លោក ហ៊ុន សែន​​ មិន​បកស្រាយ​អំពី​កិច្ចព្រមព្រៀង​សន្តិភាព​ទីក្រុង​ប៉ារីស​ទេ​

នយោបាយ
22 តុលា 2019
ហ៊ុល រស្មី
វីអូអេខ្មែរ

រូប​ឯកសារ៖ លោកនាយករដ្ឋមន្ត្រី ហ៊ុន សែន អំឡុងពិធីអបអរខួប៦៨ឆ្នាំ នៃគណបក្សប្រជាជនកម្ពុជា នៅកោះពេជ្រ រាជធានីភ្នំពេញ កាលពីថ្ងៃទី២៨ ខែមិថុនា ឆ្នាំ២០១៩។ (អូន ឆេងប៉រ/VOA)
រូប​ឯកសារ៖ លោកនាយករដ្ឋមន្ត្រី ហ៊ុន សែន អំឡុងពិធីអបអរខួប៦៨ឆ្នាំ នៃគណបក្សប្រជាជនកម្ពុជា នៅកោះពេជ្រ រាជធានីភ្នំពេញ កាលពីថ្ងៃទី២៨ ខែមិថុនា ឆ្នាំ២០១៩។ (អូន ឆេងប៉រ/VOA)

នាយករដ្ឋមន្ត្រី​កម្ពុជា​លោក​ហ៊ុន សែន​ នៅ​ថ្ងៃ​អង្គារ​នេះ​ ​បាន​ប្រតិ​កម្ម​តប​ទៅ​នឹង​​ការ​បក​ស្រាយ​​ដែល​ទាក់​ទង​ទៅ​នឹង​ការ​អនុវត្តន៍​​កិច្ច​ព្រមព្រៀង​សន្តិភាព​ទីក្រុង​ប៉ារីស​ ដោយ​លោក​​អះអាង​ថា​ ខ្លឹម​សារ​មួយ​ចំនួន​របស់​កិច្ច​ព្រមព្រៀង​នេះ​ បាន​ក្លាយ​ជា​រដ្ឋ​ធម្មនុញ្ញ​របស់​កម្ពុជា​ទៅ​ហើយ។ ប្រតិកម្ម​នេះ​ធ្វើ​ឡើង​ក្រោយ​ពី​អ្នក​វិភាគ​និង​អ្នក​ឃ្លាំមើល​សិទ្ធិ​មនុស្ស​​លើក​ឡើង​ថា ​កម្ពុជា​​បាន​បរាជ័យ​ក្នុង​ការ​អនុវត្ត​ពេញ​លេញ​នូវ​ខ្លឹម​សារ​ក្នុង​កិច្ច​ព្រម​ព្រាង​​​ឆ្នាំ​១៩៩១​នេះ។
ភ្នំពេញ — 

ថ្លែង​ក្នុង​ពិធី​ចែក​សញ្ញាប័ត្រ​មួយ​ក្នុង​ទី​ក្រុង​ភ្នំពេញ​នៅ​ថ្ងៃ​អង្គារ​នេះ នាយករដ្ឋមន្ត្រី​កម្ពុជា​លោក​ហ៊ុន សែន​ ​ប្រកាស​ថា​លោក​នឹង​មិន​ធ្វើ​ការ​បក​ស្រាយ​ណាមួយលើ​ខ្លឹម​សារ​និង​ការ​អនុវត្ត​កិច្ច​ព្រម​ព្រាង​សន្តិភាព​ទីក្រុង​ប៉ារីស​នោះ​ទេ ស្រប​ពេល​ដែល​អ្នក​វិភាគ​និង​អ្នក​ឃ្លាំមើល​សិទ្ធិ​មនុស្សវាយ​តម្លៃ​ថា​កម្ពុជា​បរាជ័យ​ក្នុង​ការអនុវត្ត​ពេញ​លេញនូវ​ខ្លឹមសារ​នៃ​កិច្ចព្រមព្រៀង​នេះ។

សេចក្ដី​ថ្លែង​ការណ៍​របស់​លោក​នាយក​រដ្ឋ​មន្ត្រី​ខ្មែរ​ ធ្វើ​ឡើង​មួយ​ថ្ងៃ​ប៉ុណ្ណោះ មុន​នឹង​ខួប​២៨​ឆ្នាំ​នៃ​កិច្ច​ព្រមព្រៀង​សន្តិភាព​ទីក្រុង​ប៉ារីស។

អ្នក​វិភាគ​និង​ក្រុម​អ្នក​ឃ្លាំមើល​សិទ្ធិ​មនុស្ស​នៅ​ក្នុង​ប្រទេស​កម្ពុជាបាន​លើកឡើង​ក្នុង​បទ​សម្ភាសន៍​ជាមួយ​វិទ្យុ​វីអូអេ កាល​ចុង​សប្ដាហ៍​មុន​ថា​ជិត​៣០​ឆ្នាំ​ក្រោយ​ពី​កិច្ច​ព្រមព្រៀង​នេះ ​កម្ពុជា​នៅ​តែ​មាន​បញ្ហា​ធ្ងន់ធ្ងរ​ក្នុង​ការ​ជំរុញ​ការ​គោរព​សិទ្ធិ​មនុស្ស​និង​សិទ្ធិ​នយោបាយ។

លោក​នាយក​រដ្ឋ​មន្ត្រី​ ហ៊ុន សែន មាន​ប្រសាសន៍​ថា​លោក​នឹង​មិន​ធ្វើ​ការ​បក​ស្រាយ​លើ​ខ្លឹម​សារ​នៃ​កិច្ច​ព្រមព្រៀង​នេះ​ទេ។

«ខ្ញុំ​អត់​និយាយ​ទេ កិច្ច​ព្រមព្រៀង​ទីក្រុង​ប៉ារីស។ទុក​ឲ្យ​គេ​បក​ស្រាយ​ទៅ»។

លោក​ប្រមុខ​រដ្ឋាភិបាល​ខ្មែរ​បន្ថែម​ថា​ក្នុង​ពេល​នេះ​កម្ពុជា​ត្រូវ​អនុវត្ត​តាម​ខ្លឹម​សារ​នៃ​រដ្ឋ​ធម្មនុញ្ញ​ដោយ​ហេតុ​ថា​ខ្លឹម​សារ​នៃ​កិច្ច​ព្រមព្រៀង​ទីក្រុង​ប៉ារីស ត្រូវ​បានបញ្ចូល​ក្នុង​រដ្ឋ​ធម្មនុញ្ញ។

«តម្លៃ​កិច្ច​ព្រមព្រៀង​ស្អីៗៗ ចុះ​រដ្ឋ​ធម្មនុញ្ញ​ខ្មែរ​ទៅ​ណា​បាត់? ពេលវេលា​នេះ​ជា​ពេលវេលា​ត្រូវ​អនុវត្ត​តាម​ក្រប​ខណ្ឌ​នៃ​រដ្ឋ​ធម្មនុញ្ញ។​ ចាំ​មើល​ឲ្យ​គេ​ចេញ​មក​បក​(ស្រាយ)​ទៅ»។

នៅ​ត្រង់​ចំណុច​ក នៃ​មាត្រា​១៥ ​របស់​កិច្ច​ព្រមព្រៀងសន្តិភាព​ទីក្រុង​ប៉ារីស ថ្ងៃ២៣​តុលា ឆ្នាំ ១៩៩១ ចែងថាកម្ពុជាធានា​ដល់​ការ​គោរព​និង​ប្រតិបត្តិ​សិទ្ធិ​មនុស្ស​និង​សេរីភាព​ជា​មូលដ្ឋាន​របស់​ប្រជា​ពលរដ្ឋ​ រួម​ទាំង​គាំទ្រ​«​ពលរដ្ឋ​កម្ពុជា​ទាំង​អស់​ក្នុង​ការ​ធ្វើ​សកម្មភាព​ដែល​ជំរុញ និង​ការពារ​សិទ្ធិ​មនុស្ស​ និង​សេរីភាព​ជា​មូលដ្ឋាន» ដើម្បី​ធានា​ថា​ នយោបាយ​ និង​អំពើ​ប្រព្រឹត្ត​ក្នុង​អតីត​កាល​មិន​ត្រូវ​បាន​អនុញ្ញាត​ឲ្យ​វិល​ត្រឡប់​មក​វិញ​ដាច់​ខាត​ និង​ចូលរួម​កិច្ច​ព្រមព្រៀង​ជា​អន្តរជាតិ​ទាំង​ឡាយ​ដែល​ពាក់​ព័ន្ធ​ដល់​សិទ្ធិមនុស្ស​។

លោក ​ហ៊ុន សែន បាន​បន្ថែម​ការ​អធិប្បាយ​ថា​កិច្ច​ព្រមព្រៀង​សន្តិភាព​ទីក្រុង​ប៉ារីស មិន​បានចែង​ឲ្យ​មាន​ការ​កាត់ទោស​អតីត​មេដឹកនាំ​ខ្មែរក្រហម​នោះ​ទេ ហើយ​កម្ពុជា​បាន​អនុវត្ត​លើស​ពី​កិច្ច​ព្រមព្រៀង​នេះ​ចែង​ទៅទៀត។

លោក​បណ្ឌិត​ ឡៅ ម៉ុងហៃ​ អ្នកវិភាគ​នយោបាយ​ប្រាប់ VOA​ថា​ កម្ពុជា​បាន​បរាជ័យ​លើ​វិស័យ​សិទ្ធិ​មនុស្ស​ ដោយ​ហេតុ​ថា​ ប្រទេស​កម្ពុជា​រហូត​មក​ដល់​ពេលនេះ​ មិន​ទាន់​មាន​ប្រព័ន្ធ​តុលាការ​ដែល​គួរ​ឲ្យ​ទុក​ចិត្ត​បាន​នៅ​ឡើយ។

លោក​បន្ថែម​ថា​កិច្ចព្រមព្រៀង​សន្តិភាព​ទីក្រុង​ប៉ារីស​នៅតែ​មាន​សុពល​ភាព​ដដែល​ ដរាប​ណា​កម្ពុជា​នៅ​មិន​ទាន់​ប្រកាស​ថា​ ខ្លួន​ឈប់​ត្រូវ​ការ​កិច្ចព្រមព្រៀង​នេះ​នោះ​ទេ។

«ប្រកាស​ប្រាប់​គេ​ថា​ ឥឡូវ​នេះ​គឺ​កិច្ច​ព្រមព្រៀង​ទីក្រុង​ប៉ារីស​ហ្នឹង​គឺ​វា​ចប់​សព្វគ្រប់​ហើយ​បាទ។ លែង​មាន​សុពលភាព​ទៀត​ហើយ​នៅ​ប្រទេស​កម្ពុជា​ គឺ​ប្រទេស​កម្ពុជា​លែង​ជាប់​ជំពាក់​នឹង​កិច្ចព្រមព្រៀង​ទីក្រុង​ប៉ារីស​ទៀត​ហើយ​បាទ»។

មាន​ប្រទេស​ហត្ថលេខី​ក្នុង​កិច្ច​ព្រមព្រៀង​ទី​ក្រុង​ប៉ារីស​ចំនួន​១៨​ប្រទេស។ ប្រទេស​ទាំង​នេះ​មាន​កាតព្វកិច្ច​ជួយ​ជំរុញ​ និង​លើក​ទឹក​ចិត្ត​ដល់​ការ​គោរព​ និង​ប្រតិបត្តិ​តាម​សិទ្ធិ​មនុស្ស​ និង​សេរីភាព​ជា​មូលដ្ឋាន​នៅ​ក្នុង​កម្ពុជា​ «ដើម្បី​ជា​ពិសេស​ការពារ​ទប់​ទល់​នឹង​ការ​កកើត​ឡើង​វិញ​ការ​រំលោភ​សិទ្ធិ​មនុស្ស​ជាថ្មី​ទៀត»។

ប៉ុន្តែ​នៅ​មុន​ការ​មក​ដល់​នៃ​ខួប​ការ​ចុះ​កិច្ច​ព្រមព្រៀង​សន្តិភាព​ទី​ក្រុង​ប៉ារីស​ ២៣​ តុលា​ សកម្មភាព​បង្ក្រាប​លើ​សកម្មជន និង​មន្ត្រី​អតីត​គណបក្ស​ប្រឆាំង​បាន​រីក​រាល​ដាល​កាន់​តែ​ខ្លាំង​ឡើង។ រហូត​មក​ដល់​ពេល​នេះ​ មាន​សកម្មជន​អតីត​គណបក្ស​សង្គ្រោះ​ជាតិ លើស​ពី​៥០​នាក់​ត្រូវ​បាន​ចាប់​ខ្លួន។ ​ភាគ​ច្រើន​ក្នុង​ចំណោម​ជន​ដែល​ត្រូវ​ចាប់​ខ្លួន ​ត្រូវ​ជាប់​ចោទ​ថា​បាន«​រួម​គំនិត​ក្បត់»​ជាមួយ​លោក​សម រង្ស៊ី ខណៈ​ដែល​ប្រធាន​ស្ដីទី​អតីត​គណបក្ស​សង្គ្រោះ​ជាតិ​រូប​នេះ ប្រកាស​វិលត្រឡប់​មកកាន់​ប្រទេស​កម្ពុជា​វិញ​នៅ​ថ្ងៃ​ទី​៩​ខែ​វិច្ឆិកា ខាងមុខ បន្ទាប់​ពី​ស្ថិត​នៅ​ក្រៅ​ប្រទេស​អស់​រយៈពេល​ប្រាំ​ឆ្នាំ៕

What Next?

Recent Articles

One Response to "លោក ហ៊ុន សែន​​ មិន​បកស្រាយ​អំពី​កិច្ចព្រមព្រៀង​សន្តិភាព​ទីក្រុង​ប៉ារីស​ទេ​"

  1. Anonymous says:

    WELL.. those agreement that HUN SEN singed in PARIS was not legitimate for HUN SEN leadership. it is so sad about an agreement in 1985 between HUN SEN and Vietcong is acting every day . I do not know what to say about this but go on keep up your good work HUN SEN no one can stop your dismantle your own nation soon Cambodian will become another refugee in their own home town .

Leave a Reply

Submit Comment