តុលាការ​កោះ​ហៅ​លោក សម រង្ស៊ី​ ជា​លើក​ទីពីរ​ ឱ្យ​​ចូល​​បំភ្លឺ​តាម​​បណ្ដឹង​លោក ស ខេង

ដោយ អាស៊ីសេរី
2019-08-12
RFA

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ។ រូបថត៖ ហ្វេសប៊ុក Sam Rainy
លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ។ រូបថត៖ ហ្វេសប៊ុក Sam Rainy


តុលាការ​ក្រុង​ភ្នំពេញ​កោះហៅ​ប្រធាន​ស្ដីទី​គណបក្ស​សង្គ្រោះ​ជាតិ​លោក សម រង្ស៊ី ជា​លើក​ទីពីរ ឱ្យ​ចូល​​ឆ្លើយ​បំភ្លឺ​តាម​បណ្ដឹង​របស់​លោក ស ខេង ដែល​​ប្ដឹង​លោក​​ពី​បទ​ញុះញង់។ ដីកា​កោះ​លើក​​ទីពីរ​របស់​អយ្យការ​អម​​​​តុលាការ​ក្រុង​ភ្នំពេញ ដែល​អាស៊ី​សេរី​ទទួល​បាន​នៅ​ថ្ងៃ​ទី១២ សីហា តម្រូវ​ឱ្យ​ប្រធាន​ស្ដីទី​បក្ស​ប្រឆាំង​រូប​នេះ ត្រូវ​បង្ហាញ​ខ្លួន​នៅ​ព្រឹក​ថ្ងៃ​ទី២៨ សីហា ខាង​មុខ នៅ​ចំពោះ​មុខ​​ព្រះរាជ​អាជ្ញា​រង​លោក សេង គីមឡាក់។

ការ​កោះហៅ​លោក សម រង្ស៊ី ជា​លើក​ទី​ពីរ​នេះ ដោយសារ​លោក​មិន​បាន​ចូល​ខ្លួន​តាម​ដីកា​កោះ​លើក​ទី​មួយ ដែល​តុលាការ​គ្រោង​សាកសួរ​លោក​ កាល​ពី​ថ្ងៃ​ទី៣១ ខែ​កក្កដា កន្លង​ទៅ។

ឧប​នាយករដ្ឋមន្ត្រី និង​ជា​រដ្ឋ​មន្ត្រី​ក្រសួង​មហាផ្ទៃ លោក ស ខេង បាន​ដាក់​ពាក្យ​ប្ដឹង​លោក សម រង្ស៊ី ពី​បទ​ញុះញង់ កាល​ពី​ដើម​ខែ​កក្កដា កន្លងទៅ បន្ទាប់​ពី​លោក សម រង្ស៊ី បាន​ចោទ​ថា លោក ហ៊ុន សែន ជា​អ្នក​បញ្ជា​ឱ្យ​សម្លាប់​លោក ហុក ឡង់ឌី ហើយ​កូន​ប្រុស​លោក ហុក ឡង់ឌី គឺ​លោក ឌី វិជ្ជា កំពុង​រៀបចំ​ផែន​ការ​សងសឹក​ឱ្យ​ឪពុក​វិញ។ លោក សម រង្ស៊ី អះអាង​ទៀត​ថា ផែន​ការ​សងសឹក​នេះ​មាន​ការ​គាំទ្រ​ពី​លោក ស ខេង ដោយសារ​មន្ត្រី​ជាន់​ខ្ពស់​របប​ក្រុង​ភ្នំពេញ​រូប​នេះ​បាន​ដឹង​ខ្លួន​ថា លោក ហ៊ុន សែន មាន​គម្រោង​កម្ចាត់​លោក ដើម្បី​លើក​បន្តុប​កូន​ប្រុស​ទាំង៣ ឱ្យ​កាន់​តំណែង​កំពូល។ លោក ស ខេង បញ្ជាក់​ថា នេះ​ជា​បណ្ដឹង​លើក​ទី​មួយ​ហើយ​ក្នុង​ជីវិត​របស់​លោក ហើយ​បំណង​របស់​លោក​ក្នុង​ការ​ដាក់​បណ្ដឹង​នេះ គឺ​ដើម្បី​ដាស់​តឿន​អ្នក​នយោបាយ​ឱ្យមាន​ក្រម​សីលធម៌ និង​ចៀស​វាង​ការ​ប្រឌិត​ព័ត៌មាន​ញុះញង់។

ទោះ​ជា​យ៉ាង​ណា អ្នក​វិភាគ​ជឿជាក់​ថា លោក ស ខេង ធ្វើ​បែប​នេះ ដើម្បី​តម្រូវ​ចិត្ត​លោក ហ៊ុន សែន ប៉ុណ្ណោះ ហើយ​ចំណាត់​ការ​របស់​តុលាការ​ក្រុង​ភ្នំពេញ​នេះ គឺ​ជា​រឿង​នយោបាយ មិន​មែន​ជា​ការ​អនុវត្ត​ច្បាប់​ពិត​ប្រាកដ​ឡើយ។

ប្រធាន​ស្ដីទី​គណបក្ស​សង្គ្រោះ​ជាតិ លោក សម រង្ស៊ី ដែល​កំពុង​រស់​នៅ​និរទេស​ខ្លួន​ក្នុង​ប្រទេស​បារាំង បាន​ប្រតិកម្ម​ថា លោក ស ខេង មិន​គួរ​លេងសើច​ជាមួយ​តុលាការ​អាយ៉ង​បែប​នេះ​ឡើយ ព្រោះ​អាច​ធ្វើ​ឱ្យ​បាត់​ភាព​ថ្លៃថ្នូរ​របស់​ខ្លួន។ លោក​ជំរុញ​ឱ្យ​ក្រុម​មេដឹកនាំ​របប​ក្រុង​ភ្នំពេញ ដាក់​ពាក្យ​ប្ដឹង​លោក​ទៅ​តុលាការ​បារាំង​វិញ ព្រោះ​តុលាការ​បារាំង​មាន​ឯករាជ្យ​ពិត​ប្រាកដ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


What Next?

Recent Articles

One Response to "តុលាការ​កោះ​ហៅ​លោក សម រង្ស៊ី​ ជា​លើក​ទីពីរ​ ឱ្យ​​ចូល​​បំភ្លឺ​តាម​​បណ្ដឹង​លោក ស ខេង"

  1. Anonymous says:

    I do not understand what this court of law is doing . for many years this court and the leader of KAMPOUCHEA press charge SAM RANSY as a criminal sentencing for million years. sound wars then the world criminal BENLADEN . my question is why?? HUN SEN and his court did not ask the US special force to get SAM RANSY like they took BENLADEN. I tell you what if the US trying to get any one it will not matter where he is hiding . sorry Mr court’s man I heart SAM RANSY asking you to take your cases to FRANCE to punishing him in the true justice . I can see Mr all of you just saying you are the pure gold but??????? the question is why??????????????? all of you is scare of fire??????????? shame on you. sorry ask the word every one used to say >> you only pointing one finger to some one but you are not really the other fore fingers are pointing at you . I tell you what it is time for the US get their special force to take some body eye out just like BINLADEN.