ក្រសួង​សុខាភិបាល​រក​ឃើញ​ករណី​ជំងឺ​កូវីដ១៩ ​ឆ្លង​ថ្មី​​កើន​ឡើង​ដល់ ១៧នាក់ ជា​ករណី​ឆ្លង​នៅ​ក្នុង​សហគមន៍

2020-12-01
RFA

ក្រសួង​សុខាភិបាល​រក​ឃើញ​ករណី​ជំងឺ​កូវីដ១៩ ​ឆ្លង​ថ្មី​​កើន​ឡើង​ដល់ ១៧នាក់ ជា​ករណី​ឆ្លង​នៅ​ក្នុង​សហគមន៍

វិទ្យាស្ថាន​ប៉ាស្ទ័រ​កម្ពុជា នៅ​រាជធានី​ភ្នំពេញ រូប៖ ពលរដ្ឋ


ក្រសួង​សុខាភិបាល​រក​ឃើញ​អ្នក​ឆ្លង​ជំងឺ​កូវីដ១៩ ចំនួន ៣នាក់​ថ្មីថែម​​ទៀត ដែល​នាំ​ឲ្យ​តួលេខ​ឆ្លង​នៅ​ក្នុង​សហគមន៍​​កើន​ឡើង​ដល់ ១៧នាក់​ហើយ ក្នុង​រយៈ​ពេល ៣ថ្ងៃ​នេះ។ ជា​មួយ​គ្នា​នេះ​ពលរដ្ឋ​មួយ​ចំនួន នៅ​តែ​មិន​សូវ​ការពារ​ខ្លួន និង​ភ័យ​ខ្លាច​ពី​ការ​រាតត្បាត​ជំងឺ​រលាត​ផ្លូវ​ដង្ហើម​ថ្មី​នេះ​ដដែល។ មន្ត្រី​សង្គម​ស៊ីវិល​យល់​ថា ​ជំងឺ​នេះ​អាច​នឹង​រាតត្បាត​ទ្រង់ទ្រាយ​ធំ ប្រសិន​បើ​ប្រជាពលរដ្ឋ​មិន​បាន​ការពារ​ខ្លួន​ឱ្យ​បាន​ត្រឹម​ត្រូវ។

សេចក្ដី​ប្រកាស​របស់​ក្រសួង​សុខាភិបាល ចុះ​ថ្ងៃ​ទី១ ធ្នូ ឱ្យ​ដឹង​ថា ក្រសួង​បាន​រក​ឃើញ​ករណី​ឆ្លង​ជំងឺ​កូ​វីដ-១៩ ចំនួន ៣ករណី​ថ្មី​បន្ថែម​ទៀត គិត​ត្រឹម​ព្រឹក​ថ្ងៃ​ទី១ ខែ​ធ្នូ ដែល​ជា​ករណី​ចម្លង​នៅ​ក្នុង​សហគមន៍ ​ហើយ​​​ពួកគេ​មាន​ទីលំនៅ​រាជធានី​ភ្នំពេញ​ទាំង​អស់​គ្នា​ ក្នុង​នោះ​មាន​ទារក​អាយុ ៧ខែ​ម្នាក់​ផង។ ដូច្នេះ​ ធ្វើ​ឱ្យ​ចំនួន​អ្នក​ឆ្លង​នៅ​ក្នុង​សហគមន៍​​កើន​ឡើង​ចំនួន ១៧នាក់​ហើយ គិត​ចាប់​ពី​ថ្ងៃ​ទី២៨ វិច្ឆិកា មក​ដល់​ព្រឹក​ថ្ងៃ​ទី១ ធ្នូ។ បច្ចុប្បន្ន ​ពួកគេ កំពុង​សម្រាក​ព្យាបាល​នៅ​មន្ទីរពេទ្យ​មិត្តភាព​ខ្មែរ​សូវៀត​នៅ​ក្រុង​ភ្នំពេញ។ ការ​រក​ឃើញ​នេះ គឺ​បន្ទាប់​ពី​ក្រសួង​សុខាភិបាល​ធ្វើ​តេស្ដ​លើ​មនុស្ស​ចំនួន​ជិត ៥ពាន់​នាក់ (៤.៨៦៤) នៅ​ក្នុង​រាជធានី​ភ្នំពេញ និង​ខេត្ត​ចំនួន ៧ទៀត។

ជាមួយ​គ្នា​នេះ ក្រសួង​សុខាភិបាល បាន​ប្រកាស​ស្នើសុំ​ឲ្យ​ថ្នាក់​ដឹក​នាំ​រដ្ឋសភា សមាជិក​រដ្ឋសភា និង​មន្ត្រី​រាជការ​នៅ​ក្នុង​រដ្ឋសភា​ជិត ១០០នាក់ ធ្វើ​តេស្ត​សុខភាព និង​ធ្វើ​ចត្តាឡីស័ក បន្ទាប់​មាន​ពី​មាន​តំណាង​រាស្ត្រ​ម្នាក់ ឈ្មោះ ឡូយ សុផាត បាន​ប៉ះពាល់​ផ្ទាល់​ជាមួយ​ប្រធាន​នាយកដ្ឋាន​ពន្ធនាគារ​នៃ​ក្រសួង​មហាផ្ទៃ លោក ឆែម សាវុធ ហើយ​លោក ឡូយ សុផាត បាន​ចូល​រួម​ប្រជុំ​ក្នុង​រដ្ឋសភា កាលពី​ថ្ងៃ​ទី២៥ ខែវិច្ឆិកា។ ក្រសួង​រក​ឃើញ​ថា មន្ត្រី​ដែល​មាន​ហានិភ័យ​មធ្យម​ឆ្លង​ជំងឺ​កូវីដ​មាន​ចំនួន ៣១នាក់ ក្នុង​នោះ មាន​ប្រធាន​រដ្ឋសភា លោក ហេង សំរិន អនុប្រធាន​រដ្ឋសភាទី១ លោក ងួន ញ៉ិល រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក អូន ព័ន្ធមុនីរ័ត្ន និង​មន្ត្រី​ជាន់​ខ្ពស់​ជា​ច្រើន​ទៀត។ ចំណែក​មន្ត្រី​ក្នុង​រដ្ឋសភា ដែល​មាន​ហានិភ័យ​ទាប​ក្នុង​ការ​ឆ្លង​ជំងឺ​កូវីដ មាន​ចំនួន ៣៥នាក់។ លោក ហេង សំរិន ប្រកាស​នៅ​លើ​ទំព័រ​ហ្វេសប៊ុក (Facebook) ថា លោក និង​ភរិយា រួម​ទាំង​សមាជិក​ក្នុង​គ្រួសារ បាន​ចាប់​ផ្ដើម​ធ្វើ​ចត្តាឡីស័ក ក្នុង​គេហដ្ឋាន ចាប់​តាំង​ពី​ថ្ងៃ​ទី២៨ ខែវិច្ឆិកា។

អាស៊ី​សេរី​មិន​អាច​ទាក់​ទង​អ្នក​នាំ​ពាក្យ​ក្រសួង​សុខាភិបាល អ្នក​ស្រី ឱ វណ្ណឌីន ដើម្បី​សុំ​អត្ថាធិប្បាយ​បន្ថែម​ជុំ​វិញ​ពី​ការ​ឆ្លង​ជំងឺ​កូវីដ១៩ នេះ​បាន​ទេ នៅ​ថ្ងៃ​ទី១ ធ្នូ ដោយ​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

ទោះ​ជា​យ៉ាង​ណា​ក្ដី នៅ​ក្នុង​សេចក្ដី​ប្រកាស​របស់​ក្រសួង​សុខាភិបាល នៅ​តែ​បន្ត​អំពាវនាវ​ឱ្យ​ប្រជាពលរដ្ឋ និង​អ្នក​ពាក់ព័ន្ធ​ជា​មួយ​ប្រធាន​នាយកដ្ឋាន​ពន្ធនាគារ​នៃ​ក្រសួង​មហាផ្ទៃ លោក ឆែម សាវុធ ធ្វើ​តេស្ដ​សុខភាព និង​ធ្វើ​​ចត្តាឡឺស័ក​​ឱ្យ​បាន​ទាំង​អស់​គ្នា និង​អំពាវនាវ​ឱ្យ​ប្រជាពលរដ្ឋ​ពាក់​ម៉ាស់​លាង​ដៃ​និង​សាប៊ូ​ឬ​ទឹក​អាល់កុល​ឱ្យ​បាន​ញឹកញាប់ ហើយ​ប្រញាប់​រាយការណ៍​ដល់​អាជ្ញាធរ​ប្រសិន​បើ​​មាន​ពលរដ្ឋ​ណា​សង្ស័យ​ឆ្លង​ជំងឺ​កូវីដ១៩។

ទោះ​​ជា​បែប​នេះ​ក្ដី​ ប្រជាពលរដ្ឋ​​នៅ​តាម​ខេត្ត​មួយ​ចំនួន​​ ហាក់​មិន​ខ្វល់​ពី​​ការ​រាតត្បាត​ជំងឺ​កូវិដ​១៩​នេះ​ទេ​ គឺ​​ពួកគាត់​​​​ភាគ​ច្រើន​​ខ្វល់​ខ្វាយ​ពី​ការ​ខំ​ប្រឹង​រក​ប្រាក់​ចំណូល​ដោះស្រាយ​ជីវភាព​គ្រួសារ​ជា​ធម្មតា។

​ពលរដ្ឋ​នៅ​​បន្ទាយមានជ័យ​ លោក កើយ កាន ប្រាប់​អាស៊ី​សេរី​ថា ​ប្រជាពលរដ្ឋ​នៅ​តំបន់​​របស់​លោក​​មិន​សូវ​ពាក់​ម៉ាស់​​ការពារ​ជំងឺ​កូវិដ​១៩​នោះ​ទេ ដោយ​​ពួក​លោក​យល់​ថា ​ជំងឺ​នេះ​មិន​អាច​រាលដាល​ដល់​តំបន់​ពួកគាត់​ឡើយ៖ «និយាយ​រួម​ទៅ​គាត់​អត់​ការពារ​ប៉ុន្មាន​ទេ​ អ្វី​ដែល​សំខាន់​គាត់​ខ្វល់​ខ្ចាយ​ទៅ​រឿង​ជីវភាព​របស់​គាត់ ទាក់​ទឹង​នឹង​ស្រូវ​ស្រែ​របស់​គាត់។ ខាង​ស្រូវ​ហ្នឹង​គឺ​ពិបាក ឥឡូវ​ប្រមូល​ផល​ហើយ​ខ្វះ​ម៉ាស៊ីន​ច្រូត​ ឡើង​ថ្លៃ ហើយ​តម្លៃ​ស្រូវ​ក៏​ថយ​ចុះ​ទៀត។ គឺ​ថា​សំខាន់​មាន​លុយ​ចាយ ពីព្រោះ​ដោយសារ​តែ​​បញ្ហា​ហ្នឹង​វា​ដដែល​ទៅ​ អីចឹង​គាត់​ជ្រើស បំផុត​គឺ​ជ្រើសរើស​យក​បញ្ហា​ក្រពះ​របស់​គាត់ ព្រោះ​បើ​សិន​គាត់​អត់​មាន​ការងារ​ធ្វើ​អត់​មាន​លុយ​ចាយ​និង​ដាច់​បាយ​ហើយ»

ដូច​គ្នា​នេះ​ដែរ ក្រុម​ប្រជាពលរដ្ឋ​នៅ​ខេត្ត​កំពង់ឆ្នាំង​និង​ខេត្ត​កំពង់ចាម​ ប្រាប់​ថា នៅ​តំបន់​ពួក​គាត់​ប្រមាណ ២០ភាគ​រយ​ប៉ុណ្ណោះ ដែល​ពាក់​ម៉ាស់​ការពារ​ខ្លាច​ឆ្លង​ជំងឺ​កូវីដ១៩។ ពលរដ្ឋ​ទាំង​នេះ​ឱ្យ​ដឹង​ទៀត​ថា ​​ប្រជាពលរដ្ឋ​ភាគ​ច្រើន​ភ័យ​ខ្លាច​គ្មាន​អង្ករ​ច្រក​ឆ្នាំង​​ជាង​ខ្លាច​ឆ្លង​ជំងឺ​រលាក​ផ្លូវ​ដង្ហើម​ថ្មី​នេះ៖ «ព្រោះ​កូវីដ​ហ្នឹង គេ​អត់​បារម្ភ​ទេ ព្រោះ​វា​អត់​ឃើញ​ថា មាន​ការ​ស្លាប់​ដោយសារ​កូវីដ​ហ្នឹង ដល់​អីចឹង​ហើយ​គាត់​អត់​ខ្លាច​ទេ ​គាត់​ភ័យ​បារម្ភ​ខ្លាំង​គឺ​ការ​ដាច់​បាយ​ហើយ​ហ្នឹង​ សុខ​សុវត្ថិភាព​នៅ​ក្នុង​សង្គម។ សព្វ​ថ្ងៃ​នេះ សំខាន់​ណាស់​មួយ​ណា​ក៏​ដោយ បើ​សិន​ជា​​បើក​ឱ្យ​មាន​ការ​សម្ភាសន៍​ជា​ទូទៅ​វិញ គឺ​មួយ​ណា​ក៏​និយាយ​ពី​រឿង​​ដាច់​ពោះ​ហ្នឹង​ដែរ ហើយ​ចំពោះ​ការ​ការពារ​តាំង​ពី​ដើម​ឡើយ​មក​ហើយ​ មិន​មែន​ទើប​ឥឡូវ​ទេ​ គេ​គ្មាន​ខ្វល់​អី​ផង។ ឥឡូវ​ពិធី​អី​ផ្សេង​ខ្លះ​នៅ​មាន​ការ​ជួប​ជុំ​គ្នា​ដែរ​ហ្នឹង ហើយ​នៅ​តាម​ផ្សារ​អី​ប្រជាពលរដ្ឋ​រស់​នៅ​ធម្មតា​ អត់​ឃើញ​មាន​ពាក់​ម៉ាស់​អី​ផង»

ទោះ​ជា​យ៉ាង​ណា ​ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព លោក យង់ គឹម​អេង ​​ព្រួយបារម្ភ​នឹង​ការ​លើក​ឡើង​របស់​ប្រជាពលរដ្ឋ​នេះ​​ថា អាច​នឹង​ធ្វើ​​ឱ្យ​ជំងឺ កូវីដ​១៩​​​​ផ្ទុះ​ឡើង​​ទ្រង់ទ្រាយ​ធំ​ប្រសិន​បើ​បើ​​អាជ្ញាធរ​ពាក់ព័ន្ធ​មិន​ឆាប់​ផ្សព្វផ្សាយ​ពី​របៀប​ការពារ​​កុំ​ឱ្យ​ឆ្លង​ជំងឺ​កូវីដ​ឱ្យ​​បាន​​គ្រប់​ទី​កន្លែង​ជា​ពិសេស​​តាម​សហគមន៍​នៅ​ទី​ជនបទ។ លោក​​ថា រឿង​នេះ​អាច​ដោយសារ​តែ​ពលរដ្ឋ​មួយ​ចំនួន​ខ្វះ​ការ​យល់​ដឹង​​អំពី​ការ​ឆ្លង​​ជំងឺ​កូវីដ១៩៖ «អីចឹង​ហើយ​វិធាន​ការ​ដែល​ល្អ​ហ្នឹង​ត្រូវ​តែ​យើង​ប្រុង​ប្រយ័ត្ន​ទាំង​អស់​គ្នា​។​ម្យ៉ាង​វិញ​ទៀត​អ្វី​ដែល​សំខាន់​យើង​ត្រូវ​ការ​ព័ត៌មាន​​ឱ្យ​បាន​កាន់​តែ​ឆាប់​ដែរ​ ព័ត៌មាន​​ដែល​ជាប់​ពាក់​នឹង​ការ​ផ្ទុះ​ឡើង​នេះ​ ខ្ញុំ​ឃើញ​មាន​ព័ត៌មាន​ច្រើន​ហើយ​ ដែល​មាន​ឈ្មោះ​​និង​មាន​ការ​កំណត់​ទីតាំង​អី​ តែ​សុំ​ឱ្យ​ផ្ដល់​ព័ត៌មាន​បន្ថែម​​ផ្សេងៗ​ទៀត ដែល​អាច​ប្រជាពលរដ្ឋ​លោក​បាន​​ស្វែង​យល់​ហើយ​ហ្នឹង​បង្ការ​​ឱ្យ​បាន​ទូលំទូលាយ​ហើយ​​កាន់​តែ​មាន​ប្រសិទ្ធភាព»

មន្ត្រី​សង្គម​ស៊ីវិល​រូប​នេះ​ឱ្យ​ដឹង​​ថា ​នៅ​ទី​តាម​ទីក្រុង​​ប្រជាពលរដ្ឋ​ភាគ​ច្រើន​ចាប់​ផ្ដើម​​​ពាក់​ម៉ាស់​ការពារ​ជំងឺ​កូវីដ​ ។ទោះ​ជា​យ៉ាង​ណា​លោក​សង្កេត​ឃើញ​​មាន​ប្រជាពលរដ្ឋ​​​ដែល​ធ្វើ​ដំណើរ​តាម​ផ្លូវ​មិន​ពាក់​ម៉ាស់​នៅ​តែ​មាន​ចំនួន​ច្រើន​ ដែល​ជា​ហានិភ័យ​​​​ងាយ​ចម្លង​ជំងឺ​កូវីដ ស្រប​ពេល​ដែល​​​ក្រសួង​សុខាភិបាល​នៅ​មិន​ទាន់​រក​ឃើញ​​​ជំងឺ​នេះ​ចម្លង​មក​ពី​​ប្រភព​ណា​ច្បាស់​លាស់​នៅ​ឡើយ។ គិត​ត្រឹម​ព្រឹក​ថ្ងៃ​ទី១ ខែ​ធ្នូ កម្ពុជា​មាន​អ្នក​កើត​ជំងឺ​កូវីដ-១៩ សរុប​ចំនួន ៣២៦នាក់ ក្នុង​នោះ​អ្នក​បាន​ជា​សះ​ស្បើយ​វិញ មាន​ចំនួន ៣០៤នាក់ និង​អ្នក​កំពុង​នៅ​សម្រាក​ព្យាបាល​ចំនួន ២២នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles