កម្ពុជា
29/11/2020 – 06:45
ដោយ៖ វុធ ច័ន្ទតារា
RFI
យ៉ាងហោចណាស់មានមនុស្ស៤នាក់បានស្លាប់និងចំនួន១០១នាក់ផ្សេងទៀត រងគ្រោះដោយសារពុលស្រា ដែលតាមការសន្និដ្ឋានជំហានដំបូងរបស់មន្ទីរសុខាភិបាលខេត្តកំពង់ឆ្នាំង សង្ស័យថាមានសារធាតុមេតាណុល (Metanol) ។ ករណីនេះបានកើតឡើងនៅប្រមាណជាងម៉ោង២រសៀល ខណៈពលរដ្ឋបានទទួលទានស្រា អំឡុងពេលកំដរពិធីបុណ្យសពមួយក្នុងស្រុកទឹកផុសខេត្តកំពង់ឆ្នាំង។ នេះបើតាមការលើកឡើងពីលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងប្រាប់វិទ្យុបារាំងអន្តរជាតិ RFI នៅថ្ងៃនេះ។
គិតមកត្រឹមព្រឹកថ្ងៃទី២៩ខែវិច្ឆិកានេះមានមនុស្ស៤នាក់បានស្លាប់ដោយសារពុលស្រា នៅខេត្តកំពង់ឆ្នាំង ដែលក្នុងនោះ២នាក់បានស្លាប់នៅផ្ទះ និង២នាក់ទៀតស្លាប់អំឡុងពេលបញ្ជូនមកសង្រ្គោះបន្តនៅមន្ទីរពេទ្យក្រុងភ្នំពេញ។ គួរបញ្ជាក់ដែរថា បច្ចុប្បន្នមានអ្នកជំងឺកំពុងសម្រាកព្យាបាលសរុប ១០១នាក់ ស្រី៥នាក់ ដែលក្នុងនោះ៣នាក់កំពុងស្ថិតក្នុងសភាពធ្ងន់ធ្ងរ។ បើតាមលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំងបានអោយដឹងបន្តថា ព្រឹកនេះក្រុមគ្រូពេទ្យខេត្តបានបញ្ជូនអ្នកជំងឺចំនួន២នាក់បន្ថែមទៀតមកភ្នំពេញហើយ ដើម្បីធ្វើការពិនិត្យនិងព្យាបាលបន្ត។
គួរជម្រាបជូនថា សមត្ថកិច្ច និងគណៈអភិបាលខេត្តកំពង់ឆ្នាំងបាននិងកំពុងស្រាវជ្រាវរកប្រភពនៃស្រាដែលបណ្តាលឲ្យពុលនេះ ដើម្បីបញ្ឈប់ការលក់ និងចែកចាយជាបន្ទាន់ផងដែរ។
គួររំឭកដែរថា ករណីពុលស្រា តែងកើតមានជារឿយៗ នៅតាមបណ្ដាខេត្តមួយចំនួនក្នុងប្រទេសកម្ពុជា ដែលកាលពីខែឧសភាឆ្នាំ២០១៨ក៏មានករណីស្រដៀងគ្នានេះកើតឡើងក្នុងខេត្តក្រចេះដែរ ដែលពេលនោះបណ្ដាលឲ្យមនុស្សជាង១០នាក់បានស្លាប់ និងជាង២០០នាក់ផ្សេងទៀតចូលសម្រាកព្យាបាលក្នុងមន្ទីរពេទ្យ។
ជារឿយៗក្រសួងសុខាភិបាលបានអំពាវនាវឲ្យប្រជាពលរដ្ឋកុំពិសាស្រាស ដែលរៀបចំគ្មានបច្ចេកទេសត្រឹមត្រូវ ដើម្បីចៀសផុតពីការពុល ហើយនឹងអាចបណ្តាលឲ្យស្លាប់បាត់បង់ជីវិតថែមទៀត៕