កម្ពុជា​​ចាត់ទុកការផ្ដើមនីតិវិធីដែល​ឈានទៅព្យួ​រ EBA របស់សហភាពអឺរ៉ុប «ជារឿងអយុត្តិធម៌បំផុត»


|
https://www.vodhotnews.com

លោក កែវ រ៉េមី ថ្លែងនៅក្នុង​កិច្ច​ប្រជុំ​ក្រុម​ប្រឹក្សា​សិទ្ធិ​មនុស្ស​អន្តរជាតិ ដែលធ្វើឡើងទីក្រុងហ្សឺណែវ ប្រទេសស្វីស កាលពីរាត្រី​ថ្ងៃពុធ ទី៣០ ខែមករា ឆ្នាំ២០១៩។ រូបភាព៖ webtv.un.org/ screenshot

រដ្ឋា​​ភិបាល​កម្ពុ​ជា​ប្រតិ​​កម្មថា ​«ជា​រឿង​អយុ​ត្តិធ​ម៌​បំផុត​» ដែ​លស​ហ​ភា​ព​អឺរ៉ុប ​សម្រេ​ច​ចាប់ផ្ដើម​នីតិវិធីដែល​ឈាន​ទៅ​រក​​​ការ​ព្យួ​រ«ប្រ​​ព័​ន្ធ​អ​នុ​គ្រោះពន្ធគ្រប់​បែបយ៉ាងលើកលែងតែអាវុធ» ដោ​យថាប្លុកលោកសេរីមួយ​នេះ បានមើល​រំលង​ពីការខំ​ប្រឹងប្រែ​ងរបស់រដ្ឋាភិបាលក្នុងការ​​កែ​លម្អស្ថា​នកា​រណ៍​ជិត១ឆ្នាំ​មក​នេះ ​​ ។

សហភាពអឺរ៉ុ​ប​​ កាលពីថ្ងៃចន្ទ បាន​ប្រកាសដំណើរការនីតិវិធីឈានទៅព្យួរប្រព័ន្ធអនុគ្រោះពន្ធបណ្ដោះ​អាសន្ន​ពីកម្ពុជា​ ដោ​​យ​អះអាងថា ​ប្រព័​ន្ធ​​អនុគ្រោះ​ពន្ធនេះ អាច​ត្រូវ​​ដ​ក​ហូត​​វិញ​ ប្រសិ​ន​បើ​​កម្ពុជា​បរា​ជ័យ​​ក្នុង​​​កា​រ​ធ្វើ​ឲ្យ​ប្រសើរ​​​​​​ឡើង​​វិញ​​​នូវ​​​​ស្ថា​​ន​​ភា​​ព​សិទ្ធិ​​​មនុស្ស​​ និ​ង​ប្រ​ជា​ធិប​តេយ្យ។​

ប៉ុន្តែ សេចក្តីថ្លែងការណ៍របស់ក្រសួងការបរទេសចុះថ្ងៃទី១២ ខែកុម្ភៈ ឆ្នាំ២០១៩ រដ្ឋាភិបាលកម្ពុជា លើកឡើងថា ខ្លួនខកចិត្ត​យ៉ាងខ្លាំង ទៅនឹង​ការ​សម្រេចរបស់សហភាពអឺរ៉ុបនេះ។

រដ្ឋាភិបាលលើកឡើងថា ការខកចិត្តនេះ ដោយសារតែសហភាពអឺរ៉ុបមើល​មិន​ឃើ​ញ​ពីគុ​ណសម្បត្តិរបស់ខ្លួន ដែលបានបើកផ្លូវ​ឲ្យថ្នាក់ដឹកនាំអតីតគណប​ក្សប​ក្ស​​ស​ង្គ្រោះជា​តិ១១៨រូបធ្វើ​នយោ​​​បាយឡើងវិញ ជំរុញ​ដល់​សិទ្ធិ​ការ​ងារ និងភាពជាដៃគូរវាងរ​ដ្ឋាភិបាលជាមួយ​អង្គកា​រ​សង្គម​ស៊ីវិលជាដើម ។

រដ្ឋាភិបាលអះអាងទៀតថា ភាពអយុត្តិធម៌មួយទៀត គឺសហភាពអឺរ៉ុបបានបដិសេ​ធសំឡេងឆ្នោត​ច្រើន​លាននាក់ ដែល​គាំទ្រគណបក្សទាំង១៩ និងរដ្ឋាភិបាល ហើយថា ការទា​មទារទាក់ទិននឹង​EBA​ ជាការជ្រៀ​តជ្រែកផ្ទៃក្នុងកម្ពុ​ជា ។

រដ្ឋាភិបាលលើកឡើងថា​៖ «គណៈកម្មការអឺរ៉ុប បានបដិសេធនូវសំឡេងដ៏ច្រើនលើសលុបរបស់​ម្ចាស់ឆ្នោត​កម្ពុ​ជា​​ ដែ​​ល​បាន​ស​ម្តែ​ង​​ការគាំទ្រដល់រដ្ឋាភិបាលតាមរយៈសន្លឹកឆ្នោតរបស់ពួកគេ។ ផ្ទុយទៅវិញ គណៈកម្មាធិកា​រអឺ​រ៉ុប​បែរ​​ជា​គាំ​​ទ្រអ្នកន​យោ​​​​​បា​យ​មួយក្តាប់តូច ដែលជាអ្នកបញ្ឆេះកំហឹងពលរដ្ឋឲ្យបង្កាត់ភ្លើងសង្គ្រាមស៊ីវិល»។

អតីតមេដឹកនាំបក្សប្រឆាំង លោក សម រង្ស៊ី កាលពីចុងខែមុន ផ្ញើសារជំរុញទៅសហភាព​អឺរ៉ុបឲ្យប​ន្តព​ង្រឹង​​ជំហរជួ​យស្តា​រ​ប្រ​​ជា​ធិបតេយ្យនៅកម្ពុជា ដោយហៅ​វិធានការដ​​​កប្រព័ន្ធអនុគ្រោះពន្ធ (EBA) នេះថា ជាការ​ទប់​ស្កាត់​កម្ពុជាកុំឲ្យ​រអិលទៅរក​របបផ្តាច់កា​រ។

លោក សម រង្ស៊ី ថា៖ «ប្រតិកម្មរបស់សហភាពអឺរ៉ុប ឆ្លើយតបទៅនឹងការរំកិលទៅរកអំណាចផ្តាច់ការនៅ​ប្រ​ទេសកម្ពុជា (គឺ​កា​រ​ព្យួ​រក​ម្ម​វិធីអនុគ្រោះពន្ធដារ EBA) គឺជាវិធានការត្រឹមត្រូវ និងសមស្រប ដែល​យើង​អាចទ​ទួល​​​យកបាន»។

ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត មានប្រសាសន៍ថា មួយរយៈចុងក្រោយនេះ រដ្ឋាភិ​បាល​ពិតជាបា​នខំកែស្ថានការណ៍ពិតមែន ដូចជា រំឭកឲ្យពន្លឿនសំណុំរឿងមេដឹកនាំសហជីព ចេញសេចក្តី​ណែនាំឲ្យបើកលំហសរីភាពសង្គមស៊ីវិលជាដើម ។

លោក អំ សំអាត រំឭកថា ប្រព័ន្ធ​អនុគ្រោះផ្នែ​កពាណិជ្ជក​ម្មរបស់ប្លុក​លោ​ក​​​សេ​រីនេះ នឹងមិនត្រូវដកហូតពីកម្ពុជា បើរដ្ឋាភិបាលមានឆន្ទៈស្តារប្រជាធិបតេយ្យឡើងវិញនោះ។

លោកថា៖ «រដ្ឋាភិបាលត្រូវតែមានឆន្ទៈមោះមុតក្នុងការប្តេជ្ញាឡើងវិញនូវការស្តារប្រជាធិបតេយ្យ និងការគោ​រពសិទ្ធិម​នុស្សនេះ​ បង្ហាញឲ្យសហភាពអឺរ៉ុបបានឃើញ អ្វីក៏ដោយវាមិន​មែនចេញនៅលើ​ច្បាប់នៅលើ​ក្រដាស និង យើ​​ង​គិត​ថាជាការកែប្រែទេ! វាស្ថិតនៅលើស​កម្មភាពទំាងឡាយដែ​លគេមើលឃើញថា ក​ម្ពុជាពិតជាមានឆន្ទៈ​ក្នុងកា​កែលំ​អនោះ»។

 ទោះជាយ៉ាងណា សហភាពអឺរ៉ុបបានបញ្ជាក់ថា នីតិវិធីឈានទៅព្យួរប្រព័ន្ធអនុគ្រោះពន្ធ EBA ពីកម្ពុជានេះ ប្រើពេ​ល១៨ខែ ចាប់ពីថ្ងៃទី១៣ ខែកុម្ភៈនេះទៅ ពោលគឺដល់ឆ្នាំ២០២០ ទើបសម្រេចជាផ្លូវការណ៍។

វិធានការរបស់សហភាពអឺរ៉ុបនេះ បានធ្វើឡើងក្រោយពីខ្លួនអំពាវនាវទៅរដ្ឋាភិបាលឲ្យស្តា​រប្រជាធិបតេយ្យ​ឡើ​ង​វិញ ដូចជា ត្រូវទម្លាក់បទចោទលើកអតីតប្រធានគណបក្សសង្គ្រោះជាតិ​ លោក កឹម សុខា ឲ្យគណ​បក្សប្រ​ឆាំង​នេះបានដំណើរការឡើងវិញ និងត្រូវរៀបចំការបោះឆ្នោតឡើងវិញ តាមយន្តការប្រជាធិបតេយ្យ​ ដោយ​មានគ​ណ​បក្ស​ប្រឆាំងចូលរួមជាដើម មិនទាន់ត្រូវបានធ្វើឡើង៕​


រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

What Next?

Recent Articles

2 Responses to "កម្ពុជា​​ចាត់ទុកការផ្ដើមនីតិវិធីដែល​ឈានទៅព្យួ​រ EBA របស់សហភាពអឺរ៉ុប «ជារឿងអយុត្តិធម៌បំផុត»"

  1. Anonymous says:

    What wrong with these guys?? what wrong with this beast regime?? why theses thugs say that un-justice?? what about jailing mr SO KHA without any evident for betray the country’ Why dissolve opposition without justice ?? What the shit words of theses thugs’ GOD will punish all bad people’

  2. Sam says:

    ហាក់បីដូចស្ដត់ទឹកមាត់ដាក់ទ្រូងខ្លួនឯង កាលណោះ ក្រុមបក្សជំទាស់​ស្រែកប្រាប់គេឯងលូងៗ នៅពេលទទួលរងភាពធ្វើទុក្ខបុកមេញពីបក្សកាន់អំណាច ថាខ្លួនរង​អយុត្តិធម៌ណាស់។​ តែបក្សកាន់អំណាចថា​ គេអនុវត្តតាមច្បាប់។
    ដល់ពេលនេះ បក្សកាន់អំណាចប្រទេសនាំគ្នាស្រែកថា​​ សហគមន៍អឺរ៉ុបធ្វើរឿងអយុត្តិធម៌ណាស់ដល់កម្ពុជា តែសហគមន៍ថាគេធ្វើតាមច្បាប់ដែរ។

    ត្រីធំសុីត្រីតូច ហើយត្រីយក្សសុីត្រីធំបន្ត។