ដោយ សុជីវី
2020-01-07
អាស៊ីសេរី
លោកនាយករដ្ឋមន្ត្រី ហ៊ុន សែន ក្នុងពិធីប្រារព្ធទិវា ៧ មករា ថ្ងៃទី៧ ខែមករា ឆ្នាំ២០២០។
រូប៖ ហ្វេសប៊ុកលោក ហ៊ុន សែន
លោក ហ៊ុន សែន មិនព្រមធ្វើតាមសំណើសហគមន៍អន្តរជាតិ
លោកនាយករដ្ឋមន្ត្រី ហ៊ុន សែន រក្សាជំហរមិនព្រមស្ដារលទ្ធិប្រជាធិបតេយ្យ និងសិទ្ធិមនុស្ស តាមការទាមទាររបស់សហគមន៍អន្តរជាតិ។ លោកថា ហេតុផលនៃការទាមទាររបស់សហគមន៍អន្តរជាតិទាំងនោះ មិនសមហេតុផល។ ប៉ុន្តែមន្ត្រីបក្សប្រឆាំង គាំទ្រការទាមទាររបស់សភាពអឺរ៉ុប និងហៅជាការសមរម្យបំផុត។
ថ្លែងក្នុងពិធីបុណ្យ ៧ មករា ខួបទី ៤១ឆ្នាំ លោក ហ៊ុន សែន ប្រកាសថា នឹងមិនព្រមស្ដារលទ្ធិប្រជាធិបតេយ្យ និងសិទ្ធិមនុស្សទេ តែបានចោទអ្នកទាមទារទៅវិញថា បានបង្ខំឲ្យរបបលោកមិនអាចអនុវត្តច្បាប់ជាតិ ដែលរបបក្រុងភ្នំពេញបានតាក់តែងឡើង។
សហគមន៍អន្តរជាតិ កំពុងថ្កោលទោស និងដាក់កំហិតឲ្យរបបលោក ហ៊ុន សែន ស្ដារលទ្ធិប្រជាធិបតេយ្យ ឲ្យបានដាច់ខាត នៅមុនថ្ងៃទី១២ កុម្ភៈ ខាងមុននេះ។ តែលោក ហ៊ុន សែន លើកឡើងថា របបលោកកំពុងតែគោរព ថែរក្សា និងលើកកម្ពស់លទ្ធិប្រជាធិបតេយ្យរាល់ថ្ងៃ ដោយឥតឈប់ឈរ ដើម្បីផលប្រយោជន៍ជាតិ និងប្រជាជន៖ «ពុំមានមូលហេតុត្រឹមត្រូវណាមួយ ដែលមជ្ឈដ្ឋានខាងក្រៅខ្លះ បានលើកឡើង ដដែលៗ អំពីការស្ដារឡើងវិញ នៃលទ្ធិប្រជាធិបតេយ្យ និងសិទ្ធិមនុស្សនៅកម្ពុជានោះទេ។ ខ្ញុំសង្ឃឹមថា មជ្ឈដ្ឋានទាំងនោះ នឹងពិចារណាឲ្យត្រឹមត្រូវ ចំពោះការវិវត្តន៍ប្រកបដោយភាពវិជ្ជមាននៅកម្ពុជា ហើយគោរពចំពោះសិទ្ធិ និងការជ្រើសរើសរបស់ប្រជាជនកម្ពុជា នូវមាគ៌ាសម្រាប់ការអភិវឌ្ឍន៍របស់ខ្លួន ដែលស្របទៅនឹងប្រវត្តិសាស្ត្រ ស្ថានភាព សង្គម វប្បធម៌ និងរដ្ឋធម្មនុញ្ញរបស់ខ្លួន»។
ថ្វីបើ លោក ហ៊ុន សែន ថា ហេតុផលរបស់សហភាពអឺរ៉ុបមិនសមទំនង ប៉ុន្តែសហភាពអឺរ៉ុបរកឃើញការរំលោភសិទ្ធិមនុស្ស និងលទ្ធិប្រជាធិបតេយ្យរបស់របបក្រុងភ្នំពេញ កម្រាស់ ៧០ទំព័រ។ របប លោក ហ៊ុន សែន បានព្យាយាមប្រកែករាល់ការចោទប្រកាន់ និងបានផ្ញើរបាយការណ៍ការពារខ្លួន ជូនសហភាពអឺរ៉ុបរួចរាល់ហើយ កាលពីថ្ងៃទី១២ ខែធ្នូ ឆ្នាំ២០១៩។ នៅថ្ងៃទី១២ ខែកុម្ភៈ ខាងមុខនេះ គណៈកម្មការសហភាពអឺរ៉ុប នឹងសម្រេចថា ឲ្យរបបក្រុងភ្នំពេញ បន្តការមិនបង់ពន្ធ ឬតម្រូវឲ្យបង់ពន្ធ រាល់មុខទំនិញនាំចូលទៅអឺរ៉ុប ចំពោះការរឹងទទឹង មិនព្រមស្ដារលទ្ធិប្រជាធិបតេយ្យ តាមការទាមទារនោះ។
អ្នកវិភាគនយោបាយ លោក គឹម សុខ អះអាងថា សហភាពអឺរ៉ុបមានហេតុផលច្បាស់លាស់ និងត្រឹមត្រូវណាស់ ក្នុងការទាញរបប លោក ហ៊ុន សែន ឲ្យងាកមកគោរពច្បាប់ជាតិ និងច្បាប់អន្តរជាតិ ឲ្យត្រឹមត្រូវ។ លោក គឹម សុខ ថា ប្រជាធិបតេយ្យ ដែលលោក ហ៊ុន សែន តែងលើកឡើងការពារខ្លួននេះ គឺក្លែងក្លាយ ជាប្រជាធិបតេយ្យរបៀបទឹកកន្លះក្អម បំពានរដ្ឋធម្មនុញ្ញ និងបំភ្លៃប្រវត្តិសាស្ត្រ៖ «ការបំភ័ន្តប្រវត្តិសាស្ត្របែបនេះហើយ ហើយការមិនគោរពរដ្ឋធម្មនុញ្ញរបស់ លោក ហ៊ុន សែន ដែលកំពុងតែធ្វើ គឺប្រជាធិបតេយ្យទឹកកន្លះក្អម ដែលគេបង្កើតឡើង ដើម្បីតែការពារអំណាចរបស់គេ ហើយនិងបម្រើបក្ខពួករបស់គេ ដែលនៅពីក្រោយ ដែលបានលើកបន្តុបគេឲ្យឡើងកាន់អំណាច តាំងពីឆ្នាំ១៩៧៩ មកដល់ឥឡូវហ្នឹង»។
ជំទប់ទី២ ជាប់ឆ្នោត ឃុំក្ដីរុន ស្រុកពួក ខេត្តសៀមរាប លោក ឈុន វាន (អានថា ឈុន វៀន មិនមែន ឈុន វ៉ាន) និយាយថា លោក ហ៊ុន សែន មិនហ៊ានទទួលស្គាល់កំហុស និងមិនអាចត្រឡប់ក្រោយវិញបាន ទើបខំប្រកែក ចោទគេឯងថា មិនសមរម្យ មិនត្រឹមត្រូវ ជាដើម។ លោកថា លោក ហ៊ុន សែន ទេ ដែលប្រឹងប្រកែកគ្រប់ពេល ដើម្បីថែរក្សាអំណាចរបស់ខ្លួន។ ឯសហគមន៍អឺរ៉ុប គ្រាន់តែចង់ឲ្យរបបលោក ហ៊ុន សែន គោរពសិទ្ធិមនុស្ស និងប្រជាធិបតេយ្យឲ្យបានត្រឹមត្រូវប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- លោក ហ៊ុន សែន ថា នឹងបង្កើនថវិកាឃុំសង្កាត់ជាង ១២ម៉ឺនដុល្លារនៅឆ្នាំ២០២០ នេះ
- សកម្មជនបក្សប្រឆាំង ជួបការលំបាកពេលរដ្ឋាភិបាលលុបចោលលិខិតឆ្លងដែន
- មន្ត្រីបក្សប្រឆាំងថា ការបន្តរៀបចំទិវា ៧ មករា ជាការពង្វក់ខ្មែរជំនាន់ថ្មី ឲ្យដឹងគុណវៀតណាមមិនចេះចប់ តាមបក្សកាន់អំណាច
- លោក កឹម សុខា គ្រោងជួបសមាជិកសភាបក្សកាន់អំណាចប្រទេស ស៊ុយអែត (Sweden) នៅថ្ងៃទី៧ ខែមករាស្អែកនេះ
- អ្នកវិភាគថា គណបក្សថ្មី នឹងទទួលបានការជេរស្ដី និងសើចចំអកពីពលរដ្ឋ ជាងសាទរ
- មតិរបស់ពលរដ្ឋ និងក្រុមយុវជន ជុំវិញយុទ្ធនាការ “អរគុណសន្តិភាព” របស់លោក ហ៊ុន សែន
- អ្នកវិភាគថា ការប្រើពាក្យ “អរគុណសន្តិភាព” ដើម្បីបិទបាំងនយោបាយខ្មៅកខ្វក់របស់លោក ហ៊ុន សែន
- ព្រះតេជព្រះគុណ ប៊ុត ប៊ុនតិញ ស្នើឱ្យគណបក្សប្រឆាំងធ្វើរឿងបីយ៉ាងជាចាំបាច់ ក្នុងឆ្នាំ២០២០នេះ
- អ្នកវិភាគ និងសកម្មជនបក្សប្រឆាំងថា រដ្ឋាភិបាលនឹងបានភ្លក់រសជាតិថ្នាំខ្លាំងពីសហភាពអឺរ៉ុបនិងអាមេរិកឆ្នាំនេះ
- ពលរដ្ឋសង្គមស៊ីវិល និងក្រុមយុវជនអំពាវនាវឱ្យអ្នកនយោបាយចាប់ដៃគ្នាកសាងជាតិនៅឆ្មាំ ២០២០នេះ
Hun Sen knows very well that by allowing to revive the dissolved CNRP will put CPP in tough position to compete for the next election. The sentiment of people now is blurred, he is not sure CPP will get the majority. It is the choice, which he has to choose between unclear result of outcome and the current status quo, which is clear.
He has heavy burden to CPP members, esp commune officials and MPs and whole a lot of other things both personally and politically. He knows well and he wants to stand firm to the last minute. Like Shakespeare’s classic novel said, ” To be or not to be? ” that the question.