OHCHR អំពាវនាវ​​ដល់​​រដ្ឋា​ភិបាល​​ដោះ​លែង​​អ្នក​ជាប់​ឃុំ​​ជាង​១០​នាក់​​ដោយ​​ឥត​​លក្ខខណ្ឌ​

ព័ត៌មានជាតិ
លោក វណ្ណ វិចារ |១១ កញ្ញា ២០២០ |ម៉ោង ១៨:២៦
VOD

ក្រុមអ្នកតវ៉ាកាន់ដៃគ្នាឈរលើកបដានៅមុខការិយាល័យ​ឧត្តម​ស្នងការ​ទទួលបន្ទុក​សិទ្ធិមនុស្ស​ប្រចាំ​នៅ​កម្ពុជា ស្វែងរកកិច្ចអន្តរាគមន៍ឱ្យមានការដោះលែងលោក រ៉ុង ឈុន នាព្រឹកថ្ងៃទី២៤ ខែសីហា ឆ្នាំ២០២០។ (ហ៊ី ឆាយ)

ក្រុមអ្នកតវ៉ាកាន់ដៃគ្នាឈរលើកបដានៅមុខការិយាល័យ​ឧត្តម​ស្នងការ​ទទួលបន្ទុក​សិទ្ធិមនុស្ស​ប្រចាំ​នៅ​កម្ពុជា ស្វែងរកកិច្ចអន្តរាគមន៍ឱ្យមានការដោះលែងលោក រ៉ុង ឈុន នាព្រឹកថ្ងៃទី២៤ ខែសីហា ឆ្នាំ២០២០។ (ហ៊ី ឆាយ)


ការិយាល័យ​ឧត្តម​ស្នងការ​អង្គការសហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​នៅ​កម្ពុជា OHCHR អំពាវនាវ​ដល់​រដ្ឋាភិបាល​កម្ពុជា ដោះលែង​អ្នក​ដែល​ត្រូវ​បាន​ឃុំខ្លួន​ជាបន្ទាន់និង​ដោយ​គ្មាន​លក្ខខណ្ឌ និង​ស្នើ​ឱ្យ​បញ្ឈប់​ការ​បំភិតបំភ័យ​ទៅលើ​តួអង្គ​សង្គម​ស៊ីវិល។

កំណត់​សង្ខេប​ព័ត៌មាន​ស្តី​ពី​កម្ពុជា ចេញផ្សាយថ្ងៃទី១១ ខែកញ្ញា ឆ្នាំ២០២០ ដោយ OHCHR លើកឡើង​ថា ចាប់តាំងពី​ថ្ងៃទី៣១ ខែកក្កដាមក នៅពេល​ដែលលោក រ៉ុង ឈុន ត្រូវ​បាន​ចាប់ខ្លួន UNHCR បាន​ចងក្រង​ជាឯក​សារ​នូវ​ការ​ចាប់ខ្លួន​អ្នកការពារ​សិទ្ធិមនុស្សចំនួន២៤រូបនៅក្នុង​ប្រទេស​កម្ពុជា ក្នុង​នោះ​មានការ​ចាប់ខ្លួន​មនុស្ស​ចំនួន​ប្រាំបី​នាក់គ្រាន់តែ​នៅក្នុង​ខែកញ្ញា​នេះ។ 

OHCHR បន្ត​ថា មនុស្ស១៣នាក់ក្នុងចំណោម​អ្នក​ដែល​ត្រូវ​បាន​ចាប់ខ្លួន ត្រូវ​បាន​ដោះលែង​បន្ទាប់​ពី​បាន​ចុះហត្ថលេខា​លើ​កិច្ច​ព្រមព្រៀង​ដោយ​បង្ខិតបង្ខំដើម្បី​បញ្ឈប់​សកម្មភាព​តវ៉ា ខណៈ​មនុស្ស​ជាង១០នាក់កំពុង​ស្ថិត​ក្នុង​ការ​ឃុំឃាំង​នៅឡើយ ក្នុង​នោះ​មាន​ស្ត្រី​ម្នាក់​ត្រូវ​បាន​ចាប់ខ្លួន បន្ទាប់ពី​ចាកចេញ​ពី​ការិយាល័យ​សិទ្ធិមនុស្ស​អង្គការសហប្រជាជាតិ​ប្រចាំ​កម្ពុជា កាលពី​ថ្ងៃ​ចន្ទ (ទី០៧ ខែកញ្ញា​)។

OHCHR បន្ថែម​ទៀត​ថា មាន​បុគ្គល​ជាច្រើន​ត្រូវ​បាន​រាយការណ៍​ផង​ដែរ​ថា បាន​ទទួលការ​គំរាមកំហែង​តាម​ទូរសព្ទនិង​តាមដាន រួម​ទាំងការ​គំរាមកំហែង​ដល់អាយុ​ជីវិត​ផង​ដែរ ប្រសិនបើ​ពួក​គេ​មិន​បញ្ឈប់​សកម្មភាព​សិទ្ធិមនុស្ស​របស់​ពួក​គេ​នោះ​ទេ។

OHCHR បន្ត​ថា បច្ចុប្បន្ន​នេះ អ្នកការពារ​សិទ្ធិមនុស្ស​ជាច្រើន​កំពុង​លាក់ខ្លួន​ដោយមាន​ការភ័យខ្លាច​ពី​ការ​ចាប់ខ្លួន។

OHCHR លើកឡើង​ដូច្នេះ៖ «ស្ថានភាព​នា​ពេល​បច្ចុប្បន្ន​នេះ បង្ហាញ​ឱ្យ​យើង​កាន់តែ​ឃើញ​នូវ​ការ​មិន​អត់ឱន​របស់​រដ្ឋាភិបាល​ចំពោះ​គំនិត​ផ្ទុយពី​ខ្លួន និង​ការគាបសង្កត់​ទៅលើ​សិទ្ធិ​សេរីភាព​ក្នុង​ការ​បញ្ចេញមតិ ការ​ជួបជុំ​ដោយសន្តិវិធី និង​ការ​ចងក្រង​សមាគម។ យើង​សូម​អំពាវនាវ​ដល់​រដ្ឋាភិបាល​ឱ្យ​ដោះលែង​អ្នក​ដែល​ត្រូវ​បាន​ឃុំខ្លួនជាបន្ទាន់និង​ដោយ​គ្មាន​លក្ខខណ្ឌ ចំពោះ​ការអនុវត្ត​សិទ្ធិ​ទាំងនេះ​របស់​ពួក​គេ ហើយ​សូម​បញ្ចប់​នូវ​ការ​បំភិតបំភ័យ​ទៅលើ​តួអង្គ​សង្គម​ស៊ីវិល»

អ្នកនាំពាក្យ​គណៈកម្មាធិការ​សិទ្ធិមនុស្ស​កម្ពុជា លោក កត្តា អ៊ន ថ្លែងប្រាប់​វី​អូ​ឌី​ថា ការ​ចាប់ខ្លួនមនុស្ស​ទាំងនោះនា​ពេល​កន្លងមក គឺ​ធ្វើ​ទៅតាមច្បាប់។ លោក​បន្ត​ច្រានចោល​ការ​លើកឡើង របស់ OHCHR និង​ចាត់ទុក​សេចក្ដីថ្លែង​ការណ៍​នេះ​ថា ​មិន​ឈរ​លើ​មូលដ្ឋាន​ពិត​ជាក់ស្ដែង។

លោក កត្តា អ៊ន បាន​ថ្លែង​ថា៖ «សម្រាប់​ខ្ញុំ​ជាម​ន្ត្រី​សិទ្ធិមនុស្ស​របស់​រដ្ឋាភិបាល សំណូមពរ​ឱ្យ​ខាង OHCHR ពិនិត្យ​ឡើងវិញ​នូវ​អ្វី​ដែល​ជារ​បាយ​ការណ៍​របស់​ខ្លួនឬការ​លើកឡើង​របស់​ខ្លួន ហើយ​ធ្វើការ​អង្កេត​និង​សិក្សាស្រាវជ្រាវ​ឱ្យ​បាន​ច្បាស់​សិន មុននឹង​ថ្លែងការណ៍​អ្វីមួយ»

អ្នកនាំពាក្យ​សមាគម​ការពារ​សិទ្ធិ​មនុស្ស​អាដ​ហុក លោក ស៊ឹង សែន​ករុណា មានប្រសាសន៍​ថា ព្រឹត្តិ​ការណ៍​ចាប់ខ្លួន​មនុស្ស​ក្នុងរយៈពេល២ខែ​ចុងក្រោយ​នេះ បង្ហាញ​ឱ្យ​ឃើញ​ពី​ការ​ធ្លាក់ចុះ​នៃ​ស្ថានភាព​សិទ្ធិមនុស្ស​នៅ​កម្ពុជា។ លោក​ថា ព្រឹត្តិ​ការណ៍​ទាំងនេះដាក់​គំនាប​លើ​អ្នកការពារ​សិទ្ធិមនុស្ស ខណៈ​ដែល​លោក​ផ្ទាល់ បារម្ភ​ចំពោះ​ការ​បំពេញការងារ​ក្នុងនាម​ជា​អ្នកការពារ​សិទ្ធិមនុស្ស​ផង​ដែរ។

លោក​មានប្រសាសន៍​ថា៖ «យើង​មានការ​ព្រួយបារម្ភ បារម្ភ​នេះ​នាំ​ឱ្យ​យើង​ព្យាយាម​រឹតត្បិត​ក្នុង ការ​និយាយ​ទៀតផង»។ 

កាលពី​ថ្ងៃទី០៩ ខែកញ្ញា ក្រុម​អង្គការ​សង្គម​ស៊ីវិល​ចំនួន៣៦ បាន​សម្ដែង​ក្ដី​បារម្ភ ក្រោយពី​អាជ្ញាធរ​ប្រើប្រាស់​បទចោទប្រកាន់​«ញុះញង់» ចាប់​ឃុំខ្លួន​យុវជន​ដែល​តវ៉ា​ដោយសន្តិវិធី​ជាបន្តបន្ទាប់ និង​ស្នើ​ឱ្យ​តុលាការ​ទម្លាក់​ចោល​នូវ​បទ​ចោទ ព្រមទាំង​ដោះលែង​ពួក​គេ​ឱ្យ​មាន​សេរីភាព​ឡើងវិញ​៕


រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

What Next?

Recent Articles

One Response to "OHCHR អំពាវនាវ​​ដល់​​រដ្ឋា​ភិបាល​​ដោះ​លែង​​អ្នក​ជាប់​ឃុំ​​ជាង​១០​នាក់​​ដោយ​​ឥត​​លក្ខខណ្ឌ​"

  1. so socheath says:

    ក្រុមភេរវកម្ម ដែលច្បាប់មិនត្រូវអត់អោន
    *******
    ការលើកឡើងការគំរាមកំហែងពីការព្យួរការអនុគ្រោះពន្ធ EBA និងការអនុគ្រោះពន្ធនាំទំនិញទៅកាន់សហរដ្ឋអាមេរិក GSP ត្រូវបានអាក្បត់ជាតិសមរង្ស៊ី និងពួកសង្គមស៊ីវិល ដែលតាំងខ្លួនឯងថាជាអ្នកវិភាគសេដ្ឋកិច្ចក្នុងប្រទេស និយាយដោយពាក្យដដែលៗ ថាអាចនឹងប៉ះពាល់ដល់កំណើនសេដ្ឋកិច្ចកម្ពុជា ។
    ពួកគេថាសហរដ្ឋអាមេរិក និងសហភាពអឺរ៉ុបបានកំណត់លក្ខខណ្ឌឲ្យកម្ពុជាកែសម្រួលនិងស្រោចស្រង់លទ្ធិប្រជាធិបតេយ្យនិងសិទ្ធិមនុស្សនិងសិទ្ធិនយោបាយ រួមទាំងស្វែងរកដំណោះស្រាយជាមួយគណបក្សប្រឆាំងដើម្បីអាចរក្សាការអនុគ្រោះពន្ធ EBA និង GSP ( sic ) មិនដូច្នេះទេ វិស័យពីរនេះក្នុងចំណោមឆ្អឹងខ្នងសេដ្ឋកិច្ចជាតិខ្មែរនឹងទទួលរងការគំរាមកំហែង ហើយដែលកន្លងទៅនេះសមរង្ស៊ី ថាបើមានការព្យូរ EBA សមរង្ស៊ីនឹងបំផុសឲ្យកម្មករងើបតវ៉ាប្រឆាំងនឹងលោក ហ៊ុន សែន។
    ដោយឡែកពួកសង្គមស៊ីវិលអ្នកដែលតាំងខ្លួនឯងថាជាអ្នកវិភាគសេដ្ឋកិច្ច ពួកនេះតែងនិយាយថាការបាត់បង់ EBA អាចនឹងធ្វើឲ្យកម្ពុជាបាត់បង់ជន្ទល់សេដ្ឋកិច្ចបើទោះបីពួកនេះដឹងថា
    រដ្ឋាភិបាលកម្ពុជា នឹងមិនយកអធិបតេយ្យភាពរបស់ខ្លួនដើម្បីចុះញ៉មនឹងការដាក់សម្ពាធសម្រាប់ការព្យួរឬផ្តាច់ EBA នោះទេ។ ដូចនេះ លក្ខខណ្ឌតាមរយះការដាក់សម្ពាធលើកម្ពុជាខាងផ្នែកនយោបាយ ដោយបំពានលើអធិបតេយ្យជាតិកម្ពុជាពី
    សហគមន៍សហភាពអឺរ៉ុប មិនទទួលបានផ្លែផ្កាទេ។
    កម្ពុជាជារដ្ឋអធិបតេយ្យ ដែលមិនអនុញ្ញាត ឲ្យប្រទេសណាមួយមករំលោភបំពានបាន។
    កម្ពុជាពិតជាត្រូវការរស់ ដោយស្មើសិទ្ធិ ស្មើមុខមាត់ ក្នុងកិច្ចសហប្រតិបត្តិការជិតស្និទ្ធជាមួយប្រទេសទាំងអស់ក្នុងលោកលើគ្រប់វិស័យ ដោយផ្តល់ផលប្រយោជន៍ដោយស្មើភាពចំពោះគ្នាទៅវិញទៅមក ។
    ជានិច្ចកាលជនក្បត់ជាតិសមរង្ស៊ី និងពួកក្រុមដែលតាំងខ្លួនឯងថាជាអ្នកវិភាគសេដ្ឋកិច្ចក្នុងប្រទេស កម្ពុជា ក្រុមសង្គម
    ស៊ីវិល ដែលស្ថិតនៅក្នុងអង្គការសិទ្ធិមនុស្ស អង្គការសិទ្ធិលំនៅដ្ឋាន សមាគមនិងក្រុមសហជីពដែលមាននិន្នការប្រឆាំងរដ្ឋាភិបាល ពួកគេតែងលើកឡើងពីសិទ្ធិសេរីភាព ពីសិទ្ធិមនុស្ស ពីប្រជាធិបតេយ្យមកធ្វើជាត្រីវិស័យក្នុងការនាំមុខ ដើម្បីប្រឆាំងអំណាចរដ្ឋ ដែលជាដែនសមត្ថកិច្ចការពារផលប្រយោជន៍ កាពារសិទ្ធិសេរីភាព ការពារសិទ្ធិមនុស្ស និងការពារប្រជាធិបតេយ្យរបស់ប្រជាពលរដ្ឋ បើទោះបីពួកគេដឹងយ៉ាងច្បាស់ថា លំហរនៃសិទ្ធិសេរីភាព សិទ្ធិមនុស្ស និងប្រជាធិបតេយ្យ នៅកម្ពុជា គឺមានយ៉ាងពេញបរិបូរណ៍ នឹងកំពុងដំណើរការជានិរន្តក្តី ។
    ប្រជាពលរដ្ឋដែលស្រឡាញ់សុខសន្តិភាព បានមើលឃើញយ៉ាងច្បាស់ពីទង្វើក្បត់ជាតិរបស់សមរង្ស៊ី ក្នុងការដើរសុំអន្តរាគមន៍ឲ្យសហភាពអឺរ៉ុប និងសហរដ្ឋអាមេរិកដកការអនុគ្រោះពន្ធ EBA និង GSPពីកម្ពុជា នឹង សកម្មភាពបែបប្រតិកិរិយារបស់ក្រុមសង្គមស៊ីវិល និង ក្រុមសហជីព ដែលមាននិន្នាការប្រឆាំងរដ្ឋាភិបាល ទាំងនេះយ៉ាងច្បាស់ ហើយពួកគាត់បានចាត់ទុកក្រុមនេះ ថាគឺជាក្រុមភេរវកម្ម ដែលច្បាប់មិនត្រូវអត់អោន ។
    សកម្មភាពក្រុមសង្គមស៊ីវិល និង ក្រុមសហជីព ដែលពួកប្រតិកិរិយាទាំងអស់នេះបានធ្វើកន្លងមក វាមិនខុសអីពីការធ្វើសកម្មភាពចូលរួមយ៉ាងសកម្មក្នុងចលនានយោបាយដើម្បីកសាងកម្លាំង ដើម្បីត្រៀមកម្លាំង ដើម្បីបង្កើតអង្គការចាត់តាំងខាងនយោបាយខុសច្បាប់ ប៉ុនប៉ងដើម្បីប្រមូលកម្លាំងប្រឆាំងរដ្ឋាភិបាល ផ្ដួលរំលំរដ្ឋាភិបាល ដែលជាអំពើខុសច្បាប់ ខុសគោលការណ៍នៃលទ្ធិប្រជាធិបតេយ្យ ដែលពួកគេបានទន្ទេញជាប់មាត់នោះឡើយ ។
    វាពិតជាមានចលនាវិទ្ធង្សនាជាច្រើនដែលបង្ករឡើងដោយក្រុមសង្គមស៊ីវិលសិទ្ធិមនុស្ស និង ក្រុមសហជីព ដែលមាននិន្នាការប្រឆាំងរដ្ឋាភិបាល ដែលសូម្បីពួកគេដឹងច្បាស់ថា ការភ័យព្រួយខ្លាចសហភាពអឺរ៉ុបផ្ដាច់ពន្ធអនុគ្រោះEBAនិង GSP ថាប៉ះពាល់ដល់សេដ្ឋកិច្ចជាតិ វាមិនមែនជាកាតព្វកិច្ចដែលពួកគេត្រូវដោះស្រាយ ដោយហេតុថាកម្ពុជា មិនអាចយកអធិបតេយ្យភាពជាតិ ទៅដោះដូរជាមួយជំនួយក្តី ៕

Leave a Reply

Submit Comment