្លួន​កាលពីថ្ងៃទី​១៦​ខែ​មករា​ដោយគ្រាន់តែ​លោក​ចែក​ផ្សាយ​បន្ត​ពី​ការយក​ពន្ធ​អង្ករ​កម្ពុជា​ដែល​នាំចូល​ទីផ្សារ​សហភាពអឺរ៉ុប។​

សេចក្តីថ្លែងការណ៍​របស់​លោក សម រង្ស៊ី​ បាន​បន្ត​ថា​៖

«ក្រុមរដ្ឋ​មន្ត្រី​សហភាព​អឺរ៉ុប​ត្រូវ​តែ​ទទូច​ថា​ទាំង​សហភាព​អឺរ៉ុប​និង​កម្ពុជា​ត្រូវតែ​គោរព​តាម​ពេញ​លេញ​និង​ទាំង​ស្រុង​តាម​គ្រប់មាត្រា​នៃ​កិច្ច​ព្រមព្រៀង​ពាណិជ្ជកម្ម​ ដែលផ្តល់មូលដ្ឋាន​សម្រាប់​លទ្ធិ​ប្រជាធិបតេយ្យ​ក្នុង​ប្រទេស​កម្ពុជា​និង​ការគោរព​សិទ្ធិ​មនុស្ស​និង​សង្គមកិច្ច»។​

លោកស្រី ​មូរ សុខហួរ ​អនុប្រធានគណបក្ស​សង្គ្រោះជាតិបាន​លើកឡើ​ង​ថា​កិច្ច​ប្រជុំ​ថ្នាក់​អន្តរជាតិ​ដូច​នេះ​គឺជា​កាតព្វកិច្ច​ចាំបាច់​ដែល​ត្រូវ​លើកយក​ករណី​ប្រទេស​សមាជិក​មក​ដោះ​ស្រាយ​ព្រោះវា​ជាការប៉ះពាល់​ដល់​សហគមន៍​ទាំងមូល៖

«យើងក៏ជឿជាក់ដែរថា​បើសិនជា​ប្រទេស​ណាមួយ​ធ្វើ​ឱ្យ​មានការ​អាក់​ខាន​ រាំងស្ទះ នូវ​ការ​វិវត្តន៍នៃ​ការងារ​ នូវការជំរុញ​ឱ្យ​មាន​កិច្ច​សហប្រតិបត្តិការ​ មានការគោរព​គ្នា​ទៅវិញ​ទៅមក​ប្រទេស​នោះ​ច្បាប់​ជា​មិនរួចខ្លួនពីសម្ពាធ​ពី​សហគមន៍​អឺរ៉ុប​ឬ​ពីអាស៊ាន​ទាំងមូលទេ‍»។

លោក​ស្រី​ ម៉ាចា គូស៊ី​ចាន់ស៊ីក ​អ្នកនាំពាក្យ​សហភាព​អឺរ៉ុប​ខាងផ្នែក​គោល​នយោបាយ​សន្តិ​សុខ​និង​កិច្ច​ការ​បរទេស​បាន​ប្រាប់​វីអូអេ​តាម​សារអេឡិកត្រូនិក​ថាកិច្ច​ប្រជុំ​នោះមិន​បាន​ផ្តោត​លើ​ប្រទេស​ណាមួយ​ឡើយដូច្នេះ​ក៏​មិន​បាន​លើក​ឡើង​ពី​ករណី​ប្រទេស​កម្ពុជា​ដែរ។​

លោកស្រី​ ម៉ាចា គូស៊ីចាន់ស៊ីក​ បាន​បន្ថែមទៀតថាសហភាព​អឺរ៉ុប​កត់សម្គាល់​ពីការ​វិវត្តន៍​ថ្មីៗ​នៅ​ប្រទេស​កម្ពុជា​ដែល​ក្នុងនោះ​មាន​ការដោះលែង​អ្នកនយោបាយ សកម្មជន​សង្គម​ស៊ីវិល និង​អ្នកសារព័ត៌​មាន ក៏​ដូច​ជា​ការ​ធ្វើ​វិសោធនកម្ម​ច្បាប់​គណបក្ស​នយោបាយ​ជាដើម។ សហភាព​អឺរ៉ុប​ចាត់​ទុក​ថា​វា«ជា​ជំហាន​វិជ្ជមាន‍»ហើយសង្ឃឹម​ថា​«​រដ្ឋាភិបាល​នឹង​ធ្វើ​សកម្ម​ភាព​បន្ថែម​ទៀត‍»។​

លោកស្រី​បន្ថែម​ថា​សហភាព​អឺរ៉ុប​នៅ​រក្សា​ច្រក​ចរចា​បើក​ចំហ​ជាមួយ​កម្ពុជា​ជានិច្ច​និង​បញ្ជាក់​ថា៖

«ប្រសិនបើ​កម្ពុជា​ចាត់​វិធានការ​គួរឱ្យ​ទុក​ចិត្ត​បាន​និង​ជាទីពេញចិត្ត​ដើម្បី​ដោះស្រាយ​យ៉ាង​រហ័ស​នូវ​ស្ថានភាព​ដែល​បាន​បណ្តាល​ឱ្យ​យើង​ចាប់ផ្តើម​ដំណើរការ​ដក​ហូត​ឋានៈ​អនុគ្រោះពន្ធ​ នោះ​សហភាព​អឺរ៉ុប​នឹង​ពិចារណា​សភាពការណ៍​នេះ‍»។​

បើទោះបីជា​កិច្ចប្រជុំរវាងរដ្ឋមន្ត្រី​ការបរទេស​អាស៊ាន​និងសហភាព​អឺរ៉ុបមិន​បាន​លើកឡើង​ដោយចំពោះលើ​ករណី​ប្រទេស​កម្ពុជា​ប៉ុន្តែ​បញ្ហា​កម្ពុជា​ត្រូវបាន​លើកឡើង​ក្នុង​កិច្ច​ប្រជុំ​ទ្វេភាគី​រវាង​លោកស្រី​ សេស៊ីលៀ ម៉ាល់ស្ត្រុម (Cecilia Malmstrom) ​ស្នងការ​ពាណិជ្ជកម្ម​សហភាព​អឺរ៉ុបជាមួយ​នឹង​លោក​ ប្រាក់ សុខុន រដ្ឋមន្ត្រី​ការបរទេស​កម្ពុជា។

រូបឯកសារ៖ ស្នងការ​ពាណិជ្ជកម្ម​សហភាព​អឺរ៉ុប អ្នកស្រី Cecilia Malmström ថ្លែង​ក្នុង​ទីក្រុង ប៊្រុចសែល។ (AP)

រូបឯកសារ៖ ស្នងការ​ពាណិជ្ជកម្ម​សហភាព​អឺរ៉ុប អ្នកស្រី Cecilia Malmström ថ្លែង​ក្នុង​ទីក្រុង ប៊្រុចសែល។ (AP)


លោកស្រី ​សេស៊ីលៀ ម៉ាលស្ត្រុម ​បាន​បញ្ជាក់​តាម​សារ​ធ្វីតថឺពី​ជំនួប​ជាមួយ​នឹង​លោក​ប្រាក់​ សុខុននៅ​ក្នុង​ទីក្រុង​ប៊្រុចសែល​ថា​៖

«យើង​បាន​ពិភាក្សា​ពី​កិច្ច​ព្រមព្រៀង​EBA ​និង​លទ្ធភាព​ដក​ហូត​ឋានៈ​អនុគ្រោះពន្ធ។ ដោយ​បាន​បញ្ជាក់​ពី​ការព្រួយ​បារម្ភ​របស់​យើង​ពី​លទ្ធិ​ប្រជាធិបតេយ្យ សិទ្ធិ​មនុស្ស​ និង​នីតិរដ្ឋ។ សហភាព​អឺរ៉ុបនៅបន្ត​ច្រក​ចរចា​បើក​ចំហ​ដដែល‍»។​

រីឯ​លោក​ប្រាក់ សុខុន ក៏បាន​បញ្ជាក់​តាមទំព័រហ្វេសប៊ុក​របស់​លោក​ដែរ​ថាលោក​បាន​ជួប​ពិភាក្សា​ការងារ​ជាមួយលោកស្រី សេស៊ីលីលៀ ម៉ាលស្រ្តុម នៅក្រៅកិច្ចប្រជុំលើកទី២២ រដ្ឋមន្រ្តីការបរទេសអាស៊ាន-សហភាពអឺរ៉ុប​ដែរប៉ុន្តែ​លោក​មិន​បាន​បញ្ជាក់​ពី​ជំហរ​របស់​កម្ពុជា​ទេ។​

លោកស្រី មូរ សុខហួរ ​បាន​បន្ថែម​ដែរ​ថា៖

«ដូច្នេះ​លោកស្រី សេស៊ីលៀ ម៉ាលស្ត្រុម​ បង្ហាញ​ខ្លួន​កាលពីម្សិលមិញ​នៅ​ចំពោះកម្ពុជា​យើង​ថា​EU ​គេមិន​ដក​ថយ​ទេ​។ ក៏ប៉ុន្តែ​គេនៅតែ​ទុក​ពេល​វេលា​ ទុក​ពេល​ហ្នឹង​ចំហរ​ដើម្បី​ជជែក​គ្នា​ គឺ​មាន​ន័យ​ថា​ទុក​ឱ្យ​របប​លោក​ហ៊ុន សែន​នេះ​បំពេញ​នូវ​អ្វី​ដែល​ជា​លក្ខខណ្ឌ​របស់​EU ​បើសិន​ជាចង់​ប្រើ​ទីផ្សារ​របស់​ EU‍»។​

សហភាព​អឺរ៉ុប​បាន​ចាប់ផ្តើម​ដំណើរ​ការ​ពិនិត្យ​មើល​លទ្ធភាព​ដក​ឋានៈ​អនុគ្រោះពន្ធ​«គ្រប់មុខ​ទំនិញ​លើកលែង​សព្វាវុធ‍»(EBA) ​តាំងពីខែ​តុលា​មក​ដោយ​សារតែការដើរ​ថយ​ក្រោយ​នៃ​លទ្ធិ​ប្រជាធិបតេយ្យ​និង​សិទ្ធិមនុស្ស​នៅកម្ពុជា​ក្រោយពី​រដ្ឋាភិបាល​របស់​លោក​នាយក​រដ្ឋមន្ត្រី​ហ៊ុន សែន​បាន​ធ្វើ​ទុក្ខបុកម្នេញ​អ្នកនយោបាយ​អតីត​គណបក្ស​ប្រឆាំង បង្ក្រាប​លើ​បណ្តាញ​ព័ត៌មាន​ឯករាជ្យ និង​អង្គការ​សង្គមស៊ីវិល​នៅ​មុន​ពេល​បោះឆ្នោត​ជាតិ​ខែកក្កដា​ឆ្នាំ​២០១៨។

​សារព័ត៌មាន ​Bloomberg របស់​សហរដ្ឋ​អាមេរិក​បាន​រាយការណ៍​កាលពី​ថ្ងៃ​អង្គារ​ថា​សហភាព​អឺរ៉ុបបានស្នើ​ឱ្យ​រដ្ឋ​សមាជិក​របស់​ខ្លួន​ផ្តល់​ការយល់ព្រម​ត្រឹម​ថ្ងៃទី​២៩​ខែ​មករា​នេះ​ដើម្បី​ព្យួរ​ឋានៈ​អនុគ្រោះពន្ធEBA។

សហភាព​អឺរ៉ុប​គឺជា​ទីផ្សារ​នាំចេញ​ដ៏ធំ​ជាងគេ​បំផុត​របស់​កម្ពុជា​ហើយ ការអនុគ្រោះពន្ធ​ធ្វើ​ឱ្យ​កម្ពុជា​ចំណេញ​ប្រាក់​ជិត​៧០០​លាន​ដុល្លារ​ក្នុង​មួយឆ្នាំៗ។ ប៉ុន្តែ​កាលពី​ថ្ងៃសុក្រ​សប្តាហ៍​មុន​សហភាព​អឺរ៉ុប​បាន​ចាប់ផ្តើម​យក​ពន្ធ​អង្ករ​កម្ពុជា​រយៈ​ពេល​៣ឆ្នាំ​ដោយ​សារ​តែ​បរិមាណ​នាំ​ចូល​មាន​ការកើនឡើង​ច្រើន ដែលការណ៍​នេះធ្វើ​ឱ្យ​កម្ពុជា​ត្រូវ​បង់​ពន្ធ​ចំនួន​៥០​លានដុល្លារ​ក្នុង​មួយឆ្នាំៗ។​

លោក ផៃ ស៊ីផាន​ អ្នកនាំពាក្យ​រាជរដ្ឋាភិបាល​កម្ពុជា​បញ្ជាក់​ថា​ការចរចាគ្នា​រវាង​កម្ពុជា​និង​សហភាព​អឺរ៉ុប​កំពុង​តែ​ដំណើរការ​ហើយ​រដ្ឋាភិបាល​កម្ពុជា​ត្រៀមខ្លួន​នឹង​បង់ពន្ធ​ដោយ​សារ​តែ​ចំណូល​កើនឡើង​ក្នុង​ប្រទេស​ដែល​ជា​លក្ខខណ្ឌ​មួយ​តម្រូវ​ឱ្យ​ប្រកួតប្រជែង​ស្មើភាព​ជាមួយ​នឹង​ប្រទេស​ដទៃ​ទៀត។

លោក​ ផៃ ស៊ីផាន​ បាន​បន្ថែម​ទៀតថា៖​

«អង្គការ​ពិភពលោក​ ដូច​ជា​ធនាគារពិភពលោក ដូច​ជា​រូបិយវត្ថុ​អន្តរជាតិ​ បាន​វាយ​តម្លៃ​ថា​កម្ពុជា​មាន​ចំណូល​ខ្ពស់​ដែល​ឈរ​លំដាប់​ទីមួយ​នៅ​តំបន់​ អាស្រ័យ​ហេតុ​ដូច្នេះ​វាជា​កត្តា​មួយ​ដែលធ្វើ​ឱ្យ​យើង​មាន​ការ​ពិបាក​ក្នុងការ​ស្វែង​រក​កិច្ច​អនុគ្រោះ​ពន្ធ​ទាំងអស់។ ដូច្នេះ​យើង​នឹង​ប្រឈម​ការបង់ពន្ធ​ខ្លះ​ហើយ​ក៏ប៉ុន្តែ​បង់ពន្ធ​ប៉ុណ្ណា​ដែល​ជា​ភាពអនុគ្រោះ​សម្រាប់​កម្ពុជា​យើង​ទៅមុខ​ទៀត‍»។

ប៉ុន្តែខាងវិស័យ​ឯកជន​មានជំហរ​ផ្សេង​ពីនេះ។ សភា​ពាណិជ្ជ​កម្ម​កម្ពុជា​ និង​តំណាង​ខាង​វិស័យ​ឯកជន​ផ្សេង​ទៀត មាន​ទាំង​ខាង​សភាពាណិជ្ជ​កម្ម​សហភាព​អឺរ៉ុប ​អ្នក​ផលិត​សម្លៀក​បំពាក់​នៅ​កម្ពុជា​ ​ឬ​ ​GMAC​ ​និង​សហជីពក៏បាន​ផ្ញើ​លិខិត​មួយ​កាលពីថ្ងៃច័ន្ទ​ដែរ ​ជូន​អ្នកស្រី សេស៊ីលៀ ម៉ាលស្ត្រុម ដោយ​បាន​បញ្ជាក់​ឲ្យដឹង​ថា​ ទោះបី​សហ​ភាព​អឺរ៉ុប​មិន​ទាន់​ផ្តល់​សេចក្តី​សន្និដ្ឋាន​ចុង​ក្រោយ​ថា​ ​នឹង​ដក​ប្រព័ន្ធ​អនុគ្រោះ​ពន្ធ​ ​EBA​ ​ពី​កម្ពុជា​ក៏​ដោយ​ ពោល​គឺ​គិត​ចាប់តាំង​ពី​ការ​ប្រ​កាស​ផ្លូវ​ការ​នៃ​ការ​ដក​ប្រព័ន្ធ​អនុ​គ្រោះ​ពន្ធនេះ​មកនោះ​ ក៏​«ផល​វិបាល​ជា​ច្រើន​នៃ​ការ​សម្រេច​ចិត្ត​នេះ​នឹង​បង្កការ​ខូច​ខាត​ខាង​សេដ្ឋកិច្ច​ធ្ងន់​ធ្ងរមក​លើ​ប្រទេស​កម្ពុជា»​ផង​ដែរ។​

ក្រុម​តំណាង​វិស័យ​ឯកជន​បាន​ឲ្យដឹង​ទៀត​ថា​ ​«ការ​សម្រេចនោះ​នឹង​អាចជា​ការ​មិន​អើពើ​ដល់​ការ​ខិត​ខំយ៉ាង​សម្បើម​របស់​វិស័យ​ឯកជន​កម្ពុជាដើម្បី​ធ្វើ​ឲ្យ​ស្រប​តាម​គុណតម្លៃ​ និង​គោល​នយោបាយ​ជាមួយ​គំរូ​សេដ្ឋកិ​ច្ច​ ដែល​នាំមុខ​ដោយ​សហភាព​អឺរ៉ុប»៕

What Next?

Related Articles

3 Responses to "EU រក្សា​ជំហរ​ដក EBA បើ​ស្ថានភាព​នយោបាយ​មិន​ប្រសើរ​ឡើង"

  1. Anonymous says:

    HUN SEN can not lie to international community. HUN SEN must not use his childish policy and getting away from the truth. HUN SEN must be responsible for this people and his own nation. we Cambodian will not forgive to HUN SEN from his big mistake that he is playing game to international community. we Cambodian can see HUN SEN’s political manipulation to the world clearly and we knew that he can not hiding the truth from EU. the expression said you can run but you can not hiding is coming to hunt HUN SEN. I just wanted to tell all this jungle war lord that western investigation is 100% clear. if you want to contest it you have to showing your true evident . consequent is come to hunt HUN SEN right now do or die is the answer. I knew HUN SEN will not give up his evil act that right he running to CHINA for help. sorry CHINA is not GOD that can help this evil to do what he always wanted. CHINA can not even help themselves even those they are trying to be a supper power nation . the question is how many nation that wanted CHINA to become a supper powers in the world. jus like HUN SEN the question is how many Cambodian wanted him to be the leader of this nation ??? life is too short Mr time to die and reserve what you have done to this poor nation. GOD bless Cambodia and it’s people

  2. so socheath says:

    EU រក្សា​ជំហរ​ដក EBA បើ​ស្ថានភាព​នយោបាយ​មិន​ប្រសើរ​ឡើង។
    ចំណែកកម្ពុជា​ រក្សា​ជំហរ​​ មិនលក់អធិបតេយ្យភាពជាតិ ដើម្បីដូរជំនួយជាថ្នាំពិសរបស់EU នោះទេ។
    អធិបតេយ្យភាពខ្មែរ មិនអាចឲ្យរំលោភបំពានបានពីសំណាក់ប្រទេសដ៍ទៃនោះទេ ។ ជនក្បត់ជាតិ ខ្មែរត្រូវតែទទួលទោសយ៉ាងធ្ងន់ធ្ងរបំផុត ព្រោះនេះជាច្បាប់របស់កម្ពុជា ។

  3. Anonymous says:

    No other countries can order cambodia only cbong uong mourng nam veitcong haha