លោក ហ៊ុន សែន អនុញ្ញាត​ឲ្យ​ពលរដ្ឋ​ខ្មែរ​ត្រឡប់​ចូល​កម្ពុជា​ដោយ​មិន​ចាំបាច់​មាន​លិខិត​បញ្ជាក់​សុខភាព

ដោយ សុជីវី
2020-05-27
RFA

លោក ហ៊ុន សែន ក្នុង​កិច្ចប្រជុំ​​គណៈរដ្ឋមន្ត្រី​នៅ​វិមាន​សន្តិភាព នៅ​ព្រឹក​ថ្ងៃ​ទី​១៩ ខែ​វិច្ឆិកា ឆ្នាំ ២០១៨។

លោក ហ៊ុន សែន ក្នុង​កិច្ចប្រជុំ​​គណៈរដ្ឋមន្ត្រី​នៅ​វិមាន​សន្តិភាព នៅ​ព្រឹក​ថ្ងៃ​ទី​១៩ ខែ​វិច្ឆិកា ឆ្នាំ ២០១៨។ រូប៖ ហ្វេសប៊ុក​នាយករដ្ឋមន្ត្រី ហ៊ុន សែន


ប្រមុខ​រដ្ឋាភិបាល​កម្ពុជា លោក ហ៊ុន សែន ផ្លាស់​ប្ដូរ​ចិត្ត​អនុញ្ញាត​ឲ្យ​ពលរដ្ឋ​ខ្មែរ​នៅ​ក្រៅ​ប្រទេស អាច​វិល​ចូល​កម្ពុជា​បាន ដោយ​មិន​ចាំបាច់​មាន​លិខិត​បញ្ជាក់​សុខភាព​នោះ​ទេ។ ពលរដ្ឋ​ខ្មែរ​ដែល​ជាប់​គាំង នៅ​ម៉ាឡេស៊ី រំពឹង​ថា រដ្ឋាភិបាល នឹង​ជួយ​បញ្ជូន​ពួក​គាត់​ត្រឡប់​ទៅ​កម្ពុជា​ឲ្យ​បាន​ឆាប់ៗ ក្រោយ​មាន​ដំណោះ​ស្រាយ​ថ្មី​នេះ។

លោកនាយករដ្ឋមន្ត្រី ហ៊ុន សែន ប្រកាស​លើ​ហ្វេសប៊ុក​ថា ចាប់​ពី​ថ្ងៃ​ទី២៧ ខែ​ឧសភា តទៅ ពលរដ្ឋ​ខ្មែរ​ដែល​កាន់ លិខិត​ឆ្លង​ដែន​កម្ពុជា ហើយ​មាន​បំណង​វិល​ត្រឡប់​ចូល​កម្ពុជា​វិញ គឺ​មិន​តម្រូវ​ឲ្យ​មាន​វិញ្ញាបនប័ត្រ​បញ្ជាក់​សុខភាព​ថា គ្មាន​ជំងឺ​ឆ្លង​កូវីដ-១៩ ដូច​មុន​ឡើយ។ លោក ថា ការ​ផ្លាស់​ប្តូរ​ចិត្ត​របស់​លោក​នេះ គឺ​ដើម្បី​ជួយ​សម្រួល​ដល់​ពលរដ្ឋ​នៅ​ក្រៅ​ប្រទេស ឲ្យ​ឆាប់​បាន​វិល​ត្រឡប់​មក​ជួបជុំ​ក្រុម​គ្រួសារ​នៅ​ក្នុង​ប្រទេស​របស់​ខ្លួន​វិញ។

ទោះ​ជា​យ៉ាង​ណា លោក​បញ្ជាក់​ថា ពេល​ត្រឡប់​មក​ដល់​ប្រទេស​កម្ពុជា​វិញ ពលរដ្ឋ​ទាំង​នោះ​ត្រូវ​ចូល​ពិនិត្យ សុខភាព ហើយ​ដាក់​ឲ្យ​ស្នាក់​នៅ​ដាច់​ដោយ​ឡែក​ចំនួន ១៤ថ្ងៃ ទើប​អនុញ្ញាត​ឲ្យ​ទៅ​លំនៅឋាន​រៀងៗ ខ្លួន​វិញ។

ការ​ផ្លាស់​ប្តូរ​ចិត្ត​របស់​លោក​នាយក​រដ្ឋមន្ត្រី ហ៊ុន សែន នៅ​ពេល​នេះ គឺ​បន្ទាប់​ពី​ពលរដ្ឋ​ខ្មែរ​ដែល ជាប់​គាំង​នៅ​ក្រៅ​ប្រទេស ជាពិសេស​នៅ​ប្រទេស​ម៉ាឡេស៊ី រិះគន់​ផង និង​ទទូច​ស្នើសុំ​ម្ដង​ហើយ ម្ដង​ទៀត​ផង ឲ្យ​រដ្ឋាភិបាល​របស់​លោក​ជួយ​សម្រប​សម្រួល​បញ្ជូន​ពួក​គេ​ត្រឡប់​មក​កម្ពុជា​វិញ​ឲ្យ​បាន​ឆាប់ ព្រោះ​ពួក​គេ​ជួប​ការ​លំបាក​ផ្នែក​ជីវភាព និង​ពុំ​មាន​ថវិកា​សម្រាប់​ចំណាយ​ថ្លៃ ធ្វើ​តេស្ត​សុខភាព។

ពលករ​ធ្វើ​ការ​សំណង់​នៅ​ប្រទេស​ម៉ាឡេស៊ី​មួយ​រូប គឺ​លោក ហាំ សាលី ត្រេកអរ​ចំពោះ​ការ​ប្រកាស របស់​ប្រមុខ​រដ្ឋាភិបាល ហើយ​លោក​រំពឹង​ថា រដ្ឋាភិបាល នឹង​ជួយ​រៀបចំ​ជើង​ហោះ​ដឹក​ពួក​លោក​ ទៅ​ស្រុក​ខ្មែរ​ឲ្យ​បាន​ឆាប់​បំផុត។ លោក ត្អូញត្អែរ​ថា ការ​ទ្រាំ​រស់​នៅ​ក្នុង​ប្រទេស​ម៉ាឡេស៊ី​ក្នុង​អំឡុង​ពេល​ជំងឺ​កូវីដ១៩ នេះ លោក និង​ពលករ​ដទៃ​ទៀត ជួប​ការ​លំបាក​ខ្លាំង​ដោយសារ​គ្មាន​ការងារ​ធ្វើ ហើយ​គ្មាន​ចំណូល​សម្រាប់​ជួល​បន្ទប់​ស្នាក់នៅ និង​ទិញ​អាហារ​ហូប​ចុក​ជា​ដើម៖ «កន្លង​មក​ដែល​គាត់ (លោក ហ៊ុន សែនមិន​ឲ្យ​ទៅ​ស្រុក​ខ្មែរ​នោះ ខ្ញុំ​ពិបាក​ក្នុង​ចិត្ត​ខ្លាំង ហើយ​ឥឡូវ​នេះ​រឿង​ពិបាក​នៅ​តែ​ពិបាក​ដដែល ប៉ុន្តែ​ធ្វើ​ម៉េច យើង​មិន​អាច​ទៅ​បាន ដូច្នេះ​ចេះ​តែ​ខំ​រក​ការងារ​ធ្វើ ដើម្បី​បាន​លុយ​បន្តិចបន្តួច។ ឥឡូវ​ឮ​ថា សម្តេច​នាយក​រដ្ឋមន្ត្រី ថា អាច​ឲ្យ​ទៅ​បាន​អ៊ីចឹង ខ្ញុំ​ត្រូវ​ទៅ​ដែរ ព្រោះ​ខ្ញុំ​នៅ​តែ​ចង់​ទៅ​ជួប​ប្រពន្ធ និង​កូន​របស់ខ្ញុំ»

ស្រដៀង​គ្នា​នេះ ពលករ​ធ្វើ​ការ​ជា​អ្នក​រត់​តុ​ក្នុង​ភោជនីយដ្ឋាន​នៅ​ប្រទេស​ម៉ាឡេស៊ី លោកស្រី ស៊ាង សំអូន រៀបរាប់​ថា ការ​ប្រកាស​មិន​តម្រូវ​ឲ្យ​មាន​លិខិត​បញ្ជាក់​សុខភាព​នេះ គឺ​ធ្វើ​ឲ្យ​ពលករ​សប្បាយ ចិត្ត​មួយ​ផ្នែក ប៉ុន្តែ​លោក​ស្រី ចង់​ឃើញ​រដ្ឋាភិបាល ចាត់​វិធានការ​ច្បាស់លាស់​ក្នុង​ការ​បញ្ជូន​អ្នក​ជាប់ គាំង​នៅ​ម៉ាឡេស៊ី​ត្រឡប់​ទៅ​កម្ពុជា​ឲ្យ​បាន​ឆាប់។ លោកស្រី​បន្ត​ថា រហូត​មក​ដល់​ពេល​នេះ ស្ថានទូត ខ្មែរ​ប្រចាំ​នៅ​ប្រទេស​ម៉ាឡេស៊ី មិន​ទាន់​ជូន​ដំណឹង​ជាក់លាក់​ថា ពួក​គាត់​ត្រូវ​ឡើង​យន្តហោះ​ថ្ងៃ​ណា នោះ​ទេ៖ «ខ្ញុំ​សំណូមពរ​ថា បើ​គាត់​ចង់​ឲ្យ​ពួក​ខ្ញុំ​ទៅ​អ៊ីចឹង គឺ​ចង់​ឲ្យ​បាន​ទៅ​លឿនៗ ព្រោះ​មិន​ចង់​ថា គាត់​ឲ្យ​ទៅ​ហើយ ត្រូវ​ផ្អាក​ដំណើរ​វិញ វា​យូរ​ថ្ងៃ​ទៀត ខ្ញុំ​អត់​ចង់​អ៊ីចឹង​ទេ។ ខ្ញុំ នៅ​ទី​នេះ​ពិបាក​ណាស់ វា​អត់​មាន​អី​ធ្វើ​បាន​លុយ ហើយ​លុយ​ជួល​ផ្ទះ​ក៏​គ្មាន លុយ​ទិញ​អី​ហូប​ក៏​គ្មាន ហើយ​បាន​តែ​គេ​ឲ្យ​ហូប ហើយ​បើ​គេ​មិន​ឲ្យ​យើង​អត់»

ប្រជាពលរដ្ឋ​ខ្មែរ ១៥០នាក់ បាន​ជាប់​គាំង​នៅ​ប្រទេស​ម៉ាឡេស៊ី ជិត​ពីរ​ខែ​ហើយ​ដោយសារ​តែ​ការ ផ្លាស់ប្តូរ​ចិត្ត​មិន​ប្រាកដប្រជា​របស់​លោក ហ៊ុន សែន។ កាល​ពី​ថ្ងៃ​ទី៧ ខែមេសា លោក​បាន​សម្រេច​ចិត្ត​ភ្លាមៗ ហាម​មិន​ឲ្យ​យន្តហោះ​ដឹក​ពលរដ្ឋ​ទាំង ១៥០នាក់​ចូល​កម្ពុជា ក្រោម ហេតុផល​ទប់​ស្កាត់​ជំងឺ​កូវីដ។ បន្ទាប់​មក​នៅ​ថ្ងៃ​ទី២៧ ខែមេសា លោក​បាន​ប្តូរ​ចិត្ត​បើក​ផ្លូវ ឲ្យ​ពលរដ្ឋ​ទាំង ១៥០នាក់ ចូល​កម្ពុជា​វិញ តែ​តម្រូវ​ឲ្យ​មាន​លិខិត​បញ្ជាក់​សុខភាព​ថា គ្មាន​ជំងឺ​កូវីដ-១៩។ លើស​ពី​នេះ រដ្ឋាភិបាល​លោក ហ៊ុន សែន ប្រកាស​ថា ការ​ពិនិត្យ​សុខភាព​នោះ​មិន​អស់​លុយ​ទេ ប៉ុន្តែ​ក្រោយ​មក​តម្រូវ​ពលរដ្ឋ​ចំណាយ​លុយ​ខ្លួន​ឯង​វិញ។

មន្ត្រី​កម្មវិធី​ផ្នែក​ទេសន្តរប្រវេសក៍​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស ​ហៅ​កាត់​ថា សង់​ត្រាល់ (CENTRAL) លោក ឌី ថេហូយ៉ា ថ្លែង​ថា ដំណោះ​ស្រាយ​ថ្មី​របស់​រដ្ឋាភិបាល​នេះ ជា​រឿង​ល្អ ប៉ុន្តែ​មិន​ទាន់​គ្រប់គ្រាន់​នៅ​ឡើយ​ទេ។ លោក​ស្នើសុំ​ឲ្យ​រដ្ឋាភិបាល ដោះ​ស្រាយ​ចំណុច​សំខាន់ៗ ជា​ច្រើន​ទៀត ដូច​ជា ជួយ​ចំណាយ​ថ្លៃ​ធ្វើ​ដំណើរ និង​អាហារ​ហូប​ចុក​សម្រាប់​អ្នក​ដែល​រង​ផល​ប៉ះ​ពាល់​ធ្ងន់ធ្ងរ​ទាំង​ក្នុង​អំឡុង​ពេល​ពួក​គេ​នៅ​ក្រៅ​ប្រទេស និង​ទៅ​ដល់​ក្នុង​ប្រទេស​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


អត្ថបទ​ដែល​ទាក់ទង

What Next?

Recent Articles

One Response to "លោក ហ៊ុន សែន អនុញ្ញាត​ឲ្យ​ពលរដ្ឋ​ខ្មែរ​ត្រឡប់​ចូល​កម្ពុជា​ដោយ​មិន​ចាំបាច់​មាន​លិខិត​បញ្ជាក់​សុខភាព"

  1. Anonymous says:

    well ..you welcome Cambodian to come back to the country that is good . but for me I’m wonder will you keep Cambodian inside Cambodia by greet job for them. the reason I speak up because I see millions of Cambodia are trying to get out because they can not fine job to feed their families . and I also seeing a lot of Vietnamese came to replace Cambodian inside Cambodia . my question to every Cambodian inside the country is>> did I’m I wright?? if I’m right every one should think we are Cambodian will never forget you . well.. you can see our comment we always wanted our Cambodian unity back to save our nation. we knew Cambodia is in danger under un certainty future the reason came from that history enemy. I think Cambodian knew who they are . but who did we blame to>>my finger will pointing to all those un educated brain wash Cambodian who let our history enemy staring internal policy of this nation for generation. what so ever I have hart a new party just born but in what reason they just pop up to be . this is my question and please showing me your intention . I knew who was what those people always blaming to and said KBOTH CHEATH. for me please do not lie to me I already knew who was KBOTH your CHEATH…OK I’m every clear no one can convincing me of any thing you can buy. GOD bless Cambodia and it’s people