ពលរដ្ឋ​ និង​សង្គម​ស៊ីវិល​នៅ​ខេត្ត​បន្ទាយមានជ័យ​ស្នើ​អាជ្ញាធរ​ចាត់​វិធានការ​ជនជាតិ​ចិន​បាញ់រះ​បង្ក​របួស​ស្នាម

2019-02-11
RFA

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

ប៉ូលិស​អន្តោប្រវេសន្ត​ចាប់​ជនជាតិ​ដី​គោក​នៅ​បន្ទប់​ជួល​ជាប់​អូរ​ព្រំដែន ភូមិ​ក្បាលស្ពាន១ សង្កាត់​ប៉ោយប៉ែត ក្រុង​ប៉ោយប៉ែត ខេត្ត​បន្ទាយមានជ័យ កាល​ពី​ថ្ងៃ​ទី​២ សីហា ឆ្នាំ​២០១៧។ Photo provided
ប៉ូលិស​អន្តោប្រវេសន្ត​ចាប់​ជនជាតិ​ដី​គោក​នៅ​បន្ទប់​ជួល​ជាប់​អូរ​ព្រំដែន ភូមិ​ក្បាលស្ពាន១ សង្កាត់​ប៉ោយប៉ែត ក្រុង​ប៉ោយប៉ែត ខេត្ត​បន្ទាយមានជ័យ កាល​ពី​ថ្ងៃ​ទី​២ សីហា ឆ្នាំ​២០១៧។ Photo provided


ប្រជាពលរដ្ឋ​ និង​មន្ត្រី​អង្គការ​សង្គម​ស៊ីវិល​ធ្វើ​ការងារ​ផ្នែក​ការពារ​សិទ្ធិ​មនុស្ស​នៅ​ខេត្ត​បន្ទាយ​មានជ័យ​ ស្នើ​ឲ្យ​សមត្ថកិច្ច​ពាក់ព័ន្ធ​​ចាត់​វិធាន​ការ​ទៅ​តាម​ផ្លូវ​ច្បាប់​បាន​តឹងរ៉ឹង​ករណី​​ជនជាតិ​ដែល​បាន​បាញ់រះ​បង្ក​របួស​ស្នាម​នៅ​ក្រុង​ប៉ោយប៉ែត ​កាល​ពី​យប់​ថ្ងៃ​ទី​១០​កុម្ភៈ។ ពួក​គេ​ថា ករណី​នេះ​ជា​ការ​បង្ក​អសន្តិសុខ​សង្គម​ ដែល​ធ្វើ​ឲ្យ​ពលរដ្ឋ​ខ្មែរ​រស់​នៅ​​មិន​មាន​សុវត្ថិភាព។

ប្រជាពលរដ្ឋ​នៅ​ក្រុង​ប៉ោយប៉ែត​ លោក​ ប៊ុន សុទ្ធី​ ថ្លែង​ប្រាប់​អាស៊ី​សេរី​នៅ​ព្រឹក​ថ្ងៃ​ទី​១១កុម្ភៈ​ថា តាំង​តែ​ជនជាតិ​ចិន​មក​រស់​នៅ​​ក្រុង​ប៉ោយប៉ែត​កាន់តែ​ច្រើន​ធ្វើ​ឲ្យ​​មួយ​រយៈ​ចុងក្រោយ​នេះ​ ​ពួកគេ​រស់​នៅ​ទាំង​ភ័យ​ខ្លាច​ ព្រោះ​ជនជាតិ​ទាំង​នោះ​បាន​បង្កជម្លោះ​ជា​មួយ​ចិន​គ្នា​ឯង​ជា​ច្រើន​លើក​មក​ហើយ​​ ។លោក​បន្ត​ថា​ ​ជនជាតិ​ចិន​រហូត​ហ៊ាន​បាញ់​បោះ​ដោយសេរី​នៅ​លើ​ទឹក​ដី​ខ្មែរ​ដូច្នេះ​គឺ​ជា​ការ​​គ្រោះ​ថ្នាក់​ដល់​​ពួកគាត់​យ៉ាង​ខ្លាំង​ ហើយ​អាជ្ញាធរ​ត្រូវ​តែ​ចាត់​វិធានការ​ជនជាតិ​បរទេស​ទាំង​នេះ​ឲ្យ​បាន​តឹងរ៉ឹង​ ដើម្បី​កុំ​ឲ្យ​ពួកគេ​បង្ក​អសន្តិសុខ​នៅ​ក្នុង​សង្គម​ទៀត៖ «ហើយ​ដើរ​អត់​មាន​សណ្ដាប់ធ្នាប់​ទេ​ពី​មុន​យើង​ឃើញ​ខ្មែរ​ដើរ​មិន​គោរព​ច្បាប់​ តែ​ឥឡូវ​ខ្មែរ​ទៅ​ណា​មក​ណា​ខ្លាច​ម៉ូតូ​ខ្លាច​ឡាន​បុក​ ប៉ុន្តែ​បើ​ពួក​ចិន​វិញ​ បើ​ថា​មាន​គ្នា​២នាក់​គឺ​ដើរ​ពីរ​ជួ​ គឺ​ដើរ​៥នាក់​ប្រាំ​ជួ​ ហើយ​វា​មិន​ស្ដាប់​ស៊ីផ្លេ​ឡាន​ម៉ូតូ​ទេ​ ហើយ​យើង​មាន​តែ​បង្អន់​សិន​ ហើយ​រក​ផ្លូវ​គេច​ទៅ​ព្រោះ​ខ្លាច​ប៉ះពាល់​ចិន​មាន​បញ្ហា​ដល់​ខ្លួន​ឯង​ ព្រោះ​យើង​មិន​ដឹង​ថា​គេ​មាន​កាំភ្លើង​ឬ​មាន​កាំបិត​ជាប់​ខ្លួន​នោះ​ទេ បាន​ជា​គេ​ដើរ​គ្មាន​សណ្ដាប់ធ្នាប់​ដូច្នេះ»

ប្រតិកម្ម​របស់​ពលរដ្ឋ​នេះ​បន្ទាប់​ពី​ជនជាតិ​ចិន​ពីរ​ក្រុម​បាន​ឈ្លោះ​ទាស់ទែង​គ្នា​ ហើយ​ដក​កាំភ្លើង​ខ្លី​បាញ់​ចិន​គ្នា​ឯង​ នៅ​ក្នុង​ខារ៉ាអូខេ​ឈ្មោះ​ឡាហ្វីរ៉ា​ នៅ​ភូមិ​បាលិលេយ្យ​សង្កាត់​ប៉ោយប៉ែត​ ​បណ្ដាល​ឲ្យ​ជន​ជាតិ​ម្នាក់​របួស​ជើង​ខាង​ស្ដាំ កាល​ពី​យប់​ថ្ងៃ​ទី​១០​កុម្ភៈ។

អាស៊ី​សេរី​មិនទាន់​អាច​សុំ​អត្ថាធិប្បាយ​ពី​ស្នងការ​រង​នគរបាល​ខេត្ត​បន្ទាយមានជ័យ​ទទួល​បន្ទុក​ផ្នែក​ព្រហ្មទណ្ឌ​​ លោក សិទ្ធ ឡោះ​ បាន​នៅ​ឡើយ​ទេ​ ដោយ​លោក​ប្រាប់​ថា​ជាប់​ចុះ​បេសកកម្ម​ រីឯ​មេបញ្ជាការ​កងរាជអាវុធហត្ថ​ខេត្ត​លោក ប៊ន ប៊ិន ក៏​មិន​អាច​សុំ​អត្ថាធិប្បាយ​បាន​ដែរ​នៅ​ថ្ងៃ​ទី​១១​កុម្ភៈ​ ដោយ​លោក​ប្រាប់​ថា​ កំពុង​ស៊ើបអង្កេត​ការងារ​មួយ​ទៀត​នៅ​ក្នុង​កាស៊ីណូ។ ប៉ុន្តែ​អភិបាល​ក្រុង​ប៉ោយប៉ែត​លោក សាន ស៊ានហូ មាន​ប្រសាសន៍​ប្រាប់​អាស៊ី​សេរី​ថា សមត្ថកិច្ច​កំពុង​ស៊ើបអង្កេត​លើ​សំណុំ​រឿង​នេះ​ ដើម្បី​ចាប់​អ្នក​ពាក់ព័ន្ធ​បញ្ជូន​ទៅ​ដោះស្រាយ​នៅ​តុលាការ​ហើយ៖ «យើង​កំពុង​តែ​ធ្វើ​ការ​ស្រាវជ្រាវ​តើ​វា​មាន​អី​កើត​ឡើង​ ក្រោយ​ពី​ឃាត់​ខ្លួន​ខាង​ព្រះរាជអាជ្ញា​គាត់​កំពុង​ធ្វើ​ការ​សាកសួរ​។ និយាយ​រួម​យើង​ត្រូវ​ចាត់វិធានការ​​តាម​ច្បាប់​របស់​កម្ពុជា»

ទោះ​ជា​យ៉ាង​នេះ​ក្ដី​មន្ត្រី​សម្របសម្រួល​សមាគម​ការពារ​សិទ្ធិមនុស្ស​ អាដហុក ​(Adhoc)ខេត្ត​បន្ទាយ​មានជ័យ​លោក ស៊ុំ ច័ន្ទគា ហាក់​គ្មាន​ជំនឿ​ទៅ​លើ​វិធានការ​របស់​សមត្ថកិច្ច​ជុំ​វិញ​ការ​បាញ់​បង្ក​របួស​ស្នាម​របស់​ជនជាតិ​ចិន​នេះ​ទេ ព្រោះ​កន្លង​មក​ពួកគេ​តែង​តែ​បង្ក​បញ្ហា​ជា​ច្រើន​ករណី​ហើយ​ ប៉ុន្តែ​បាន​ត្រឹម​ចាប់​អប់រំ​ ហើយ​ក៏​ដោះលែង​ពួកគេ​ឲ្យ​មាន​សេរីភាព​វិញ​ ដោយ​មិន​បាន​ផ្ដន្ទាទោស​ទៅ​តាម​ផ្លូវ​ច្បាប់​នោះ​ទេ។លោក​អះអាង​ថា ការអនុវត្ត​ច្បាប់​ធូររលុង​ គឺ​ជា​ការ​ធ្វើ​ឲ្យ​ជន​បទេស​មិន​ខ្លាច​ច្បាប់ ហើយ​ចេះ​តែ​នាំ​គ្នា​បង្ក​បញ្ហា​នៅ​ក្នុង​សង្គម​កាន់​តែ​ច្រើន៖ «អ្វី​ដែល​សំខាន់​ឲ្យ​តែ​ថា​កំពុង​ធ្វើ​ការ​ស្រាវជ្រាវ​ ឬ​ធ្វើ​ការ​ស៊ើបអង្កេត​ គឺ​ស្មើ​នឹង​អត់​ កន្លង​មក​ ហើយ​បើ​កំពុង​ស៊ើបអង្កេត​ដោយ​បង្កើត​គណៈកម្មការ​ស៊ើបអង្កេត​ក៏​កាន់​តែ​អត់​មាន​អី​ទៀត។ចំណែក​ពលរដ្ឋ​ខ្មែរ​វិញ​បើ​កើត​ឡើង​ត្រូវ​បាន​គេ​ចាប់​ភ្លាមៗ​យក​មក​ផ្ដន្ទាទោស ហើយ​បើ​ប៉ះ​មន្ត្រី​ធំៗ​អ្នក​មាន​លុយ​និង​មាន​អំណាច​វិញ​​​ គេ​បង្កើត​គណៈកម្មការ​ដើម្បី​ស្រាវជ្រាវ​អី​ទៅ​ ហើយ​ឥឡូវ​ជនជាតិ​ចិន​គេ​ក៏​ប្រើ​ពាក្យ​នេះ​តទៅ​ទៀត»

មន្ត្រី​សង្គម​ស៊ីវិល​រូប​នេះ​ ស្នើ​ឲ្យ​អាជ្ញាធរ​ពាក់ព័ន្ធ​ចាត់វិធានការ​ទៅ​លើ​ជនជាតិ​ចិន​ ដែល​បាន​បាញ់​បោះ​នេះ​ឲ្យ​បាន​តឹងរ៉ឹង និង​ស្រាវជ្រាវ​រក​មុខ​សមត្ថកិច្ច​ពាក់ព័ន្ធ​ដែល​បាន​ផ្ដល់​អាវុធ​​ឲ្យ​ពួកគេ​កាន់កាប់​ ដើម្បី​កសាង​សំណុំ​រឿង​បញ្ជូន​ទៅ​តុលាការ​ដោះស្រាយ​តាម​ច្បាប់​ ដើម្បី​កុំ​ឲ្យ​ពួកគេ​​ធ្វើ​សកម្មភាព​នៅ​ថ្ងៃ​ក្រោយ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


What Next?

Recent Articles