ទស្សនៈ​ផ្សេង​គ្នា អំពី​គោល​បំណង​នៃ​ការ​ឈ្លានពាន​របស់​កងទ័ព​វៀតណាម​មក​លើ​ប្រទេស​កម្ពុជា កាល​ពី ៤២ឆ្នាំ​មុន

ដោយ ជី វិតា
2021-01-07
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

ទស្សនៈ​ផ្សេង​គ្នា អំពី​គោល​បំណង​នៃ​ការ​ឈ្លានពាន​របស់​កងទ័ព​វៀតណាម​មក​លើ​ប្រទេស​កម្ពុជា កាល​ពី ៤២ឆ្នាំ​មុន

កងទ័ព​វៀតណាម​នៅ​ក្នុង​ប្រទេស​កម្ពុជា​កាល​ពី​ក្នុង​អំឡុង​ទសវត្សរ៍​ឆ្នាំ១៩៨០។ រូប៖ ហ្វេសប៊ុក​ស្ថានទូតវៀតណាមប្រចាំកម្ពុជា ថ្ងៃ​ទី៤ ខែមករា ឆ្នាំ២០២១


នៅ​ថ្ងៃ​ទី២៥ ខែធ្នូ ឆ្នាំ១៩៧៨ កងទ័ព​វៀតណាម​ប្រមាណ ១៥ម៉ឺន​នាក់ បាន​ចាប់​ផ្ដើម​វាយ​លុក​ចូល​ប្រទេស​កម្ពុជា និង​ដណ្ដើម​បាន​ទីក្រុង​ភ្នំពេញ​ពី​រដ្ឋាភិបាល​កម្ពុជា​ប្រជាធិបតេយ្យ ឬ​របប​ខ្មែរ​ក្រហម នៅ​ថ្ងៃ​ទី៧ ខែមករា ឆ្នាំ១៩៧៩។ វៀតណាម​បាន​ដក​ទ័ព​ចេញ​ទៅ​វិញ​ក្រោយ​ត្រួតត្រា​កម្ពុជា បាន​រយៈ​ពេល ១០ឆ្នាំ។

ប្រជាពលរដ្ឋ និង​អ្នក​នយោបាយ​ខ្មែរ ហាក់​នៅ​មិន​ទាន់​ឯកភាព​គ្នា​នៅ​ឡើយ​ទេ អំពី​គោល​បំណង​នៃ​ការ​ឈ្លានពាន​របស់​កងទ័ព​វៀតណាម​មក​លើ​ប្រទេស​កម្ពុជា កាល​ពី ៤២ឆ្នាំ​មុន។

តើ​អ្នក​ស្រាវជ្រាវ​ប្រវត្តិ​រឿងរ៉ាវ​ខ្មែរក្រហម និង​វៀតណាម​វិញ យល់​យ៉ាង​ណា​ដែរ?

កងទ័ព​វៀតណាម​​ ដែល​មាន​មនោគមន៍​វិជ្ជា​កុម្មុយនិស្ត​ដូច​គ្នា និង​ធ្លាប់​ប្រកៀក​ស្មា​គ្នា​ធ្វើ​សង្គ្រាម​ប្រឆាំង​អាមេរិកកាំង​​ជាមួយ​គ្នា​ផង ហេតុ​អ្វី​បានជាចាប់​ផ្ដើម​ចូល​លុកលុយ​កម្ពុជា នៅចុង​ឆ្នាំ​១៩៧៨ នោះ តើ​ក្នុង​បំណង​ជួយ​សង្គ្រោះ​ពលរដ្ឋ​កម្ពុជា​ឱ្យ​រួច​ផុត​ពី​ការ​កាប់​សម្លាប់​របស់​ខ្មែរ​ក្រហម ឬ​មាន​គោល​បំណង​ផ្សេង?

គោល​បំណង​ចម្បង​នៃ​ការ​ផ្ដួល​រំលំ​របប​ខ្មែរ​ក្រហម​នៅ​ដើម​ឆ្នាំ១៩៧៩ ដោយ​កងទ័ព​វៀតណាម មិន​មែន​ដើម្បី​សង្គ្រោះ​ប្រជាជន​កម្ពុជា​ឱ្យ​រួច​ផុត​ពី​ការ​កាប់​សម្លាប់​របស់​ខ្មែរ​ក្រហម​នោះ​ទេ នេះ​បើ​តាម​ការ​រក​ឃើញ​របស់​បណ្ដា​អ្នក​ស្រាវជ្រាវ។

លោក បើនដ៍ សេហ្វឺ (Bernd Schaefer) ជនជាតិ​អាល្លឺម៉ង់ ជា​សាស្ត្រាចារ្យ​ផ្នែក​ប្រវត្តិសាស្ត្រ និង​កិច្ចការ​អន្តរជាតិ នៅ​សាកលវិទ្យាល័យ ហ្ចច វ៉ាស៊ីងតោន (George Washington) សហរដ្ឋ​​អាមេរិក ឱ្យ​ដឹង​ថា វត្ថុ​បំណង​នៃ​ការ​ឈ្លាន​ពាន​ប្រទេស​កម្ពុជា​ពី​សំណាក់​កងទ័ព​វៀតណាម គឺ​ដើម្បី​ផ្លាស់​ប្ដូរ​មេ​ដឹក​នាំ​ខ្មែរ​ក្រហម ដែល​មិន​រណប​វៀតណាម។ លោក​ថា ឯកសារ​ការ​ទូត​ខ្សែ​កាប ដែល​លោក​ប្រទះ​ឃើញ​នៅ​ប្រទេស​អាល្លឺម៉ង់​ខាង​កើត កាលពីទសវត្សរ៍ឆ្នាំ១៩៨០ បញ្ជាក់​ថា វៀតណាម​មិន​ពេញ​ចិត្ត​មេ​ដឹក​នាំ​ខ្មែរ​ក្រហម​នេះ ចាប់តាំងពីដើមឆ្នាំ១៩៧៨ មក វៀតណាម​បាន​គិតគូរ​រក​វិធី​ផ្លាស់​ប្ដូរ ប៉ុល ពត ចេញ​ពី​មេ​ដឹក​នាំ​កម្ពុជា​ប្រជាធិបតេយ្យ ហើយ​ដាក់​ជំនួស​មក​វិញ នូវ​មនុស្ស​ណា​ដែល​មាន​សមាន​ចិត្ត​ចំពោះ​វៀតណាម។

ការ​លើក​ឡើង​របស់​លោក បើនដ៍ សេហ្វឺ នេះ ស៊ី​សង្វាក់​គ្នា​នឹង​ការ​បញ្ជាក់​របស់​អតីត​អ្នក​កាសែត​ជាន់​ខ្ពស់​នៃ​កងទ័ព​ប្រជាជន​វៀតណាម គឺ​លោក ប៊ុយ ទីន (Bui Tin)។ លោក ប៊ុយ ទីន ដែល​អម​ដំណើរ​កងទ័ព​វៀតណាម​ចូល​ទីក្រុង​ភ្នំពេញ​នៅ​ថ្ងៃ​ទី៧ ខែមករា ឆ្នាំ១៩៧៩ នោះ និយាយ​ថា កងទ័ព​វៀតណាម​ឈ្លានពាន​​កម្ពុជា គឺ​ដោយ​សារ​តែ​កងទ័ព​ខ្មែរ​ក្រហម​វាយ​ប្រហារ​ទៅ​លើ​ប្រទេស​វៀតណាម។

លោក ប៊ុយ ទីន ដែល​មាន​ឋានៈ​ជា​វរសេនីយ៍ឯក​នៃ​កងទ័ព​ប្រជាជន​វៀតណាម​ផង​នោះ ក្រោយមក គឺ​នៅ​ឆ្នាំ១៩៩០ បាន​ភៀស​ខ្លួន​ចេញ​ពី​ប្រទេស​វៀតណាម ទៅ​សុំ​សិទ្ធិ​ជ្រក​កោន​នយោបាយ​នៅ​ប្រទេស​បារាំង បន្ទាប់​ពី​លោក​បាន​រិះគន់​គោល​នយោបាយ​ដឹក​នាំ និង​អំពើ​ពុក​រលួយ​របស់​មេ​ដឹក​នាំ​បក្ស​កុម្មុយនិស្ត​វៀតណាម។ លោក​ទទួល​មរណភាព​នៅ​ខែ​សីហា ឆ្នាំ២០១៨ ក្នុង​វ័យ ៩០ឆ្នាំ។

Bui_Tin_1.jpg
លោក ប៊ុយ ទីន (Bui Tin) អតីត​អ្នក​កាសែត​ជាន់​ខ្ពស់​នៃ​កងទ័ព​ប្រជាជន​វៀតណាម ដែល​មាន​ឋានន្តរសក្ដិ​​ជា​វរសេនីយ៍ឯក។

ក្រោយ​ពេល​សង្គ្រាម​បង្ហូរ​ឈាម​ប្រឆាំង​បារាំង និង​អាមេរិក អស់​រយៈ​ពេល​បី​ទសវត្សរ៍​មក វៀតណាម​ខាងជើង និង​វៀតណាម​ខាង​ត្បូង បាន​បង្រួបបង្រួម​គ្នា​ជា​ប្រទេស​តែ​មួយ នៅ​ចុង​ខែ​មេសា ឆ្នាំ​១៩៧៥។ លោក ប៊ុយ ទីន កាល​នៅ​មាន​ជីវិត បាន​អះអាង​ប្រាប់​អាស៊ី​សេរី​ថា ក្រោយ​សង្គ្រាម​ដ៏​មហា​វិនាសកម្ម​នោះ វៀតណាម​ទាំង​មូល​​ខ្សោះ​កម្លាំង និង​ធនធាន ដូច្នេះ​ពុំ​មាន​ទឹក​ចិត្ត​បន្តិច​ណា​ចង់​ឈ្លានពាន​កម្ពុជា​នោះ​ទេ៖ «ខ្ញុំ​ច្បាស់​ណាស់ មេ​ដឹក​នាំ​កុម្មុយនិស្ត​វៀតណាម មិន​មាន​គោល​បំណង​ឈ្លានពាន​ប្រទេស​កម្ពុជា​ទេ ពីព្រោះ​ក្រោយ​ពេល​សង្គ្រាម ដែល​វៀតណាម​ទាំង​ពីរ​បាន​បង្រួបបង្រួម​គ្នា​ជា​ប្រជាជាតិ​តែ​មួយ​ហើយ​នោះ វៀតណាម​បាន​ជួប​ប្រទះ​បញ្ហា​ធំៗ ជា​ច្រើន​នៅ​ក្នុង​ប្រទេស។ ហេតុ​ដូច​នេះ មេ​ដឹក​នាំ​កុម្មុយនិស្ត និង​ប្រជាជន​វៀតណាម គឺ​ចង់​បាន​តែ​សន្តិភាព​ប៉ុណ្ណោះ ពីព្រោះ​បន្ទាប់​ពី​សង្គ្រាម​អស់​រយៈ​ពេល ៣០ឆ្នាំ​មក ប្រទេស​វៀតណាម​រង​ការ​ខូចខាត​ខ្ទេចខ្ទាំ​យ៉ាង​ធ្ងន់ធ្ងរ ហើយ​មនុស្ស​ស្លាប់ និង​រង​របួស​ក៏​ច្រើន​សន្ធឹកសន្ធាប់​ដែរ»

អ្នក​សិក្សា​ស្រាវជ្រាវ​ប្រវត្តិ​ខ្មែរ​ក្រហម បណ្ឌិត ក្រែក អិចជេសិន (Craig Etcheson) យល់​ស្រប​ជាមួយ​ការ​លើក​ឡើង​របស់​លោក ប៊ុយ ទីន។ លោក​ថា តាម​ការ​ស្រាវជ្រាវ ​លោក​ពុំ​ដែល​ឃើញ​មាន​ឯកសារ​ណា​មួយ​បង្ហាញ​ថា កងទ័ព​វៀតណាម ចូល​មក​កម្ពុជា ដើម្បី​សង្គ្រោះ​ជីវិត​ពលរដ្ឋ​កម្ពុជា ឬ​ពលរដ្ឋ​វៀតណាម ដែល​ខ្មែរ​ក្រហម​កំពុង​កាប់​សម្លាប់​នោះ​ទេ៖ «អត់​ទេ ខ្ញុំ​មិន​គិត​ថា កងទ័ព​វៀតណាម​ចូល​កម្ពុជា​ក្នុង​គោល​បំណង​មនុស្សធម៌​នោះ​ទេ បើ​ទោះ​ជា​ពេល​នោះ ប្រាកដ​ណាស់​ថា ប្រជាជន​វៀតណាម​នៅ​ក្នុង​ប្រទេស​កម្ពុជា កំពុង​ត្រូវ​ខ្មែរ​ក្រហម​ធ្វើ​បាប​ក៏​ដោយ​ចុះ ពីព្រោះ​ក្នុង​គ្រា​នោះ ប្រទេស​វៀតណាម​កំពុង​មាន​បញ្ហា​ជា​ច្រើន​របស់​ខ្លួន ដែល​ត្រូវ​ដោះ​ស្រាយ​ចំពោះ​មុខ នោះ​គឺ​ការ​ខិតខំ​ច្របាច់​បញ្ចូល​គ្នា​រវាង​វៀតណាម​ខាង​ជើង និង​វៀតណាម​ខាង​ត្បូង។ ហេតុ​ដូច​នេះ វៀតណាម​មិន​ចង់​ធ្វើ​សង្គ្រាម ដែល​មិន​ចាំបាច់​នោះ​ទេ។ ប៉ុន្តែ​ខ្មែរ​ក្រហម​ទេ ដែល​ធ្វើ​ឱ្យ​វៀតណាម​អស់​ផ្លូវ​ជ្រើសរើស»

ទោះ​ជា​យ៉ាង​ណា លោក ប៊ុយ ទីន អះអាង​ថា ចិន​ជា​អ្នក​ញុះញង់​ឱ្យ​ខ្មែរ​ក្រហម​វាយ​ប្រហារ​វៀតណាម ព្រោះ​ចិន​មិន​ចង់​ឃើញ​វៀតណាម​ខាង​ជើង និង​ខាង​ត្បូង​រួបរួម​គ្នា ក្លាយ​ជា​ប្រទេស​ធំ​មួយ​ទេ៖ «ជា​យុទ្ធសាស្ត្រ ចិន​ចង់​ធ្វើ​ឱ្យ​វៀតណាម​ចុះ​ខ្សោយ គឺ​ចិន​មិន​ចង់​ឃើញ​វៀតណាម​ខាង​ត្បូង និង​ខាង​ជើង​រូប​រួម​គ្នា​ក្លាយ​ជា​ប្រទេស​ធំ​មួយ​នោះ​ទេ។ ដូច្នេះ​ហើយ ទើប​ចិន​បាន​ញុះញង់ ឬ​ជំរុញ​ឱ្យ​ខ្មែរ​ក្រហម​វាយ​ប្រហារ​ទៅ​លើ​វៀតណាម​នៅ​តាម​ព្រំដែន​ផ្នែក​ខាង​ត្បូង ហើយ​នេះ​ក៏​ជា​ការ​យល់​ឃើញ​របស់​លោក ហ៊ុន សែន និង​លោក ហេង សំរិន ដែរ ដែល​ខ្ញុំ​បាន​ជួប​ញឹកញាប់។​ ពួក​គាត់​ប្រាប់​ខ្ញុំ​ថា ចិន​បាន​ប្រើប្រាស់​ខ្មែរ​ក្រហម​ជា​ឧបករណ៍ ដើម្បី​បញ្ឆេះ​សង្គ្រាម​ជាមួយ​វៀតណាម ដើម្បី​ធ្វើ​ឱ្យ​វៀតណាម​ចុះ​ទន់​ខ្សោយ។  ពេលនោះ ចិនដឹងថា វៀតណាម​ខាង​ត្បូង​ដែល​ទើប​ត្រូវ​បាន​រំដោះ​នោះ មាន​បញ្ហា​ជា​មួយ​វៀតណាម​ខាង​ជើង ដូច្នេះ​ទើប​ចិន​ឆក់​ឱកាស​ពន្យុះ​វៀតណាម​ខាង​ត្បូង ឱ្យ​ងើប​បះបោរ​ប្រឆាំង​រដ្ឋាភិបាល​វៀតណាម​ថ្មី ពីព្រោះ​ចិន​ដឹង​ថា វៀតណាម​ខាង​ត្បូង​ស្អប់​វៀតណាម​កុម្មុយនិស្ត» 

លោក ប៊ុយ ទីន បន្ថែម​ថា នៅ​ថ្ងៃ​ទី៧ មករា ឆ្នាំ១៩៧៩ ពេល​លោក​ចូល​មក​ដល់​ទីក្រុង​ភ្នំពេញ លោក​បាន​ចូល​ទៅ​ក្នុង​ស្ថានទូត​ចិន ដែល​នៅ​ទៅ​នោះ លោក​បាន​ប្រទះ​ឃើញ​ឯកសារ​ជា​ច្រើន​បង្ហាញ​ថា នៅ​កម្ពុជា​ក្នុង​សម័យ​ខ្មែរក្រហម មាន​វត្តមាន​ទីប្រឹក្សា​ចិន ទាំង​យោធា ទាំង​ស៊ីវិល​ប្រមាណ ៧ពាន់​នាក់ (៧០.០០០)។

តើ​ចិន​ជា​អ្នក​គាំទ្រ​ខ្មែរក្រហម​នៅ​ក្នុង​របប​កម្ពុជា​ប្រជាធិបតេយ្យ ពន្យុះ​ឱ្យ​​ខ្មែរក្រហម​វាយ​ប្រហារ​ទៅ​លើ​វៀតណាម​នៅ​ពេល​នោះ​មែន​ឬ​​ទេ?

ផ្ទុយ​ពី​ការ​អះអាង​របស់​លោក ប៊ុយ ទីន ដែល​ថា ចិន​ជា​អ្នក​ពន្យុះ​ខ្មែរ​ក្រហម​ឱ្យ​វាយ​ប្រហារ​វៀតណាម​នោះ បណ្ឌិត ក្រែក អិចជេសិន (Craig Etcheson) ដែល​ជា​អតីត​ប្រធាន​ក្រុម​ស៊ើប​អង្កេត​នៃ​ការិយាល័យ​សហ​ព្រះរាជអាជ្ញា របស់​សាលា​ក្តី​ខ្មែរ​ក្រហម​និយាយ​ថា ការ​វាយ​ប្រហារ​របស់​ខ្មែរក្រហម​ទៅ​លើ​ទឹក​ដី​វៀតណាម គឺ​កើត​ចេញ​ពី​ខ្មែរ​ក្រហម​ខ្លួន​ឯង៖ «ដើម​ហេតុ​ដែល​ខ្មែរ​ក្រហម​វាយ​ប្រហារ​ទៅ​លើ​វៀតណាម គឺ​អាច​កើត​ចេញ​ពី​ភាព​សង្ស័យ​របស់​ខ្មែរ​ក្រហម​ទៅ​លើ​វៀតណាម និង​ការ​ស្អប់​ខ្ពើម​របស់ ប៉ុល ពត និង នួន ជា ទៅ​លើ​វៀតណាម ជា​ជាង​ការ​លូក​ដៃ​ជ្រៀតជ្រែក​របស់​ជន​បរទេស»

ចំណែក​លោក ស្ទីវ ហេដឌ័រ (Steve Heder) អ្នក​ជំនាញ​រឿងរ៉ាវ​ខ្មែរ​ក្រហម​មួយ​រូប​ទៀត ក៏​មិន​យល់​ស្រប​ជា​មួយ​លោក ប៊ុយ ទីន ដែរ។ លោក​ប្រាប់​អាស៊ី​សេរី តាម​សារ email ថា លោក ប៊ុយ ទីន អ្នក​កាសែត​កងទ័ព​ប្រជាជន​វៀតណាម​រូប​នោះ គឺ​តែងតែ​ឃោសនា​ប្រឆាំង​សាធារណរដ្ឋ​ប្រជាមានិត​ចិន។ លោក​ថា គ្មាន​ភស្តុតាង​ណា​មួយ​បញ្ជាក់​ថា ចិន​ជា​អ្នក​ជំរុញ​ឱ្យ​ខ្មែរ​ក្រហម​វាយ​ប្រហារ​ទៅ​លើ​វៀតណាម​នោះ​ទេ។ មិនតែប៉ុណ្ណោះលោកថា ក្នុង​អំឡុង​ពេល​នោះ ចិន​ថែម​ទាំង​បាន​បញ្ជូន​អ្នកស្រី តេង យិងចៅ (Deng Yingchao) ភរិយា​របស់​នាយក​រដ្ឋមន្ត្រី​ចិន លោក ជូ អេងឡាយ ឱ្យ​ទៅ​កម្ពុជា នៅ​ដើម​ឆ្នាំ១៩៧៨ ដើម្បី​បញ្ចុះបញ្ចូល ប៉ុល ពត និង នួន ជា ឱ្យ​អត់ធ្មត់​ជាមួយ​វៀតណាម ទៀត​ផង ប៉ុន្តែប៉ុល ពត និង នួន ជា មិន​បាន​ស្តាប់​ឡើយ។

ទោះ​ជា​យ៉ាង​ណា សម្រាប់​នាយក​ផ្នែក​ភាសា​ចិន​នៃ​អង្គការ​សិទ្ធិ​មនុស្ស យូមែន រ៉ៃត៍ វ៉ច្ឆ (HRW) អ្នកស្រី សូហ្វី រីច្ឆាដសុន (Sophie Richardson) វិញ បើ​ទោះ​ជា គ្មាន​ភស្តុតាង​ជាក់លាក់​បញ្ជាក់​ថា ចិន​បាន​ជំរុញ​ឱ្យ​ខ្មែរ​ក្រហម​វាយ​ប្រហារ​វៀតណាម​ក៏​ដោយ ក៏​នៅ​អំឡុង​ពេល​នោះ ចិន​បាន​ផ្តល់​ជំនួយ​ជា​អាវុធ​យុទ្ធភណ្ឌ​ជា​ច្រើន និង​ទីប្រឹក្សា​ផ្នែក​យោធា​ និង​ស៊ីវិល​ជា​ច្រើន​ពាន់​នាក់​ដល់​របប​ខ្មែរ​ក្រហម​ដែរ។

នៅថ្ងៃទី១ ខែឧសភា ឆ្នាំ១៩៧៥ ពោល​គឺ ពីរ​សប្ដាហ៍​ក្រោយ​រំដោះ​បាន​ទីក្រុង​ភ្នំពេញ ខណៈ​កាណុង​កាំភ្លើង​នៅ​មិន​ទាន់​បាត់​ឈ្ងៀម​ក្លិន​រំសេវ​ផង កងទ័ព​ខ្មែរ​ក្រហម​បាន​ចាប់​ផ្ដើម​វាយ​លុក​កោះ​ត្រល់។ កោះ​ត្រល់ ដែល​វៀតណាម​ហៅ​ថា កោះ​ភូកុក (Phú Quốc) គឺ​ជា​អតីត​ទឹក​ដី​ខ្មែរ តែ​ត្រូវ​បាន​បារាំង​ប្រគល់​ឱ្យ​វៀតណាម​កាន់កាប់​ជា​ផ្លូវ​ការ​នៅ​ឆ្នាំ១៩៥៤។ ថ្វី​ដ្បិត​តែ​កងទ័ព​ខ្មែរក្រហម​ដណ្តើម​កាន់កាប់​កោះ​ត្រល់​បាន​មួយ​រយៈ​ពេល​ខ្លី​មែន តែ​វៀតណាម​វាយ​ដណ្ដើម​យក​ទៅ​វិញ​បាន​ភ្លាម និង​វាយ​បង្ក្រាប​កងទ័ព​ខ្មែរ​ក្រហម​ស្លាប់​គរ​ជើង​គ្នា។ បន្ទាប់​ពី​នោះ​មក សង្គ្រាម​រវាង​ខ្មែរ​ក្រហម និង​វៀតណាម​នៅ​តាម​ព្រំដែន និង​ចូល​ក្នុង​ទឹក​ដី​នៃ​ប្រទេស​ទាំង​ពីរ ក៏​ចេះ​តែ​បន្ត​កើត​មាន​ជា​ហូរហែ​រហូត​ដល់​មេ​ដឹក​នាំ​វៀតណាម​សម្រេច​ចិត្ត​ផ្ដួល​រំលំ​មេ​ដឹក​នាំ​ខ្មែរ​ក្រហម ប៉ុល ពត ពី​អំណាច។

លោក ប៊ុយ ទីន បញ្ជាក់​ថា ទង្វើ​ឈ្លានពាន​របស់​ខ្មែរ​ក្រហម ប៉ុល ពត ទៅ​ក្នុង​ទឹក​ដី​វៀតណាម ធ្វើ​ឱ្យ​មេ​ដឹក​នាំ​វៀតណាម​ទ្រាំ​លែង​បាន ហើយ​យល់​ថា ខ្លួន​មាន​ហេតុផល​សម​ស្រប ដើម្បី​លើក​ទ័ព​ចូល​ប្រទេស​កម្ពុជា ដោយ​គិត​ថា បើ​មិន​ធ្វើ​នៅ​ចុងឆ្នាំ១៩៧៨ នោះ​ទេ គឺ​នឹង​គ្មាន​ឱកាស​ទៀត​ឡើយ៖ «នៅ​ចុង​ឆ្នាំ១៩៧៨ ក្រោយ​ពី​មាន​ការ​ពិភាក្សា​គ្នា​យ៉ាង​យូរ​មក ការិយាល័យ​នយោបាយ​នៃ​ទីក្រុង​ហាណូយ បាន​សម្រេច​ចិត្ត​រៀបចំ​ប្រមូល​ផ្តុំ​កងទ័ព ដើម្បី​ឈ្លានពាន​កម្ពុជា។ មេ​ដឹក​នាំ​វៀតណាម​គិត​ថា សង្គ្រាម​នេះ​នឹង​ត្រូវ​ចំណាយ​ពេល​វេលា​ពី ១ឆ្នាំ ទៅ ២ឆ្នាំ ដើម្បី​យក​ជ័យជម្នះ​លើ​ខ្មែរក្រហម ពីព្រោះ​ខ្មែរ​ក្រហម​មិន​មែន​ជា​កងទ័ព​ទន់​ខ្សោយ​នោះ​ទេ ហើយ​នៅ​ពី​ក្រោយ​ខ្មែរ​ក្រហម គឺ​មាន​ចិន​ទៀត​ផង។ ក៏​ប៉ុន្តែ នៅ​ពេល​កងទ័ព​វៀតណាម​ចាប់​ផ្ដើម​វាយ​ប្រហារ​ចូល​ប្រទេស​កម្ពុជា នៅ​ថ្ងៃទី ២៥ ខែធ្នូ ឆ្នាំ១៩៧៨ ដែល​ចំ​ថ្ងៃ​បុណ្យ​ណូអែល​នោះ អ្វី​ដែល​គួរ​ឱ្យ​ភ្ញាក់​ផ្អើល គឺ​ថា បន្ទាប់​ពី​កងទ័ព​វៀតណាម​វាយ​ឆ្លង​ផុត​ទី​ប្រជុំ​ជន​អ្នក​លឿង​ហើយ គឺ​ពុំ​ឃើញ​មាន​ការប្រយុទ្ធ​ទប់ទល់​ពី​កងទ័ព​ខ្មែរ​ក្រហម​ទៀត​ឡើយ»

តែ​ក្នុង​រយៈ​ពេល ១៣ថ្ងៃ​ប៉ុណ្ណោះ កងទ័ព​វៀតណាម​បាន​រុល​ទៅ​ដល់​ទីក្រុង​ភ្នំពេញ។ បើ​តាម​លោក ប៊ុយ ទីន ជ័យជម្នះ​របស់​វៀតណាម​យ៉ាង​ឆាប់​រហ័ស​ដោយ​មិន​រំពឹង​ទុក​នេះ ក៏​ដោយសារ​ខ្មែរ​ក្រហម​បាន​ដក​កម្លាំង​ទ័ព​ភាគ​ច្រើន​ទៅ​ត្រៀម​ប្រយុទ្ធ​ទប់ទល់​ជាមួយ​វៀតណាម​នៅ​តាម​ព្រំដែន ធ្វើ​ឱ្យ​ចំនួន​កងទ័ព​នៅ​សល់​តិចតួច នៅ​ខាង​ផ្ទៃក្នុង​ប្រទេស។ ហេតុ​ដូច​នេះ នៅ​ពេល​កងទ័ព​វៀតណាម​វាយ​ទម្លុះ​ខ្សែ​ត្រៀម​ព្រំដែន​បាន​ហើយ ធ្វើ​ឱ្យ​ការ​រុល​សម្រុក​ទៅ​មុខ​ឆ្ពោះ​ទៅ​ទីក្រុង​ភ្នំពេញ​របស់​ពួក​គេ ជួប​ឧបសគ្គ​តិចតួច​ប៉ុណ្ណោះ។

អតីត​អ្នក​ឆ្លើយឆ្លង​ព័ត៌មាន​របស់​ទស្សនាវដ្ដី​សេដ្ឋកិច្ច​ចុង​បូព៌ា (Far Eastern Economic Review Magazine) លោក ណេត ថេយើ (Nate Thayer) ដែល​ជា​អ្នក​កាសែត​បរទេស​ទី២ ដែល​បាន​សម្ភាស ប៉ុល ពត នៅ​ខែ​តុលា ឆ្នាំ១៩៩៧ នៅ​ស្រុក​អន្លង់វែង​នោះ បា្រប់​អាស៊ី​សេរី​ថា គោល​នយោបាយ​របស់ ប៉ុល ពត និង​ការ​បែកបាក់​ផ្ទៃក្នុង​ខ្មែរ​ក្រហម​ខ្លួន​ឯង បាន​បើក​ឱកាស​ឱ្យ​កងទ័ព​បរទេស​ចូល​ឈ្លានពាន​កម្ពុជា​បាន​យ៉ាង​ងាយ​ស្រួល៖ «ការ​ពិត​ទៅ ការ​ផ្ដោត​ចិត្ត​ទាំង​ស្រុង​របស់ ប៉ុល ពត ទៅ​លើ​ការ​លេប​យក​ប្រទេស​កម្ពុជា​ដោយ​វៀតណាម ជា​ហេតុ​ធ្វើ​ឱ្យ​គាត់​បង្កើត​គោល​នយោបាយ​មួយ​ចំនួន ដែល​បណ្ដាល​ឱ្យ​មាន​ទុក្ខ​វេទនា​យ៉ាង​ខ្លាំង​នៅ​ក្នុង​ប្រទេស​កម្ពុជា និង​ធ្វើ​ឱ្យ​កម្ពុជា​ធ្លាក់​ចុះ​ទន់​ខ្សោយ ជា​ហេតុ​បង្ក​ភាព​ងាយ​ស្រួល​ដល់​ការ​ឈ្លានពាន​របស់​កងទ័ព​វៀតណាម»។

ទោះ​ជា​យ៉ាង​ណា ប៉ុល ពត បាន​ព្យាយាម​បក​ស្រាយ​ប្រាប់​លោក ណេត ថេយើ ខណៈ​ស្ថិត​ក្រោម​ការ​ឃុំ​ខ្លួន​របស់​មេ​ខ្មែរ​ក្រហម តា ម៉ុក នៅ​ស្រុក​អន្លង់វែង​ថា នៅ​ក្នុង​របប​កម្ពុជា​ប្រជាធិបតេយ្យ ការ​ចរចា ដើម្បី​បញ្ចប់​ជម្លោះ​ព្រំដែន​ជាមួយ​វៀតណាម ធ្វើ​ឡើង​ជា​ហូរហែ ប៉ុន្តែ​ស្រប​ពេល​គ្នា​នោះ កងទ័ព​វៀតណាម ក៏​ចេះ​តែ​បង្ក​ជម្លោះ​តាម​ព្រំដែន​ជា​បន្ត​បន្ទាប់​ដែរ។ ប៉ុល ពត ថែម​ទាំង​អះអាង​ថា កម្ពុជា​ជា​ប្រទេស​តូច មិន​ហ៊ាន​ថ្លើម​ធំ​ទៅ​ឈ្លានពាន​វៀតណាម ដែល​ជា​ប្រទេស​ធំ​នោះ​ទេ ហើយ​ថា ផ្ទុយ​ទៅ​វិញ គឺ​វៀតណាម​មាន​មហិច្ឆតា​យក​កម្ពុជា និង​ឡាវ ធ្វើ​ជា​ប្រទេស​ក្រោម​រណប​ខ្លួន៖ «បក្ស​កុម្មុយនិស្ត​ឥណ្ឌូចិន ក្រោយ​មក​វា​ចែក​ជា​បក្ស​បី បក្ស​ពលករ​វៀតណាម បក្ស​ប្រជាជន​បដិវត្តន៍​ខ្មែរ និង​បក្ស​ប្រជាជន​បដិវត្តន៍​ឡាវ គ្រាន់​តែ​ចែក​ជា​បី​ទេ ប៉ុន្តែ​យុទ្ធសាស្ត្រ​តែ​មួយ ប្រទេស​តែ​មួយ ពាក្យ​យួន​ថា បី​បង​ប្អូន យើង​ថា បង​ប្អូន​បី​នាក់។ វា​គឺ​ជា​យុទ្ធសាស្ត្រ​ការពារ​ដែន​ដី​វា។ ខ្ញុំ​យល់​ថា ចុះ​មក​យក​ដែនដី​កម្ពុជា​ទៅ​ការពារ​យួន យើង​មិន​ត្រូវ​ការពារ​ដី​យើង? ទី១។ ទី២ ម៉្យាង​ទៀត វា​ថា យក​បរិវេណ​ដី​ពីព្រោះ​មនុស្ស​វា​ច្រើន.. គេ​មិន​ចង់​រស់​ដែរ? តើ​ខ្មែរ​មិន​ចង់​រស់? ដូច្នេះ ខួរ​ក្បាល​ខ្ញុំ គឺ (ធ្វើ​ម៉េច) មិន​ឱ្យ​យួន​យក​ខ្មែរ​បាន»។

Pol_Pot_tiral_072597_Nate_Thayer.jpg
ប៉ុល ពត ឬ សាឡុត ស ជា​លេខា​បក្ស​កុម្មុយនិស្ត​កម្ពុជា និង​ជា​នាយក​រដ្ឋ​មន្ត្រី​នៃ​របប​កម្ពុជា​ប្រជាធិបតេយ្យ ពី​ឆ្នាំ១៩៧៥ ដល់​ឆ្នាំ១៩៧៩ ត្រូវ​បាន​មេទ័ព​ខ្មែរក្រហម​ឈ្មោះ តា ម៉ុក យក​ទៅ​កាត់​ទោស​ក្បត់ នៅ​ស្រុក​អន្លង់​វែង ខេត្ត​ឧត្ដរ​មានជ័យ កាល​ពី​ថ្ងៃ​ទី២៥ ខែ​កក្កដា ឆ្នាំ១៩៩៧។ រូប៖ Nate Thayer

ទោះ​ជា​យ៉ាង​ណា អ្នក​ជំនាញ និង​ជា​អ្នក​និពន្ធ​សៀវភៅ​អំពី​រឿងរ៉ាវ​ខ្មែរ​ក្រហម លោក ស្ទីវ ហេដឌ័រ (Steve Heder) អះអាង​ថា ការ​វាយ​ប្រហារ​របស់​កងទ័ព​ខ្មែរ​ក្រហម​ឆ្លង​ដែន​ចូល​ទៅ​ក្នុង​ទឹក​ដី​វៀតណាម នៅ​ចុង​ឆ្នាំ​១៩៧៧ និង ដើម​ឆ្នាំ១៩៧៨ ធ្វើ​ឱ្យ​វៀតណាម​អស់​ភាព​អត់ធ្មត់ ហើយ​លើក​ទ័ព​វាយ​បក​លុកលុយ​ចូល​កម្ពុជា។

តើ​ហេតុ​អ្វី​បាន​ជា​មេ​ដឹក​នាំ​វៀតណាម​រើស​យក​ថ្ងៃ​ទី២៥ ខែ​ធ្នូ ឆ្នាំ១៩៧៨ ជា​ថ្ងៃ​លើក​ទ័ព​ជាង​ប្រមាណ ១៥ម៉ឺន​នាក់​វាយ​លុកលុយ​ចូល​កម្ពុជា?

ការ​ជ្រើសរើស​យក​ថ្ងៃ​ទី២៥ ខែធ្នូ ឆ្នាំ១៩៧៨ របស់​មេ​ដឹក​នាំ​វៀតណាម ដើម្បី​វាយ​លុក​ចូល​ប្រទេស​កម្ពុជា ពី​ព្រោះ​ពេល​នោះ គឺ​ចំ​ពេល​មេ​ដឹក​នាំ​បក្ស​កុម្មុយនិស្ត​ចិន ដែល​គាំទ្រ​ខ្មែរ​ក្រហម កំពុង​ជាប់​រវល់​ទាស់ទែង​ខ្វែង​គំនិត​គ្នា ស្រប​ពេល​មេ​ដឹក​នាំ​កំពូល​ចិន​លោក តេង ស៊ាវពិង (Teng Xiao Ping) កំពុង​ព្យាយាម​ធ្វើ​ប្រក្រតីភាវូបនីយកម្ម​ជាមួយ​សហរដ្ឋ​អាមេរិក​ឡើង​វិញ ។ ហើយ​ហេតុផល​មួយ​ទៀត ថ្ងៃទី២៥ ធ្នូ គឺ​ចំ​ពេល​ពួក​ប្រទេស​ប្លុក​សេរី​កំពុង​ឈប់​សម្រាក​បុណ្យ​ណូអែល និង​ចូល​ឆ្នាំ​សកល។ ប្រហែល​ជា​វៀតណាម​គិត​ថា ព្រឹត្តិការណ៍​ទាំង​ពី​នេះ អាច​ទាញ​អារម្មណ៍​របស់​ពិលោក​ចេញ​ពី​ការ​ឈ្លានពាន​កម្ពុជា​របស់​ខ្លួន។

មួយ​ថ្ងៃ​ក្រោយ​ពី​ដណ្ដើម​បាន​ទីក្រុង​ភ្នំពេញ​ពី​ខ្មែរ​ក្រហម អាជ្ញាធរ​ក្រុង​ហាណូយ​បាន​ជួយ​បង្កើត​ជូន​កម្ពុជា​នូវ​រដ្ឋាភិបាល​ថ្មី​សន្លាង​មួយ នៅ​ថ្ងៃ​ទី៨ ខែមករា ឆ្នាំ១៩៧៩ ដាក់​ឈ្មោះ​ថា «សាធារណរដ្ឋ​ប្រជាមានិត​កម្ពុជា» ដោយ​មាន​លោក ហេង សំរិន ជា​ប្រមុខ​រដ្ឋ។

ជិត​ប្រាំ​បី​ខែ​បន្ទាប់​មក គឺ​នៅ​ថ្ងៃ​ទី១៥ ខែ​សីហា ឆ្នាំ១៩៧៩ តុលាការ​ប្រជាជន​បដិវត្តន៍​នៃ​របប​សាធារណរដ្ឋ​ប្រជាមានិត​កម្ពុជា បាន​សម្រេច​បើក​សវនាការ​កំបាំង​មុខ​កាត់​ទោស ប៉ុល ពល និង​អៀង សារី ប្រហារជីវិត ពី​បទ​ប្រល័យ​ពូជ​សាសន៍។

តើ​ពេលនោះ​ហេតុ​អ្វី​បាន​កាត់​ទោស​មេ​ខ្មែរ​ក្រហម​​តែ​ពីរ​នាក់​នោះ?

ការ​ផ្ដន្ទាទោស​មេ​ខ្មែរ​ក្រហម​តែ​ពីរ​រូប​នេះ ត្រូវ​បាន​អ្នក​សង្កេត​ការណ៍​មើល​ឃើញ​ថា គឺ​ជា​ឈុត​ឆាក​នយោបាយ​របស់​អាជ្ញាធរ​ក្រុង​ហាណូយ ក្នុង​បំណង​បំបែក​បំបាក់​ក្រុម​មេ​ដឹក​នាំ​ខ្មែរ​ក្រហម ដែល​កំពុង​តស៊ូ​ប្រដាប់​អាវុធ នៅ​ឯ​ព្រំដែន​កម្ពុជា-ថៃ។ ការ​ផ្ដន្ទាទោស​ខ្លះ អត់​ខ្លះ​នេះ គឺ​ក្នុង​បំណង​ទុក​ឱកាស​ឱ្យ​មេ​ដឹក​នាំ​ខ្មែរក្រហម​ផ្សេង​ទៀត ដូចជា នួន ជា ខៀវ សំផន ជា​ដើម ចុះ​ចូល​ជាមួយ​រដ្ឋាភិបាល​ថ្មី។

នេះ​ក៏​ជា​សក្ខីកម្ម​មួយ​ទៀត ដែល​អាច​បញ្ជាក់​ពី​គោល​បំណង​ចម្បង​នៃ​ការ​លុកលុយ​របស់​កងទ័ព​វៀតណាម​មក​លើ​កម្ពុជា គឺ​ដើម្បី​ផ្លាស់​ប្ដូរ​មេ​ដឹក​នាំ​ខ្មែរ​ក្រហម​ណា ដែល​អមិត្ត និង​មិន​រណប​វៀតណាម​តែ​ប៉ុណ្ណោះ មិន​មែន​ក្នុង​គោល​បំណង​មនុស្សធម៌​នោះ​ទេ។ ទោះ​ជា​យ៉ាង​ណា​ក៏​ដោយ វត្តមាន​កងទ័ព​វៀតណាម​នៅ​លើ​ទឹក​ដី​កម្ពុជា​នៅ​ពេល​នោះ ដែល​អាច​បញ្ចប់​ភាព​ឃោរឃៅ​របស់​ខ្មែរ​ក្រហម​ទៅ​លើ​ប្រជាពលរដ្ឋ​ខ្លួន​ផង​នោះ ត្រូវ​អ្នក​ស្រាវជ្រាវ​មើល​ឃើញ​ថា គឺ​ជា​សមិទ្ធផល​មិន​បាន​ត្រៀម​ទុក​របស់​មេ​ដឹក​នាំ​វៀតណាម។ គឺ​ប្រហែល​ផ្អែក​លើ​ហេតុផល​ទាំង​នេះ​ហើយ បាន​ជា​មនុស្ស​មួយ​ចំនួន នៅ​តែ​មិន​ទទួល​ស្គាល់​ថ្ងៃ ៧មករា ឆ្នាំ១៩៧៩ ថា ជា​ថ្ងៃ​ដែល​វៀតណាម ជួយ​រំដោះ​ប្រជាជន​កម្ពុជា ហើយ​នៅ​តែ​ចាត់​ទុក​ថា នោះ​ជា​ថ្ងៃ​ដែល​វៀតណាម​ចូល​ឈ្លានពាន​កម្ពុជា​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Related Articles

4 Responses to "ទស្សនៈ​ផ្សេង​គ្នា អំពី​គោល​បំណង​នៃ​ការ​ឈ្លានពាន​របស់​កងទ័ព​វៀតណាម​មក​លើ​ប្រទេស​កម្ពុជា កាល​ពី ៤២ឆ្នាំ​មុន"

  1. Anonymous says:

    Veitname is the robbers and the killers’ . 1979 is the illegal invasion and rob everything from cambodia’ so the robbers must pay back ‘. Veitname should accompany with U N or international troops but 1979 is the illegal invasion without permission from U N . Remember ‘ 7 january is the illegal invasion of veitname to cambodia ‘ No condition or what so ever ‘ veitname are the aggressors ,the killers, the robbers and continue till now and force their dogs to gave them Tral Island ‘ . Remember Tral Island is belong to cambodia ‘.God will punished the crooks veitname politicians ‘

  2. so socheath says:

    បើគេឈ្លានពាន មិនមែនអាពូជសំផឹងអ្ហែងអស់ហ្នឹង រស់ធំធាត់
    មកដល់សព្វថ្ងៃនេះទេ អាពូជឆ្កែ ។
    អ្ហែងត្រូវចាំ ។ វៀតណាមបន្តនៅកម្ពុជាបន្តទៀត ក្រោយថ្ងៃ៧ មករា ១៩៧៩
    វាជាសំណូមពរចាំបាច់របស់ប្រជាជនកម្ពុជា ឲ្យនៅជួយការពារ កុំឲ្យ
    របបប្រល័យពូជសាន៍វិលត្រឡប់មកវិញ តែប៉ុណ្ណោះ ។ ព្រោះកម្លាំងទ័ពកម្ពុជា
    ពេលនោះគ្មានលទ្ធភាពគ្រប់គ្រាន់ ក្នុងការទប់ទល់ការវិលត្រឡប់របស់
    របបខ្មែរក្រហមប៉ុលពតនោះទេ ។
    យ៉ាប់មែន ពួកអចុយម៉្រាយ !

  3. Anonymous says:

    WELL …I just wanted to say if SO SOCHEATH true Khmer he better have known where was his country’s border . but if he is a Vietnamese he must saying >>OH CHOYEIY we gain more land from AH .CHESSTU KAMPOUCHEA. I knew Cambodian like SO SOCHEATH is too good if you meet him in forest . for me I already think I will never be Cambodian again the reason I hated this nation . you can ask me why I hated this nation?? every one is AH CHESSTU but AH LNGOUNGTU VIETCONG just about take over their poor nation . I tell you all the truth my families now becoming half western right now only me and my wife is speaking Khmer the rest all AH CHESSTU in Cambodia can not even understanding. please continuous to live as a poor slave talking and speaking like animal that can only be the best

  4. Anonymous says:

    Veitcong germ so socheat’ veitname are the killers ,the robbers ‘ O K ‘ Why don’t they invited U N to come and controle after a year ?? Remember Parish Accord is the value of khmer resistances who spended a lot of life to kick Veitname out from cambodia ‘but even thought the dogs of hanoi are the worse khmer history ‘ they never respected Parish Accord ‘ they did the coup to grab the power and continue giving more to veitname ‘ so veitname politicians and their dogs are the real criminals who continue killing khmer people without respected international . God will punish the veitcong boss and veitcong dogs soon ‘

Leave a Reply

Submit Comment