ច្បាប់ស្តីពីគ្រាអាសន្ន៖ អ្នកឃ្លាំមើលចង់ឲ្យមានការពិភាក្សាបន្ថែមទៀត មុននឹងបញ្ជូនទៅសភាអនុម័ត

ច្បាប់គ្រាអាសន្ន
02/04/2020 – 09:27
ដោយ៖ វ៉ា សំណព្វ
RFI

សកម្មភាពមន្ត្រីនានាប្រជុំនៅក្នុងរដ្ឋសភា កាលពីពេលកន្លងទៅ (រូបភាពឯកសារ)
សកម្មភាពមន្ត្រីនានាប្រជុំនៅក្នុងរដ្ឋសភា កាលពីពេលកន្លងទៅ (រូបភាពឯកសារ) © Internet

សេចក្តី​ព្រាង​ច្បាប់​ស្តី​ពី «ការ​គ្រប់​គ្រង​ប្រទេស​ជាតិ​ស្ថិត​ក្នុង​ភាព​អាសន្ន» ត្រូវ​បាន​គណៈ​អចិន្ត្រៃយ៍​គណៈ​រដ្ឋមន្ត្រី​កម្ពុជា​ដឹក​នាំ​ដោយ​លោក​នាយក​រដ្ឋ​មន្ត្រី ហ៊ុន សែន ពិនិត្យ​រួច​រាល់​ហើយ និង​កំពុង​ត្រៀម​បញ្ជូន​ទៅ​កាន់​រដ្ឋ​សភា​ដើម្បី​ប្រជុំ​អនុម័ត​តែ​ម្តង ដោយ​ពុំ​ចាំ​បាច់​ឆ្លង​កាត់​កិច្ច​ប្រជុំ​គណៈរដ្ឋមន្ត្រីនៅ​ថ្ងៃ​សុក្រ​សប្តាហ៍​នេះ​ទេ។ ប៉ុន្តែ​សម្រាប់​អ្នក​វិភាគ​និង​អ្នក​ច្បាប់​កម្ពុជា បាន​មើល​ឃើញ​ពី​ចន្លោះ​ប្រហោង​ជា​ច្រើន និង​ចង់​ឲ្យ​មាន​ការ​ពិភាក្សា​ឲ្យ​បាន​ទូលំ​ទូលាយ​បន្ថែម​ទៀត មុន​និង​បញ្ជូន​ទៅ​ឲ្យ​រដ្ឋ​សភា​អនុម័ត​។

លោក សុខ សំអឿន អ្នកច្បាប់ម្នាក់នៅក្នុងប្រទេសកម្ពុជាបានលើកឡើងថា ការដាក់ពិន័យនៅក្នុងសេចក្តីព្រាងច្បាប់នេះ ហាក់ធ្ងន់ធ្ងរពេក ដោយគ្រាន់តែល្មើសចេញពីផ្ទះ ដែលត្រូវជាប់ពន្ធនាគារពី១ខែទៅ១ឆ្នាំ។ បើតាមអ្នកច្បាប់ជើងចាស់រូបនេះ ការចែងពីទោសពិន័យ គួរធ្វើឡើងដោយមិនមានកម្រិតទោសអប្បរមានោះទេ។ បន្ថែមលើនេះ លោកមេធាវីក៏បានកត់សំគាល់ដែរថា សេចក្តីព្រាងច្បាប់នេះ នៅមានចន្លោះប្រហោងជាច្រើនចំណុចទៀតដូចជា តួនាទីរបស់ព្រះមហាក្សត្រ ប្រធានរដ្ឋសភា និងប្រធានព្រឹទ្ធសភាជាដើម ថាតើព្រះមហាក្សត្រទ្រង់គ្រាន់តែប្រកាសដាក់ប្រទេសក្នុងគ្រាអាសន្ន ដោយមិនមានវិធានការឬយ៉ាងណា?

សូមបញ្ជាក់ថា សេចក្តីព្រាងច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» ដែលមាន៥ជំពូក និង១១មាត្រា ត្រូវបានគណៈអចិន្ត្រៃយ៍គណៈរដ្ឋមន្ត្រីកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន ពិនិត្យរួចរាល់ហើយ កាលពីថ្ងៃទី ៣១ មីនា និងត្រៀមបញ្ជូនទៅកាន់រដ្ឋសភាដើម្បីប្រជុំអនុម័តតែម្តង ដោយពុំចាំបាច់ឆ្លងកាត់កិច្ចប្រជុំគណៈរដ្ឋមន្ត្រីនៅថ្ងៃសុក្រសប្តាហ៍នេះទេ។ ច្បាប់នេះ បានចែងពីគោលបំណង វិសាលភាព បែបបទ នីតិវិធី និងលក្ខខណ្ឌនៃការប្រកាសដាក់ប្រទេសជាតិស្ថិតក្នុងភាពអាសន្ន ការគ្រប់គ្រងប្រទេសជាតិស្ថិតក្នុងភាពអាសន្ន និងទោសប្បញ្ញត្តិជាដើម។ ប៉ុន្តែអ្វីជាការកត់សំគាល់ បើផ្អែកតាមខ្លឹមសារនៃសេចក្តីព្រាងច្បាប់នេះ នឹងដាក់ពិន័យធ្ងន់ធ្ងរដល់ជនណាដែលរារាំងកិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន ដែលនាំឲ្យមានចលាចលជាសាធារណៈ ឬប៉ះពាល់ដល់សន្តិសុខជាតិ ដោយត្រូវប្រឈមជាប់ពន្ធនាគារពី៥ឆ្នាំទៅ១០ឆ្នាំ។ ចំណែកឯអ្នកដែលមិនគោរពតាមវិធានការក្នុងពេលប្រទេសស្ថិតក្នុងភាពអាសន្នវិញ ត្រូវផ្តន្ទាទោសដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ពី១០ម៉ឺនរៀលដល់១លានរៀល និងដាក់ពន្ធនាគារពី១ឆ្នាំទៅ៥ឆ្នាំ និងពិន័យជាប្រាក់ពី១លានទៅ៥លានរៀល កាលបើអំពើនោះ នាំឲ្យមានចលាចលជាសាធារណៈ។

ទាក់ទងនឹងសេចក្តីព្រាងច្បាប់នេះ លោក សន ជ័យ អ្នកតាមដានសង្គមកម្ពុជាបានលើកឡើងថា សេចក្តីព្រាងច្បាប់នេះ គួរពិភាក្សាឲ្យបានទូលំទូលាយបន្ថែមទៀត មុននឹងបញ្ជូនទៅឲ្យរដ្ឋសភាប្រជុំនិងអនុម័ត។ ហើយថា សម្លេងពីភាគីពាក់ព័ន្ធគួរត្រូវបានបញ្ចូលទៅក្នុងសេចក្តីព្រាងច្បាប់នេះ ខណៈដែលលោកបណ្ឌិត មាស នី អ្នកវិភាគនយោបាយសង្ឃឹមថា ច្បាប់នេះ នឹងមិនក្លាយទៅជាឧបករណ៍ ដើម្បីរឹតបន្តឹងសម្លេងប្រឆាំងនៅកម្ពុជានោះទេ។

យ៉ាងណាក៏ដោយ គិតត្រឹមព្រឹកថ្ងៃព្រហស្បត្តិ៍ ទី០២ មេសានេះ រដ្ឋសភានៅមិនទាន់ទទួលបានសេចក្តីព្រាងច្បាប់នេះនៅឡើយទេ។ នេះបើតាមការបញ្ជាក់ពីលោក ឡេង ប៉េងឡុង អ្នកនាំពាក្យរដ្ឋសភាកម្ពុជា៕

What Next?

Recent Articles

One Response to "ច្បាប់ស្តីពីគ្រាអាសន្ន៖ អ្នកឃ្លាំមើលចង់ឲ្យមានការពិភាក្សាបន្ថែមទៀត មុននឹងបញ្ជូនទៅសភាអនុម័ត"

  1. Anonymous says:

    MY QUESTION TO CAMBODIA ?? are these person in this parliament are just one party?? if yes what did you knew if they are democratic party. if no what political party are they?? this is the main question because the people have the right to choose their own leader. if Cambodian let some kind of extremist to leaded the just go ahead we outside Cambodian will not care any more. I knew HUN SEN will get his medicine to inject all of you soon. GOD bless Cambodia