បទយកការណ៍
|
https://www.vodhotnews.com
ប្រជាកសិករនៅតាមបណ្ដាខេត្តនានា ដែលធ្វើស្រែប្រាំងកំពុងប្រមូលភោគផលស្រូវដែលពួកគាត់បានដាំដុះជាបណ្តើរៗ។
មិនខុសពីកសិករនៅតាមតំបន់ផ្សេង កសិករដែលធ្វើស្រែប្រាំងនៅស្រុកកោះធំ ខេត្តកណ្ដាល ក៏កំពុងមមាញឹកក្នុងការច្រូតកាត់ស្រូវរបស់ពួកគាត់ផងដែរ។ ជាធម្មតានៅពេលប្រមូលផលម្ដងៗ ប្រជាកសិករតែងតែបង្ហាញក្តីសប្បាយរីករាយ ព្រោះពួកគាត់នឹងទទួលបានចំណូលសម្រាប់យកចាយវាយ ទិញសម្ភារ និងរបស់របរប្រើប្រាស់ដែលជាតម្រូវការរបស់ពួកគាត់។
ប៉ុន្តែ សម្រាប់កសិករមួយចំនួននៅស្រុកកោះធំ ខេត្តកណ្ដាល បែរជាត្អូញត្អែរប្រាប់អ្នកយកព័ត៌មាន វីអូឌី ពេលដែលចុះផ្ទាល់ដល់កន្លែងប្រមូលផលរបស់ពួកគាត់ ថា ការធ្វើស្រែប្រាំងឆ្នាំនេះ មិនចំណេញនោះទេ ដោយសារតែទិន្នផលស្រូវក៏បាត់ ហើយតម្លៃក៏ធ្លាក់ចុះច្រើន បើប្រៀបធៀបនឹងឆ្នាំមុន។
អង្គុយនៅកណ្តាលវាលស្រែ កសិករមកពីភូមិពោធិ៍ ឃុំព្រែកស្តី ស្រុកកោះធំ ខេត្តកណ្តាល លោក មាស ដាំ មានវ័យជាង៤០ឆ្នាំ បានរៀបរាប់ថា គាត់ធ្វើស្រែឆ្នាំនេះប្រហែលជា៣ហិកតា ដោយចំណាយថវិកាសរុបជិត២ពាន់ដុល្លារ។ លោក បន្តថា ការធ្វើស្រែរបស់លោកឆ្នាំនេះ មិនចំណេញនោះទេ ដោយសារទិន្នផលស្រូវមានការថយចុះប្រហែលជា២០ភាគរយ ហើយលក់បានក្នុងតម្លៃថោកទៀតផង។
កសិករមកពីភូមិពោធិ៍ ឃុំព្រែកស្តី ស្រុកកោះធំ ខេត្តកណ្តាល លោក មាស ដាំ មានវ័យជាង៤០ឆ្នាំ ផ្ដល់បទសម្ភាសន៍ដល់ក្រុមការងារ វីអូឌី។ រូបភាព៖ ហេង វិចិត្រ
លោកមានប្រសាសន៍ថា៖ «ម៉េចបានថាខាត សាំងថ្លៃ ជីក៏ថ្លៃ សាំងក៏ថ្លៃ ដល់ពេលយើងបានផល លក់បានថោក វាខាតច្រើន ប៉ះពាល់ដល់ជីវភាពគ្រួសារ វាចំណាយទៅលើរបស់យើងទិញធ្វើ ដូចជា ជី សាំង»។
កសិករូបនេះបានរៀបរាប់ថា កាលពីឆ្នាំមុនស្រូវសើម ឈ្មួញចុះទៅទិញដល់វាលស្រែ តម្លៃចន្លោះពី៩៨០រៀល ទៅ១១៥០រៀលក្នុងមួយគីឡូក្រាម។ ប៉ុន្តែ ឆ្នាំនេះ ឈ្មួញទិញតម្លៃចន្លោះពី៧០០រៀល ទៅ ៧៤០រៀលក្នុងមួយគីឡូតែប៉ុណ្ណោះ។
អង្គុយនៅក្រោមផ្ទះក្បែរជង្រុកដាក់ស្រូវ កសិករ ជី ភី រស់នៅភូមិពោធិ៍អណ្តែត ឃុំព្រែកស្តី ស្រុកកោះធំ បានរៀបរាប់ថា ស្រូវធ្លាក់ថ្លៃឆ្នាំនេះ ធ្វើឲ្យគាត់លក់មិនបានចំណេញនោះទេ។ ករណីនេះ អ្នកស្រី ថាស្រូវដែលច្រូតហើយជាងកន្លះខែនេះ គាត់រក្សាទុកលក់ក្រោយចូលឆ្នាំចិន ព្រោះគាត់បានលឺថាស្រូវនឹងឡើងថ្លៃក្រោយចប់បុណ្យនេះ។
ប្រជាកសិកររូបនេះ ស្នើទៅរដ្ឋាភិបាលយកចិត្តទុកដាក់ជួយរកទីផ្សារឲ្យកសិករលក់ស្រូវសើមឲ្យបានតម្លៃ ៩០០រៀល និងស្រូវស្ងួតតម្លៃ១២០០រៀល ទើបធ្វើឲ្យកសិករមានដើមទុន និងទឹកចិត្ត ប្រកបមុខរបរកសិកម្មនេះបន្តទៀត។
កសិករ ជី ភី រស់នៅភូមិពោធិ៍អណ្តែត ឃុំព្រែកស្តី ស្រុកកោះធំ កំពុងផ្ដល់បទសម្ភាសន៍ដល់ក្រុមការងារ វីអូឌី។ រូបភាព៖ ហេង វិចិត្រ
អ្នកស្រីសំណូមពរថា៖ «សូមឲ្យរបស់ ជ្រូក គោ ស្រូវ ឲ្យបានថ្លៃ ប្រជាពលរដ្ឋបានរស់ហើយ សូមឲ្យរដ្ឋាភិបាលចាត់អ្នកធ្វើការ អ្នកដែលស៊ីប្រាក់ខែរាស្ត្រ ឲ្យជួយរាស្ត្រផង រាស្ត្រវេទនាណាស់»។
ប្រភពដដែលនិយាយថា ដើមចមដែលនាំឲ្យកសិករធ្វើស្រែខាត ដោយសារតម្លៃស្រូវធ្លាក់ចុះ ហើយត្រូវចំណាយថវិកាច្រើនដូចជា ចំណាយលើថ្នាំ ជួលគេបាញ់ថ្នាំ ជួលគេរាស់ដី ទិញជី ជួលគេបូមទឹកដាក់ស្រូវ និងជួលម៉ាស៊ីនច្រូតស្រូវជាដើម។
វ័យជាង៧០ឆ្នាំ ដែលអះអាងថា មានបទពិសោធន៍ធ្វើស្រែជាង៣០ឆ្នាំ លោក នៅ ហុង បានរៀបរាប់ថា គាត់លក់ស្រូវឆ្នាំនេះខាត ដោយសារត្រូវចំណាយដើមទុនច្រើនចាប់ពីថ្ងៃដាំដុះរហូតដល់ថ្ងៃប្រមូលផល។ ប្រជាកសិកររូបនោះបញ្ជាក់ថា គាត់សម្រេចចិត្តលក់ស្រូវនេះ ដោយសារយកលុយសងថ្លៃចំណាយផ្សេងៗដែលជំពាក់គេ។
កសិករម្នាក់ លោក ជី ភី រស់នៅភូមិពោធិ៍អណ្តែត ឃុំព្រែកស្តី ស្រុកកោះធំ កំពុងផ្ដល់បទសម្ភាសន៍ដល់ក្រុមការងារ វីអូឌី។ រូបភាព៖ ហេង វិចិត្រ
លោកមានប្រសាសន៍ថា៖ «គេគិតចុងការ ឧទាហរណ៍ថា ថ្នាំមួយដប ៣ម៉ឺនរៀល គេយកវិញ៣ម៉ឺន៥ពាន់រៀល គេគិតចុងការ៥ពាន់រៀល ល្មមដល់ពេលស្រូវដល់រដូវចូលរបស់គេ៣ខែ គេគិតវិលទៅ ហើយជីមួយបាវ៨ម៉ឺនរៀល ឡើង៨ម៉ឺន៥ពាន់រៀល ទៅ៩ម៉ឺនរៀល»។
ឈរកត់ត្រាគីឡូស្រូវនៅកណ្តាលវាលស្រែ អ្នកស្រី មិន មុត ដែលអះអាងថា ជាឈ្មួញទិញស្រូវយកទៅលក់នៅប្រទេសវៀតណាមរាប់រយតោនក្នុងមួយឆ្នាំៗ មានប្រសាសន៍ថា តម្លៃស្រូវឆ្នាំនេះធ្លាក់ចុះ ដោយសារភាគីវៀតណាម មិនសូវសម្រុកទិញច្រើនដូចកាលពីឆ្នាំមុន។ អ្នកស្រី អះអាងថា តម្លៃស្រូវធ្លាក់ចុះ ធ្វើឲ្យប្រជាកសិករ និងឈ្មួញទិញស្រូវជួបការលំបាកដូចគ្នា។
ឈ្មួញកណ្ដាលរូបនេះ បានស្នើឲ្យរដ្ឋាភិបាល និងភាគីពាក់ព័ន្ធជួយធ្វើយ៉ាងណាឲ្យមានឡសម្ងួតស្រូវដូចប្រទេសជិតខាង។
អ្នកស្រី មិន មុត ដែលអះអាងថា ជាឈ្មួញទិញស្រូវយកទៅលក់នៅប្រទេសវៀតណាម ផ្ដល់បទសម្ភាសន៍ដល់ក្រុមការងារ វីអូឌី។ រូបភាព៖ ហេង វិចិត្រ
អ្នកស្រីនិយាយថា៖ «សំខាន់ជាងគេ មានទីផ្សារ មានកន្លែងលក់ មានឡសម្ងួត មានរោងម៉ាស៊ីនកិនស្រូវ មានកន្លែងនាំអង្ករចេញដូចគេ ស្រុកខ្មែរយើងមានតម្លៃណាស់ ត្រូវការតែប៉ុណ្ណឹងទេ»។
ម្ចាស់ត្រាក់ទ័រដែលស៊ីឈ្នួលភ្ជួរស្រែ និងជាកសិករម្នាក់ដែរលោក រម្យ នឿន មានប្រសាសន៍ថា បើរដ្ឋាភិបាលមិនយកចិត្តទុកដាក់ជួយប្រជាកសិករទេនឹងធ្វើឲ្យពួកគេធ្វើចំណាកស្រុក ឬបោះបង់ការងារធ្វើស្រែនេះទៀតផង។
លោកមានប្រសាសន៍ថា៖ «គាត់ខំធ្វើហើយ មិនបានទទួលប្រាក់ចំណេញ យូរៗគាត់បាក់ទឹកចិត្ត ប្រហែលជាគាត់បោះបង់ការធ្វើស្រែចំការគាត់ ទុកដីលែងធ្វើ មានតែធ្វើការចំណាកស្រុកទៅប្រទេសថៃ ឬមួយធ្វើការរោងចក្រ ចូលកាស៊ីណូវិញ»។
ទីប្រឹក្សាអង្គការសេដាក លោក សម វិទូ សង្កេតឃើញថា តម្លៃស្រូវធ្លាក់ចុះជាផ្នែកមួយ ប៉ុន្តែអ្វីដែលគួរឲ្យកត់សំគាល់ជាងនេះទៀត នៅពេលដែលឈ្មួញមួយចំនួនចុះទៅទិញស្រូវ ពួកគេនិយាយបំភ័យប្រជាកសិករថា ស្រូវឆ្នាំនេះធ្លាក់ចុះ ដោយសារសហភាពអឺរ៉ុប និងអាមេរិកយកពន្ធនាំចូលលើទំនិញស្រូវអង្ករនោះ។ លោកលើកទឹកចិត្តទៅរដ្ឋាភិបាលចុះទប់ស្កាត់ឈ្មួញទិញស្រូវទាំងនោះផងដែរ។
លោក វិទូ ផ្តល់ជាអនុសាសន៍ថា ដើម្បីទប់ស្កាត់បញ្ហាស្រូវធ្លាក់ថ្លៃនេះបាន រដ្ឋាភិបាលត្រូវទំលាក់ថវិកាចន្លោះពី៨០ ទៅ១០០លានដុល្លារ ជំរុញទៅស្ថាប័នពាក់ព័ន្ធធ្វើការស្រាវជ្រាវលើថ្លៃចំណាយរបស់ប្រជាកសិករ ទើបប្រមូលទិញស្រូវពីកសិករក្នុងតម្លៃសមរម្យ និងធ្វើឲ្យពួកគេមានជីវភាពធូធារបាន។
លោកមានប្រសាសន៍ថា៖ «តម្លៃ យើងអាចធៀបគ្នាដែរ ថាតម្លៃទៅលើទីផ្សារដែលកសិករដែលគាត់ថាចំណេញប៉ុណ្ណា ហើយតម្លៃដែលសម្រាប់ថ្លៃដើមឆ្នាំនេះ យើងអាចវាយតម្លៃប៉ុណ្ណា? តើវាអាចចុះតិចតួចឬយ៉ាងម៉េច ដើម្បីកុំឲ្យឈ្មួញ ឬក៏ក្រុមហ៊ុនដែលទិញស្រូវនៅក្នុងស្រុកខ្មែរមានការខាតបង់ ហើយកសិករក៏ចំណេញ ខាងក្រុមហ៊ុនក៏ចំណេញ ធ្វើឲ្យចំណេញទាំងអស់គ្នា»។
វី.អូ.ឌី មិនអាចសុំការបំភ្លឺពីអ្នកនាំពាក្យក្រសួងកសិកម្ម លោក ស្រី វុទ្ធី បានទេ ខណៈប្រធានមន្ទីរកសិកម្មខេត្តកណ្តាល លោក បុណ្យ ទួនស៊ីម៉ូណា សុំមិនធ្វើការបកស្រាយជុំវិញបញ្ហា ដោយលោកថា ជាប់រវល់។ ប៉ុន្តែ រដ្ឋមន្រ្តីក្រសួងកសិកម្ម លោក វេង សាខុន កាលពីថ្ងៃទី០២ ខែកុម្ភៈ បានសសេរបង្ហោះនៅលើទំព័រហ្វេសប៊ុក លោកថា មូលហេតុស្រូវធ្លាក់ថ្លៃដោយសារឈ្មួញវៀតណាមមិនទាន់ចូលមកទិញព្រោះគេរវល់បុណ្យចូលឆ្នាំប្រពៃណីរបស់គេ។
កាលពីឆ្នាំ២០១៨ កម្ពុជានាំចេញអង្ករបានជាង៦២ម៉ឺនតោន ថយចុះ១,៥ភាគរយ បើធៀបទៅនឹងការនាំចេញក្នុងឆ្នាំ២០១៧ ជាង៦៣ម៉ឺនតោន ខណៈរដ្ឋាភិបាលបានបន្ទោសបញ្ហានេះទៅលើការប្រកួតប្រជែងនៅលើទីផ្សារអន្តរជាតិ៕