ដោយ ហេង រស្មី
2020-10-17
RFA
លោក លី ច័ន្ទតុលា (កណ្ដាល) ជាប់ឆ្នោតជាប្រធានគណៈមេធាវីនៃព្រះរាជាណាចក្រកម្ពុជា នៅថ្ងៃទី១៦ ខែតុលា ឆ្នាំ២០២០។
រូប៖ គណៈមេធាវីនៃព្រះរាជាណាចក្រកម្ពុជា
លោកមេធាវី លី ច័ន្ទតុលា ដែលមានស្នាដៃ ចូលរួមយ៉ាងសកម្មរឿងក្ដីរំលាយគណបក្សសង្គ្រោះជាតិកាលចុងឆ្នាំ២០១៧ និងបានរៀបចំឯកសារស្នើសុំតុលាការកំពូលបំបិទសិទ្ធិធ្វើនយោបាយរបស់មន្ត្រីបក្សប្រឆាំង ១១៨នាក់ រយៈពេល ៥ឆ្នាំ បានឈ្នះជាប្រធានគណៈមេធាវីអាណត្តិទី១៣។ សមាជិកគណៈមេធាវីអ្នកចូលរួមបោះឆ្នោតរិះគន់ថា ការរៀបចំការបោះឆ្នោតនេះគ្មានតម្លាភាពដោយសារតែបេក្ខជនមានលុយបានប្រើប្រាស់លុយនិងអំណាច ដើម្បីស្វែងរកការគាំទ្រក្នុងការបោះឆ្នោត។
មិនខុសពីការបោះឆ្នោតលើកមុនៗ ទេ គឺមេធាវីដែលទំនាក់ទំនងជាមួយបក្សកាន់អំណាច ឬក្រុមគ្រួសារលោក ហ៊ុន សែន តែងឈ្នះការបោះឆ្នោតធ្វើជាប្រធានគណៈមេធាវី។ លោកមេធាវី លី ច័ន្ទតុលា ទទួលបានការគាំទ្រជិត ១ពាន់ ៥រយសំឡេង។ ក្រៅពីនេះមានបេក្ខជនផ្សេងទៀតរួមមាន៖ លោកមេធាវី កែត ឃី លោកមេធាវី សំ សុខគង់ លោកមេធាវី ស សូវ៉ាន លោកមេធាវី សេក សោភ័ណ្ឌ ទទួលសំឡេងគាំទ្រខ្ពស់បំផុតត្រឹម ១៣០ និងទាបបំផុតត្រឹម ២៦សំឡេង។
លោក លី ច័ន្ទតុលា គឺជាមេធាវីដែលមានងារជាឯកឧត្ដម និងឋានៈស្នើរដ្ឋមន្ត្រីផងនោះទទួលបានសំឡេងគាំទ្រ ១៤៤៤ ស្មើនឹង ៧៨.៦៥ភាគរយច្រើនលើសលុបពីបេក្ខជនផ្សេងទៀត ដែលធ្វើឱ្យលោកក្លាយប្រធានគណៈមេធាវីអាណត្តិទី១៣ ក្នុងការបោះឆ្នោតនៅមហាសន្និបាតដែលរៀបចំឡើងដោយគណៈមេធាវីនាថ្ងៃទី១៦ ខែតុលា។ ថ្លែងក្រោយប្រកាសលទ្ធផលមេធាវី លី ច័ន្ទតុលា ថា ការប្រកួតប្រជែងគ្នានេះមិនមានការវាយប្រហារគ្នា បើទោះជាពេលខ្លះបេក្ខជនទាំង ៥នាក់មានគោលនយោបាយខុសគ្នាខ្លះក្ដី។ លោកយល់ថា ការប្រកួតប្រជែងជ្រើសរើសប្រធានគណៈមេធាវីពេលនេះគឺជាគំរូសម្រាប់ការប្រកួតប្រជែងពេលក្រោយទៀត។ លោកប្ដេជ្ញាចិត្តថា អនុវត្តន៍គោលនយោបាយទាំង ៨ចំណុចរបស់លោក ដើម្បីការពារផលប្រយោជន៍រួមនៃវិជ្ជាជីវៈមេធាវីគណៈមេធាវី និងផលប្រយោជន៍របស់មេធាវី៖ «ថ្វីដ្បិតពេលខ្លះយើងមានគោលនយោបាយខុសគ្នាខ្លះ ត្រូវគ្នាខ្លះប៉ុន្តែយើងទាំងប្រាំនាក់មិនមានគេហៅថា ការជជែកវែកញែកស្វិតស្វាញខ្លាំងពេកទេរហូតដល់ថា ឈ្មោះគ្នាអីទេគឺយើងបានសហការគ្នាខ្ញុំគិតថា នេះគឺគំរូមួយ»។
លី ច័ន្ទតុលាជាមេធាវីមានឥទ្ធិពលម្នាក់ក្នុងចំណោមក្រុមមេធាវីរបស់លោក គី តិច ដែលជាមេធាវីរដ្ឋាភិបាលនិងអតីតប្រធានគណៈមេធាវី។ លោកក៏ជាមេធាវីម្នាក់បានចូលរួមយ៉ាងសកម្មរឿងក្ដីរំលាយគណបក្សសង្គ្រោះជាតិកាលចុងឆ្នាំ២០១៧ និងបានរៀបចំឯកសារស្នើសុំតុលាការកំពូលបំបិទសិទ្ធិធ្វើនយោបាយរបស់មន្ត្រីបក្សប្រឆាំង ១១៨នាក់រយៈពេល ៥ឆ្នាំ។ ក្រោយពេលប្ដឹងរំលាយគណបក្សសង្គ្រោះជាតិបានជោគជ័យលោក លី ច័ន្ទតុលា ក៏ជាមេធាវីដែលកំពុងចោទប្រកាន់ប្រធានគណបក្សសង្គ្រោះជាតិ លោក កឹម សុខា ពីបទក្បត់ជាតិនៅតុលាការផងដែរ។
ក្រៅពីមានកិច្ចការងារការពារផ្នែកច្បាប់ឱ្យរដ្ឋាភិបាលនេះ តាមរយៈទំព័រហ្វេសប៊ុកផេករបស់លោកក៏មានបង្ហោះរូបថតដែលលោកបានថតជាមួយលោក ហ៊ុន សែន និងកូនៗ លោក ហ៊ុន សែន ទៀតផង។
ប្រធានគណៈមេធាវីចប់អាណត្តិលោក សួន វិសាល និយាយថា លោក លី ច័ន្ទតុលា ជាបេក្ខជនដែលលោកគាំទ្រ។ លោករំពឹងថា ប្រធានគណៈមេធាវីរូបនេះនឹងបំពេញការងារបន្តពីលោកបានជោគជ័យ៖ «នេះជាក្ដីសង្ឃឹមរបស់ខ្ញុំដែរ ព្រោះថាជាបេក្ខជនមួយ ដែលខ្ញុំគាំទ្រ ខ្ញុំសង្ឃឹមគិតថា គាត់មានសមត្ថភាពគ្រប់គ្រាន់ដឹកនាំគណៈមេធាវីបន្ត ប៉ុន្តែទោះបីមិនបានគាត់ជាប់អ្នកផ្សេងជាប់ក៏ខ្ញុំនៅតែគាំទ្រ ព្រោះជាលទ្ធផលបោះឆ្នោត ដែលយើងគោរពតែឥឡូវចំសណ្ដានចិត្តរបស់យើង ដែលយើងចង់បាន»។
លោកមេធាវី ជួង ជួងី ជាមេធាវីការពារក្ដីឲ្យមន្ត្រី និងសកម្មជនបក្សប្រឆាំង ឱ្យអាស៊ីសេរីដឹងថា លោកសង្កេតឃើញថា ក្នុងការឃោសនាមានបញ្ហាខ្លះគួរកត់សម្គាល់ គឺមានការមិនស្មើភាពគ្នារវាងបេក្ខជនក្នុងការប្រកួតប្រជែងនេះ។ លោកបញ្ជាក់ថា មានបេក្ខជនខ្លះប្រើប្រាស់ទឹកលុយរបស់ខ្លួនរាប់ម៉ឺនដុល្លារអញ្ជើញមេធាវី ដែលជាអង្គបោះឆ្នោតទៅជប់លៀងក្នុងពេលឃោសនាបោះឆ្នោតហើយក៏មានបេក្ខជនផ្សេងទៀតប្រើឥទ្ធិពលនៃអ្នកនយោបាយ ដើម្បីទាក់ទាញរកសំឡេងឆ្នោត។ ប៉ុន្តែលោក ជួង ជួងី សុំមិនបង្ហាញឈ្មោះបេក្ខជនដែលប្រើឥទ្ធិពលទឹកលុយ និងឥទ្ធិពលអ្នកនយោបាយនោះទេ ដោយលោកនិយាយថា សមាជិកគណៈមេធាវីផ្សេងទៀតដឹងរឿងនេះទាំងអស់៖
«គឺបង្ហាញឱ្យឃើញថា ការឃោសនាបោះឆ្នោតហ្នឹងនៅក្នុងកម្រិតមួយដែលខ្ញុំអត់ទាន់ពេញចិត្តនៅឡើយទេ។ ខ្ញុំចង់ឱ្យបេក្ខជនឈរឈ្មោះជាប្រធានគណៈមេធាវីហ្នឹងគឺប្រើការប្រកួតប្រជែងដោយស្មើភាពដោយស្មោះត្រង់ កុំប្រើទឹកលុយ ហើយកុំប្រើឥទ្ធិពលអ្នកកាន់អំណាចមកដើម្បីជួយរកសំឡេងឆ្នោត»។
ការលើកឡើងនេះស្របទៅនឹងសកម្មភាពរបស់លោក លី ច័ន្ទតុលា។ នៅមុនពេលបោះឆ្នោតលោក តែងបង្ហោះរូបភាពលើហ្វេសប៊ុកផេករបស់លោកជាបន្តបន្ទាប់បង្ហាញពីកម្មវិធីជប់លៀងស្វែងរកការគាំទ្រពីក្រុមមេធាវីនានា ក្រោមរូបភាពកម្មវិធីអាហារសាមគ្គីគាំទ្របេក្ខភាពលោកជាប្រធានគណៈមេធាវី។
លោកមេធាវី ជូង ជូងី ព្រួយបារម្ភថា របៀបការបោះឆ្នោតសព្វថ្ងៃដែលអាចបេក្ខជនចំណាយថវិកាផ្ទាល់ខ្លួនឃោសនាស្រែកតែចិត្តបែបនេះគឺគ្មានតម្លាភាពនិងធ្វើឱ្យមានការបែងចែកបក្សពួក។ លោកមេធាវីក៏ចង់ឃើញគណៈមេធាវីជាអ្នកចេញរៀបចំកម្មវិធី និងឱ្យបេក្ខជនឈរឈ្មោះជជែកតទល់គ្នាដើម្បីរកអ្នកមានសមត្ថភាពពិតមកដឹកនាំគណៈមេធាវី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សមត្ថកិច្ចចាប់ផ្សឹកព្រះចៅអធិការវត្តមួយអង្គក្រោយពីលួចផលិតវីដេអូ អាសអាភាសលើកុមារីមិនទាន់គ្រប់អាយុ
- តុលាការកំពូលនឹងជម្រះបណ្ដឹងសុំបដិសេធការស៊ើបអង្កេតបន្ថែមរឿងចារកម្មរបស់អតីតអាស៊ីសេរីពីររូប នៅសប្ដាហ៍ក្រោយ
- ប្រពន្ធសមាជិកបក្សប្រឆាំងប្ដឹងទៅតុលាការ និងអង្គការយូនីសេហ្វ រឿងអាជ្ញាធរឃុំខ្លួន និងធ្វើទារុណកម្មកុមារា កាក់ សុវណ្ណច្ឆ័យ
- យុទ្ធនាការបំបាត់អំពើនិទណ្ឌភាព មានអ្នកចូលរួមកើនឡើងជាង ២ម៉ឺន ៥ពាន់នាក់
- មេធាវី មានស្នាដៃជ្រោមជ្រែងរំលាយបក្សប្រឆាំង ទទួលបានការគាំទ្រផ្ដាច់មុខ ពីរដ្ឋាភិបាល ក្នុងការប្រកួតតំណែង ប្រធានគណៈមេធាវី
- តុលាការក្រុងភ្នំពេញ សាកសួរយុវជនជាប់ឃុំពីរនាក់ជុំវិញសកម្មភាពទាមទារយុត្តិធម៌សង្គម
- អ្នកវិភាគថា ការដោះដូរអគ្គកុងស៊ុលខ្មែរប្រចាំនៅខេត្តយូណានប្រទេសចិន គឺពាក់ព័ន្ធនឹងការដណ្ដើមផលប្រយោជន៍គ្នា
- យុទ្ធនាការបំបាត់អំពើនិទណ្ឌភាព មានអ្នកចូលរួមកើនឡើងជាង ២ម៉ឺន ៤ពាន់នាក់
- មេធាវីម្នាក់ដកខ្លួន ជាបេក្ខភាពប្រធានគណៈមេធាវី ខណៈ៥នាក់ទៀតកំពុងឃោសនា
- សភាអនុម័តសេចក្ដីព្រាងច្បាប់ ស្ដីពីការគ្រប់គ្រងល្បែងពាណិជ្ជកម្ម
All these are criminals’ they are support veitcong mafia dictator and his groups so all theses people are the criminals ‘
I knew every thing is for $$$$$$$$$$$$$$$$$ all bloody in the world is also because of $$$$$$$$$$$only the people having peace in mind is do not care about money . the person whit evil mind like HUN SEN and this lawyer can not be peace because they drunk $$$$$$$