ការ​ហូរ​ចូល​ដ៏​គំហុក​របស់​ជនជាតិ​ចិន​នៅ​កម្ពុជា​បាន​បង្ក​ឱ្យ​មាន​​អារម្មណ៍​​មិន​ពេញចិត្ត​ខ្លះ​លើ​ជនជាតិ​ចិន

កម្ពុជា
22 មករា 2020
Liyuan Lu
វីអូអេខ្មែរ

រូបឯកសារ៖ បុរស​ជនជាតិ​ចិន​ម្នាក់​ដើរ​ទិញ​ទំនិញ​នៅក្នុង​ផ្សារទំនើប ​Min Hui International Mall នៅក្នុង​ក្រុង​ព្រះសីហនុ ដែល​លក់​ផលិតផល​ភាគច្រើន​នាំចូល​ពី​ប្រទេសចិន និង​មាន​ស្លាក​ឈ្មោះ​ទំនិញ និង​តម្លៃ​ជា​អក្សរចិន និង​បំពេញ​តម្រូវការ​អតិថិជនចិន នៅខេត្តព្រះសីហនុ ថ្ងៃទី១៣​ កុម្ភៈ ២០១៩។

រូបឯកសារ៖ បុរស​ជនជាតិ​ចិន​ម្នាក់​ដើរ​ទិញ​ទំនិញ​នៅក្នុង​ផ្សារទំនើប ​Min Hui International Mall នៅក្នុង​ក្រុង​ព្រះសីហនុ ដែល​លក់​ផលិតផល​ភាគច្រើន​នាំចូល​ពី​ប្រទេសចិន និង​មាន​ស្លាក​ឈ្មោះ​ទំនិញ និង​តម្លៃ​ជា​អក្សរចិន និង​បំពេញ​តម្រូវការ​អតិថិជនចិន នៅខេត្តព្រះសីហនុ ថ្ងៃទី១៣​ កុម្ភៈ ២០១៩។ Photo: VOA Khmer


ភ្នំពេញ — រដ្ឋាភិបាល​ក្រុង​ប៉េកាំង​កំពុង​ពង្រឹង​ចំណង​សេដ្ឋកិច្ច​ ការទូត និង​យោធា​ជាមួយ​នឹង​រដ្ឋាភិបាល​របស់​លោក​នាយករដ្ឋមន្ត្រី ហ៊ុន សែន តាមរយៈ​ការ​វិនិយោគ​ ប្រាក់​ឧបត្ថម្ភ និង​កញ្ចប់​ប្រាក់​ជំនួយ​យោធា​ដ៏​ច្រើន។ ស្រប​ពេល​ជាមួយ​គ្នា​នេះ ភ្ញៀវ​ទេសចរណ៍​ កម្មករ និង​អ្នក​ជំនួញ​ចិន​សម្រុក​មក​ប្រទេស​កម្ពុជា​ក្នុង​ចំនួន​ដ៏​ច្រើន​ដែល​មិន​ធ្លាប់​មាន​ពី​មុន។

ខណៈ​ដែល​ពលរដ្ឋ​ខ្មែរ​មួយ​ចំនួន​ទទួល​បាន​ប្រយោជន៍​ពី​ការ​ហូរ​ចូល​មក​ដល់​របស់​ជនជាតិ​ចិន និង​ប្រាក់​របស់​ចិន ជីវិត​របស់​មនុស្ស​ជាច្រើន​ទទួល​រង​ផល​ប៉ះពាល់​អវិជ្ជមាន​យ៉ាង​ខ្លាំង។

អ្នក​លក់​ទូរស័ព្ទ​ម្នាក់​នៅ​ក្នុង​សង្កាត់​មួយ​ពោរពេញ​ដោយ​ជនជាតិ​ចិន​នៅ​ក្នុង​ក្រុង​ព្រះសីហនុ ដែលសុំ​ប្រើ​ឈ្មោះ ចេ បាន​ប្រាប់​ VOA ផ្សាយ​ជា​ភាសា​ចិន​កុកងឺ​ថា៖

«ខ្ញុំ​មិន​មាន​អារម្មណ៍​ថា​ មាន​សុវត្ថិភាព​នោះ​ទេ ដោយសារ​តែ​ជនជាតិ​ចិន​មួយ​ចំនួន​បើកបរ​លឿនៗ​ណាស់។ អ្នក​ខ្លះ​ផឹក​ស្រា​ច្រើន និង​និយាយ​ឮៗ»។

បុរស​វ័យ​ក្មេង​ម្នាក់​ដែល​ធ្វើ​នៅ​ក្នុង​រោងចក្រ​របស់​ចិន​ក្នុង​តំបន់​សេដ្ឋកិច្ច​ពិសេស​របស់​ក្រុង​ព្រះសីហនុ ​ក៏​បាន​ត្អូញត្អែរដែរ​ថា ជនជាតិ​ចិន​បើកបរ​លឿនៗ​ពេក។

កម្មករ​ម្នាក់​នោះ​និយាយ​ថា៖ «ជនជាតិ​ចិន​មិន​គោរព​ពលរដ្ឋ​ខ្មែរ​នោះ​ទេ»។

លោក ឆន សុគន្ធ ដែល​ជា​អ្នក​បើក​តាក់ស៊ី​ម្នាក់​ មាន​អតិថិជន​បរទេស​ជាច្រើន។

លោក​និយាយ​ថា៖ «នៅ​ពេល​ដែល​ជនជាតិ​ចិន​មក​ធ្វើ​ជំនួញ​នៅ​ទីនេះ ពួកគេ​ខុស​ពី​ជនជាតិ​អឺរ៉ុប»។ លោក​បាន​ពន្យល់​បន្ថែម​ថា៖ «នៅ​ពេល​ដែល​ជនជាតិ​អឺរ៉ុប​មក​ទីនេះ វា​ជា​ការ​ធ្វើ​ជំនួញ​ដើម្បី​អ្នក​ដទៃ ចំណែក​ឯ​ជនជាតិ​ចិន​ធ្វើ​ជំនួញ​តែ​ជាមួយ​នឹង​ជនជាតិ​ចិន​គ្នា​ឯង ហើយ​ពលរដ្ឋ​ខ្មែរ​មិន​អាច​ធ្វើ​ជំនួញ​ជាមួយ​ពួកគេ​បាន​ទេ»។

លោក ថុន រដ្ឋា ដែល​ជា​អ្នក​ស្រាវជ្រាវ​ម្នាក់​នៃ​អង្គការ​មាតា​ធម្មជាតិ យល់​ថា ជនជាតិ​ចិនខ្វាយខ្វល់​តែ​ពី​ការ​រក​ប្រាក់​តែ​ប៉ុណ្ណោះ។

លោក ថុន រដ្ឋា បាន​និយាយ​ថា៖ «នៅ​ពេល​ពួកគេ [ជនជាតិ​ចិន] មក​ធ្វើ​ការ​វិនិយោគ ពួកគេ​មិន​ខ្វល់​ពី​សិទ្ធិ​មនុស្ស​នោះ​ទេ។ ពួកគេ​មិន​ខ្វល់​ពី​ច្បាប់​នោះ​ទេ។ ពួកគេ​គ្រាន់​តែ​ចង់​បាន​ប្រយោជន៍ និង​ផល​ចំណេញ»។

អ្នកស្រី Maggie Eno ​ជា​ស្ថាបនិក និង​សហប្រធាន​នៃ​អង្គការ​ម្លប់​តាប៉ាង ដែល​ជា​អង្គការ​មិន​ស្វែង​រក​ប្រាក់​ចំណេញ​មួយ​ធ្វើ​ការ​ការពារ​កុមារ និង​គ្រួសារ​ងាយ​រងគ្រោះ​នៅ​ក្នុង​ខេត្ត​ព្រះសីហនុ។ អ្នកស្រី​និយាយ​ថា អ្វី​ដែល​ពលរដ្ឋ​ក្នុង​ស្រុក​មាន​ការ​លំបាក​មួយ​ទៀត​នោះ​ គឺ​ឥរិយាបថ​ចោល​សំរាម​របស់​ជនជាតិ​ចិន​ដែល​ជា​អ្នក​ចំណូល​ថ្មី។

អ្នកស្រី Eno និយាយ​ថា៖ «ខ្ញុំ​ឃើញ​ជនជាតិ​ចិន​ជាច្រើន​ជក់​បារី​នៅ​លើ​ឆ្នេរ និង​បោះ​បារី​នោះ​ចោល​ទៅ​ក្នុង​សមុទ្រ»។

ជនជាតិ​អង់គ្លេស​រូប​នេះ​បាន​រស់​នៅ​ និង​ធ្វើ​ការ​នៅ​ក្នុង​ប្រទេស​កម្ពុជា​អស់​រយៈពេល​១៧ឆ្នាំ​មក​ហើយ។ អ្នកស្រី​និយាយ​ថា អ្នកស្រី​បាន​មើល​ឃើញ​ថា មាន​ការ​ខឹងសម្បារខ្លាំង​ចំពោះ​ជនជាតិ​ចិន។

អ្នកស្រី Eno និយាយ​ថា៖ «ខ្ញុំ​គិត​ថា មនុស្ស​ជាច្រើន​មាន​គំនិត​មិន​ពេញ​ចិត្ត​នឹង​ជនជាតិ​ចិន។ ការ​រើសអើង​ជាតិ​សាសន៍​កើត​មាន​ឡើង ជាពិសេស​នៅ​តាម​ផ្លូវ​ ដោយសារ​តែ​ពួកគេ​គិត​ថា ជីវភាព​របស់​ពួកគេ​ និង​ចរាចរណ៍​នៅ​លើ​ផ្លូវ​មាន​ការ​ផ្លាស់ប្តូរ ដោយសារ​តែ​ការ​មក​ដល់​របស់​ជនជាតិ​ចិន»។

អ្នកស្រី រ័ត្ន ចន្ទផល្គុណ ជា​សហប្រធាន​អង្គការ​ម្លប់​តាប៉ាង និង​បាន​ធ្វើ​ការ​ដោយ​ផ្ទាល់​ជាមួយ​នឹង​គ្រួសារ​ខ្មែរ។

អ្នកស្រី​និយាយ​ថា៖ «នៅ​ពេល​ពួកគេ [ពលរដ្ឋ​ខ្មែរ] ជួប​បញ្ហា​មួយ​ទៅ​បញ្ហា​មួយ ពួកគេ​មាន​ការ​ឆ្អែត​ចិត្ត។ ពួកគេ​ហត់នឿយ។ អ្វី​ដែល​ពួកគេ​យល់​ឃើញ​គឺ​ថា ដោយសារ​តែ​អ្នក [ជនជាតិ​ចិន] ទើប​ខ្ញុំ​ត្រូវ​ប្រឈម​មុខ​នឹង​បញ្ហា​ទាំង​នេះ​ ហើយ​រស់​នៅ​កន្លែង​បច្ចុប្បន្ន»។

បដាដ៏ធំមួយនៃតំបន់ឧស្សាហកម្មសេដ្ឋកិច្ចពិសេសរបស់ចិននៅក្រុងព្រះសីហនុ
បដាដ៏ធំមួយនៃតំបន់ឧស្សាហកម្មសេដ្ឋកិច្ចពិសេសរបស់ចិននៅក្រុងព្រះសីហនុ

គំនរសំរាមត្រូវបានដាក់ពង្រាយនៅតាមដងផ្លូវមួយនៅក្នុងក្រុងព្រះសីហនុ
គំនរសំរាមត្រូវបានដាក់ពង្រាយនៅតាមដងផ្លូវមួយនៅក្នុងក្រុងព្រះសីហនុ

ការ​ហូរ​ចូលយ៉ាង​គំហុក​របស់​ជនជាតិ​ចិន និង​ប្រាក់​របស់​ចិន​ កំពុង​ក្លាយ​ជា​បញ្ហា​នយោបាយ ដោយសារ​តែ​គណបក្ស​ប្រឆាំង​បាន​ព្រមាន​ពី​កំណើន​ឥទ្ធិពល​របស់​ចិន។

លោក ទាវ វណ្ណុល គឺជា​ប្រធាន​គណបក្ស​ភ្លើង​ទៀន ដែល​ជា​គណបក្ស​ប្រឆាំង​មួយ​ត្រូវបាន​បង្កើត​ឡើង​ ពេល​ដែល​គណបក្ស​សម រង្ស៊ី ត្រូវ​ប្តូរ​ឈ្មោះ។ លោក​បាន​និយាយ​ថា ដោយសារ​តែ​ការ​ឈ្លានពាន​របស់​វៀតណាម​មក​លើ​កម្ពុជា និង​ភាព​អយុត្តិធម៌​នៅ​ក្នុង​ប្រវត្តិសាស្ត្រ​ផ្សេង​ទៀត កាលពី​ពេល​មុន​ពលរដ្ឋ​ខ្មែរ​មិន​ចូលចិត្ត​ជនជាតិ​វៀតណាម ប៉ុន្តែ​ឥឡូវ​នេះ​ពួកគេ​ខឹង​ជនជាតិ​ចិន​ខ្លាំង​ជាង​វៀតណាម។

លោក ទាវ វណ្ណុល បាន​និយាយ​ថា៖ «ឥឡូវ​នេះ ការ​ខឹងសម្បារបាន​ប្តូរ​ទៅ​រក​ជនជាតិ​ចិន​វិញ ដោយសារ​តែ​នៅ​ពេល​ជនជាតិ​ចិន​មក​ទីនេះ ពួកគេ​មិន​គោរព​ពលរដ្ឋ​ខ្មែរ​នោះ​ទេ។ ពួកគេ​មិន​គោរព​ច្បាប់​នៅ​កម្ពុជា​ទេ។ លើស​ពី​នេះ ឥរិយាបថ​និង​ទង្វើ​របស់​ពួកគេ​មក​លើ​ពលរដ្ឋ អាក្រក់​ខ្លាំង​ណាស់»។

អ្នកស្រី រ័ត្ន ចន្ទផល្គុណ និយាយ​ថា អ្នកស្រី​បាន​ឃើញ​ជនជាតិ​ចិន​មាន​ឥរិយាបថ​អាក្រក់ ប៉ុន្តែ​អ្នកស្រី​ក៏​មាន​មិត្តភក្តិ​ចិន​ល្អ​មួយ​ចំនួន និង​បាន​ឃើញ​ជនជាតិ​ធ្វើ​រឿង​ល្អៗ​នៅ​ក្នុង​ប្រទេស​កម្ពុជា​ផង​ដែរ។

អ្នក​ស្រី​បាន​និយាយ​ថា៖ «ប៉ុន្មាន​ថ្ងៃ​មុន [ក្នុង​ខែសីហា] ផ្លូវ​ត្រូវ​បាន​លិច​ទឹក​យ៉ាង​ខ្លាំង នៅ​ពេល​ខ្ញុំ​ធ្វើ​ដំណើរ​ទៅ​ផ្ទះ។ វា​ស្ថិត​នៅ​កម្ពស់​នេះ»។ អ្នកស្រី​បាន​ចង្អុល​ទៅ​ចង្កេះ​អ្នកស្រី ដើម្បី​ប្រាប់​ថា​ ទឹក​ជំនន់​មាន​កម្ពស់​ណា​នៅ​ពេល​នោះ។

អ្នកស្រី​បន្ថែម​ថា៖ «ខ្ញុំ​ឃើញ​ម៉ូតូ​កង់បី​មួយ​ដួល ហើយ​ជនជាតិ​ចិន​មួយ​ក្រុម​រត់​ទៅ​ជួយ​លើក​ម៉ូតូ​កង់បី​នោះ»។

ខណៈ​ពេល​ដែល​មាន​អារម្មណ៍​មិន​ពេញចិត្ត​លើ​ជនជាតិ​ចិន​នោះ អ្នក​ខ្លះ​ជឿ​ថា មិន​គួរ​បន្ទោស​ទៅ​លើ​ជនជាតិ​ចិន​តែ​ម្ខាងនោះ​ទេ ដោយសារ​តែ​ពួកគេ​ត្រូវ​បាន​អនុញ្ញាត​ឱ្យ​ចូល​មក​ក្នុង​ប្រទេស​កម្ពុជា។

អ្នកស្រី Eno និយាយ​ថា៖ «យ៉ាង​ហោច​ណាស់ ពួកគេ​ភាគច្រើន​មិន​បាន​មក​ទីនេះ​ដោយ​ខុស​ច្បាប់​នោះ​ទេ»។

ស្ត្រី​ខ្មែរ​ម្នាក់​ដែល​ធ្វើ​នៅ​ក្នុង​រោងចក្រ​កាត់ដេរ​របស់​ចិន​មួយ​នៅ​ក្រៅ​រាជធានី​ភ្នំពេញ​បាន​យល់​ស្រប​ថា វា​មិន​យុត្តិធម៌​នោះ​ទេ​ក្នុង​ការ​បន្ទោស​ជនជាតិ​ចិន​សម្រាប់​អ្វីៗ​គ្រប់​យ៉ាង​នោះ»។

នាង​និយាយ​ថា៖ «ពួកគេ​មក​ទីនេះ​ដើម្បី​សាងសង់​រោងចក្រ ហើយ​ពួកគេ​ធ្វើ​ល្អ។ មនុស្ស​មួយ​ចំនួន​និយាយ​ថា ជនជាតិ​មក​ទីនេះ​យក​ដី​របស់​ពួក​យើង។ ប៉ុន្តែ​ប្រសិន​បើ​អ្នក​មិន​លក់​ដី​ តើ​គេ​អាច​យក​ដី​របស់​យើង​បាន​យ៉ាង​ដូចម្តេច?»

អ្នកស្រី រ័ត្ន ចន្ទផល្គុណ យល់​ថា ពលរដ្ឋ​ខ្មែរ​មាន​ការ​មិន​ពេញ​ចិត្ត​ចំពោះ​រដ្ឋាភិបាល​ខ្មែរ​ដែល​មិន​បាន​ជួយ​ពួកគេ​នៅ​ពេល​ពួកគេ​ត្រូវ​ការ​ជំនួយ។

វិនិយោគិន​ចិន​នៅ​ក្នុង​ប្រទេស​កម្ពុជា​មួយ​ចំនួន​យល់​ថា វា​ជា​រឿង​ធម្មតា​សម្រាប់​ពលរដ្ឋ​ខ្មែរ​ដែល​មាន​ការ​មិន​ពេញ​ចិត្ត​ខ្លះ​ចំពោះ​ជនជាតិ​ចិន។

លោក Fei Lu ដែល​ជា​នាយក​គម្រោង​របស់​ក្រុមហ៊ុន New Landmark ដែល​ជា​ក្រុមហ៊ុន​អភិវឌ្ឍន៍​អចលនទ្រព្យ​ ដោយ​ផ្តោត​ការ​វិនិយោគ​នៅ​ក្នុង​ខេត្ត​ព្រះសីហនុ​ បាន​និយាយ​ថា៖ «នៅ​កន្លែង​ណា​ក៏​ដោយ នៅ​អឺរ៉ុប អាមេរិក ចិន ជប៉ុន ឬ​កូរ៉េ​ខាង​ត្បូង នៅ​ពេល​អ្នក​មាន​អ្នក​ខាង​ក្រៅ​ហូរ​ចូល​យ៉ាង​ច្រើនគំហុក​ដើម្បីមក​ធ្វើ​ការ​វិនិយោគ​ក្នុង​ទ្រង់ទ្រាយ​ធំ វា​គេច​មិន​ផុត​ទេ​ដែល​ថា ពលរដ្ឋ​ក្នុង​ស្រុក​នឹង​រង​ផល​ប៉ះពាល់។ ដោយសារ​តែ​វា​ពាក់ព័ន្ធ​ការ​ផ្លាស់ប្តូរ​ទម្លាប់»។

លោក​និយាយ​ថា អ្វីៗ​ក៏​ដោយ​ មានកត្តា​ទាំង​សង​ខាង។ លោក​ថា៖ «នៅ​ពេល​ដែល​អ្នក​មើល​ឃើញ​ថា​ វា​ជា​បញ្ហា ខ្ញុំ​មើល​ឃើញ​ថា​ វា​ជា​អ្វី​មួយ​ដែល​នាំ​យក​បច្ចេកវិទ្យា​ទំនើបៗ និង​គំនិត​ថ្មីៗ រួម​ទាំង​ការ​អភិវឌ្ឍផ្លោះ​ទៅ​មុខ​លឿន​សម្រាប់​ទីក្រុង​ទាំង​មូល​ផង​ដែរ»។

ជនជាតិ​ចិន​ជាច្រើន​យល់​ស្រប​ថា ការ​វិនិយោគ​របស់​ចិន​នៅ​ក្នុង​ប្រទេស​កម្ពុជា រួម​ទាំង​គម្រោង​ជា​ច្រើន​នៃ​គម្រោងផ្លូវ​ក្រវាត់​ពាណិជ្ជកម្ម​របស់​ចិន​ដ៏​មាន​មហិច្ឆតា​ កំពុង​លើក​កម្ពស់​ការ​អភិវឌ្ឍ​នៅ​ក្នុង​ប្រទេស​កម្ពុជា។ លោក Jiaping Zhou ដែល​ជា​អ្នក​តំណាង​ស្រប​ច្បាប់​របស់​ក្រុមហ៊ុន Hubei Hengji Intelligence Equipment Corp ជា​មនុស្ស​ម្នាក់​ដែល​គិត​ដូច្នេះ។

លោក Zhou ស្ថិត​នៅ​តំបន់​តារាសាគរ​ដើម្បី​រក​មើល​ឱកាស​វិនិយោគ។ លោក​បាន​ប្រាប់​ VOA ផ្សាយ​ជា​ភាសា​ចិន​កុកងឺ​ថា៖ «ខ្ញុំ​មក​ប្រទេស​កម្ពុជា ដោយ​សង្ឃឹម​ថា ​នឹង​នាំ​យក​បច្ចេកវិទ្យា​ទំនើបៗ​របស់​ចិន​ទៅ​កាន់​ប្រទេស​នានា​ ដែល​មិន​ទាន់​មាន​ការ​អភិវឌ្ឍ​នៅ​ឡើយ តាមរយៈ​គម្រោង​ផ្លូវ​ក្រវាត់​ពាណិជ្ជកម្ម​របស់​ចិន​ ដើម្បី​ធ្វើ​ឱ្យ​មាន​ភាព​រុងរឿង​នៅ​ទីនោះ»។

លោក Zhang ដែល​ជា​កម្មករ​សំណង់​ម្នាក់​នៅ​ក្នុង​រាជធានី​ភ្នំពេញ​ក៏​ជឿ​ថា គម្រោង​ផ្លូវ​ក្រវាត់​ពាណិជ្ជកម្ម​របស់​ចិន​ជា​គម្រោង​ល្អ​សម្រាប់​កម្ពុជា​ដែរ។

បុរសម្នាក់កំពុងថតរូបទិដ្ឋភាពឆ្នេរសមុទ្រតារាសាគរ នៅខេត្តកោះកុង ដែលជាគម្រោងអភិវឌ្ឍតំបន់ឆ្នេរដ៏ធំមួយរបស់ចិននៅក្នុងប្រទេសកម្ពុជា។
បុរសម្នាក់កំពុងថតរូបទិដ្ឋភាពឆ្នេរសមុទ្រតារាសាគរ នៅខេត្តកោះកុង ដែលជាគម្រោងអភិវឌ្ឍតំបន់ឆ្នេរដ៏ធំមួយរបស់ចិននៅក្នុងប្រទេសកម្ពុជា។

រូបឯកសារ៖ ប្រជាពលរដ្ឋ​ដើរកាត់​ការតុបតែង​លំអ​រ​អម​ស្វាគមន៍​លោកប្រធានា​ធិបតី​ចិន​ Xi Jinping (ឆ្វេង)និង​រូប​ថត​ព្រះ​មហាក្សត្រ​ខ្មែរ​ព្រះបរមនាថ​នរោត្តម​សីហមុនី ​ក្នុងទស្សន​កិច្ច​ផ្លូវ​រដ្ឋ​នៅ​កម្ពុជារបស់​លោកប្រធានាធិបតី​ចិន​មក​កម្ពុជា ថ្ងៃទី១៣ ខែតុលា ឆ្នាំ២០១៦។
រូបឯកសារ៖ ប្រជាពលរដ្ឋ​ដើរកាត់​ការតុបតែង​លំអ​រ​អម​ស្វាគមន៍​លោកប្រធានា​ធិបតី​ចិន​ Xi Jinping (ឆ្វេង)និង​រូប​ថត​ព្រះ​មហាក្សត្រ​ខ្មែរ​ព្រះបរមនាថ​នរោត្តម​សីហមុនី ​ក្នុងទស្សន​កិច្ច​ផ្លូវ​រដ្ឋ​នៅ​កម្ពុជារបស់​លោកប្រធានាធិបតី​ចិន​មក​កម្ពុជា ថ្ងៃទី១៣ ខែតុលា ឆ្នាំ២០១៦។

លោក​បាន​និយាយ​ដោយ​មាន​មោទនភាព​ថា៖ «គម្រោង​ផ្លូវ​ក្រវាត់​ពាណិជ្ជកម្ម​របស់​លោក​ប្រធានាធិបតី ស៊ី ជីនពីង​ (Xi Jinping) របស់​យើង​ គឺ​ជា​រឿង​ដ៏​អស្ចារ្យ​សម្រាប់​គ្រប់​ទីកន្លែង​នៅ​ក្នុង​ពិភពលោក។ វា​ជា​រឿង​ល្អ​ដោយសារ​តែ​វា​អាច​ជួយ​ឱ្យ​អ្នក​ក្រ​ក្លាយ​ជា​អ្នក​មាន​បាន​ និង​លើក​កម្ពស់​ការ​អភិវឌ្ឍ»។

ទោះ​ជា​យ៉ាង​ណា​ក៏​ដោយ ពលរដ្ឋ​ខ្មែរ​ភាគច្រើន​បារម្ភ​ថា ប្រទេស​កម្ពុជា​នឹង​ក្លាយ​ជា​រដ្ឋចំណុះ​មួយ​របស់​ចិន ដោយសារ​តែ​ចិន​ជា​ម្ចាស់​បំណុល និង​អ្នក​ផ្តល់​ជំនួយ​ដ៏​ធំ​បំផុត​របស់​កម្ពុជា និង​ដោយសារ​តែ​រដ្ឋាភិបាល​កម្ពុជា​ពឹង​ផ្អែក​លើ​រដ្ឋាភិបាល​ក្រុង​ប៉េកាំង​កាន់​តែ​ខ្លាំង​ទៅៗ។

លោក ទាវ វណ្ណុល ដែល​ជា​ប្រធាន​គណបក្ស​ភ្លើង​ទៀន និយាយ​ថា លោក​មិន​បារម្ភ​ថា​ ចិន​នឹង​លេប​យក​ប្រទេស​កម្ពុជា​នោះ​ទេ ប៉ុន្តែ​លោក​បារម្ភ​អំពី​ឥទ្ធិពល​ចិន​មក​លើ​កម្ពុជា និង​លទ្ធភាព​ដែល​ប្រវត្តិសាស្ត្រ​អាច​កើត​ឡើង​ម្តង​ទៀត។

លោក ទាវ វណ្ណុល​ និយាយ​ថា៖ «ប្រសិន​បើ​អ្នក​មើល​ប្រវត្តិសាស្ត្រ នៅ​ក្នុង​ឆ្នាំ១៩៦៥ សម្តេច​សីហនុ​បាន​ទាត់​អាមេរិក​ចេញ​ពី​ប្រទេស​កម្ពុជា ហើយ​ក្រោយ​មក​ប្រទេស​ចិន​បាន​ក្លាយ​ជា​បង​ធំ​របស់​កម្ពុជា»។

លោក​បន្ត​ថា៖ «អ្នក​បាន​ឃើញ​មាន​អ្វី​កើត​ឡើង​នៅ​ក្នុង​ឆ្នាំ១៩៦៥ ដល់​ឆ្នាំ១៩៧០ ​រួច​ហើយ។ សង្គ្រាម​បាន​កើត​ឡើង។ នៅ​ក្នុង​ឆ្នាំ១៩៧៥ ប៉ុល ពត ដែល​ជា​អ្នក​មាន​គំនិត​កុម្មុយនិស្ត​បែប​ចិន​បាន​ដណ្តើម​យក​ការ​ដឹកនាំ​ប្រទេស។ អ្នក​ឃើញ​ហើយ​ថា ប្រទេស​កម្ពុជា​ត្រូវ​បាន​បំផ្លាញ​ដោយ​របៀប​ណា។ នោះ​ជា​អ្វី​ដែល​ខ្ញុំ​បារម្ភ​បំផុត។ ខ្ញុំ​បារម្ភ​ថា ពួកគេ​នឹង​ដើរ​តាម​ប្រវត្តិសាស្ត្រ​ម្តង​ទៀត»។

លោក​ ផៃ ស៊ីផាន អ្នក​នាំពាក្យ​របស់​រដ្ឋាភិបាល​កម្ពុជា បាន​ប្រាប់ VOA នៅ​ក្នុង​បទសម្ភាសន៍​មួយ​ក្នុង​ការិយាល័យ​របស់​លោក​ នៅ​ឯ​អគារ​ទីស្តីការ​គណៈរដ្ឋមន្ត្រី ដែល​ជា​អគារ​សាងសង់​ដោយ​ទឹកប្រាក់​ជំនួយ​របស់​ចិន​ ថា ប្រវត្តិសាស្ត្រ​មិនប្រាកដ​ថា​ត្រូវកើត​ឡើង​ម្តង​ទៀត​នោះ​ទេ។ លោក​បាន​ផ្តល់​ឧទាហរណ៍​ពី​ទំនាក់ទំនង​វៀតណាម​និង​អាមេរិក។

លោក​បាន​និយាយ​ថា៖ «ពួកគេ​[វៀតណាម]​បាន​ចាប់ និង​សម្លាប់​ពលរដ្ឋ​អាមេរិកាំង ប៉ុន្តែ​ពួកគេ​នៅត្រឡប់​មក​វិញ ចាប់​ដៃ​គ្នា​ និង​ជឿ​ទុក​ចិត្ត​គ្នា​ទៅ​វិញ​ទៅ​មក។ គេ​មិន​បាន​ដើរ​តាម​ប្រវត្តិសាស្ត្រ​នោះ​ទេ។ ដូច្នេះ​សូម​ផ្តល់​ឱកាស​ឲ្យ​កម្ពុជា​បញ្ជាក់​ចំណុច​នេះ​សិន​ទៅ»។

អ្នក​នាំ​ពាក្យ​របស់​រាជរដ្ឋាភិបាល​រូប​នេះ ​បន្ត​រៀបរាប់​ថា កត្តា​មួយ​ចំនួន​ដូច​ជា​ រដ្ឋធម្មនុញ្ញ​កម្ពុជា របប​ពហុភាគី និង​វត្តមាន​របស់​គណបក្ស​នយោបាយ​ដែលលម្អៀង​ទៅ​រកសហរដ្ឋ​អាមេរិក និង​ប្រទេស​មហាអំណាច​លោក​ខាង​លិច​ធានា​បាន​ថា ពលរដ្ឋ​ខ្មែរ​នឹង​មិន​អនុញ្ញាត​ឱ្យ​ប្រទេស​ខ្លួន​ធ្លាក់​ចូល​ក្នុង​អន្ទាក់​ចិន​នោះ​ទេ។

នៅពេល​សួរ​ថា​តើ​កម្ពុជា​អាច​នឹង​ធ្វើ​វិសោធនកម្ម​លើ​រដ្ឋធម្មនុញ្ញ​របស់​ខ្លួន​ដើម្បី​អនុញ្ញាត​ឱ្យ​មាន​វត្តមាន​យោធា​ចិន​នៅ​លើ​ដី​កម្ពុជា​ឬ​យ៉ាង​ណា លោក ផៃ​ ស៊ីផាន និយាយ​ថា វា​មិន​អាច​ទៅ​រួច​នោះ​ទេ ដោយសារ​តែ​កម្ពុជា​ត្រូវ​តែ​ជា​ប្រទេស​អព្យាក្រឹត មាន​អធិបតេយ្យភាព និង​ឯករាជ្យ។

លោក អ៊ូ វីវៈ ​គឺជា​ស្ថាបនិក​អង្គការ​វេទិកា​អនាគត​ដែល​ជា​អង្គការ​ស្រាវជ្រាវ​ និង​ជា​វិភាគ​ឯករាជ្យ​មួយ​នៅ​ក្នុង​រាជធានី​ភ្នំពេញ។ លោក​ក៏​ជឿ​ថា គេ​មិន​ទាន់​អាច​សន្និដ្ឋាន​បាន​ថា ចិន​នឹង​លេប​យក​ប្រទេស​កម្ពុជា​ឬ​យ៉ាង​នោះ​ទេ។

លោក អ៊ូ វីរៈ ​និយាយ​ថា៖ «ខ្ញុំ​អាច​និយាយ​ថា ប្រទេស​កម្ពុជា​មិន​ស្ថិត​នៅ​ក្នុង​ដៃ​របស់​ចិន​នោះ​ទេ។ ខ្ញុំ​គិត​ថា ​យើង​អាច​ងាយ​គិតដូច្នេះ​ បើ​យើង​មើល​ស្ថានភាព​បច្ចុប្បន្ន​ ទិសដៅ​យើង​កំពុង​ងាកទៅ​រក​ក្នុង​ពេល​បច្ចុប្បន្ន»។

លោក​គិត​ថា ប្រសិន​បើ​ពលរដ្ឋ​ខ្មែរ​ចំណាយ​ពេល​ទប់ទល់​ជាមួយ​នឹង​ប្រទេស​លោក​ខាង​លិច និង​ចិន ហើយ​ព្យាយាម​ពង្រឹង​សេដ្ឋកិច្ច​របស់​ខ្លួន និង​កាត់​បន្ថយ​ការ​ពឹងផ្អែក​លើ​ជំនួយ​បរទេស​ និង​អំណាច​ប្រទេស​លោក​ខាង​លិច នោះ​កម្ពុជា​នឹង​មាន​ឱកាស​ដើរ​ឆ្ពោះ​ទៅ​មុខ​នៅ​លើ​ផ្លូវ​ស្ថិរភាព​មួយ។

នៅ​ក្នុង​ការដ្ឋាន​សាងសង់​របស់​អគារ​ខារ៉ាអូខេ​មួយ​កន្លែងនៅ​ក្នុង​រាជធានី​ភ្នំពេញ កម្មករ​ចិន និង​ខ្មែរ​ធ្វើ​ការ​ជាមួយ​គ្នា។ ទោះ​ជា​ពួកគេ​មាន​ប្រវត្តិ ភាសា ប្រាក់​ឈ្នួល និង​កន្លែង​ស្នាក់​នៅ​ផ្សេង​គ្នា​ក្តី តាម​រយៈ​ការ​ធ្វើ​ការ និង​រស់នៅ​ជាមួយ​គ្នា ពួកគេ​បាន​ក្លាយ​ជា​សហការី និង​អ្នក​ជិតខាង​ល្អ។ កូនៗ​របស់​កម្មករ​ខ្មែរ​ដែល​រស់នៅ​ក្បែរ​ការដ្ឋាន​ឧស្សាហ៍​មក​លេង​កម្មករ​ចិន​នៅ​ក្នុង​កន្លែង​ស្នាក់នៅ​របស់​កម្មករ​ចិន​ណាស់។

កម្មករ​ចិន​ម្នាក់​និយាយ​ថា៖ «ពួកគេ​គោរព​យើង​ដែល​ជា​ជនជាតិ​ចិន»។ លោក​បន្ថែម​ថា៖ «យើង​ក៏​គោរព​ពួកគេ​វិញ​ដែរ»៕

What Next?

Recent Articles

2 Responses to "ការ​ហូរ​ចូល​ដ៏​គំហុក​របស់​ជនជាតិ​ចិន​នៅ​កម្ពុជា​បាន​បង្ក​ឱ្យ​មាន​​អារម្មណ៍​​មិន​ពេញចិត្ត​ខ្លះ​លើ​ជនជាតិ​ចិន"

  1. ទី says:

    ( អ្នក​នាំ​ពាក្យ​របស់​រាជរដ្ឋាភិបាល​រូប​នេះ ​បន្ត​រៀបរាប់​ថា កត្តា​មួយ​ចំនួន​ដូច​ជា​ រដ្ឋធម្មនុញ្ញ​កម្ពុជា របប​ពហុភាគី និង​វត្តមាន​របស់​គណបក្ស​នយោបាយ​ដែលលម្អៀង​ទៅ​រកសហរដ្ឋ​អាមេរិក និង​ប្រទេស​មហាអំណាច​លោក​ខាង​លិច​ធានា​បាន​ថា ពលរដ្ឋ​ខ្មែរ​នឹង​មិន​អនុញ្ញាត​ឱ្យ​ប្រទេស​ខ្លួន​ធ្លាក់​ចូល​ក្នុង​អន្ទាក់​ចិន​នោះ​ទេ)
    និយាយបានល្អ ​ពលរដ្ធ មិនអនុញ្ញាតិ តែអ្នកណាទៅប្រកដទៅថានិងមានមានរឿងដូចអតីតកាលកើតឡើងម្តងទៀត?

  2. Anonymous says:

    Veitcong germs are the poison and lead the veitcong mafia dictator and his groups to go to hell again like decade 60 . Remember that time As communist king Si hak nouk and his veitcong wife bring veitcong to spreaded war to cambodia and teach khmer-veitcong to killed khmer intelligence then they came to invade cambodia in the name of rescue but rob everything from cambodia and appointed their dogs to gave Tral Island to them so now the same path again ‘ they lead veitcong dogs to fight with US and democracy world then cambodia will be victim again and again ‘ so khmer must study hard and think about the past and the present and the future ‘.GOD bless all good people’

Leave a Reply

Submit Comment