ទស្សនៈ​ពលរដ្ឋ​ចំពោះ​ការ​បន្ធូរបន្ថយ​បម្រាម​លើ​លោក កឹម សុខា

ដោយ មួង ណារ៉េត
2019-11-10
RFA

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

លោក កឹម សុខា (កណ្ដាល) ប្រធាន​គណបក្ស​សង្គ្រោះ​ជាតិ ស្វាគមន៍​អ្នក​គាំទ្រ​ក្នុង​ខួប​លើក​ទី​២៥ នៃ​កិច្ចព្រមព្រៀង​សន្តិភាព​ទីក្រុង​ប៉ារីស នា​ទីស្នាក់ការ​គណបក្ស​ក្នុង​សង្កាត់​ចាក់អង្រែលើ រាជធានី​ភ្នំពេញ ថ្ងៃ​ទី​២៣ ខែ​តុលា ឆ្នាំ​២០១៦។

លោក កឹម សុខា (កណ្ដាល) ប្រធាន​គណបក្ស​សង្គ្រោះ​ជាតិ ស្វាគមន៍​អ្នក​គាំទ្រ​ក្នុង​ខួប​លើក​ទី​២៥ នៃ​កិច្ចព្រមព្រៀង​សន្តិភាព​ទីក្រុង​ប៉ារីស នា​ទីស្នាក់ការ​គណបក្ស​ក្នុង​សង្កាត់​ចាក់អង្រែលើ រាជធានី​ភ្នំពេញ ថ្ងៃ​ទី​២៣ ខែ​តុលា ឆ្នាំ​២០១៦។ RFA/Cheu Sideth


ពលរដ្ឋ​មួយ​ចំនួន​យល់​ថា ការ​អនុញ្ញាត​ឱ្យ​លោក កឹម សុខា អាច​ធ្វើ​ដំណើរ​ក្នុង​ប្រទេស​បាន ប៉ុន្តែ​មិន​អនុញ្ញាត​ឱ្យ​ធ្វើ​សកម្មភាព​នយោបាយ គឺ​គ្រាន់តែ​ល្បិច​នយោបាយ​របស់​របប​ក្រុងភ្នំពេញ​ដើម្បី​ចង់​បំភ័ន្ត​ភ្នែក​អន្តរជាតិ និង​ចង់​រក្សា​ប្រព័ន្ធ​អនុគ្រោះ EBA ទាំង​ដែល​របប​នេះ​មិន​បាន​បំពេញ​តាម​លក្ខខណ្ឌ​របស់​អន្តរជាតិ​នៅឡើយ​។ ការ​លើកឡើង​របស់​ពលរដ្ឋ​បែបនេះ បន្ទាប់​ពី​តុលាការ​ក្រុងភ្នំពេញ​នៅ​ថ្ងៃ​ទី​១០ ខែ​វិច្ឆិកា​នេះ សម្រេច​ឱ្យ​ប្រធាន​គណបក្ស​សង្គ្រោះ​ជាតិ​លោក កឹម សុខា អាច​ធ្វើ​ដំណើរ​ក្នុង​ប្រទេស​បាន ប៉ុន្តែ​មិន​ឱ្យ​ចេញ​ក្រៅ​ប្រទេស និង​ត្រូវ​ឆ្លើយតប​នឹង​ការ​កោះ​ហៅ​ពី​គ្រប់​សមត្ថកិច្ច។

ពលរដ្ឋ​ចាត់​ទុក​ចំណាត់ការ​ថ្មី​ដែល​ជា​ការ​ដក​បម្រាម​ខ្លះ​នៃ​ការ​រឹតត្បិត​សិទ្ធិ​សេរីភាព​លើ​លោក កឹម សុខា គឺ​មិន​អាច​ធ្វើ​ឱ្យ​សហភាព​អឺរ៉ុប​បញ្ឈប់​នីតិវិធី​ព្យួរ​ប្រព័ន្ធ​អនុគ្រោះ​ពន្ធ​EBA បានទេ​។ ពលរដ្ឋ​ចង់​ឃើញ​របប​ក្រុងភ្នំពេញ​ចិត្តសឿង​បើក​ឱ្យ​មាន​គណបក្ស​សង្គ្រោះជាតិ ផ្ដល់​តួនាទី​ក្រុម​ប្រឹក្សាឃុំ​សង្កាត់​ជាង​៥០០០ អាសនៈ​របស់​គណបក្ស​នេះ និង​អនុញ្ញាត​ឱ្យ​លោក កឹម សុខា អាច​ធ្វើ​នយោបាយ​ឡើងវិញ។

ពលរដ្ឋ​រស់នៅ​ខេត្ត​ព្រៃវែង​ម្នាក់​លោក ថន សុភាព យល់ថា នេះ​គ្រាន់តែ​ជា​ការ​បិទបាំង​ភាព​តានតឹង​នៃ​ស្ថានការណ៍​នយោបាយ​សព្វថ្ងៃ ខណៈ​លោក សម រង្ស៊ី កំពុង​ព្យាយាម​វិល​ចូល​ប្រទេស​កម្ពុជា​វិញ​។ លោក​បន្ត​ថា លោក កឹម សុខា ជា​អ្នកនយោបាយ ប៉ុន្តែ​ការ​តម្រូវ​មិន​ឱ្យ​លោក កឹម សុខា ធ្វើ​នយោបាយ​គឺ​ស្មើនឹង​យក​គុក​ឥត​ជញ្ជាំង​មក​ដាក់​ឃុំ​លោក កឹម សុខា ដដែល៖ «ដូច​តែ​នៅ​ក្នុង​គុក​ដដែល មិន​អាច​និយាយ​ពាក់ព័ន្ធ​នឹង​នយោបាយ​ហើយ​បើ​អ្នកនយោបាយ​មិន​អាច​និយាយ​នយោបាយ​បាន​ដូច​តែ​ជាប់គុក​អត់​ជញ្ជាំង​ដែរ»។

ពលរដ្ឋ​ម្នាក់ទៀត លោក ជិន សុខន យល់​ថា ការសម្រេច​របស់​តុលាការ​ពេលនេះ​គឺ​ធ្វើតាម​បញ្ជា​របស់​លោក ហ៊ុន សែន ដែល​មេដឹកនាំ​រូប​នេះ​ចង់​លួងលោម​សហភាព​អឺរ៉ុប​ថា ខ្លួន​បាន​ដោះលែង​លោក កឹម សុខា ដូចដែល​សហភាព​អឺរ៉ុប​កំពុង​ទាមទារ។ ពលរដ្ឋ​រូប​នេះ​លើកឡើង​ថា បើ​លោក ហ៊ុន សែន ចង់​ស្ដារ​ស្ថានការណ៍​ឡើងវិញ​មែន​នោះ លុះ​ត្រា​អនុញ្ញាត​ឱ្យ​លោក កឹម សុខា អាច​ធ្វើ​សកម្មភាព​នយោបាយ និង​អនុញ្ញាត​ឱ្យ​គណបក្ស​សង្គ្រោះ​ជាតិ​អាច​ដំណើរការ​ឡើងវិញ៖ «គឺ​គាត់​(​លោក ហ៊ុន សែន​លែង​ដើម្បី​បន្ធូរបន្ថយ​ឱ្យ​ឆាក​អន្តរជាតិ​ដឹង​ថា គាត់​បាន​ដោះលែង​លោក កឹម សុខា ហើយ​។ ប៉ុណ្ណឹង​អត់​ត្រឹមត្រូវ​សោះ​អត់​ទទួល​យក​បាន»។

ចំណែក​ពលរដ្ឋ​ម្នាក់ទៀត លោក ភួង ថា សង្កេត​ឃើញ​ថា ការ​លុប​បម្រាប​មួយ​ចំនួន​លើ​លោក កឹម សុខា ពេលនេះ​អាច​ជាប់​ពាក់ព័ន្ធ​នឹង​កត្តា​សំខាន់​ពីរ គឺ​របប​ក្រុងភ្នំពេញ​ចង់​បង្ហាញ​ទៅ​សហគមន៍​អន្តរជាតិ​ថា ខ្លួន​កំពុង​ធ្វើតាម​ចង់បាន​របស់​សហគមន៍​អន្តរជាតិ​ដែល​ជា​ការ​ស្តារ​សិទ្ធិមនុស្ស និង​ប្រជាធិបតេយ្យ​ឡើងវិញ។ លោក​បន្ត​ថា ចំណុច​មួយទៀត​គឺ​អាច​ជា​ល្បិច នយោបាយ​របស់​គណបក្ស​ប្រជាជន​កម្ពុជា​ដើម្បី​ចង់​បំបែក​លោក កឹម សុខា ចេញពី​លោក សម រង្ស៊ី ព្រោះ​គណបក្ស​នេះ​ធ្លាប់​ធ្វើ​ឱ្យ​គណបក្ស​ហ៊្វុនស៊ិនប៉ិច​បែកបាក់​បាន​ជោគជ័យ​នា​ពេល​កន្លង​ទៅ៖ «គឺជា​លេស​អ្នកដឹកនាំ​របស់​បក្ស​កាន់អំណាច​ដើម្បី​បំបែក​សំឡេង​លោក កឹម សុខា និង​លោក សម រង្ស៊ី ឱ្យ​គណបក្ស​នេះ​ចែក​ផ្លូវ​គ្នា​ដើរ​វិញ​ណា»។

ចៅក្រម​ស៊ើបសួរ​សាលាដំបូង​រាជធានី​ភ្នំពេញ នៅ​ថ្ងៃ​ទី១០ ខែ​វិច្ឆិកា បានសម្រេច​កែប្រែ​លក្ខខណ្ឌ​នៃ​ការ​ដាក់​លោក កឹម សុខា ឱ្យ​ស្ថិត​ក្រោម​ការ​ត្រួតពិនិត្យ​តាម​ផ្លូវ​តុលាការ ដោយ​បង្រួម​លក្ខខណ្ឌ​ខ្លះៗ​មក​នៅ​ត្រឹម​៣ គឺ​មិន​ត្រូវ​ចេញ​ក្រៅ​ព្រំប្រទល់​ដែនដី​ប្រទេស​កម្ពុជា មិន​ត្រូវ​ធ្វើ​សកម្មភាព​នយោបាយ និង​ត្រូវ​ឆ្លើយតប​នឹង​ការ​កោះហៅ​ពី​គ្រប់​សមត្ថកិច្ច។

សេចក្តី​សម្រេច​នេះ ធ្វើឡើង​មួយថ្ងៃ ក្រោយ​ប្រធាន​ស្តីទី​គណបក្ស​សង្គ្រោះ​ជាតិ លោក សម រង្ស៊ី ដែល​បាន​ធ្វើ​ដំណើរ​ទៅដល់​ប្រទេស​ម៉ាឡេស៊ី កាលពី​រសៀល​ថ្ងៃ​ទី៩ ខែ​វិច្ឆិកា ក្នុង​ដំណើរ​មាតុភូមិនិវត្តន៍​ទៅ​កម្ពុជា ដែល​លោក​អះអាង​ថា ទៅ​ដើម្បី​ឱ្យ​មាន​ការ​ដោះលែង​លោក កឹម សុខា និង​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


អត្ថបទ​ដែល​ទាក់ទង

What Next?

Recent Articles

2 Responses to "ទស្សនៈ​ពលរដ្ឋ​ចំពោះ​ការ​បន្ធូរបន្ថយ​បម្រាម​លើ​លោក កឹម សុខា"

  1. Anonymous says:

    please do not believe that evil yet . please showing me your mojo then I can believe you

  2. so socheath says:

    ឯ/ឧ គឹម សន្តិភាពថា កឹម សុខា ត្រូវបន្តអនុវត្តឲ្យបានខ្ជាប់ខ្ជួននូវកាតព្វកិច្ច ដែលកំណត់ដោយចៅក្រមស៉ើបសួរ បើពុំនោះទេចៅក្រមស៉ើបសួរ អាចសម្រេចឃុំខ្លួនវិញបាន
    (ភ្នំពេញ)៖ ឯ/ឧ គឹម សន្តិភាព អ្នកនាំពាក្យក្រសួងយុត្តិធម៌ បានថ្លែងថា អ្វីដែល កឹម សុខា អតីតប្រធានគណបក្សសង្គ្រោះជាតិត្រូវធ្វើ គឺបន្តអនុវត្តឲ្យបានខ្ជាប់ខ្ជួន នូវកាតព្វកិច្ចរបស់ខ្លួន ដែលកំណត់ដោយចៅក្រមស៉ើបសួរ បើពុំនោះទេចៅក្រមស៉ើបសួរ អាចសម្រេចឃុំខ្លួនបានឡើវិញបាន ដោយយោងតាមមាត្រា២៣០ នៃក្រមនីតិវិធីព្រហ្មទណ្ឌកម្ពុជា។
    ការចេញមុខមកបញ្ជាក់ពីមន្ត្រីជាន់ក្រសួងយុតិ្តធម៌ បានធ្វើឡើងបន្ទាប់ពីអ៊ូ ច័ន្ទរ័ត្ន អតីតតំណាង
    រាស្ត្រនៃអតីតគណបក្សសង្គ្រោះជាតិ បានបង្ហាញឆន្ទៈរបស់ខ្លួន ចង់ទៅជួបជជែកជាមួយ
    កឹម សុខា ពីការយកអាសនៈឃុំសង្កាត់មកវិញ។
    អ្នកនាំពាក្យក្រសួងយុត្តិធម៌ បានបញ្ជាក់យ៉ាងដូច្នេះថា៖ «អ្វីដែលកឹម សុខា ត្រូវធ្វើគឺបន្តអនុវត្តឲ្យបានខ្ជាប់ខ្ជួន នូវកាតព្វកិច្ចរបស់ខ្លួនដែលកំណត់ដោយចៅក្រមស៉ើបសួរ បើពុំនោះទេចៅក្រម
    ស៉ើបសួរអាចសម្រេចឃុំខ្លួនបាន យោងតាមមាត្រា ២៣០ នៃក្រមនីតិវិធីព្រហ្មទណ្ឌ។
    ហេតុនេះ ទាំង កឹម សុខា និងអ្នកដទៃ ត្រូវយល់អំពីបញ្ហានេះ និងចៀសវាងសកម្មភាពណា ដែលប៉ះពាល់ដល់ដំណើរការនីតិវិធីរបស់តុលាការ និងកាតព្វកិច្ចដែលត្រូវអនុវត្ត» ៕
    សូមបញ្ជាក់ថា នៅថ្ងៃទី១០ ខែវិច្ឆិកា ឆ្នាំ២០១៩ សាលាដំបូងរាជធានីភ្នំពេញ បានចេញសេចក្តីប្រកាសព័ត៌មានពិសេសមួយ ដោយសម្រេចដាក់លោក កឹម សុខា ឲ្យស្ថិតក្រោមការត្រួតពិនិត្យតាមផ្លូវតុលាការដដែល ប៉ុន្តែទទួលបានការបន្ធូរបន្ថយលក្ខខណ្ឌត្រួតពិនិត្យតាមផ្លូវកា
    ការទទួលបានការបន្ធូរបន្ថយកាតព្វកិច្ចនៅពេលនេះ ដោយសារជនត្រូវចោទលោក កឹម សុខា នាពេលកន្លងមកបានគោរពត្រឹមត្រូវតាមកាតព្វកិច្ច នៃការដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ព្រមទាំងមានកិច្ចសហការល្អក្នុងដំណើរការនីតិវិធីតុលាការ ជាពិសេសបញ្ហាសុខភាពរបស់ជនត្រូវចោទដែលចាំបាច់ត្រូវពិនិត្យ និងព្យាបាល។
    សេចក្តីប្រកាសព័ត៌មានរបស់សាលាដំបូងរាជធានីភ្នំពេញ បានឲ្យដឹងថា ជនត្រូវចោទ
    ឈ្មោះ កឹម សុខា ត្រូវបានចៅក្រមស៊ើបសួរសម្រេចបន្តដាក់ឲ្យស្ថិត ក្រោមការត្រួតពិនិត្យតាមផ្លូវតុលាការ ដោយត្រូវជាប់កាតព្វកិច្ចដូចខាងក្រោម ៖
    ក៖ មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា។
    ខ៖ មិនត្រូវធ្វើសកម្មភាពនយោបាយ។
    គ៖ ត្រូវឆ្លើយតបនឹងការកោះហៅពីគ្រប់សមត្ថកិច្ច ។
    កឹម សុខា ត្រូវបានសមត្ថកិច្ចចាប់ខ្លួននៅថ្ងៃទី៣ ខែកញ្ញា ឆ្នាំ២០១៧ ពាក់ព័ន្ធនឹងការប្រព្រឹត្តអំពើ «ក្បត់ជាតិ» ឃុបឃិតជាមួយបរទេសផ្តួលរំលំ រាជរដ្ឋាភិបាលស្របច្បាប់ ហើយត្រូវបានឃុំខ្លួន នៅក្នុងពន្ធនាគារ ត្រពាំងផ្លុង ខេត្តត្បូងឃ្មុំ បន្ទាប់ពីបែកធ្លាយវីដេអូមួយដែលលោកនិយាយថា លោកអនុវត្តតាមការណែនាំពីបរទេស ដើម្បីធ្វើការផ្លាស់ប្តូរប្រទេសកម្ពុជា ដោយយកលំនាំតាមប្រទេសយូហ្គោស្លាវី និងប្រទេសស៊ែប៊ី ៕