ដោយ អាស៊ីសេរី
2019-10-22
អាស៊ីសេរី
លោក រ៉ាត់ រត្នមុនី សកម្មជនសិទ្ធិការងារ (រូបពី៖ ហ្វេសប៊ុកលោក រ៉ាត់ រត្នមុនី)
តុលាការកំពូលគ្រោងប្រកាសសាលដីកាសុំនៅក្រៅឃុំរបស់សកម្មជនសិទ្ធិការងារ លោក រ៉ាត់ រត្នមុនី នៅថ្ងៃទី២៨ តុលា សប្ដាហ៍ក្រោយនេះ បន្ទាប់ពីបានបើកសវនាការកាលពីថ្ងៃទី២១ តុលា។
មេធាវីការពារក្តីឱ្យលោក រ៉ាត់ រត្នមុនី លោក សំ ទិត្យសីហា សង្ឃឹមថា តុលាការនឹងអនុញ្ញាតឱ្យកូនក្ដីរបស់លោកបាននៅក្រៅឃុំតាមការស្នើសុំ ដោយសារកូនក្តីរបស់លោកបានសន្យាថា នឹងចូលរួមគ្រប់នីតិវិធីរបស់តុលាការ។ ម្យ៉ាងវិញទៀត លោកថា ផ្អែកតាមនីតិវិធីក្នុងសំណុំរឿងព្រហ្មទណ្ឌ តុលាការមិនគួរឃុំខ្លួនកូនក្តីរបស់លោកបន្តទៀតនោះទេ ពីព្រោះគាត់គ្មានលទ្ធភាពបង្កភាពវឹកវរក្នុងសង្គម និងធ្វើសកម្មភាពផលប៉ះពាល់ដល់សណ្តាប់ធ្នាប់សាធារណៈនោះឡើយ។
សាលាដំបូងរាជធានីភ្នំពេញ និងសាលាឧទ្ធរណ៍បានបដិសេធសំណើសុំនៅក្រៅឃុំរបស់លោក រ៉ាត់ រត្នមុនី ជាបន្តបន្ទាប់ ក្រោមហេតុផលថា ដើម្បីរារាំងកុំឱ្យមានការគាបសង្កត់លើសាក្សី ឬជនរងគ្រោះ រារាំងកុំឱ្យមានការត្រូវរ៉ូវគ្នារវាងជនត្រូវចោទ និងអ្នកសមគំនិត និងដើម្បីរក្សាភស្តុតាង ឬតម្រុយជាសម្ភារៈ ព្រមទាំងដើម្បីធានារក្សាសណ្ដាប់ធ្នាប់សាធារណៈកុំឱ្យមានការច្របូកច្របល់ដែលបណ្ដាលមកពីបទល្មើស។
តុលាការក្រុងភ្នំពេញបានផ្ដន្ទាទោស លោក រ៉ាត់ រត្នមុនី ឱ្យជាប់ពន្ធនាគារ ២ឆ្នាំ ពីបទ “ញុះញង់ឱ្យមានការរើសអើង” និងបង់សំណងឱ្យដើមបណ្ដឹងរដ្ឋប្បវេណីចំនួន ៧០លានរៀល ឬស្មើនឹងជិត ២ម៉ឺនដុល្លារអាមេរិក។
គិតត្រឹមពេលនេះ ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី បានជាប់ឃុំក្នុងពន្ធនាគារព្រៃសអស់រយៈជាង ១០ខែមកហើយ។ សហគមន៍អន្តរជាតិបានទាមទារឱ្យរបបក្រុងភ្នំពេញដោះលែងសកម្មជនសិទ្ធិការងាររូបនេះវិញជាបន្ទាន់ និងដោយឥតលក្ខខណ្ឌ បន្ទាប់ពីពិនិត្យឃើញថា រឿងក្តីនេះមានលក្ខណៈបាយឡុកបាយឡ គួរឱ្យអាម៉ាស់ និងគួរឱ្យស្អប់ខ្ពើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- តុលាការខេត្តរតនគិរីដាក់មន្ត្រីជាន់ខ្ពស់សមាគម អាដហុក ក្រោមការត្រួតពិនិត្យ
- សាលាឧទ្ធរណ៍លើកពេលសវនាការសំណុំរឿងលោក រ៉ាត់ រត្នមុនី ទៅថ្ងៃក្រោយវិញ
- សង្គមស៊ីវិលជាតិ និងអន្តរជាតិទាមទារឱ្យរបបក្រុងភ្នំពេញទម្លាក់ចោលបទចោទប្រកាន់លើអតីតអ្នកយកព័ត៌មានអាស៊ីសេរី
- អ្នកសារព័ត៌មាន និងសង្គមស៊ីវិលខកចិត្ត ចំពោះសេចក្ដីសម្រេចរបស់តុលាការក្រុងភ្នំពេញលើសំណុំរឿងវិទ្យុអាស៊ីសេរី
- អតីតអ្នកយកព័ត៌មានអាស៊ីសេរីខកចិត្ត ដែលតុលាការមិនប្រកាសសាលក្រមលើអង្គសេចក្តី
- ក្រុមសិទ្ធិមនុស្សរបបក្រុងភ្នំពេញបដិសេធអនុសាសន៍អ្នកស្រី រ៉ូណា ស្មីត ទាក់ទងនឹងបក្សសង្គ្រោះជាតិ
- ក្រុមប្រទេសនិយមប្រជាធិបតេយ្យ សម្តែងក្តីបារម្ភរួមគ្នា អំពីបញ្ហារំលោភបំពានសិទ្ធិមនុស្សកាន់តែធ្ងន់ធ្ងរនៅកម្ពុជា
- ភរិយា និងសកម្មជនសិទ្ធិមនុស្សទាមទារអោយសាលាឧទ្ធរណ៍ផ្ដល់យុត្តិធម៌ដល់ លោក រ៉ាត់ រត្នមុនី
- តុលាការគ្រោងប្រកាសសាលក្រមសំណុំរឿងអតីតអ្នកយកព័ត៌មានអាស៊ីសេរី ២រូប នៅដើមខែតុលា
- មេធាវីស្នើសុំចៅក្រមឱ្យឆាប់ប្រកាសសាលក្រមសំណុំរឿងអតីតអ្នករាយការណ៍ព័ត៌មានអាស៊ីសេរី