សន្ដិសុខ
លោក ហួត វុទ្ធី | ២៥ មីនា ២០១៩ | ម៉ោង ៣:៤០ ល្ងាច
https://www.vodhotnews.com
លោកនាយករដ្ឋមន្ត្រី ហ៊ុន សែន ថ្លែងថា កម្ពុជាបានសម្រេចបញ្ជាទិញរថពាសដែកបន្ថែមទៀតដែលនឹងត្រូវបញ្ជូនទៅបំពេញបេសកកម្មថែរក្សាសន្តិភាពក្រោមឆ័ត្រអង្គការសហប្រជាជាតិនៅឯប្រទេសម៉ាលី ស្ថិតនៅក្នុងទ្វីបអាហ្វ្រិក។
ថ្លែងក្នុងពិធីប្រគល់សញ្ញាបត្រដល់ក្រុមនិស្សិតនៅព្រឹកថ្ងៃនេះលោកនាយករដ្ឋមន្រ្តី ហ៊ុន សែន បានលើកឡើងថាប្រទេសកម្ពុជាបានបញ្ចេញថវិកាចំនួន ១៥លានដុល្លារដើម្បីទិញរថពាសដែកបំពាក់ឲ្យកងទ័ពមួកខៀវប្រចាំនៅប្រទេសម៉ាលី
ដែលនេះបង្ហាញពីការពង្រឹងសមត្ថភាពរបស់កងទ័ពកម្ពុជា។
លោក ហ៊ុន សែន ថ្លែងថា៖ «អាទិត្យមុននេះ បានចុះហត្ថលេខាបញ្ចេញប្រាក់ ១៥លានដុល្លារអាមេរិក ព្រោះអង្គការសហប្រជាជាតិតម្រូវការឲ្យបំពាក់មធ្យោបាយ ដូចជា រថពាសដែកទៅកាន់ប្រទេសម៉ាលី។ ពីមុននេះ កម្ពុជាស្នើសុំឲ្យអង្គការសហប្រជាជាតិជាអ្នកដោះស្រាយ ប៉ុន្តែ ឥឡូវហ្នឹង អង្គការសហប្រជាជាតិកំពុងមានវិបត្តិថវិកាទៀត។ អញ្ចឹង បន្ទុកនេះ យើងមិនដកកងទ័ពរបស់យើងចេញដោយខ្វះការទទួលខុសត្រូវដែរ ហើយយើងក៏មិនទុកឲ្យកងទ័ពរបស់យើងដៃទទេដែរ ត្រូវមានរថពាសដែកការពារខ្លួន»។
កាលពីអំឡុងខែឧសភា ឆ្នាំ២០១៧ ទាហានមួកខៀវកម្ពុជា ត្រូវពួកឧទ្ទាមសម្លាប់ ខណៈពួកគេកំពុងបំពេញបេសកកម្មក្នុងនាមជាកងកម្លាំងរក្សាសន្តិភាពនៅប្រទេសអាហ្វ្រិកកណ្ដាល។
គិតត្រឹមឆ្នាំ២០១៨កន្លងមក កម្ពុជាបានដាក់ពង្រាយកងកម្លាំងរបស់ខ្លួនចំនួនសរុប ៨០៨នាក់ ឲ្យបំពេញបេសកកម្មថែរក្សាសន្តិភាពនៅក្រោមឆ័ត្រអង្គការសហប្រជាជាតិ នៅឯបណ្ដាប្រទេសនានាក្នុងទ្វីបអាហ្វ្រិក ដូចជា ប្រទេសស៊ូដង់ អាហ្វ្រិកកណ្ដាល និងម៉ាលី ជាដើម៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។