ដោយ ខែ សុណង
2021-01-12
RFA
ស្ដាប់ ឬទាញយកសំឡេង
(ឆ្វេង) លោក ជុំ ពុទ្ធី កាលពីឆ្នាំ២០១៨ និងលោកស្រី ឆេន សុវណ្ណា ប្រពន្ធរបស់លោក ពេលចេញតវ៉ាទាមទារអាជ្ញាធរឱ្យដោះលែងប្ដីលោកស្រី កាលពីថ្ងៃទី៨ ខែមករា ឆ្នាំ២០២១។ រូប៖ ពលរដ្ឋ
សាច់ញាតិសកម្មជនគណបក្សសង្គ្រោះជាតិ ដែលកំពុងជាប់ឃុំនៅពន្ធនាគារព្រៃស ចូលសួរសុខទុក្ខប្ដីនិងឪពុករបស់ពួកគេនៅរសៀលថ្ងៃទី១២ មករា។ប្រពន្ធជនជាប់ឃុំឱ្យដឹងថា ប្ដីរបស់គាត់មានសភាពស្គមស្គាំងខុសប្រក្រតីដោយសារគ្មានអាហារហូបចុកគ្រប់គ្រាន់នៅក្នុងពន្ធនាគារ។ មន្ត្រីសង្គមស៊ីវិល លើកឡើងថា មន្ត្រីពន្ធនាគារគួរតែដោះស្រាយរឿងនេះជូនពួកគាត់ជាបន្ទាន់ ដើម្បីកុំឱ្យប៉ះពាល់ដល់សុខភាពជនជាប់ឃុំ។
ប្រពន្ធរបស់លេខាយុវជនគណបក្សសង្គ្រោះជាតិខេត្តស្វាយរៀងលោក ជុំ ពុទ្ធី គឺលោកស្រី ឆេន សុវណ្ណា ប្រាប់អាស៊ីសេរីនៅរសៀលថ្ងៃទី១២ មករាថា ប្ដីរបស់លោកស្រីធ្លាក់ខ្លួនស្គមស្គាំងខុសពីធម្មតា បណ្ដាលមកពីការហូបចុកអាហារមិនគ្រាន់គ្រាន់នៅក្នុងពន្ធនាគារ។ ស្ត្រីមានផ្ទៃពោះ ៨ខែរូបនេះបន្តថា លោកស្រីមានជីវភាពក្រីក្រគ្មានប្រាក់ផ្ដល់ឱ្យប្ដីចាយវាយក្នុងពន្ធនាគារនោះឡើយ។លោកស្រីបន្ថែមថា ប្ដីរបស់គាត់ត្អូញត្អែរថា មួយរយៈនេះអ្នកជាប់ឃុំដោយមូលហេតុនយោបាយ និងសង្គមនៅក្នុងពន្ធនាគារព្រៃស រងាដេកមិនសូវលក់នោះទេ៖ «ខ្ញុំមានអារម្មណ៍ថា អាណិតគាត់ខ្លាំង ព្រោះកាលតែយើងនិយាយពីសុខភាពពីបញ្ហាគាត់មិនសូវហូបបាយ ហើយគាត់រងាគាត់ហូតទឹកភ្នែក។ព្រោះខ្ញុំបានប្រាប់គាត់ថា ថ្ងៃនេះមកលើកចុងក្រោយហើយអត់បានមកទៀតទេ ព្រោះខ្ញុំចាំតែថ្ងៃសម្រាលកូន ដល់ពេលអីចឹងទៅគាត់មានទឹកភ្នែករលីងរលោង។តាំងពីគាត់ជាប់ពន្ធនាគារមកអត់មានអ្នកណាមកក្រៅពីខ្ញុំទេ ដែលមកមើលគាត់នោះ។ឥឡូវខ្ញុំមកមើលគាត់នេះជាថ្ងៃចុងក្រោយខ្ញុំលែងបានមកមើលគាត់ហើយ មិនដឹងថ្ងៃណាខែណាទេ ព្រោះខ្ញុំចាំតែថ្ងៃឆ្លងទន្លេ»។
ប្រពន្ធ និងកូនរបស់សកម្មជនគណបក្សប្រឆាំង ៧នាក់បានចូលរួមសួរសុខទុក្ខប្ដីនិងឪពុករបស់ពួកគេនៅពន្ធនាគារព្រៃសនៅរសៀលថ្ងៃទី១២ មករា។
ទាក់ទងនឹងបញ្ហានេះអ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃ លោក នុត សាវនា ប្រាប់អាស៊ីសេរីថា ពន្ធនាគារព្រៃសមានរបបអាហារហូបចុកគ្រប់គ្រាន់ និងមានរសជាតិអាចទទួលយកបាន។ លោកប្រាប់ថា មន្ត្រីពន្ធនាគារ តែងយកចិត្តទុកដាក់ពីសុខភាពរបស់ជនជាប់ឃុំស្មើៗ គ្នា។ លោកទទួលស្គាល់ថា មួយរយៈនេះអាកាសធាតុប្រែប្រួលឆាប់រហ័ស ដែលមិនអាចត្រៀមភួយចែកជនជាប់ឃុំទាន់ពេលវេលា៖ «បើថា អ្នកណាដែលគាត់គេងអត់បានដោយសារអាកាសធាតុត្រជាក់ពេកហ្នឹង យើងនឹងខិតខំព្យាយាមផ្ដល់ជូន។ យើងអត់មានឱ្យគាត់វេទនាដល់ថ្នាក់ហ្នឹងទេ តែសំខាន់ឱ្យគាត់ប្រាប់ទៅមន្ត្រីយើងឱ្យគាត់បានដឹងផង ព្រោះវាខុសពីឆ្នាំមុនៗ ដូចខ្ញុំជម្រាបអីចឹង មកភ្លាមៗ អាកាសធាតុឥឡូវមកដល់ខែមករាហើយ ស្រាប់តែខ្យល់ត្រជាក់មកអ្នកណាទៅដឹងលោក»។
ទោះជាយ៉ាងណាប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) លោក នី សុខា យល់ថា រឿងនេះបានកើតឡើងជាច្រើនឆ្នាំមកហើយ ពុំមែនទើបតែកើតមានក្នុងពេលនេះទេ។ លោកប្រាប់ថា កាលពីលោកជាប់ពន្ធនាគារ អាហារហូបចុកមិនគ្រប់គ្រាន់ និងគ្មានរស់ជាតិនោះឡើយ។ លោកបន្តថា ជនជាប់ឃុំដែលមានជីវភាពក្រីក្រហូបអាហារនៅក្នុងពន្ធនាគារ ចំណែកឯអ្នកជាប់ឃុំដែលមានជីវភាពធូរធារវិញ ពួកគាត់ទិញចំណីអាហារនៅក្នុងពន្ធនាគារហូបបន្ថែមទើបអាចរស់នៅបាន។ មន្ត្រីសង្គមស៊ីវិលរូបនេះ បញ្ជាក់ថា ក្រសួងមហាផ្ទៃគួរតែដោះស្រាយបញ្ហានេះជូនជនជាប់ឃុំជាបន្ទាន់ ដើម្បីកុំឱ្យប៉ះពាល់ដល់សុខភាពរបស់ពួកគាត់នៅពេលខាងមុខ៖ «ហើយជាទូទៅនៅពន្ធនាគារហ្នឹងមានការរឹតបន្តឹងទៀត នៅពេលដែលយកសម្ភារៈចូលហ្នឹង។ មានការបន្ធូរបន្ថយខ្លះ ចំពោះអ្នកដែលគេមានលទ្ធភាព អ្នកដែលគេមានមុខមានមាត់អីចឹងទៅ ដូចជាអាជ្ញាធរដែលធ្លាប់ធ្វើការខាងក្រៅហើយ គាត់ទៅជាប់ពន្ធនាគារ ឬអ្នកឧកញ៉ា អាហ្នឹងគេមិនប្រើទេសម្ភារៈនៅក្នុងពន្ធនាគារហ្នឹងនោះ កុំថាឡើយដល់ភួយដល់មុង សូម្បីខោអាវហ្នឹង ក៏គេមិនចង់ប្រើខោអាវពន្ធនាគារហ្នឹងដែរ។ អ្នកខ្លះទៅកាត់ខោអាវផ្សេងពីខោអាវហ្នឹងទៅទៀត»។
ក្រុមស្ត្រីដែលជាប្រពន្ធ និងកូនរបស់ជនជាប់ឃុំទាំងនោះ ចាត់ទុកការចាប់ឃុំខ្លួននេះថា ជារឿងអយុត្តិធម៌ធ្វើបាបប្រជាពលរដ្ឋទន់ខ្សោយ ដើម្បីផ្គាប់ចិត្តលោក ហ៊ុន សែន។ ក្រុមស្ត្រីទាំងនោះប្រកាន់ជំហរថា ពួកគាត់នឹងប្រមូលផ្ដុំគ្នាតវ៉ាឱ្យមានយុត្តិធម៌សង្គមនៅចុងសប្ដាហ៍នេះបន្តទៀត និងធ្វើសកម្មភាពរហូតដល់មានដំណោះស្រាយ។
ក្រុមអ្នកសង្កេតការណ៍ បានចាត់ទុកករណីទាំងនេះថា ជារឿងនយោបាយ ដើម្បីបំបិទសិទ្ធិពលរដ្ឋ និងកម្ចាត់កម្លាំងគាំទ្រដែលនៅសេសសល់ចុងក្រោយរបស់គណបក្សសង្គ្រោះជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
គុកជាសណ្ឋាគារ ជាភោជនីយដ្ឋាន មែនទេ ?
បើអញ្ចឹងមែន គេមិនហៅថាគុកទេ ។
this animal is sourly HA …TMILL ETHSASNA CHEA SHUT NORUOK