កម្សាន្ត | កូរ៉ូណាវីរុស | ព័ត៌មានជាតិ
ពេជ្រ សុធារី |០៧ សីហា ២០២០ |ម៉ោង ០៩:៣៦
VOD
ទិដ្ឋភាពនៅរោងភាពយន្ត Major Cineplex ដែលទើបតែចាប់ដំណើរការឡើងវិញនៅថ្ងៃទី០៧ ខែសីហា ឆ្នាំ២០២០។ (អ៊ុយ សុធា)
រាជរដ្ឋាភិបាលបានសម្រេចឱ្យបើកដំណើរការរោងកុននិងរោងសម្តែងសិល្បៈឡើងវិញ ប៉ុន្តែត្រូវអនុវត្តតាមលក្ខខណ្ឌសុវត្ថិភាពនៃគោលការណ៍ស្តង់ដារប្រតិបត្តិការការពារការចម្លងវីរុសកូវីដ-១៩។
យោងតាម សេចក្តីជូនព័ត៌មាន របស់ក្រសួងវប្បធម៌ និងវិចិត្រសិល្បៈ នៅថ្ងៃព្រហស្បតិ៍នេះ បានលើកឡើងថា ការអនុញ្ញាតឱ្យបើកដំណើរការឡើងវិញ គឺដើម្បីជួយសម្រាលការលំបាកផ្នែកសេដ្ឋកិច្ចនិងជាការលើកទឹកចិត្តដល់កិច្ចខិតខំប្រឹងប្រែងរបស់សិល្បករ-សិល្បការិនី ផលិតករ អាជីវករ ម្ចាស់រោងភាពយន្ត និងរោងសម្តែងសិល្បៈ ក្នុងបុព្វហេតុអភិរក្សនិងលើកស្ទួយវិស័យសិល្បៈវប្បធម៌ជាតិ។
ក្រសួងបានបន្តថា៖ «សិល្បករ-សិល្បការិនី ព្រមទាំងផលិតករ អាជីវកម្ម ម្ចាស់រោងភាពយន្ត និងរោងសម្តែងសិល្បៈ ដែលមានបំណងបើកដំណើរការរោងភាពយន្តនិងរោងសម្តែងសិល្បៈឡើងវិញ ត្រូវមកដាក់ពាក្យស្នើសុំនៅនាយកដ្ឋានសិល្បៈភាពយន្តនិងផ្សព្វផ្សាយ នៃក្រសួងវប្បធម៌ និងវិចិត្រសិល្បៈ នៅរៀងរាល់ម៉ោងធ្វើការ ចាប់ពីថ្ងៃជូនដំណឹងនេះតទៅ»។
តែយ៉ាងណា ក្រសួងបានតម្រូវឱ្យរោងភាពយន្តនិងរោងសម្តែងសិល្បៈទាំងអស់ ត្រូវអនុវត្តលក្ខខណ្ឌមួយចំនួន ដោយត្រូវដាក់ពាក្យស្នើសុំនិងចុះអនុស្សរណៈយោគយល់ជាមួយក្រសួង ដើម្បីធានាថា ការអនុវត្តនូវគោលការណ៍ស្តង់ដារប្រតិបត្តិឱ្យបានត្រឹមត្រូវនិងត្រូវរៀបចំខ្លួនរួចរាល់ក្នុងការអនុវត្តតាមលក្ខខណ្ឌសុវត្ថិភាព ដូចមានចែងក្នុងគោលការណ៍ស្តង់ដារប្រតិបត្តិការការពារការចម្លងវីរុសកូវីដ១៩។
ក្រសួងបានបន្ថែមថា ចំពោះការបើកដំណើរការរោងភាពយន្តនិងរោងសម្តែងសិល្បៈឡើងវិញ ត្រូវឈរលើគោលការណ៍ស្ម័គ្រចិត្តដោយការទទួលខុសត្រូវខ្ពស់និងចូលរួមសហការពេញលេញជាមួយក្រុមការងារចម្រុះរបស់ក្រសួងវប្បធម៌និងក្រសួងសុខាភិបាល។
កាលពីថ្ងៃទី១៧ ខែមីនា ឆ្នាំ២០២០ ក្រសួងសុខាភិបាល បានសម្រេចឱ្យផ្អាកដំណើរការរោងភាពយន្តនិងរោងសម្តែងសិល្បៈនៅទូទាំងប្រទេស ដើម្បីទប់ស្កាត់ការរីករាលដាលនៃជំងឺកូវីដ-១៩៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។
THERE IS NO WHAT THEY SAID GOVERNMENT IN CAMBODIA