លោក ហ៊ុន សែន ​ប្រកាស​ឲ្យ​កម្ពុ​ជា​ត្រៀម​ខ្លួន​សម្រាប់​ការ​បាត់​បង់​ EBA

កម្ពុជា

21 វិច្ឆិកា 2019
កាន់ វិច្ឆិកា
វីអូអេខ្មែរ

លោកនាយករដ្ឋមន្ត្រី ហ៊ុន សែន ចូលរួមពិធីបុណ្យអុំទូកនៅរាជធានីភ្នំពេញ ថ្ងៃទី១០ ខែវិច្ឆិកា ឆ្នាំ២០១៩។
លោកនាយករដ្ឋមន្ត្រី ហ៊ុន សែន ចូលរួមពិធីបុណ្យអុំទូកនៅរាជធានីភ្នំពេញ ថ្ងៃទី១០ ខែវិច្ឆិកា ឆ្នាំ២០១៩។

លោក​នាយក​រដ្ឋមន្រ្តី​ ហ៊ុន សែន នៅ​ថ្ងៃ​ព្រហស្បតិ៍​នេះ ប្រាប់​ឲ្យ​ប្រជាជនកម្ពុជា​ និង​មន្ត្រី​ពាក់ព័ន្ធ​ត្រៀម​ខ្លួន​ក្នុង​ការ​បាត់​បង់​ប្រព័ន្ធ​អនុគ្រោះ​ពន្ធ​ «អ្វី​គ្រប់​យ៉ាង​លើក​លែង​តែ​អា​វុធ​(EBA)‍» ​តែ​កុំ​ឲ្យ​បាត់បង់​អធិបតេយ្យ។​

លោក​នាយក​រដ្ឋមន្ត្រី ​ហ៊ុន ​សែន ​ថ្លែង​ដូច្នេះ​ក្រោយ​ពី​សហភាព​អឺរ៉ុប​ (EU)​ កាល​ពី​ថ្ងៃទី​១២​ ខែ​វិច្ឆិកា​នេះ ​បាន​ផ្ញើ​របាយ​ការណ៍ជា​លើក​ទី​២​ឲ្យ​រដ្ឋាភិបាល​កម្ពុជា​ ដោយ​ទុករយៈពេល​មួយ​ខែ​ដើម្បី​ឲ្យកម្ពុជា​ឆ្លើយ​តប​បញ្ហា​សិទ្ធិ​មនុស្ស ដូច​ជា​ការ​ធ្វើ​ទុក្ខ​បុក​ម្នេញ​ទៅ​លើ​ក្រុម​ប្រឆាំង​ អង្គការ​សង្គម​ស៊ីវិល​ និង​ការ​បង្ក្រាប​លើ​ប្រព័ន្ធ​ផ្សព្វផ្សាយ​ ដែល​មិន​ចំណុះ​រដ្ឋាភិបាល។​

ក្នុង​ពិធី​សម្ពោធ​អគារ​ឥន្ទ្រទេវី​របស់​រាជ​បណ្ឌិត្យ​សភា​កម្ពុជា​ នៅ​ថ្ងៃ​ទី​២១ ខែ​វិច្ឆិកា ​ឆ្នាំ​២០១៩​នេះ​ លោក ​ហ៊ុន សែន ​ថ្លែង​ថា​ ​កម្ពុជា​មិន​អាច​យក​អធិបតេយ្យ​ភាព​ជាតិ​ទៅ​ដោះដូរ​ជាមួយជំនួយ ​ឬ​ការ​អនុគ្រោះ​ណា​មួយ​នោះ​ទេ។​

«ព្រោះ​ឥឡូវគេ​យក​អាហ្នឹង​ [EBA]​ មក​គំរាម​យើង​ថា​ ​អ្នក​ឯង​ត្រូវ​ធ្វើ​អា​នេះ​ អា​នេះ។​ អីចឹង​បាន​យើង​ប្រាប់​ទៅ​វិញ​ថា​ យើង​មិន​អាច​យក​អធិបតេយ្យ​របស់​យើង​ទៅ​ដោះ​ដូរ​ជាមួយ​ជំនួយ ​ឬ​ការ​អនុគ្រោះ​ណា​ទេ។ ​អ្វី​ដែល​យើង​ខិត​ខំ​ធ្វើ​ ​យើង​ធ្វើ​បាន​យើង​ធ្វើ​ តែ​អ្វី​ដែល​យើង​ធ្វើ​មិន​អាច​ធ្វើ​បាន គឺ​អត់​ទេ។ ​ទីផ្សារ​នៅ​តែ​ជា​ទីផ្សារ ​គ្រាន់តែ​ពី​មុន​អត់​បង់​ពន្ធ ​ឥឡូវត្រូវ​បង់​ពន្ធ»។​

លោក ហ៊ុន សែន​ បន្ត​ថា ​នៅ​ឆ្នាំ​២០២៥ ​ឬ​២០២៦ ​កម្ពុជា​នឹង​ត្រូវ​ដក​ចេញ​ពី​ការ​ផ្តល់​ប្រព័ន្ធ​អនុគ្រោះ​ពន្ធ ​«អ្វី​គ្រប់​យ៉ាង​លើក​លែង​តែ​អាវុធ​(EBA) ដោយ​ស្វ័យ​ប្រវត្តិដោយ​សារ​សេដ្ឋ​កិច្ច​កម្ពុជា​រីក​ចម្រើន ​ដូច្នេះ​លោក​ថា​ ​កម្ពុជា​នៅ​ត្រូវ​តែ​បង់​ពន្ធ​នាំ​ចេញ​ពេញ​ដដែល។​

លោក​ ហ៊ុន សែន ក៏​បាន​បន្ថែម​ ​ដោយ​ជំរុញ​ឲ្យ​សភា​ពាណិជ្ជ​កម្ម​កម្ពុជា​ផ្នែក​ធុរកិច្ច​ត្រូវ​សម្លឹងឆ្ពោះ​ទៅ​រក​ទីផ្សារ​នានា​តាម​ប្រទេស​ក្នុង​តំបន់​អាស៊ាន ​និង​ត្រូវ​ប្រើប្រាស់​ឲ្យ​អស់​លទ្ធភាព​ទាញ​យក​ផល​ប្រយោជន៍​ពី​ពាណិជ្ជ​កម្ម​សេរី​កម្ពុជា-ចិន។​

លោក​ ឈាង វណ្ណារិទ្ធ​ ​នាយក​វិទ្យាស្ថាន​ចក្ខុវិស័យ​អាស៊ី ​លើក​ឡើង​ថា​ ​ក្នុង​ស្ថានភាព​បច្ចុប្បន្ន​ ​កម្ពុជា​មិន​ទាន់​មាន​សមត្ថ​ភាព​គ្រប់​គ្រាន់ក្នុង​ការ​ធ្វើ​ពាណិជ្ជ​កម្ម​ជាមួយ​ប្រទេស​ចិន ​និង​ប្រទេស​ក្នុង​តំបន់​អាស៊ាន​បាន​នៅ​ឡើយ។​ ​លោក​បន្ត​ថា​ ការ​រក្សា​ឲ្យបាន​ ​EBA​ និង​ទំនុក​ចិត្ត​ពី​អ្នក​វិនិយោគ​គឺ​ជា​កត្តា​សំខាន់​សម្រាប់​កម្ពុជា។​

«EBA​ បើ​នៅ​បាន​ល្អ​ ពីព្រោះ​ថា​ យើង​ត្រូវ​ការ​រយៈពេល​មួយ​ transaction ​[ការ​ធ្វើ​ប្រតិបត្តិការ] ​ទៅ​ knowledge base economy ​[ចំណេះ​ដឹង​ផ្នែក​សេដ្ឋកិច្ច]។​ អាហ្នឹង​វា​ត្រូវ​ការ​រយៈពេល​មួយ។ ​ហើយ​ល្បឿន​នៃ​កំណែ​ទម្រង់​ហ្នឹង​វា​ត្រូវ​តែ​លឿន​មែន​ទែន។ ​ឥឡូវល្បឿន​កំណែ​ទម្រង់​ហ្នឹង​ វា​នៅ​យឺត​នៅ​ឡើយ​ diversify [ការ​ធ្វើ​ពិបិធកម្ម]​ ហ្នឹង​ អីចឹង​យើង​គិត​ថា​ EBA ​នៅ​តែ​មាន​សារសំខាន់ ​ហើយ​បើ​ការពារ​បាន​ផ្នែក​ណា​មួយ ​ជាពិសេស​វិស័យ​កាត់​ដែរ ​កាន់​តែ​ល្អ»។​

កាល​ពី​ខែ​កុម្ភៈ​ ឆ្នាំ​២០១៩​កន្លង​ទៅ​នេះ​ គណៈ​កម្មការ​សហភាព​អឺរ៉ុប​ប្រកាស​ចាប់​ផ្តើម​ដំណើរ​ការ​ជា​ផ្លូវការដែល​អាច​នឹង​ឈាន​ទៅ​ដល់​ការ​ព្យួរ​ជា​បណ្តោះ​អាសន្ន​នូវ​ឋានៈ​អនុគ្រោះ​ពន្ធ​ EBA ​ពី​ប្រទេស​កម្ពុជា​ ​ដោយសារ​តែ​ការ​ខូចខាត​យ៉ាង​ដំណំ​លើ​បញ្ហា​សិទ្ធិ​មនុស្ស​ ​និង​ដំណើរ​ការ​ប្រជាធិបតេយ្យ​នៅ​កម្ពុជា​ ​ជាពិសេស​គឺ​ក្រោយ​ការ​រំលាយ​គណបក្ស​សង្គ្រោះ​ជាតិ​នៅ​ឆ្នាំ​២០១៧។​

រូបឯកសារ៖ កម្មករ​រោងចក្រ​កាត់ដេរ​ខ្មែរ កំពុង​ធ្វើការ​នៅ​ក្នុង​រោងចក្រ​កាត់ដេរ​មួយ​កន្លែង​ក្នុង​ទីក្រុង​ភ្នំពេញ។
រូបឯកសារ៖ កម្មករ​រោងចក្រ​កាត់ដេរ​ខ្មែរ កំពុង​ធ្វើការ​នៅ​ក្នុង​រោងចក្រ​កាត់ដេរ​មួយ​កន្លែង​ក្នុង​ទីក្រុង​ភ្នំពេញ។

បន្តិចមុន​ សហភាព​អឺរ៉ុប​ចេញ​របាយ​ការណ៍​ជា​លើក​ទី​២​ ​គេ​ឃើញ​ក្រុម​សហជីព​ និង​សមាគម​ផ្សេង​មួយ​ចំនួន​ ពិសេស​សមាគម​រោងចក្រ​កាត់​ដេរ​កម្ពុជា​ ​បាន​ព្រមាន​ពី​ហានិភ័យ​ផ្សេងៗ​ ​ប្រសិន​បើ​កម្ពុជា​បាត់​បង់​ EBA។ ​ចំណែក​ក្រុមហ៊ុន​វិនិយោគ​ទុន ​ដូចជា ​H&M ​ក៏​បាន​ឲ្យ​ដឹង​ថា ​ពួកគេ​បាន​ត្រៀម​ខ្លួន​ផ្លាស់​ប្តូរ​ទីតាំង​ផលិត​កម្ម​របស់​ពួកគេ​ទៅ​ប្រទេស​ចិន ​ឬ​ឥណ្ឌូនេស៊ី ​បើ​សិន​ជា​កម្ពុជា​បាត់បង់​ឋានៈ​អនុគ្រោះ​ពន្ធ​នេះ​ពី​សហភាព​អឺរ៉ុប។​

ក្រុម​អ្នក​ការពារ​សិទ្ធិ​កម្មករ​លើក​ឡើង​ថា​ ​ប្រសិន​បើ​កម្ពុជា​បាត់បង់​ EBA​ ​នោះ​ក្រុមហ៊ុន​ដែល​នាំ​ផលិតផល​កាត់ដេរ​ចេញ​ទៅ​ប្រទេស​អឺរ៉ុប​ជាច្រើន​នឹង​ចាក​ចេញ​ពី​ប្រទេស​កម្ពុជា​ដើម្បី​រក​ប្រទេស​ដែល​ផលិត​កម្ម​មាន​តម្លៃ​ថោក​ជាង​កម្ពុជា។​ ​អ្នក​ធ្វើការ​ជាង​៧៥០.០០០​នាក់ ​អាច​ប្រឈម​នឹង​ការ​ធ្លាក់​ចុះ​ប្រាក់​ចំណូល ​ឬ​បាត់បង់​ប្រាក់​ចំណូល​ទាំង​ស្រុង។​

លោក​ ដួង តុលា​ តំណាង​សហជីព​នៅ​រោងចក្រ​អ៊ីហ្គាមិនដែល​ជា​រោង​ចក្រ​ផលិត​សម្លៀក​បំពាក់​នាំ​ចេញ​ទៅ​ទី​ផ្សារ​អឺរ៉ុប ​ប្រាប់ ​VOA ​ថា ​ការ​ដក​ប្រព័ន្ធ​អនុគ្រោះ​ពន្ធ​ចេញ​ពី​កម្ពុជា ​អាច​ធ្វើ​ឲ្យ​រោងចក្រ​មួយ​ចំនួន​ដក​ចេញ​ពី​កម្ពុជា ​ទៅ​កាន់​ប្រទេស​ផ្សេង។ លោក​បន្ត​ថា ​ការណ៍​នេះ​នឹង​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​កម្មករ ​ដែល​ត្រូវ​ការ​ប្រាក់​ចំណូល​ជា​ប្រចាំ​ក្នុង​ការ​ទំនុក​បម្រុង​គ្រួសារ ​និង​បង់​ធនាគារ ​រហូត​អាច​បង្ខំ​ឲ្យ​ពួក​គេ​ធ្វើ​ចំណាក​ស្រុក​ស្វែងរក​ការងារ​នៅ​ក្រៅ​ប្រទេស។​

លោក​ ដួង តុលា​ សង្ឃឹម​ថា រដ្ឋាភិបាល​កម្ពុជានឹង​ព្យាយាមទប់​ស្កាត់​មិន​ឲ្យមាន​ការ​ដក​ប្រព័ន្ធ​ការ​អនុគ្រោះ​ពន្ធពី​កម្ពុជា។​

«សម្រាប់​ពួក​ខ្ញុំ​ជា​កម្មករ​គឺរង​ហានិភ័យ​ច្រើន​ ​ដោយ​សារ​អត់​មាន​ការងារ ​ហើយ​បើ​សិន​មាន​ការងារ​ ​ប្រាក់​ខែ​ក៏​មិន​ច្រើន​ដូច​ពួក​គាត់[រដ្ឋាភិបាល]ដែរ​ គឺ​ប្រាក់​ខែ​តែ​២០០​ឬ​៣០០​ដុល្លារ​ បែង​ចែក​ទៅ​ថ្លៃ​ទឹក​ភ្លើង​សព្វ​គ្រប់។​ ​សម្រាប់​ពួក​គាត់​ ទោះ​ជា​បាត់​បង់​ក៏​អត់​មានអី​ត្រូវ​ខ្វល់​ទេ​ ​ដោយសារ​ពួក​គាត់​មាន​លុយ​ត្រៀមសម្រាប់​ពួកគាត់​ស៊ី​ចាយ​ហើយហ្នឹង!​ ​វា​អាច​ជះ​ឥទ្ធិពល​មិន​ត្រឹម​តែ​ក្នុង​ប្រព័ន្ធ​វាយនភ័ណ្ឌ។​ វា​អាច​ជះ​ឥទ្ធិពល​ដល់​អ្នក​សេដ្ឋកិច្ច​ក្រៅ​ប្រព័ន្ធ​មួយ​ចំនួន​ទៀត»។​

សភា​ពាណិជ្ជ​កម្ម​អឺរ៉ុបបាន​សន្និដ្ឋាន​ថា​ ​មនុស្ស​យ៉ាង​ហោច​ណាស់​៩​ម៉ឺន​នាក់​ អាច​នឹង​បាត់បង់​ការងារ​ធ្វើ ​បើ​សិន​ជា​សហភាព​អឺរ៉ុប​សម្រេច​ផ្អាក ​ឬ​ដក​ឋានៈ​អនុគ្រោះ​ពន្ធ ដែល​អនុញ្ញាត​ឲ្យ​កម្ពុជា​ចំណេញ​ប្រមាណ​ជា​៦០០​លាន​ដុល្លារ​អាមេរិក​ក្នុង​មួយ​ឆ្នាំពី​ការ​នាំ​ចូល​ភាគ​ច្រើន​នៃ​ផលិត​ផល​ក្នុង​ស្រុក​ទៅ​អឺរ៉ុប​ ដោយ​មិន​បាច់​បង់​ពន្ធ។​ វិស័យ​កាត់ដេរ​បាន​ផ្តល់​ការងារ​យ៉ាង​ហោច​ណាស់​ចំនួន​៧​សែន​ដល់​ប្រជា​ពលរដ្ឋ​កម្ពុជា​ ជា​ពិសេស​ស្ត្រី៕

What Next?

Recent Articles

3 Responses to "លោក ហ៊ុន សែន ​ប្រកាស​ឲ្យ​កម្ពុ​ជា​ត្រៀម​ខ្លួន​សម្រាប់​ការ​បាត់​បង់​ EBA"

  1. Anonymous says:

    Good choice and the question is what countries that are willing to pay that high price and can Cambodia products compete with China or Vietnam? How about India?

  2. so chết says:

    what is the multiplier effect
    example with a gain of 1 unit and if we stop at the 4th individual, economie generates the sum of 3.36 unit How many million that the Khmer will lose to the EBA and GPS suprresion
    but all these bands of one-eyed crocodile fan do not understand but not at all

  3. Anonymous says:

    well.. this evil is suicide himself but he did not realize that can be affecting to Cambodian. it is the same the word that this evil saying to his followers be preparing to die. I just want to give this dumb ass a clue>>right now is only EU but if all western nation lost hope the US will joint soon . I tell you what if you HUN SEN not give up they will chocking you to deft . I’m glad right now they just give you the red light the reason why??? because they think about Cambodian not you . wakeup Cambodian you should not gong hell whit this whatever you call him. GOD bless Cambodia and it’s people

Leave a Reply

Submit Comment