ដោយ យន់ សាមៀន
2019-04-13
RFA
(ឆ្វេង) លោក កឹម សុខា ប្រធានគណបក្សសង្គ្រោះជាតិ និងលោកនាយករដ្ឋមន្ត្រី ហ៊ុន សែន (ស្ដាំ)។ Photo courtesy of their Facebook
មេដឹកនាំរបបក្រុងភ្នំពេញ និងមេដឹកនាំគណបក្សប្រឆាំង ផ្ញើសាររបស់ខ្លួនបង្កប់ន័យផ្សេងៗគ្នា ជូនទៅពលរដ្ឋតាមបណ្ដាញសង្គមហ្វេសប៊ុក (Facebook) ក្នុងឱកាសបុណ្យចូលឆ្នាំខ្មែរ។ អ្នកវិភាគ និងព្រះសង្ឃ យល់ថា ឆ្នាំថ្មីនេះ ជាឱកាសល្អសម្រាប់មេដឹកនាំកម្ពុជាដោះស្រាយវិបត្តិនយោបាយដែលប្រទេសនេះ កំពុងជួបប្រទះ។
នៅមុនបុណ្យចូលឆ្នាំខ្មែរមួយថ្ងៃ លោក ហ៊ុន សែន សរសេរសារជូនពរយ៉ាងខ្លី ដោយមិនបានលើកឡើងពីបញ្ហាវិបត្តិ របស់ប្រទេសជាតិ ដែលកំពុងកើតមានចម្រូងចម្រាសនិងថែមទាំងមិនបង្ហាញសារដែលជាដំណោះ ស្រាយនយោបាយទៀតផង។
ដោយឡែក លោក កឹម សុខា ដែលត្រូវរបបឃុំឃាំងក្នុងផ្ទះ ក៏បានយកឱកាស បុណ្យចូលឆ្នាំខ្មែរផ្ញើសារតាមហ្វេសប៊ុក ដោយបួងសួងនូវពរពីរប្រការជាសំខាន់ ចូលកើតមានដល់ពលរដ្ឋ និងប្រទេសកម្ពុជា។ លោកចង់កម្ពុជា មានសុខសន្តិភាព ការរីកចំរើន ស្ថិតស្ថេរ គង់វង្សសម្រាប់ប្រជាពលរដ្ឋខ្មែរគ្រប់រូបដែលជាម្ចាស់ទឹកដី និងសូមឱ្យកម្ពុជាចាកផុតគ្រោះថ្នាក់ទាំងឡាយ ដែលបង្កដោយធម្មជាតិ ឬដោយមហិច្ឆតាអគតិរបស់មនុស្ស។ ហើយ ទី២ លោកសូមឱ្យប្រជាពលរដ្ឋខ្មែរ រួមរស់ជាមួយគ្នា ដោយសុខដុមរមនា ប្រកបដោយព្រហ្មវិហារធម៌ (មេត្តា ករុណា មុទិតា ឧបេក្ខា) និងសូមឱ្យកម្ចាត់ចេញពីកាយ វាចា ចិត្តរបស់មនុស្ស ជាពិសេសអ្នកនយោបាយខ្មែរនូវអកុសល ធម៌ទាំងឡាយ(លោភៈ ទោសៈ មោហៈ) ដូចជាការលោភលន់គ្មានព្រំដែន ការរំលោភបំពាន ការគំរាមកំហែង អំពើហិង្សា ការមួលបង្កាច់ចោទប្រកាន់ ការលាបពណ៌ ការជេរប្រមាថ ការគុំកួនសង សឹកគ្នា ដែលជាមូលហេតុនាំឱ្យមានការឈឺចាប់ ការបែកបាក់ក្នុងសង្គមជាតិ និងនាំឱ្យអាប់ឱននូវតម្លៃ ពូជសាសន៍ តម្លៃនៃអ្នកដឹកនាំ ជាពិសេសកិត្យានុភាពជាតិ។
លោក កឹម សុខា សង្ឃឹមថា ឆ្នាំថ្មីនេះជាឆ្នាំសេរីសួស្តី ឆ្នាំដែលខ្មែរវិលមករកដំណោះស្រាយជាវិជ្ជមានវិញ។ ព្រះសង្ឃ និងមន្ត្រីសិទ្ធិមនុស្សក៏យល់ថា សម្រាប់ឆ្នាំថ្មីនេះ ជាឱកាសល្អសម្រាប់មេដឹកនាំខ្មែរដោះស្រាយបញ្ហាប្រទេសជាតិដែលកំពុងមានវិបត្តិ។
ព្រះតេជព្រះគុណ លូន សុវ៉ាត ដែលជាសកម្មជនសង្គមមួយអង្គ មានថេរដីកាថា សារជូនពរគ្នាទៅ វិញទៅមកគឺជារឿងធម្មតាក្នុងឱកាសបុណ្យចូលឆ្នាំថ្មី ប៉ុន្តែព្រះតេជព្រះគុណ កត់សម្គាល់ថា សារជូនពរ របស់អ្នកនយោបាយ ជាពិសេស លោកនាយករដ្ឋមន្ត្រី ហ៊ុន សែន គឺមិនបានផុសចេញពីបេះដូង និងផ្ទុយពីទង្វើជាក់ស្ដែងដែលកើតចេញពី កាយ វិចារ ចិត្ត ។ ព្រះអង្គបន្តថា ប្រសិនបើមេដឹកនាំបាត់បង់នូវព្រហ្មវិហារធម៌ និងទសពិធរាជធម៌ ឬធម៌ទាំង១០ដែលមេដឹកនាំត្រូវមាននោះ ទោះបី ជាផ្ញើសារជូនពរយ៉ាងណា ក៏ប្រជារាស្ត្រក្នុងនគរនោះគ្មានសេចក្ដីសុខនិងរីកចម្រើនដែរ។ អ្នកនាំពាក្យសមាគមអាដហុក (Adhoc) លោក ស៊ឹង សែនករុណា មិនចង់ធ្វើអត្ថាធិប្បាយពីការ លើកឡើងរបស់អ្នកនយោបាយនេះទេ ប៉ុន្តែ ចង់ ឃើញគណបក្សប្រជាជនកម្ពុជា និងគណបក្សសង្គ្រោះជាតិ រកដំណោះស្រាយរួម មួយ ដើម្បីឱ្យមានបរិយាកាសសង្គមនយោបាយ ការគោរពសិទ្ធិមនុស្ស និងបញ្ហាប្រជាធិបតេយ្យ មានភាពល្អប្រសើរជាងឆ្នាំចាស់។ លោកបង្ហាញការព្រួយបារម្ភថា សំពាធផ្សេងៗ អាចនឹងកើតមានក្នុងឆ្នាំថ្មីនេះតទៅ ដែលអាចធ្វើឱ្យប៉ះពាល់ដល់ប្រជាពលរដ្ឋ សេដ្ឋកិច្ច និងការរីកចម្រើនរបស់ជាតិ ប្រសិនបើបញ្ហាពិតដែលអន្តរជាតិលើកឡើង នៅតែមិនត្រូវបានដោះស្រាយនោះទេ។ «»
រីឯអ្នកវិភាគនយោបាយ និងសង្គម លោក បណ្ឌិត ឡៅ ម៉ុងហៃ លើកឡើងថា សារ លោក កឹម សុខា មានលក្ខណ:ជាសារ ពីរដ្ឋបុរសទៅកាន់ប្រជាជាតិទាំងមូល ព្រោះលោកបួងសួង សុំទេវតាថ្មី ជួយដល់ជីវភាពរស់នៅនិងសុខុមាលភាពរបស់ប្រជាពលរដ្ឋខ្មែរ ឱ្យបានកាន់តែល្អប្រសើរ ឱ្យបានរស់នៅសុខដុមជាមួយគ្នា រួចចាកពីការបែកបាក់ទាស់ទែងគ្នា។
លោកបណ្ឌិត ឡៅ ម៉ុងហៃ ក៏មានសារជូនពរផ្ទាល់ខ្លួនដែរ គឺសុំបងប្អូនខ្មែររីករាយក្នុងពិធីបុណ្យ ចូលឆ្នាំខ្មែរ ដោយសុខសុវត្ថិភាព ហើយចៀសវាងការសៅហ្មង ឬអរិភាពរវាងគ្នានិងគ្នា និងស្នើសុំ ឱ្យប្រជាពលរដ្ឋខ្មែរចូលរួមឧទ្ទិសដល់ព្រលឹងជាតិខ្មែរផង និងប្ដេជ្ញារួមគ្នាទប់ស្កាត់កុំឱ្យមានសោក នាដកម្ម ទោះកម្រិតណាក៏ដោយ ដែលប្រជាជាតិខ្មែរធ្លាប់ទទួលរងគ្រោះ ចាប់ពីថ្ងៃ១៧ ខែមេសា ឆ្នាំ ១៩៧៥ គឺមួយថ្ងៃក្រោយចូលឆ្នាំថ្មី៕