ដោយ ហេង រស្មី
2019-04-16
RFA
ស្ដាប់ ឬទាញយកសំឡេង
លោក យឹម ស៊ីណន (ឆ្វេង) តំណាងចលនាយុវជនខ្មែរនៅប្រទេសកូរ៉េខាងត្បូង និងលោក ផៃ ស៊ីផាន អ្នកនាំពាក្យរបបក្រុងភ្នំពេញ។ រូប៖ ហ្វេសប៊ុក Yim Sinorn និង RFA
ក្រុមសកម្មជនគាំទ្រគណបក្សសង្គ្រោះជាតិដែលរួមមានមកពីប្រទេសកូរ៉េខាងត្បូង សហរដ្ឋអាមេរិក និងប្រទេសថៃ បានសច្ចាថានឹងបន្តសកម្មភាពរបស់ខ្លួនរហូតទាល់តែមានការផ្លាស់ប្ដូរជាវិជ្ជមាននៅកម្ពុជា បើទោះបីជារបបក្រុងភ្នំពេញព្រមានម្ដងហើយម្ដងទៀត ឱ្យបញ្ចប់សកម្មភាពប្រឆាំងរដ្ឋាភិបាលកម្ពុជាពីក្រៅប្រទេសក៏ដោយ។
កាលពីសប្ដាហ៍អ្នកនាំពាក្យរបបក្រុងភ្នំពេញ លោក ផៃ ស៊ីផាន បានព្រមានថា របបរបស់លោកមានលទ្ធភាពតាមផ្លូវច្បាប់ ដើម្បីចាត់វិធានការដោយប្រការណាមួយជាចាំបាច់ទៅលើក្រុមគាំទ្រគណបក្សសង្គ្រោះជាតិនៅក្រៅប្រទេស។
លោក ផៃ ស៊ីផាន អ្នកនាំពាក្យផ្លូវការរបស់របបក្រុងភ្នំពេញកាលពីសប្ដាហ៍មុន ដំបូងឡើយ ប្រកាសថា រដ្ឋាភិបាលក្រុងភ្នំពេញអាចចាប់មេខ្លោងរៀបចំពិធីទទួល លោក សម រង្ស៊ី ដែលលោក ផៃ ស៊ីផាន ហៅថា ជាទណ្ឌិត។ មួយស្របក់ក្រោយមក សារនេះត្រូវបានប្រព័ន្ធឃោសនារបបក្រុងភ្នំពេញលុបចោល ហើយជំនួសមកវិញនូវសារថ្មីមួយទៀត។
សារចុងក្រោយរបស់លោក ផៃ ស៊ីផាន នៅតែមានន័យគំរាមកំហែងដដែល តែមានការបញ្ជោរបញ្ចើចបញ្ចើចៅហ្វាយនាយរបស់ខ្លួនផង។ លោក ផៃ ស៊ីផាន សរសេរថា “រដ្ឋាភិបាលមានលទ្ធភាពតាមផ្លូវច្បាប់ ក្នុងកិច្ចចាត់វិធានការដោយប្រការណាមួយជាចាំបាច់ ទៅលើក្រុមបាតុករនៅក្រៅប្រទេស។”
លោក ផៃ ស៊ីផាន បញ្ជាក់ប្រាប់អាស៊ីសេរីថា ពលករខ្មែរដែលបានចេញទៅធ្វើការនៅក្រៅប្រទេសអាចធ្វើទៅបាន ដោយសារមានកិច្ចព្រមព្រៀងរវាងរដ្ឋាភិបាលកម្ពុជា និងបណ្ដាប្រទេសមួយចំនួន ដែលទទួលយកពលករខ្មែរទាំងនោះទៅធ្វើការតែប៉ុណ្ណោះ ដូច្នេះយើងអាចមានលទ្ធភាពគ្រប់បែបយ៉ាង ដើម្បីនាំខ្លួនពួកគេមកទទួលទោសនៅកម្ពុជា បើសិនជាពួកគេចូលរួមសកម្មភាពណាមួយប្រឆាំងនឹងរដ្ឋាភិបាល៖ «យើងអាចមានលទ្ធភាពគ្រប់បែបយ៉ាងក្នុងការដកយកវីសា ឬក៏ស្នើសុំឱ្យបញ្ជូនជននោះមកវិញ ក៏ប៉ុន្តែសម្ដេចជាគោលនយោបាយរបស់លោកហ្នឹងមានតម្លៃក្នុងកិច្ចការ និងការពារសេចក្ដីថ្លៃថ្នូររបស់មុខមាត់កម្ពុជាមិនចង់ឱ្យកើតមានអរិភាព ឬជម្លោះរវាងខ្មែរ និងខ្មែរនៅលើទឹកដីបរទេសដទៃទៀតទេ»។
ការព្រមានពីមន្ត្រីជាន់ខ្ពស់នៃរបបក្រុងភ្នំពេញនេះបានកើតមានឡើងក្រោយពីសកម្មជនគាំទ្រគណបក្សសង្គ្រោះជាតិនៅក្រៅប្រទេសគ្រោងនឹងធ្វើសមាជពិភពលោក នៃអ្នកប្រជាធិបតេយ្យ និងបាតុកម្មភ្លើងទៀន ដែលគ្រោងនឹងធ្វើនៅក្រុងក្វាងជូ នៃប្រទេសកូរ៉េខាងត្បូងនៅថ្ងៃទី២០ មេសា ខាងមុខនេះ។
តំណាងចលនាយុវជនខ្មែរនៅប្រទេសកូរ៉េខាងត្បូង លោក យឹម ស៊ីណន មានប្រសាសន៍ថាការគំរាមពីមន្ត្រីរបបក្រុងភ្នំពេញមិនអាចបន្ទច់បង្អាក់ចលនាបាតុកម្មនេះបានឡើយ តែផ្ទុយទៅវិញសន្ទុះនៃការគាំទ្រពីប្រជាពលរដ្ឋខ្មែរនៅក្រៅប្រទេសកាន់តែមានចំនួនច្រើនឡើងថែមទៀត៖ «សម្រាប់ពួកយើងអត់មានការភ័យខ្លាចអ្វីផង។ ជាធម្មតាកាលពីលើកមុនក៏ដោយ ក៏មានការគំរាមកំហែងមុនកម្មវិធីដើម្បីចង់ស្ទាក់កម្លាំងមិនឱចូលរួមក្នុងបាតុកម្មប៉ុន្តែពួកគេជាទូទៅតែងតែបរាជ័យនៅចំពោះមុខមហាបាតុកម្មរបស់យុវជនរបស់យើង»។
មេដឹកនាំរបបក្រុងភ្នំពេញលោក ហ៊ុន សែន ក៏ធ្លាប់បានគំរាមជាសាធារណៈថាលោកនឹងប្រើប្រាស់កាំភ្លើងយន្តស្វ័យប្រវត្តិបាញ់កម្ទេចលោក សម រង្ស៊ី ប្រធានស្ដីទីគណបក្សសង្គ្រោះជាតិ ប្រសិនបើហ៊ានវិលចូលប្រទេសកម្ពុជាវិញតាមច្រកព្រំដែនកម្ពុជាថៃ។
តំណាងគណបក្សសង្គ្រោះជាតិប្រចាំប្រទេសថៃ លោក ម៉ោញ សារ៉ាត់ មានប្រសាសន៍ថា អ្វីដែលរបបរបស់លោក ហ៊ុន សែន គំរាមកន្លងមកក្នុងបំណង ដើម្បីបំបាក់ស្មារតីអ្នកគាំទ្រគណបក្សសង្គ្រោះជាតិមិនឱ្យចូលរួមសកម្មភាពប្រឆាំង ដើម្បីឱ្យមានការផ្លាស់ប្ដូរប៉ុណ្ណោះ។ លោកបញ្ជាក់ថាសារគំរាមកាន់តែខ្លាំងសន្ទុះចិត្តប្រជាពលរដ្ឋចូលរួមប្រឆាំងនឹងរបបលោក ហ៊ុន សែន ក៏កាន់តែខ្លាំង៖ «ពេលឮសាររបៀបហ្នឹងមកវាទៅជាពញ្ញាក់ស្មារតីធ្វើឱ្យការងើបក្រោកឈររបស់យុវជនកាន់តែមានស្មារតីពុះកញ្ជ្រោលឡើងទៅវិញថែមទៀត ពីព្រោះថា អ្វីដែលលោក ផៃ ស៊ីផាន មានប្រសាសន៍ហ្នឹង វាធ្វើឱ្យអស់សំណើច ហើយវាហួសពីអ្វីដែលជាការពិត»។
មានសកម្មជនគណបក្សសង្គ្រោះជាតិជាច្រើននាក់បានភៀសខ្លួនចេញពីក្រៅប្រទេស ដើម្បីគេចចេញពីការធ្វើទុក្ខបុកម្នេញពីរបបក្រុងភ្នំពេញក្រោយពីគណបក្សប្រឆាំងដ៏ធំជាងគេ ត្រូវបានតុលាការកំពូលបានរំលាយ កាលពីខែវិច្ឆិកាឆ្នាំ២០១៧។
អតីតអ្នកតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរិទ្ធ ដែលបានភៀសខ្លួនមកសហរដ្ឋអាមេរិក បានបញ្ជាក់ថា ការគំរាមពីរបបក្រុងភ្នំពេញជារឿងធម្មតាទៅហើយមកលើសកម្មជនគាំទ្រគណបក្សសង្គ្រោះជាតិ។ លោកបញ្ជាក់ថា ក្រុមអ្នកគាំទ្រគណបក្សប្រឆាំងមិនខ្លាចរាល់ការគំរាមកំហែងណាមួយពីមន្ត្រីរដ្ឋាភិបាលទេ៖ «ខ្ញុំយល់ថា នៅប្រទេសកម្ពុជា ប្រជាពលរដ្ឋខ្លះមានការភ័យព្រួយ តែសម្រាប់អ្នកដែលរស់នៅក្នុងប្រទេសអ្នកកាន់លទ្ធិប្រជាធិបតេយ្យដូចជាប្រទេសកូរ៉េ។ ខ្ញុំយល់ថាពលករនៅទីនោះគាត់មិនរាថយក្នុងការចូលរួមទេមានតែលើកទឹកចិត្តថែមទៀតក្នុងការចូលរួម ដើម្បីប្រឆាំងរបបក្រុងភ្នំពេញ»។
សកម្មជនគាំទ្រគណបក្សសង្គ្រោះជាតិនៅក្រៅប្រទេសបានអះអាងរួចហើយថា សមាជពិភពលោក នៃអ្នកប្រជាធិបតេយ្យ និងបាតុកម្មភ្លើងទៀន ដែលគ្រោងនឹងធ្វើនៅក្រុងក្វាងជូ នៃប្រទេសកូរ៉េខាងត្បូងមិនមានអ្វីប្រែប្រួលទេ។ តំណាងចលនាយុវជនខ្មែរនៅប្រទេសកូរ៉េខាងត្បូង លោក យឹម ស៊ីណន នៅតែបង្ហាញឆន្ទៈមោះមុតរបស់លោក ក្នុងការរៀបចំសមាជ និងបាតុកម្មភ្លើងទៀននោះដោយមិនចុះញ៉មនឹងការប្រើពាក្យគំរាមពីមន្ត្រីរបបក្រុងភ្នំពេញនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។