ដោយ អាស៊ីសេរី
2019-05-26
ព្រះមហាក្សត្រ ព្រះករុណា ព្រះបាទសម្ដេច នរោត្ដម សីហមុនី យាងចូលរួមទិវាបុណ្យខួបឯករាជ្យជាតិលើកទី៦៣ នាវិមានឯករាជ្យ រាជធានីភ្នំពេញ នៅថ្ងៃទី៩ ខែវិច្ឆិកា ឆ្នាំ២០១៦។ RFA
ព្រះមហាក្សត្រ ព្រះបាទបរមនាថ នរោត្តម សីហមុនី បានយាងនិវត្តន៍មកដល់ប្រទេសកម្ពុជាវិញហើយ នៅថ្ងៃទី២៦ ឧសភា នេះ បន្ទាប់ពីព្រះអង្គបានយាងធ្វើជាព្រះកិត្តិយសក្នុងពិធីអបអរសាទរខួប២៥ឆ្នាំ នៃសកម្មភាពគណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់អង្គរ ហៅកាត់ថា ICC-Angkor ដែលប្រព្រឹត្តទៅនៅប្រទេសបារាំងកាលពីថ្ងៃទី២៤ ឧសភា កន្លងទៅ។
ថ្នាក់ដឹកនាំកំពូលៗនៃរបបក្រុងភ្នំពេញ មានជាអាទិ៍ប្រធានព្រឹទ្ធសភា លោក សាយ ឈុំ ប្រធានរដ្ឋសភា លោក ហេង សំរិន លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់ដទៃទៀត ព្រមទាំងព្រះញាតិវង្សជាច្រើនអង្គផង បានធ្វើបដិសណ្ឋារកិច្ចទទួលព្រះអង្គនៅអាកាសយានដ្ឋានអន្តរជាតិភ្នំពេញ។
គណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់អង្គរ ត្រូវបានបង្កើតឡើងកាលពីខែធ្នូ ឆ្នាំ១៩៩៣ ក្នុងគោលដៅអភិរក្ស និងអភិវឌ្ឍតំបន់អង្គរ ក្រោយពេលប្រាសាទអង្គរវត្តត្រូវបានដាក់បញ្ចូលជាសម្បត្តិបេតិកភណ្ឌមនុស្សជាតិរបស់អង្គការយូណេស្កូ។ គណៈកម្មាធិការនេះមានតួនាទី និងភារកិច្ច ស្រោចស្រង់ អភិរក្ស និងអភិវឌ្ឍប្រកបដោយចិរភាពចំពោះរមណីយដ្ឋានក្នុងតំបន់សៀមរាបអង្គរ។
ICC-Angkor មានប្រទេសបារាំង និងជប៉ុន ជាសហប្រធាន ហើយលេខាធិការដ្ឋានវិទ្យាសាស្ត្រអចិន្ត្រៃយ៍ គឺទទួលបន្ទុកដោយការិយាល័យតំណាងរបស់អង្គការយូណេស្កូ (UNESCO) ប្រចាំកម្ពុជា និងអាជ្ញាធរជាតិអប្សរា៕