កម្ពុជា-នយោបាយ
12/01/2021 – 07:22
ដោយ៖ វណ្ណ សុគន្ធា
RFI

កូនស្រី​លោក​ កឹម សុខា ​គឺ​កញ្ញា​ កឹម មនោវិទ្យា ​នៅ​ព្រឹក​ថ្ងៃ​អង្គារ​នេះ​ បាន​បង្ហើប​ឱ្យ​ដឹង​ថា​ ឪពុក​របស់​កញ្ញា​មាន​បំណង​ចង់​ដឹកនាំ​គណបក្ស​ប្រឆាំង​ ដើម្បី​ចូលរួម​ប្រកួតប្រជែង​ការ​បោះឆ្នោត​នៅ​ក្នុង​ឆ្នាំ​២០២២​ និង​ ឆ្នាំ​២០២៣​ខាង​មុខ​នេះ​។ ការ​លើក​ឡើង​នេះ​ គឺ​ស្រប​ពេល​លោក ​កឹម សុខា ​កំពុង​ជាប់​រឿង​ក្តីក្តាំ​នៅ​តុលាការ​ហើយ​ត្រូវ​បាន​ហាម​ឃាត់​សិទ្ធិ​នយោបាយ​ថែម​ទៀត​។ ប៉ុន្តែ​ កញ្ញា​ កឹម មនោវិទ្យា ​អះអាង​ថា​ អ្វីៗ​នឹង​អាច​ទៅ​រួច​ប្រសិន​បើ​អតីត​បក្ស​ប្រឆាំង​ និង​សហគមន៍​អន្តរជាតិ​បន្ត​ប្តេជ្ញា​ស្តារ​លទ្ធិ​ប្រជាធិបតេយ្យ​នៅ​ក្នុង​ប្រទេស​កម្ពុជា​។

គឺតាមរយៈបណ្តាញសង្គមធ្វីតទ័រ កញ្ញា កឹម មនោវិទ្យា កូនស្រីលោក កឹម សុខា បានរំលឹកពីការបង្រ្កាបទៅលើអតីតបក្សសង្រ្គោះជាតិ និងថ្នាក់ដឹកនាំបក្សនេះនៅក្នុងឆ្នាំ២០១៧ ដែលកញ្ញាហៅថា ជាសកម្មភាពប្រាសចាកពីរដ្ឋធម្មនុញ្ញ។ បើទោះជាបែបនេះក្តី ក៏កូនស្រីលោក កឹម សុខា រូបនេះបានគូសបញ្ជាក់ថាក៏បក្សប្រជាជនកម្ពុជាមិនអាចធ្វើឱ្យមូលដ្ឋានអតី​តបក្សប្រឆាំងចុះខ្សោយបានឡើយ។ កញ្ញា កឹម មនោវិទ្យា ក៏បានអះអាងពីការបរាជ័យរបស់បក្សកាន់អំណាចដែលបានព្យាយាមបង្ខំឱ្យមន្រ្តីអតីតបក្សប្រឆាំងចូលរួមបង្កើតឱ្យមានបក្សចម្រុះនៅក្នុងការបោះឆ្នោតឆ្នាំ២០១៨ផងដែរ។

បន្ថែមលើនេះ កញ្ញា កឹម មនោវិទ្យា ក៏លើកឡើងពីបំណងរបស់បក្សប្រជាជនកម្ពុជាដែលតែងតែចង់បង្កើតពហុបក្សនៅកម្ពុជា។ ត្រង់ចំណុងនេះ កញ្ញាគូសបញ្ជាក់ថា ការប៉ុនប៉ងនេះ គឺដោយសារបក្សកាន់អំណាចចាប់ផ្តើមមើលឃើញពីស្នាមប្រេះនៃអតីតបក្សប្រឆាំង។ បើតាមកូនស្រីលោក កឹម សុខា គណបក្សប្រជាជនកម្ពុជាសង្ឃឹមជាមួយពេលវេលា គឺបក្សកាន់អំណាចប្រហែលអាចជំរុញឱ្យមន្រ្តីថ្នាក់កណ្តាលនៃអតីតបក្សប្រឆាំងបោះបង់ចោលលោក កឹម សុខា ហើយអាចធ្វើឱ្យរូបលោកចុះខ្សោយតាមរយៈការវាយប្រហារនានាជាដើម។

ប៉ុន្តែសម្រាប់កញ្ញា កឹម មនោវិទ្យា គណបក្សប្រជាជនកម្ពុជាអាចព្យាយាមធ្វើបែបនេះបាន តែបើសិនអតីតបក្សប្រឆាំងរួមនឹងសហគមន៍អន្តរជាតិបន្តប្រកាន់ការប្តេជ្ញាចំពោះលទ្ធិប្រជាធិបតេយ្យកម្ពុជា នោះការព្យាយាមរបស់បក្សកាន់អំណាចនឹងបរាជ័យ។ មិនតែប៉ុណ្ណោះ កញ្ញាក៏បានបញ្ជាក់ដែរថា លោក កឹម សុខា នឹងមិនទៅណាឡើយ ហើយលោកមានបំណងចង់ចូលរួមប្រកួតប្រជែងការបោះឆ្នោតនៅក្នុងឆ្នាំ២០២២ និង ឆ្នាំ២០២៣ខាងមុខនេះ។

សូមបញ្ជាក់ថា នៅពេលនេះ លោក កឹម សុខា មិនអាចពាក់ព័ន្ធនឹងសកម្មភាពនយោបាយបានទេ ព្រោះបម្រាមរបស់តុលាការ។ តុលាការបានចោទប្រកាន់លោក កឹម សុខា ពីបទសន្ទិដ្ឋិភាពជាមួយបរទេសចង់ផ្តួលរំលំរដ្ឋាភិបាលកម្ពុជា។ តុលាការបានបើកសវនាការលើសំណុំរឿងរបស់លោកកាលពីខែមករាឆ្នាំ២០២០ ប៉ុន្តែបានផ្អាកទៅវិញនៅក្នុងខែមីនា ដោយសារតែការរីករាលដាលនៃជំងឺកូវីដ១៩នៅក្នុងប្រទេសកម្ពុជា។ ក្រុមមេធាវីលោក កឹម សុខា កាលពីខែមិថុនាបានស្នើសុំឱ្យតុលាការបន្តសវនាការលោកកឹម សុខាឡើងវិញ តែត្រូវរងការបដិសេធក្រោមហេតុផលបញ្ហាជំងឺកូវីដ១៩។ ក្រោយមក គឺកាលពីខែតុលា ឆ្នាំ២០២០ ក្រុមមេធាវីក៏បានស្នើសុំម្តងទៀតទៅកាន់តុលាការ ប៉ុន្តែមកដល់ពេលនេះ គឺមិនទាន់មានការឆ្លើយតបយ៉ាងណានៅឡើយទេ៕