ការងារ | តុលាការ និងច្បាប់ | ព័ត៌មានជាតិ
លោក ឃុត សុគន្ធ | ៣០ មិថុនា ២០២០ | ម៉ោង ១៨:០៧
VOD
ព្រឹកថ្ងៃទី២៩ ខែមិថុនា ឆ្នាំ២០២០ កម្មករ-កម្មការិនីរបស់រោងចក្រ ញូបែស គ្លូប៊ល ថេកស្ថាយ (New Best Global Textile) ស្ថិតក្នុងស្រុកសំរោងទង ខេត្តកំពង់ស្ពឺ ឡើងមកតវ៉ានៅមុខក្រសួងការងារដើម្បីរកកិច្ចអន្តរាគមន៍ ក្រោយថៅកែបិទទ្វាររោងចក្រដោយមិនបានទូទាត់សំណងតាមផ្លូវច្បាប់។ (ហ៊ី ឆាយ)
ក្រុមមេដឹកនាំសហជីព អះអាងថា កម្មករប្រឈមនឹងការបាត់បង់អត្ថប្រយោជន៍បន្ថែមទៀត ក្រោយក្រសួងការងារបកស្រាយច្បាប់ពាក់ព័ន្ធការទូទាត់ប្រាក់សំណងជំងឺចិត្ត និងប្រាក់ជូនដំណឹងជាមុន ខណៈកម្មករកាន់តែច្រើនប្រឈមមុខនឹងការបញ្ចប់កិច្ចសន្យាការងារ ក្រោយរោងចក្រជាច្រើនបិទទ្វារក្រោមហេតុផលវិបត្តិសេដ្ឋកិច្ចដោយសារជំងឺកូវីដ១៩។
ក្នុងលិខិតមួយចុះថ្ងៃទី២៩ ខែមិថុនា ឆ្លើយតបទៅនឹងសំណួររបស់សមាគមរោងចក្រកាត់ដេរនៅកម្ពុជា (GMAC) ក្រសួងការងារបានបកស្រាយច្បាប់ពាក់ព័ន្ធការទូទាត់ប្រាក់សំណងជំងឺចិត្ត និងប្រាក់ជូនដំណឹងមុន ពេលបញ្ចប់កិច្ចសន្យាការងារ និងពេលរោងចក្របិទទ្វារ។
លិខិតដដែលបានលើកឡើងថា តាមផ្លូវច្បាប់ នៅពេលស្ថានភាពសេដ្ឋកិច្ចជួបវិបត្តិធ្ងន់ធ្ងរដោយសារការរីករាលដាលជំងឺកូវីដ១៩នោះ គឺម្ចាស់រោងចក្រ សហគ្រាស ដែលបានបិទទ្វារអាជីវកម្មទាំងស្រុង អាចរួចផុតពីការបង់លុយជំងឺចិត្ត និងលុយជូនដំណឹងមុនដល់កម្មករ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការលើកឡើងរបស់ក្រសួងការងារនេះ នឹងធ្វើឱ្យកម្មករបាត់បង់ផលប្រយោជន៍បន្ថែមទៀត ក្រោយពួកគេបាត់បង់ការងារ ហើយថា កម្មករនឹងប្រឈមបាត់បង់ផលប្រយោជន៍នេះពីបច្ចុប្បន្នដល់អនាគត។
លោក អាត់ ធន់ បន្ថែមថា ការបកស្រាយរបស់ក្រសួងនេះ ក៏បានផ្តល់ឱកាសឱ្យក្រុមហ៊ុនយកហេតុផលនេះទៅអនុវត្តភ្លាមៗ និងបានលេសគេចវេះពីការដោះស្រាយសំណងតាមផ្លូវច្បាប់ជូនកម្មករផងដែរ។
លោក អាត់ ធន់ មានប្រសាសន៍ថា៖ «ការបកស្រាយរបស់ក្រសួងនេះ ដូចលឿនពេក ហើយការបកស្រាយបែបហ្នឹងជាប្រយោជន៍របស់និយោជក ដែលធ្វើនិយោជកយកអាហ្នឹងធ្វើជា Reference [លិខិតយោង] ហើយបានដាក់ជាវិធានការតែម្តង ហើយក្រុមហ៊ុនបង្ហាញហេតុផលឱ្យច្បាស់ពីការបិទទ្វាររោងចក្រ ហើយបិទទ្វារត្រូវគិតប្រាំចំណុចហ្នឹងឱ្យគាត់ទៅ ដើម្បីឱ្យកម្មករទទួលបានផលប្រយោជន៍ផង»។
មន្ត្រីគ្រប់គ្រងកម្មវិធីការងារ និងសិទ្ធិមនុស្សនៃអង្គការសង់ត្រាល់ លោក ឃុន ថារ៉ូ មានប្រសាសន៍ថា ការបកស្រាយច្បាប់របស់ក្រសួងការងារនេះ គឺមិនត្រឹមត្រូវ ឬស្របទៅតាមផ្លូវច្បាប់នោះទេ ហើយថា ការបកស្រាយនេះនឹងធ្វើឱ្យកម្មករបាត់បង់ផលប្រយោជន៍ច្រើនណាស់សម្រាប់កម្មករដែលបម្រើការងារយូរឆ្នាំ។
លោក ឃុន ថារ៉ូ បន្តថា ការបកស្រាយច្បាប់ណាមួយដែលពាក់ព័ន្ធបញ្ហានៃផលប៉ះពាល់ជំងឺកូវីដ១៩លើវិស័យវាយនភណ្ឌកាត់ដេរ និងផលិតផលស្បែកជើង វាគួរតែជាស្ថានប័នឯករាជ្យមួយដែលមានការទទួលស្គាល់ពីអន្តរជាតិ ឬក៏ជាក្រុមប្រឹក្សាអាជ្ញាកណ្តាលជាដើម។
មន្ត្រីសិទ្ធិមនុស្ស និងការងាររូបនេះ លើកឡើងថា តាំងពីមុនជំងឺកូវីដផ្ទុះឡើង គឺមានរោងចក្រជាច្រើនបានបិទទ្វារខុសនីតិវិធីច្បាប់ និងគេចវេះមិនដោះស្រាយតាមផ្លូវច្បាប់ជូនកម្មករ ដែលលោកថា បញ្ហាវិបត្តិជំងឺកូវីដនៅពេលនេះ មិនអាចកំណត់ជាប្រធានសក្តិ ហើយផ្តល់ឱកាលឱ្យថៅកែរួចផុតពីការទូទាត់សំណងជូនកម្មករនោះទេ។
លោក ឃុន ថារ៉ូ ប្រាប់ថា៖ «គួរតែទុកការបកស្រាយទាំងអស់ហ្នឹងស្ថានប័នឯករាជ្យមួយដែលមានការទទួលស្គាល់ពីអន្តរជាតិ។ អ៊ីចឹងអាហ្នឹងវាខូចប្រយោជន៍កម្មករ ខណៈពេលដែលក្រុមហ៊ុនមិនបានអនុវត្តច្បាប់បានត្រឹមត្រូវ មិនបានជូនដំណឹងបិទសហគ្រាសបានត្រឹមត្រូវ។ ផ្ទុយទៅវិញ គឺវាបានការពារផលប្រយោជន៍និយោជក ព្រោះកាតព្វកិច្ចហ្នឹងជាកាតព្វកិច្ចរបស់និយោជក។ អ៊ីចឹង រដ្ឋគួរតែអនុវត្តច្បាប់ ជាជាងចេញសេចក្តីជូនដំណឹងធ្វើឱ្យខាតប្រយោជន៍កម្មករ ហើយអនុញ្ញាតឱ្យថៅកែគេចវេះកាតព្វកិច្ចផ្លូវច្បាប់»។
ប្រធាននាយកដ្ឋានអធិការកិច្ចការងារនៃក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ុក ចាន់ធូ បន្ថែមលើលិខិតថា មុនក្រសួងការងារចេញលិខិតឆ្លើយតបទៅសមាគមរោងចក្រកាត់ដេរនេះ គឺក្រសួងបានសិក្សាផ្លូវច្បាប់ច្បាស់លាស់ហើយ។
ប្រធាននាយកដ្ឋានរូបនេះ បញ្ជាក់ថា ការរីករាលដាលនៃជំងឺកូវីដ១៩ បានធ្វើឱ្យថៅកែរោងចក្រជាច្រើនជួបវិបត្តិសេដ្ឋកិច្ចយ៉ាងធ្ងន់ធ្ងរ ដែលលោកថា ករណីនេះត្រូវចាត់ចូលជាប្រធានសក្តិ។
លោក អ៊ុក ចាន់ធូ បន្ថែមថា តាមផ្លូវច្បាប់ នៅពេលចាត់ចូលជាប្រធានសក្តិ គឺថៅកែត្រូវរួចផុតពីការទូទាត់ប្រាក់ជូនដំណឹង និងប្រាក់សំណងជំងឺចិត្តដល់កម្មករ។
លោក អ៊ុក ចាន់ធូ ប្រាប់ថា៖ «អ៊ីចឹង ករណីប្រធានសក្តិក្នុងមាត្រា៨២ គេបានកំណត់ដោយមិនតម្រូវឱ្យនិយោជកជូនដំណឹងទេ ហើយក្នុងករណីប្រធានសក្តិហ្នឹង បាននិយាយយ៉ាងច្បាស់នៅចំណុចទី៣ ហើយមាត្រា៨៧ ក៏បានបញ្ជាក់ច្បាស់ដែរ។ អ៊ីចឹង សុំឱ្យបងប្អូនសហជីពពិនិត្យមើលការបកស្រាយរបស់ក្រសួងការងារឱ្យបានច្បាស់។ អ៊ីចឹង ថៅកែក៏គាត់មានភាពខាតបង់របស់គាត់ដែរ ហើយច្បាប់ក៏បានការពារជូនគាត់ដែរ មិនមែនក្រសួងការពារ រដ្ឋាភិបាលការពារគាត់ទេ គឺច្បាប់»។
នៅក្នុងសប្តាហ៍នេះ កម្មកររបស់រោងចក្រចំនួន២ បាននាំគ្នាតវ៉ា ក្រោយថៅកែបិទទ្វារដោយមិនបានដោះស្រាយសំណងជូនពួកគេតាមផ្លូវច្បាប់។
រោងចក្រកាត់ដេរសម្លៀកបំពាក់ និងផលិតម៉ាស់ ហាណា (HANA) ស្ថិតក្នុងខណ្ឌពោធិ៍សែនជ័យ រាជធានីភ្នំពេញ ដែលមានកម្មករជិត ៧០០នាក់ បានប្រកាសបិទទ្វារអាជីវកម្មភ្លាមៗកាលពីថ្ងៃទី២២ ខែមិថុនា ដោយមិនបានជូនដំណឹងមុនដល់កម្មករនោះទេ។
ក្នុងកំណត់ហេតុដោះស្រាយរវាងតំណាងកម្មករ និងតំណាងក្រុមហ៊ុន ក្រោមការសម្របសម្រួលពីមន្ត្រីក្រសួងការងារកាលពីថ្ងៃទី២៣ ខែមិថុនា បានបញ្ជាក់ថា ថៅកែ រោងចក្រ ហាណា បានសន្យាផ្តល់សំណងជូនកម្មករចំនួន ៥ចំណុចស្របតាមច្បាប់ស្តីពីការងារ។
ប៉ុន្តែ កម្មករអះអាងថា ពេលពួកគេបើកលុយនៅថ្ងៃទី២៦ ខែមិថុនា គឺថៅកែទូទាត់សំណងឱ្យពួកគេត្រឹមតែ ៣ចំណុចប៉ុណ្ណោះ មានប្រាក់ឈ្នួលចុងក្រោយ ប្រាក់អតីភាពការងារ និងប្រាក់ដំណាច់ឆ្នាំដែលនៅសល់ ដែលបណ្តាលឱ្យកម្មករបម្រើការងារចន្លោះពី ៤ ទៅ ១០ឆ្នាំ ផ្ទុះការតវ៉ារហូតមកដល់ថ្ងៃនេះ ដើម្បីទាមទារអត្ថប្រយោជន៍ ២ចំណុចបន្ថែម មានប្រាក់សំណងជំងឺចិត្ត និងប្រាក់ជូនដំណឹងមុន។
ចំណែករោងចក្រ ញូបែស គ្លូប៊ល ថេកស្ថាយ (New Best Global Textile) ស្ថិតក្នុងស្រុកសំរោងទង ខេត្តកំពង់ស្ពឺ ត្រូវបានថៅកែបិទទ្វារអាជីវកម្មរត់ចោលកម្មករតាំងពីខែកុម្ភៈ ខណៈដែលកម្មករ ៧៦៣នាក់របស់រោងចក្រនេះ មិនត្រូវបានដោះស្រាយសំណងតាមផ្លូវច្បាប់ឡើយ។
ក្រោយថៅកែរោងចក្រ ញូបែស គ្លូប៊ល ថេកស្ថាយ រត់ចោលកម្មករ គឺម្ចាស់ទីតាំងបានចេញមុខដោះស្រាយសំណងជូនកម្មករចំនួន ៣ចំណុច មានប្រាក់ឈ្នួលចុងក្រោយ ប្រាក់អតីភាពការងារ និងប្រាក់ដំណាច់ឆ្នាំដែលនៅសល់ ដោយលុបចោលប្រាក់សំណងជំងឺចិត្ត និងប្រាក់ជូនដំណឹង ប៉ុន្តែ កម្មករមិនព្រម ហើយបានផ្ទុះការតវ៉ារហូតមកដល់សព្វថ្ងៃនេះដែរ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។