អង្គការ​សង្គម​ស៊ីវិល​មួយ​ចំនួន​បាន​រក​ឃើញ​ថា​ សេរីភាព​ជា​មូលដ្ឋាន​របស់​ប្រជាពលរដ្ឋ​ខ្មែរ​ កំពុង​ត្រូវ​បាន​រឹត​បន្តឹង​យ៉ាង​ខ្លាំង

ដោយ ហេង រស្មី
2019-09-10
RFA

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

សកម្មជន​ប្រឆាំង​ជួបជុំ​គ្នា​ផ្ដល់​កម្លាំង​ចិត្ត​ឲ្យ​សកម្មជន​មួយ​រូប មុន​ពេល​ចូល​ជួប ប៉ូលិស​នៅ​ប៉ុស្តិ៍​នគរបាល​រដ្ឋបាល​សំឡូត ស្រុក​សំឡូត ខេត្ត​បាត់ដំបង នៅ​ថ្ងៃ​ទី៩ ខែ​មករា ឆ្នាំ២០១៩។ រូបថត៖ ពលរដ្ឋ
សកម្មជន​ប្រឆាំង​ជួបជុំ​គ្នា​ផ្ដល់​កម្លាំង​ចិត្ត​ឲ្យ​សកម្មជន​មួយ​រូប មុន​ពេល​ចូល​ជួប ប៉ូលិស​នៅ​ប៉ុស្តិ៍​នគរបាល​រដ្ឋបាល​សំឡូត ស្រុក​សំឡូត ខេត្ត​បាត់ដំបង នៅ​ថ្ងៃ​ទី៩ ខែ​មករា ឆ្នាំ២០១៩។ រូបថត៖ ពលរដ្ឋ


អង្គការ​សង្គម​ស៊ីវិល​មួយ​ចំនួន​បាន​រក​ឃើញ​ថា​ សេរីភាព​ជា​មូលដ្ឋាន​របស់​ប្រជាពលរដ្ឋ​ខ្មែរ​ កំពុង​ត្រូវ​បាន​រឹត​បន្តឹង​យ៉ាង​ឃ្លាំង ទាំង​សេរីភាព​នៃ​ការ​ជួប​សម្ដែង​មតិ​ និង​សិទ្ធិ​ជួប​ប្រជុំ​ដោយ​សន្តិវិធី។ ចំណែក​អង្គការ​សង្គម​ស៊ីវិល​ខ្លួន​ឯង ក៏​ត្រូវ​បាន​អាជ្ញាធរ​រារាំង និង​ជ្រៀតជ្រែក​ការងារ​របស់​ពួក​គេ​ផង​ដែរ។ មន្ត្រី​របប​ក្រុង​ភ្នំពេញ​បញ្ជាក់​ថា អង្គការ​សង្គម​ស៊ីវិល​ទាំង​នោះ​មិនដែល​មើល​ឃើញ​ភាព​វិជ្ជមាន​របស់​រដ្ឋាភិបាល​ទេ។

នៅ​ក្នុង​របាយការណ៍​ដែល​មាន​ចំនួន ៩ទំព័រ​របស់​អង្គការ​សង្គម​ស៊ីវិល​មួយ​ចំនួន ដែល​រួម​មាន​សហគមន៍​ជនជាតិ​ដើម​ភាគតិច​ សហគមន៍​រង​គ្រោះ​ដីធ្លី​ គ្រូបង្រៀន​ អង្គការ​មិន​មែន​រដ្ឋាភិបាល​ កម្មករ​ កម្មការិនី​ ជន​ពិការ​ យុវជន​ និង ក្រុម​អ្នក​ស្រឡាញ់​ភេទ​ដូចគ្នា ​ព្រម​ទាំង​ប្រជាពលរដ្ឋ​ចំនួន ២៦៨​នាក់​បាន​រក​ឃើញ​ថា ស្ថានភាព​សិទ្ធិមនុស្ស​ ប្រជាធិបតេយ្យ​ និង​ការ​ទទួល​បាន​យុត្តិធម៌​របស់​ពលរដ្ឋ​ខ្មែរ​ក្រោម​ការ​ដឹកនាំ​ពី​របប​ក្រុង​ភ្នំពេញ​រយៈពេល​កន្លង​មក​ ជា​ពិសេស ក្រោយ​ពី​ការ​បោះឆ្នោត២០១៨ ​មិន​មាន​ភាព​ល្អ​ប្រសើរ​ទេ។

ក្រុម​អង្គការ​សង្គម​ស៊ីវិល​ទាំង​នោះ​បាន​បញ្ជាក់​ថា សេរីភាព​ជា​មូលដ្ឋាន​របស់​ប្រជាពលរដ្ឋ​ត្រូវ​បាន​រិត​បន្តឹង​យ៉ាង​ខ្លាំង​។ រដ្ឋាភិបាល​ហាក់​យកចិត្តទុកដាក់​លើ​ការ​អភិវឌ្ឍន៍​សេដ្ឋកិច្ច​ ប៉ុន្តែ​មិន​បាន​ខិតខំ​អនុវត្ត​ឲ្យ​មាន​ប្រសិទ្ធភាព​នូវ​យន្តការ​ធានា​ការ​គោរព​សិទ្ធិមនុស្ស​ ជា​មូលដ្ឋាន​របស់​ពលរដ្ឋ​ទេ។

ការ​ចូល​រួម​សកម្មភាព​សង្គម​ដែល​ឆ្លុះ​បញ្ចាំង​ពី​ការ​អនុវត្ត​សិទ្ធិ​សេរីភាព​ រួមមាន​សេរីភាព​ បញ្ចេញ​មតិ​ សិទ្ធិ​ការ​ជួប​ប្រជុំ​ដោយសន្តិវិធី​ សិទ្ធិ​ទទួល​បាន​យុត្តិធម៌​ សិទ្ធិ​ដើរ​ហើរ​ របស់​ប្រជាពលរដ្ឋ​ និង​ អង្គការ​សង្គម​ស៊ីវិល​ ត្រូវ​បាន​ជ្រៀតជ្រែក​ និង​ រារាំង​ដោយ​អាជ្ញាធរ។

អ្នកនាំពាក្យ​គណបក្ស​ប្រជាជន​កម្ពុជា​ លោក​ សុខ ឥសាន​ បាន​ការពារ​ទង្វើ​របស់​រដ្ឋាភិបាល​ថា ​អ្វី​ដែល​បាន​បង្ហាញ​នៅ​ក្នុង​សេចក្ដី​ថ្លែង​ការណ៍​នោះ គឺ​ខុស​ពី​ការ​ពិត​ជាក់​ស្ដែង ដែល​កើត​មាន​នៅ​កម្ពុជា។ លោក​ប្រាប់​ប្រាប់​អាស៊ី​សេរី​កាល​ពី​ថ្ងៃ​ទី៩ កញ្ញា​ថា ក្រុម​អង្គការ​ក្រៅ​រដ្ឋាភិបាល​ទាំង​នោះ​មិន​ដែល​មើល​ភាព​វិជ្ជមាន​របស់​រដ្ឋាភិបាល​ទេ គឺ​មើល​ឃើញ​តែ​ភាព​ខ្មៅ​ងងឹត​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


What Next?

Recent Articles

One Response to "អង្គការ​សង្គម​ស៊ីវិល​មួយ​ចំនួន​បាន​រក​ឃើញ​ថា​ សេរីភាព​ជា​មូលដ្ឋាន​របស់​ប្រជាពលរដ្ឋ​ខ្មែរ​ កំពុង​ត្រូវ​បាន​រឹត​បន្តឹង​យ៉ាង​ខ្លាំង"

  1. so socheath says:

    ក្រុមសង្គមស៊ីវិល និង ក្រុមសហជីព ដែលមាននិន្នាការប្រឆាំងរដ្ឋាភិបាល
    គឺជាក្រុមភេរវកម្ម ដែលច្បាប់មិនត្រូវអត់អោន
    *******
    ជានិច្ចកាល ក្រុមសង្គមស៊ីវិល ដែលស្ថិតនៅក្នុងអង្គការសិទ្ធិមនុស្ស អង្គការសិទ្ធិលំនៅដ្ឋាន សមាគម
    និងក្រុមសហជីពដែលមាននិន្នការប្រឆាំងរដ្ឋាភិបាល ពួកគេតែងលើកឡើងពីសិទ្ធិសេរីភាព ពីសិទ្ធិមនុស្ស ពីប្រជាធិបតេយ្យមកធ្វើជាត្រីវិស័យក្នុងការនាំមុខ ដើម្បីប្រឆាំងអំណាចរដ្ឋ ដែលជាដែនសមត្ថកិច្ចការពារផលប្រយោជន៍ កាពារសិទ្ធិសេរីភាព ការពារសិទ្ធិមនុស្ស និងការពារប្រជាធិបតេយ្យ
    របស់ប្រជាពលរដ្ឋ បើទោះបីពួកគេដឹងយ៉ាងច្បាស់ថា លំហរនៃសិទ្ធិសេរីភាព សិទ្ធិមនុស្ស និង
    ប្រជាធិបតេយ្យ នៅកម្ពុជា គឺមានយ៉ាងពេលបរិបូរណ៍ នឹងកំពុងដំណើរការជានិរន្តក្តី ។
    ប្រជាពលរដ្ឋដែលស្រឡាញ់សុខសន្តិភាព បន្ទាប់ពីបានមើលឃើញសកម្មភាពបែបប្រតិកិរិយារបស់ក្រុមសង្គមស៊ីវិល និង ក្រុមសហជីព ដែលមាននិន្នាការប្រឆាំងរដ្ឋាភិបាល ទាំងនេះរួចមក ពួកគាត់បាន
    ចាត់ទុកក្រុមនេះ ថាគឺជាក្រុមភេរវកម្ម ដែលច្បាប់មិនត្រូវអត់អោន ។
    ពិតណាស់ ជាមួយសកម្មភាពដែលពួកប្រតិកិរិយាទាំងអស់នេះបានធ្វើកន្លងមក វាមិនខុសអីពីការ
    ធ្វើសកម្មភាពចូលរួមយ៉ាងសកម្មក្នុងចលនានយោបាយដើម្បីកសាងកម្លាំងដើម្បីត្រៀមកម្លាំង ដើម្បី
    បង្កើតអង្គការចាត់តាំងខាងនយោបាយខុសច្បាប់មួយ ប៉ុនប៉ងដើម្បីប្រមូលកម្លាំងប្រឆាំងនឹងរដ្ឋាភិបាល ផ្ដួលរំលំរដ្ឋាភិបាល ដែលជាអំពើខុសច្បាប់ ខុសគោលការណ៍នៃលទ្ធិប្រជាធិបតេយ្យ ដែលពួកគេបានទន្ទេញជាប់មាត់ ។
    វាពិតជាមានចលនាវិទ្ធង្សនាជាច្រើនដែលបង្ករឡើងដោយក្រុមសង្គមស៊ីវិល និង ក្រុមសហជីព ដែលមាននិន្នាការប្រឆាំងរដ្ឋាភិបាល ដែលសូម្បីពួកគេដឹងច្បាស់ថា ការភ័យព្រួយខ្លាចសហភាពអឺរ៉ុបផ្ដាច់ពន្ធEBA
    ប៉ះពាល់ដល់សេដ្ឋកិច្ចជាតិ វាមិនមែនជាកាតព្វកិច្ចដែលពួកគេត្រូវដោះស្រាយ ដោយហេតុថា
    កម្ពុជា មិនអាចយកអធិបតេយ្យភាពជាតិ ទៅដោះដូរជាមួយជំនួយក្តី ។
    ពួកគេនូវបានបំផុស ចលនាសម្អប់ ចងគំនុំ ក្នុងការបំភ័ន្តជាមួយរឿងរ៉ាវ ដែលទាក់ទងជាមួយ
    ស្ថាប័នមីក្រូហិរញ្ញវត្ថុនានានៅកម្ពុជា ដែលបានផ្តល់ឥណទាន ជូនប្រជាពលរដ្ឋខ្ចីដើម្បីធ្វើកិច្ចអភិវឌ្ឍ
    គ្រួសារ ការធ្វើអាជីវកម្ម ខ្នាតតូច ឬធំ ដែលវាដូចជាសំណុំនៃការរីកចម្រើនក្នុងជីវភាពរស់នៅរបស់
    ប្រជាពលរដ្ឋ បានក្លាយទៅជាសំណុំភ្លើងដុតក្បាលពួកគេ ឲ្យគេចផុតពីពាក្យភូតភរ បោកប្រាស
    ដែលពួកគេបានបង្ករឡើង ។
    បញ្ហាទំនាស់ដីធ្លី ក្នុងសកម្មភាព ឲ្យមានការលួចដីរដ្ឋ ប្លន់ដីរាស្ត្រ ស្ថិតនៅក្រោមទិសស្លោក ឈ្នះបានដី
    ចាញ់បានលុយ ដែលបង្ករឡើងដោយពួកក្រុមសង្គមស៊ីវិល ដែលមាននិន្នាការប្រឆាំងរដ្ឋាភិបាល
    បានក្លាយជាដំបៅ ដែលត្រូវធ្វើការព្យាបាលរាល់ថ្ងៃ ជាមួយការបំផុសបន្ថែមរបស់ពួកគេ សម្រាប់បង្កររឿងហេតុ ។
    ដោយឡែក សម្រាប់រឿងដែល សម រង្ស៊ី សន្យាថានឹងវិលត្រឡប់ទៅស្រុកខ្មែរវិញនាថ្ងៃទី៩ វិច្ឆិកា ឆ្នាំ២០១៩ ពួកនេះបានប្រើប្រាស់ភាពសកម្ម ក្នុងការបំផុសឲ្យមានការប្រមូលផ្តុំកម្លាំងមនុស្ស ដើម្បី
    ចាំទទួលសមរង្សី ដែលសូម្បីពួកគេដឹងយ៉ាងច្បាស់ថា សមរង្ស៊ីជាជនកំសាក ជាទណ្ឌឹត ដែលដែលត្រូវតែជាប់គុក ហើយសមរង្ស៊ីពិតជាមិនហ៊ានត្រឡប់មកវិញក្តី ។ តែថា ទោះជាយ៉ាងណា សកម្មភាព
    ដែលធ្វើឡើងដោយពួកគេ ក៏មិនអត់ប្រយោជន៍នោះដែរ ព្រោះពួកគេគឺជាក្រុមតែមួយ ធ្វើសកម្មភាព
    ដើម្បីផលប្រយោជន៍នយោបាយផង និងបានទទួលជំនួយពីបរទេស ដើម្បីទ្រទ្រង់សកម្មភាពអង្គការ
    សមាគម របស់ពួកគេបន្តទៀតផងដែរ ។ដូច្នេះផលប្រយោជន៍ពួកគេ ត្រូវបានទុកជាធំជាងសេចក្តី
    សុខសាន្តរបស់ប្រជាជន ដែលកំពុងរស់នៅក្រោមដំបូលសន្តិភាពដែលរកបានដោយកម្រពីសំណាក់
    សម្តេចតេជោហ៊ុន សែននាយករដ្ឋមន្ត្រីនៃកម្ពុជា ។
    ប្រជាជនកម្ពុជា ទទូចស្នើសុំរាជរដ្ឋាភិបាល មេត្តាពិនឹត្យនៅលើផ្លូវច្បាប់ចំពោះ ក្រុមសង្គមស៊ីវិល និង ក្រុមសហជីព ដែលមាននិន្នាការប្រឆាំងរដ្ឋាភិបាលទាំងនេះ ព្រោះថាសកម្មភាពអនុវត្តរបស់ពួកគេ ដូចគ្នានិងក្រុមភេរវកម្ម បំផ្លាញសេចក្តីសុខសាន្តរបស់ប្រជាជន ដែលច្បាប់មិនត្រូវ
    អត់អោននោះទេ ៕

Leave a Reply

Submit Comment