ដោយ អេង គីមហុង
07/11/2019
RFI
ទំនប់វារីអគ្គីសនីកំចាយ (@Internet)
លោកនាយករដ្ឋមន្ត្រី ហ៊ុន សែន នៅថ្ងៃទី៧វិច្ឆិកានេះ បានប្រកាសទុកជាមុនថា រាជធានីភ្នំពេញនឹងប្រឈមការខ្វះថាមពលអគ្គិសនីប្រើប្រាស់ជាថ្មី នៅក្នុងឆ្នាំ២០២០។ ប្រឈមនឹងកង្វះថាមពលដែលនឹងកើតឡើងជាថ្មីនេះ លោកនាយករដ្ឋមន្ត្រី ហ៊ុន សែន បានធ្វើការសូមទោសនិងសុំការយោគយល់ ដោយជំនួសមកវិញនូវការសន្យាទិញថាមពលអគ្គិសនីពីប្រទេសឡាវនិងវៀតណាម៤០០មេហ្គាវ៉ាត់បន្ថែមមកបំពេញតម្រូវការជាក់ស្ដែងនៅក្នុងឆ្នាំ២០២០។
មូលហេតុដែលកម្ពុជាប្រឈមនឹងការខ្វះថាមពលអគ្គិសនីប្រើប្រាស់ជាថ្មី ពិសេសក្នុងរាជធានីភ្នំពេញដោយសារកត្តាអាកាសធាតុប៉ះពាល់ដល់ដំណើរការផលិតថាមពលអគ្គិសនី ដើរដោយធ្យូងថ្ម និងពន្លឺព្រះអាទិត្យ។ ជាក់ស្ដែង កម្រិតទឹកទន្លេមេគង្គក្នុងខេត្ត ក្រចេះ កំពង់ចាម ស្ទឹងត្រែង ឡើងផុតកម្រិតប្រកាសអាសន្ន ខណៈកម្រិតទឹកនៅភ្នំពេញ កណ្ដាល ទឹកធ្លាក់ចុះមិនធ្លាប់មាន ដែលទាំងនេះមិនអំណោយផលដល់ទំនប់វារីអគ្គិសនីក្នុងការផលិតថាមពលឡើយ។ ម្យ៉ាងទៀតការផលិតថាមពលដោយខ្លួនឯង សម្រេចបានតែ១៨៤ទៅ៦៨៧មេហ្គាវ៉ាត់តែប៉ុណ្ណោះ ដែលផ្ទុយពីរាល់ឆ្នាំជាមធ្យម កម្ពុជាអាចផលិតថាមពលអគ្គិសនី ក្នុងកម្រិត១៣២៨មេហ្គាវ៉ាត់។
បើតាមការបង្ហាញមូលហេតុបន្ថែមទៀតរបស់លោក ហ៊ុន សែន ការដំឡើងម៉ាស៊ីនផលិតថាមពលអគ្គិសនី ដែលរដ្ឋាភិបាលបញ្ជាទិញពីរគ្រឿងពីបរទេស នៅមិនទាន់ដំណើរតាមការគ្រោងទុកឡើយ។ ត្រង់ចំណុចនេះ លោកនាយករដ្ឋមន្ត្រីបានអះអាងថា ដោយសារទីតាំងដំឡើងម៉ាស៊ីន ក្នុងស្រុកល្វាឯម ស្ថិតនៅលើដីដែលមានទំនាស់ជាមួយពលរដ្ឋ។ តែទោះជាបែបនេះក្ដីលោកនាយករដ្ឋមន្ត្រីជំរុញឲ្យរដ្ឋមន្ត្រីក្រសួងរ៉ែ និងថាមពលពន្លឿនការងារនេះ។
សូមជម្រាបជូនថា រដ្ឋាភិបាលបានចំណាយលុយជិត៤០០លានដុល្លា ដោយទិញម៉ាស៊ីនផលិតអគ្គិសនីពីអាល្លឺម៉ង់២០០មេហ្គាវ៉ាត់ និងហ្វាំងឡង់២០០មេហ្គាវ៉ាត់សម្រាប់ផ្គត់ផ្គង់ថាមពលក្នុងរាជធានីភ្នំពេញ។
ប្រឈមបញ្ហានេះ ប្រមុខរដ្ឋាភិបាលលោក ហ៊ុន សែន ចរចាទិញថាមពលអគ្គិសនីពីប្រទេសឡាវ២០០មេហ្គាវ៉ាត់យកមកផ្គត់ផ្គង់បន្ថែម។ ប៉ុន្តែភាគីឡាវអះអាងថា ខ្លួនក៏ប្រឈមនឹងកង្វះថាមពលដែរ ដោយសារទំនប់វារីអគ្គិសនីដនសាហុង ទឹកស្ថិតក្នុងកម្រិតមួយទាប។ ក្រៅតែពីប្រទេសឡាវប្រមុខរដ្ឋាភិបាល ក៏បង្ហើបលទ្ធភាពក្នុងការទិញប្រភពថាមពលពីប្រទេសវៀតណាមដែរ។ គួររម្លឹកថា អំឡុងពេលចុងឆ្នាំ២០១៨ និងដើមឆ្នាំ២០១៩ កម្ពុជាជួបប្រទះកង្វះថាមពលប្រើប្រាស់ក្នុងរួបភាពមួយធំធេង ហើយកាលណោះអាជ្ញាធរបានជំរុញឲ្យពលរដ្ឋ ឬម្ចាស់អាជីវកម្មធំទិញម៉ាស៊ីនភ្លើងប្រើប្រាស់ផ្ទាល់ខ្លួន៕