អ្នកវិភាគ​ថា លោក ហ៊ុន សែន ធ្វើ​រឿង​កុន​ភាគ​ដើម្បី​លើក​តម្កើង​ខ្លួនឯង​ក្នុង​ទិសដៅ​ពង្រឹង​អំណាច

ដោយ ទីន ហ្សាការីយ៉ា
2021-01-15
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

អ្នកវិភាគ​ថា លោក ហ៊ុន សែន ធ្វើ​រឿង​កុន​ភាគ​ដើម្បី​លើក​តម្កើង​ខ្លួនឯង​ក្នុង​ទិសដៅ​ពង្រឹង​អំណាច

លោក​នាយករដ្ឋមន្ត្រី ហ៊ុន សែន។ រូប​ពី​ហ្វេសប៊ុក


ក្រុម​អ្នកវិភាគ​លើកឡើង​ថា ការ​ថត​កុន​ភាគ​រឿង “​កូនប្រុស​ក្រោម​ពន្លឺព្រះច័ន្ទ​ពេញ​បូណ៌មី​” ដែល​រៀបរាប់​រឿងរ៉ាវ​ជីវិត​របស់​លោក​នាយករដ្ឋមន្ត្រី ហ៊ុន សែន ជា​រឿង​មិន​ចាំបាច់​សម្រាប់​ពលរដ្ឋ​ចង់​ដឹង​នោះ​ទេ ។ អ្នកវិភាគ​ថា លោក ហ៊ុន សែន ចង់​ផលិត​រឿង​កុន​ភាគ​នេះ គ្រាន់តែ​ចង់​ឱ្យ​គេ​ដឹងគុណ​និង​កើត​សរសើរ​លោក។

រីឯ​ពលរដ្ឋ​វិញ លើកឡើង​ថា បើសិនជា លោក ហ៊ុន សែន ជា​មនុស្ស​ល្អ​គួរ​ឱ្យ​គោរព​មិនមែន​នោះ ទុក​ឱ្យ​ពលរដ្ឋ​ឬ​ស្ថាប័ន​ឯករាជ្យ​ជា​អ្នក​ចងក្រង​ឯកសារ ឬ​ផលិត​រឿង​កុន​នេះ​វិញ ទើប​មានតម្លៃ​ជា​ប្រវត្តិសាស្ត្រ​ពិតប្រាកដ។

អ្នកវិភាគ​អះអាង​ថា លោក ហ៊ុន សែន បង្កើត​គណៈកម្មការ​ផលិត​ខ្សែ​ភាពយន្ត​អំពី​ជីវិត​របស់​លោក រឿង​«​កូនប្រុស​ក្រោម​ពន្លឺព្រះច័ន្ទ​ពេញ​បូណ៌មី» នោះ ដើម្បី​ចង់​លើ​តម្កើង​ខ្លួន ដើម្បី​ឈាន​ទៅ​ការ​ពង្រឹង​អំណាច​ទៅ​មុខ​ទៀត​ប៉ុណ្ណោះ។

អ្នកវិភាគ​នយោបាយ​និរទេស​ខ្លួន​នៅ​ក្រៅ​ប្រទេស​លោក គឹម សុខ មាន​ប្រសាសន៍​ថា លោក ហ៊ុន សែន មិនមែន​ជា​វីរៈបុរស​ជាតិ ដែល​សាក​សម​នឹង​ផលិត​រឿង​កុន​ភាគ រក្សា​ទុកជា​ប្រវត្តិសាស្ត្រ​តស៊ូ​ក្នុង​ការ​សង្គ្រោះ​កម្ពុជា​នោះ​ទេ​។ ផ្ទុយទៅវិញ លោក គឹម សុខ អះអាង​ថា លោក ហ៊ុន សែន មានបំណង​ដើម្បី​ពង្រឹង​អំណាច​ផង និង​ចង់​ភ្ជាប់​ខ្លួន​ទៅ​នឹង​ស្ដេច​ផង៖ «លោក ហ៊ុន សែន ផ្សា​ខ្លួន​គាត់​ទៅ​ស្ដេច​កន​ផង ទៅ​សម្ដេច សីហនុ ផង ដើម្បី​ឱ្យ​ប្រជារាស្ត្រ​មើល​ឃើញ​ថា លោក​នឹង​ក្លាយ​ទៅជា​ស្ដេច ហើយ​ឱ្យ​កូន​របស់​គាត់​ផ្សា​ភ្ជាប់​នឹង​ខ្លួន​គាត់»។

អតីត​ទាហាន​ខ្មែរក្រហម លោក ហ៊ុន សែន ត្រូវ​បាន​អ្នក​ដែល​ទទួល​លាភសក្ការៈ​ពី​លោក គោរព​បូជា រួច​ចាត់​ទុក​លោក​ថា ជា​អ្នក​មានបុណ្យ​បារមី ឬក៏​ជា​ស្ដេច​មក​ចាប់ជាតិ​ផង។ ក្រោម​បញ្ជា​របស់​លោក ឬក៏​ក្រោម​ការ​ផ្ដួចផ្ដើម​នៃ​អ្នក​ដែល​អែបអប​យក​បុង​នឹង​លោក គេ​បាន​សាងសង់​រូបសំណាក​ស្ដេច​កន ដែល​គេ​ធ្វើ​ខំ​ដាប់​ថ្ម ឬ​បាត​ស៊ីម៉ង់​ឱ្យ​មាន​មុខ​ស្រដៀង​នឹង​លោក នៅ​ស្ទើរ​គ្រប់​ខេត្ត​ក្រុង​នៃ​ប្រទេស​កម្ពុជា​។ គេ​និពន្ធ​ចម្រៀង ច្រៀង​លើក​សរសើរ​លោក និង​ភរិយា​លោក ហើយ​មក​ចាក់​ផ្សាយ​នៅ​តាម​ស្ថានីយ​វិទ្យុ ទូរទស្សន៍ មាន​ទាំង វិទ្យុ​និង​ទូរទស្សន៍​ផង។

អ្នក​ច្រៀង​អា​យ៉ៃ អ្នកលេង​កំប្លែង​ល្បីៗ​មួយ​ចំនួន​ធំ ត្រូវ​លោក​ចាត់ចែង​តែងតាំង​ជា​នាយ​ទាហាន មាន​ស័ក្ដិ​ពាក់​ពេញ​ស្មា ធ្វើ​យ៉ាង​ណា​ឱ្យ​ពួកគេ​បញ្ជ្រាប​សារ​ឃោសនា​លើកជើង​លោក និង​គ្រួសារ​លោក នៅ​ក្នុង​ការ​សម្ដែង​របស់​ខ្លួន​។ ប៉ុណ្ណេះ​ហើយ លោក​នៅ​មិន​អស់ចិត្ត​ទៀត ថ្មីៗ​នេះ លោក​ចេញ​បញ្ជា​ឱ្យ​គេ​ចាត់ចែង​ថតកុន​ភាគ​រឿង “​កូនប្រុស​ក្រោម​ពន្លឺព្រះច័ន្ទ​ពេញ​បូណ៌មី​” ដែល​រៀបរាប់​រឿងរ៉ាវ​ជីវិត​របស់​លោក​ថែម​ទៀត​ផង។

លោក ហ៊ុន សែន បាន​ប្រកាស​បង្កើត​គណៈ​កម្ម​ការផលិត​ភាពយន្ត​ភាគ​រឿង​កូនប្រុស​ក្រោម​ពន្លឺ​ព្រះ​ចន្ទ​ពេញបូណ៌មី កាលពី​ថ្ងៃ​ទី​៥ មករា ឆ្នាំ​២០២១។ សមាសភាព​សមាជិក​គណៈកម្មការ​នេះ មាន​មន្ត្រី​រដ្ឋាភិបាល​តាម​ក្រសួង​នានា និង​ទីប្រឹក្សា​របស់​លោក​រួមគ្នា​ផលិត។ សេចក្ដី​សម្រេច​បង្កើត​គណៈកម្មការ​នោះ មាន​រដ្ឋលេខាធិការ​ក្រសួង​ព័ត៌មាន លោក ម៉ៅ អាយុទ្ធ ជា​ប្រធាន​គណៈកម្មការ​ផលិតភាព​យន្ត​ភាគ​រឿង និង​មាន​មន្ត្រី​ស្ថាប័ន​ផ្សេងទៀត ជា​អនុប្រធាន និង​ជាទី​ប្រឹក្សា​។ រឿង​នេះ និពន្ធ និង​ដឹកនាំ​ដោយ​លោក ហ៊ុយ វាសនា។ ចំណែក​ល្ខោន​វិទ្យុ​រឿង​កូនប្រុស​ក្រោម​ពន្លឺ​ព្រះ​ចន្ទ​ពេញបូណ៌មី​វិញ​។ រឿង​នេះ​ត្រូវ​បាន​វិទ្យុ​បាយ័ន​ជា​របស់​កូនស្រី​លោក ហ៊ុន សែន អ្នកស្រី ហ៊ុន ម៉ាណា ចាក់​ផ្សាយ​ជាច្រើន​ឆ្នាំ​មក​ហើយ។

លោក ហ៊ុន សែន បាន​ប្រកាស​នៅ​ថ្ងៃ​ទី​១៣ មករា ថា ការផលិត​ខ្សែ​ភាពយន្ត​អំពី​ជីវិត​របស់​លោក រឿង​«​កូនប្រុស​ក្រោម​ពន្លឺព្រះច័ន្ទ​ពេញ​បូណ៌មី​» មិន​ប្រើប្រាស់​ថវិកា​រដ្ឋ​នោះ​ទេ​។ លោក​បន្ថែម​ថា លោក​បាន​ជួល​ក្រុមហ៊ុន​ឯកជន​ផលិត​រឿង​នេះ​ឡើង​។ លោក​អះអាង​ថា “ ការ​ថត​ភាពយន្ត​រឿង​នេះ មិនបាន​ប្រើប្រាស់​ថវិកាជាតិ​សូម្បី តែមួយ​សេន​» ដោយសារតែ​ម្ចាស់​ផលិតកម្ម​ជា​អ្នក​ចំណាយ​ដើមទុន​។ ខ្សែភាពយន្ត​ភាគ​នេះ ក៏​ជា​កម្ម​សិទ្ធ​ផ្ដាច់មុខ​របស់​ផលិតកម្ម​ឯកជន​នោះ​ដែរ​។ ទោះបីជា​យ៉ាង​នេះ​ក្ដី លោក ហ៊ុន សែន មិន​បាន​បង្ហាញ​ឈ្មោះ​ផលិតកម្ម ឬ​ឈ្មោះ​ម្ចាស់​ផលិត​កម្ម​នេះ​ទេ។

លោក ហ៊ុន សែន ប្រកាស​អំពី​ការ​ចំណាយ​ថត​ភាពយន្ត​រឿង​ជីវិត​របស់​លោក​នេះ នៅ​ក្រោយ​ពី​សាធារណជន​រិះគន់​ថា លោក​បាន​យក​លុយ​ជាតិ​ទៅ​ផលិត​រឿង​កុន​ភាគ​អំពី​ជីវិត​ឯកជន​របស់​លោក នៅ​ក្នុង​ពេល​ពលរដ្ឋ​កំពុង​តែ​ជួប​ប្រទះ​ជីវភាព​លំបាក ដោយសារតែ​ជំងឺ​កូវីដ​១៩ និង​រងគ្រោះ​ដោយសារ​ទឹកជំនន់។

ពលរដ្ឋ​ម្នាក់​រស់នៅ​ខេត្ត​តាកែវ លោក ស៊ីណា ថូ សង្កេត​ឃើញ​ថា លោក ហ៊ុន សែន តែង​ប្រើ​គ្រប់​មធ្យោបាយ​បង្ហាញ​ពី​ស្នាដៃ​របស់​ខ្លួន ដូចជា ការផលិត​ចម្រៀង សៀវភៅ និង​វីដេអូ​ឯកសារ​ជាដើម​។ ពលរដ្ឋ​រូប​នេះ​យល់ថា បើ​លោក ហ៊ុន សែន ពិតជា​មេដឹកនាំ​មាន​ស្នាដៃ​មែន​នោះ មិន​ចាំបាច់​ប្រឹងប្រែង​ផលិត​ខ្លួនឯង​នោះ​គឺ ពលរដ្ឋ ឬ​អ្នក​គោរព​ស្រលាញ់​លោក​គេ​នឹង​ផលិត​ដោយ​ខ្លួនឯង​មិន​ចាំបាច់​លោក ហ៊ុន សែន បង្គាប់បញ្ជា​នោះ​ទេ​៖ «និយាយ​យ៉ាង​ខ្លី​ទៅ​ថា មនុស្ស​យើង​ធ្វើ​រឿង​ល្អ​ស្នេហា​ជាតិ គេ​អ្នក​និពន្ធ​គេ​ធ្វើ​ឱ្យ​យើង​ហ្មង»។

អតីត​ស្ថាបនិក​បណ្ដាញ​ព្រះសង្ឃ​ឯករាជ្យ ដើម្បី​យុត្តិធម៌​សង្គម ព្រះតេជព្រះគណ ប៊ុត ប៊ុនតិញ មាន​ថេរដីកា​ថា លោក ហ៊ុន សែន ជា​តួ​ចិត្តអាក្រក់ ហើយ​ចង់​មក​សំដែង​ជា​តួ​ចិត្តល្អ​នៅ​ក្នុង​រឿង​កុន​នេះ​។ ព្រះអង្គ​បន្ថែម​ថា លោក ហ៊ុន សែន ជា​ទាហាន​ខ្មែរក្រហម មិនមែន​ជា​តួអង្គ​ដែល​សង្គ្រោះ​ពលរដ្ឋ​ចេញពី​របប​ខ្មែរក្រហម​ពិតប្រាកដ​ឡើយ​។ លើស​ពី​នេះ​ទៀត​ព្រះអង្គ​បញ្ជាក់​ថា លោក ហ៊ុន សែន​ដឹកនាំ​ប្រទេស​កន្លង​មក​នេះ ធ្វើ​ឱ្យ​ប្រជារាស្ត្រ​ជួរ​ចត់ ព្រាត់ប្រាស​សាច់ញាតិ ប្រពន្ធ​កូន និង​បាត់បង់​ដីធ្លី​ផ្ទះសម្បែង​៖ «ការដឹកនាំ​របស់​លោក ហ៊ុន សែន ធ្វើ​ឱ្យ​ពលរដ្ឋ​ជួរ​ចត់ របប​រំលោភ​សិទ្ធិ របប​គាបសង្កត់ បើសិនជា​លោក​ហ៊ុន សែន ចង់​ឱ្យ​គេ​ចងចាំ​គឺ​រឿង​កុន​នេះ ថត​រឿង​រំលោភ​ដីធ្លី​ប្រជាពលរដ្ឋ រឿង​បណ្ដេញ​ចេញ រឿង​អយុត្តិធម៌​សង្គម គឺ​រឿង​ទាំង​អស់នេះ ពេល​ថតកុន​ទៅ​ទាញ​ការ​ចាប់អារម្មណ៍​ពី​ប្រជាពលរដ្ឋ​បាន​ច្រើន»។

អ្នកនាំពាក្យ​គណបក្ស​ប្រជាជន​កម្ពុជា​លោក ឈឹម ផលវរុណ ចាត់​ទុក​មតិ​រិះគន់​អំពី​ការ​រឿង​កុន​ភាគ អំពី​ជីវិត​តស៊ូ​លោក ហ៊ុន សែន នេះ​ថា ជា​ការ​បញ្ចេញមតិ​ក្នុងសង្គម​ប្រជាធិបតេយ្យ​។ លោក​បន្ថែម​ថា មេដឹកនាំ​ប្រទេស​ដែល​ផលិត​សៀវភៅ ឬ​ភាពយន្ត​នេះ ជា​តម្លៃ​ប្រវត្តិសាស្ត្រ​មិនមែន​ជា​តម្លៃ​បុគ្គល​នោះ​ទេ​៖ «ត្រូវ​ទទួលស្គាល់​ជា​ផលិតផល​ប្រវត្តិសាស្ត្រ​ទេ មិនមែន​សំដៅ​ទៅ​បុគ្គល​ទេ គ្រាន់តែ​បុគ្គល​អ្នកធ្វើ​ក្នុង​សកម្មភាព​ប្រវត្តិសាស្ត្រ»។

ទោះបីជា​យ៉ាង​នេះ​ក្ដី លោក គឹម សុខ អះអាង​ថា ខ្សែ​ភាពយន្ត​នេះ មិន​អាច​ចាត់ទុកជា​ស្នាដៃ​ប្រវត្តិសាស្ត្រ​បាន​ទេ តែ​អាច​ចាត់ទុកជា​ស្នាដៃ​របស់​ក្រុម​អ្នកនិពន្ធ​ចង់​លើកជើង​លោក ហ៊ុន សែន និង​ក្រុម​គ្រួសារ​លោក​បាន។ ម្យ៉ាងវិញទៀត លោក គឹម សុខ បញ្ជាក់​ថា មានរឿង​ជាច្រើន​ដែល​ជា​មរតក​របស់​ជាតិ ដែល​អាច​ថត​ទុកជា​ឯកសារ​ប្រវត្តិសាស្ត្រ​កម្ពុជា​។ ស្នាដៃ​ទាំងនោះ​មាន​ដូចជា កម្ពុជា​ក្រោម​ការដឹកនាំ​របស់​លោក ហ៊ុន សែន បាន​បំផ្លាញ​ធនធានធម្មជាតិ មាន​បឹង​បួរ បរិស្ថាន និង​ព្រៃឈើ​ជាដើម​៖ «សម្ដេច​នរោត្តម សីហនុ ក៏​និពន្ធ​រឿងកុន​ដែរ តែ​រឿង​ព្រះអង្គ​គឺ​ថតកុន​បង្ហាញ​ពី​ធនធាន​ធម្មជាតិ ព្រៃឈើ ការពារ​សម្បត្តិ​ធនធានធម្មជាតិ ដើម្បី​បង្ហាញ​ទឹកដី​ព្រៃ​ប្រឹក្សា​ប្រទេស​កម្ពុជា ឱ្យ​កូនចៅ​ព្រះអង្គ​បាន​មើល​ឃើញ តែ​ករណី​លោក​ហ៊ុន សែន វិញ គាត់​និពន្ធ​ក្នុង​គោលបំណង​ជា​គាត់​ជា​ស្ដេច​កន គាត់​ជា​ស្ដេច ដើម្បី​បង្ហាញ​អំណាច​របស់​លោក ១៥០​ឆ្នាំ​ទៅមុខ»។

លោក ហ៊ុន សែន កើត​ក្នុង​ឆ្នាំ​១៩៥២​។ លោក​បាន​ចូលរួម​ជាមួយ​កងទ័ព​ខ្មែរក្រហម​នៅ​ឆ្នាំ​១៩៧០​។ បន្ទាប់​មក​បាន​ភៀសខ្លួន​ទៅ​ប្រទេស​វៀតណាម ក្នុង​ឆ្នាំ​១៩៧៧​។ ក្រោយ​ពី​បាន​ដឹកនាំ​កងទ័ព​វៀតណាម ចូល​ឈ្លានពាន​ក្នុង​ប្រទេស​កម្ពុជា ដើម្បី​បណ្ដេញ​ក្រុម​ខ្មែរ​ក្រហម​ឱ្យ​ចូល​ទៅ​ក្នុង​ព្រៃ​ហើយ​បង្កើត​រដ្ឋាភិបាល​កុម្មុយនិស្ត​រួច​ហើយ​នោះ លោក ហ៊ុន សែន បាន​ឡើង​កាន់​អំណាច​នៅ​ឆ្នាំ​១៩៨៥ តាមរយៈ​ការ​ជួយជ្រោមជ្រែង​របស់​វៀតណាម។

ប្រជាពលរដ្ឋ និង​អ្នកវិភាគ អះអាង​ថា លោក ហ៊ុន សែន កំពុងតែ​កាឡៃ​ប្រវត្តិសាស្ត្រ​តាមរយៈ​ការផលិត​ខ្សែរ​ភាពយន្ត​នេះ​។ អ្នកវិភាគ​ថា ពលរដ្ឋ​ជាច្រើន​បាន​ដឹង​ពី​ប្រវត្តិសាស្ត្រ​ពិត ដែល​មិន​អាច​កែប្រែ​បាន​នោះ គឺ លោក ជា​អតីត​ទាហាន​ខ្មែរក្រហម។

អ្នកវិភាគ​លើក​ឡើង​ថា ការផលិត​ខ្សែ​ភាពយន្ត​នេះ លោក ហ៊ុន សែន ចង់​បង្កើត​សាច់រឿង​ថ្មី​បំភ្លៃ​ប្រវត្តិសាស្ត្រ​ពិត​ទាំងនេះ ក្នុង​ទិសដៅ​លើក​តម្កើង​ខ្លួនឯង​ផង និង​ចង់​ទទួល​បាន​ការ​អាណិត​អាសូរ​ពី​ពលរដ្ឋ​ផង ដើម្បី​ឈាន​ទៅ​ពង្រឹង​អំណាច​ត​ពូជ​ពង់​វង្ស​ត្រកូល​នៅ​ពេល​អនាគត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "អ្នកវិភាគ​ថា លោក ហ៊ុន សែន ធ្វើ​រឿង​កុន​ភាគ​ដើម្បី​លើក​តម្កើង​ខ្លួនឯង​ក្នុង​ទិសដៅ​ពង្រឹង​អំណាច"

  1. Anonymous says:

    the old Cambodian word said ( you can not sit on the basket to life yourself ) the ugly guy like you will never be that great . the reason why I said that >>starting from how you look , word you speak, way you doing , the most importance is the evil action you as been doing . for me you should going hell instate

  2. Anonymous says:

    So funny’ haha’ the truth is the truth haha’ it can not lie to the people and history of crooks people still in the GOD’ book ‘ . Crooks people committed with sin will die and go to hell but leave the bad name for ever ‘.Remember who ever sign&gave Tral Island to Youn-hanoi are the traitors’