សហគមន៍​ស្រែ​ប្រាំង និង​សង្គម​ស៊ីវិល រិះគន់​អាជ្ញាធរ​ខេត្ត​ត្បូង​ឃ្មុំ​រឿង​ចាប់​ឃុំ​ខ្លួន​សកម្មជន​ដីធ្លី​មួយ​រូប​ទៀត

ដោយ ជី វិតា
2021-01-19
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

សហគមន៍​ស្រែ​ប្រាំង និង​សង្គម​ស៊ីវិល រិះគន់​អាជ្ញាធរ​ខេត្ត​ត្បូង​ឃ្មុំ​រឿង​ចាប់​ឃុំ​ខ្លួន​សកម្មជន​ដីធ្លី​មួយ​រូប​ទៀត

(ឆ្វេង) ​សហគមន៍​ស្រែ​ប្រាំង នៅ​ឃុំ​ត្រពាំង​ព្រីង ស្រុក​តំបែរ ខេត្ត​ត្បូង​ឃ្មុំ តវ៉ាការ​ចាប់លោក សែម សាង តំណាង​សហគមន៍​របស់​ពួក​គាត់ នៅ​មុខ​សាលាដំបូង​ខេត្ត​ត្បូង​ឃ្មុំ និង​ទាមទារ​ដោះលែងលោក​វិញ (រូប​ស្ដាំ) ​លោក សែម ចំណាន ជា​តំណាង​សហគមន៍​ស្រែប្រាំង​ម្នាក់​ទៀត ត្រូវ​បាន​អាជ្ញាធរ​​​ចាប់​ខ្លួន​ កាល​​ពី​​ថ្ងៃ​​ទី១៥ ខែ​មករា ឆ្នាំ២០២១។ រូប៖ ពលរដ្ឋ


សហគមន៍​ស្រែប្រាំង​ និង​មន្ត្រី​សង្គម​ស៊ីវិល ទាមទារ​ឲ្យ​តុលាការ​ខេត្ត​ត្បូង​ឃ្មុំ ទម្លាក់​បទ​ចោទ និង​ដោះលែង​តំណាង​សហគមន៍​ស្រែប្រាំង​មួយ​រូប​ឈ្មោះ សែម ចំណាន ឲ្យ​មាន​សេរីភាព​ឡើងវិញ។ ពូក​គេ ទាមទារ​បែប​នេះ ​បន្ទាប់ពី​អាជ្ញាធរ​ខេត្ត​ត្បូងឃ្មុំ ​បាន​ចាប់​ឃុំ​ខ្លួន​តំណាង​សហគមន៍​ដីធ្លី​រូប​នេះ ​កាល​ពី​ថ្ងៃ​ទី១៥ ខែមករា​កន្លងទៅ ​ពាក់ព័ន្ធ​នឹង​សកម្មភាព​ការពារ​ដី​ព្រៃ​សហគមន៍​ និង​ការ​បញ្ចេញ​មតិ​តាម​បណ្ដាញ​សង្គម​ហ្វេសប៊ុក (Facebook)។

តំណាង​សហគមន៍​ស្រែ​ប្រាំង និង​មន្ត្រី​សង្គម​ស៊ីវិល​ លើក​ឡើង​ថា ការ​ចាប់​ខ្លួន និង​ការ​ចោទ​ប្រកាន់ តំណាង​សហគមន៍​ស្រែប្រាំង​លោក សែម ចំណាន គឺ​ធ្វើ​ឡើង​ដោយ​មិន​ត្រឹម​ត្រូវ​តាម​គោលការណ៍​ច្បាប់​ទេ។

តំណាង​សហគមន៍​ស្រែ​ប្រាំង នៅ​ឃុំ​ត្រពាំង​ព្រីង ស្រុក​តំបែរ ខេត្ត​ត្បូង​ឃ្មុំ លោក​ថា លីដា ប្រាប់​អាស៊ី​សេរី​ថា អាជ្ញាធរ ​បាន​ចាប់​ខ្លួន​លោក សែម ចំណាន កាល​ពី​ថ្ងៃ​ទី១៥ ខែ​មករា ​ក្នុង​ពេល​ដែល​លោក​ទៅ​ធ្វើ​ជា​កម្មករ​សំណង់​នៅ​ខេត្ត​ឧត្តរ​មាន​ជ័យ ហើយ​បាន​បញ្ជូន​មក​ឃុំ​ខ្លួន​នៅ​ខេត្ត​ត្បូង​ឃ្មុំ​វិញ។ លោក ​ចាត់ទុកថា​ ការ​ចាប់​ឃុំ​ខ្លួន​នេះ​ គឺ​ជា​រឿង​អយុត្តិធម៌ ព្រោះ​លោក សែម ចំណាន ​និង​អ្នកភូមិ​ផ្សេងទៀត ​តែង​នាំគ្នា​ទៅ​ទប់ស្កាត់ និង​ដក​ម៉ាស៊ីន​អារ​ឈើ​ទុក​ប្រគល់​ឱ្យ​អាជ្ញាធរ​ឃុំ នៅ​ពេល​មាន​សកម្មភាព​លួច​កាប់​ព្រៃ​សហគមន៍​ត្រពាំង​ព្រីង ពី​សំណាក់​ជនខិលខូច យក​ទៅ​លក់​ឱ្យ​ឈ្មួញ៖ «វា​ជា​រឿង​អយុត្តិធម៌​មួយ​ដែរ​សម្រាប់​ពួក​គាត់​ដែល​អាជ្ញាធរ​ចាប់ខ្លួន ជា​បន្ត​បន្ទាប់​នេះ វា​បំបាក់​ទឹកចិត្ត​ប្រជាពលរដ្ឋ​ផង និង​មិន​ឲ្យ ប្រជាពលរដ្ឋ​ងើប​តវ៉ា​ទាមទារ​នូវ​អ្វី​ដែល គាត់​បាត់បង់ ឬ​ក៏​បំបិទ​នូវ​សិទ្ធិ​សេរីភាព​នៅ​តាម​បណ្ដាញ​សង្គម​ហ្វេសប៊ុក ឬ​ការ​តស៊ូ​មតិ​តាម​ស្ថាប័ន ក្រសួង​នានា ទៀត»

ស្នងការ​នគរបាល​ខេត្ត​ត្បូង​ឃ្មុំ​លោក បែន រ័ត្ន ឆ្លើយ​តប​ថា សមត្ថកិច្ច ​ពិតជា​បាន​ចាប់​ខ្លួន លោក ​សែម ចំណាន​ពី​ខេត្ត​ឧត្តរ​មានជ័យ ដោយ​អនុវត្ត​តាម​ដីកា​របស់​តុលាការ​ចំនួន​ពីរ ប៉ុន្តែ​មិន​ពាក់ព័ន្ធ​នឹង​រឿង​នយោបាយ​នោះ​ទេ។ លោក​បញ្ជាក់​ថា ​ដីកាបញ្ជាឲ្យចាប់ខ្លួនទី១ គឺ​ពាក់ព័ន្ធ​នឹង​ករណី​លោក ​សែម ចំណាន បាន​កំហែង​យក​ទ្រព្យ​សម្បត្តិ​របស់​ពលរដ្ឋ​ដទៃ​ដែល​ចូល​ទៅ​អាស្រ័យផល​ក្នុង​ព្រៃ​សហគមន៍ ចំណែក​ដីកា​ទី២ លោក​មិន​បាន​ដឹង​ពាក់ព័ន្ធ​នឹង​បទ​ល្មើស​អ្វី​នោះ​ទេ៖ «រឿង​ហ្នឹង​ គឺ​មិន​មែន​ខ្ញុំ​ជា​អ្នក​ចោទ​ប្រកាន់​ទេ ​គឺ​ខ្ញុំ​ជា​អ្នក​កសាង​សំណុំរឿង​ទេ​ប្អូន ​ទាល់តែ​ប្អូន​សួរ​ទៅ​ខាង​តុលាការ ដែល​គេ​ស៊ើប​អង្កេត ​គេ​អី​ពី​ខាង​ណា​មក​ទៅ គេ​ពន្លាត់ នីតិវិធី​គេ គេ​បាន​ចម្លើយ​ពី​ខាង​ណេះ​ពី​ខាង​ណោះ ​ឬ​ភស្តុតាង​អី​មក ហើយ​ចេញ​ដីកា ​ខ្ញុំ​ក៏​មិន​ដឹង​ដែរ ខ្ញុំ​ដឹង​តែ​ការ​អនុវត្ត​ដីកា​ទេ។ ដូច្នេះ​ប្អូន​សួរ​ខាង​ណោះ​ បាន​គេ​ច្បាស់​ទាំង​បទ​ចោទ​ទាំង​បញ្ហា​ផ្សេងៗ»

អាស៊ី​សេរី​មិន​អាច​ទាក់ទង​ប្រធាន​លេខាធិការដ្ឋាន​សាលា​ដំបូង​ខេត្ត​ត្បូង​ឃ្មុំ លោក ថេង ជាង និង​ព្រះរាជ​អាជ្ញា​រង​អម​សាលា​ដំបូង​ខេត្ត​នេះ គឺ​លោក ហាក់ សៀកលីម ដើម្បី​បំភ្លឺ​រឿង​នេះ​បាន​ទេ ដោយ​ទូរស័ព្ទ​ចូល ពុំ​មាន​អ្នក​ទទួល។

កាល​ពី​ថ្ងៃ​ទី​៣ មិថុនា ឆ្នាំ២០២០ ​ប្រធាន​ចៅក្រម​ជំនុំជម្រះ​សាលាដំបូង​ខេត្ត​ត្បូងឃ្មុំ ​លោក ​ផុន វណ្ណា​ សម្រេច​ផ្ដន្ទាទោស​តំណាង​សហគមន៍​ស្រែ​ប្រាំង​ចំនួន៨នាក់ឲ្យ​ជាប់ពន្ធនាគារម្នាក់៧ឆ្នាំ ពី​បទ​កំហែង​យក​ដោយមាន​ស្ថាន​ទម្ងន់​ទោស​ដោយសារ​ប្រើប្រាស់​អាវុធ នៅ​ភូមិ​ស្រែប្រាំង ឃុំ​ត្រពាំងព្រីង កាល​ពី​ថ្ងៃ​ទី១៨ ​កុម្ភៈ ​ឆ្នាំ​២០១៦។ តំណាង​សហគមន៍​ស្រែប្រាំង​ រំលឹក​ថា ​ក្នុង​ហេតុការណ៍​ចុះ​ទប់​ស្កាត់​បទ​ល្មើស​កាប់​ឈើ​កាលពី​ប្រមាណ ៥ឆ្នាំមុន​នោះ ​ក្រុម​ប្រជា​សហគមន៍​ប្រមាណ ៣០ ទៅ ៤០នាក់ ​គ្រាន់តែ​នាំគ្នា​ទៅ​ចុះ​ទៅ​ឃាត់​ពលរដ្ឋ​មួយ​ចំនួន​តូច ដែល​លួច​កាប់​ឈើ​លក់​ឲ្យ​ឈ្មួញ ដោយ​ដក​យក​ម៉ាស៊ីន​អារ​ឈើ​ចំនួន​ពីរ​គ្រឿង​ទុក​ប៉ុណ្ណោះ និង​មិន​មាន​ប្រើ​អាវុធ ឬ​កាំបិត​ទៅ​គំរាម​ក្រុម​អ្នក​កាប់​ឈើ​នោះ​ទេ។ តំណាង​សហគមន៍​អះអាង​ថា អាជ្ញាធរ ​និង​តុលាការ បាន​ប្រើ​ករណី​នេះ ជា​លេស​ក្នុង​ការ​ចាប់​ខ្លួន​តំណាង​សហគមន៍ ដើម្បី​កុំ​ឱ្យ​តវ៉ា​ទាមទារ​ដីធ្លី​ជាមួយ​ក្រុមហ៊ុន​ចិន​ ឈ្មោះ​ហាមិនីវេន អ៊ិនវេសមេន (Hamenivent Investment) ដែល​ឈូស​ឆាយ​រំលោភ​យក​ដី​ព្រៃ​សហគមន៍​របស់​ពលរដ្ឋ​កំពុង​អាស្រ័យ​ផល​ទំហំ ៧៨៥ហិកតារ។ មក​ទល់​ពេល​នេះ មាន​តំណាង​សហគមន៍​ស្រែ​ប្រាំង ៣នាក់​ហើយ ​ដែល​ត្រូវ​បាន​ចាប់ខ្លួន​ដាក់​ពន្ធនាគារ​ក្នុង​នោះ​រួម​មាន លោក សែម សាង លោក ហឿន ស៊ីនាត និង​លោក សែម ចំណាន ដែល​សមត្ថកិច្ច ទើប​ចាប់​ខ្លួន កាល​ពី​សប្ដាហ៍​មុន។ ក្រៅ​ពី​នេះ សមាជិក​សហគមន៍​ស្រែ​ប្រាំង​ជាង ៣០នាក់​ផ្សេង​ទៀត ត្រូវ​បាន​រង​ការ​ចោទ​ប្រកាន់​ពី​បទល្មើស​ព្រហ្មទណ្ឌ​ជា​ច្រើន​តាម​បណ្ដឹង​របស់​ក្រុមហ៊ុន​ចិន និង​អាជ្ញាធរ ដោយសារ​ព្យាយាម​ធ្វើ​សកម្មភាព​ការពារ​ដីធ្លី​សហគមន៍​របស់​ពួក​គាត់។

ប្រធាន​សមាគម​សម្ព័ន្ធ​សហគមន៍​កសិករ​កម្ពុជា លោក ថេង សាវឿន ឲ្យ​ដឹង​ថា ថ្មីៗ នេះ តុលាការ​ខេត្ត​ត្បូង​ឃ្មុំ ក៏​បាន​ចោទ​ប្រកាន់​លោក សែម ចំណាន ពី​បទ​សម​គំនិត​ក្នុង​អំពើ​ញុះញង់​ឲ្យ​ប្រព្រឹត្ត​អំពើ​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម តាម​បណ្ដាញ​សង្គម ដូច​ករណី​តំណាង​សហគមន៍​ជាំក្រវៀន ​ស្រុក​មេមត់ លោក ផុន សុផល ដែល​ត្រូវ​បាន​ចាប់​ខ្លួន កាល​ពី​ចុង​ខែ​ធ្នូ ឆ្នាំ២០២០​ដែរ។ លោក​ យល់ថា ​ការ​ប្រើប្រាស់​ប្រព័ន្ធ​តុលាការ ​ចោទប្រកាន់​ និង​ចាប់​ឃុំ​ខ្លួន​តំណាង​សហគមន៍​ដីធ្លី​ជា​បន្ត​បន្ទាប់​នេះ​ គឺ​ជា​ការ​គំរាម​កំហែង ​និង​បំបាក់​ស្មារតី​របស់​ពួក​គេ ដែល​តែង​តែ​ធ្វើសកម្មភាព​ការពារ​សិទ្ធិ​ដីធ្លី​សម្រាប់​ខ្លួន​ឯង និង​ប្រជាពលរដ្ឋ​ក្នុង​សហគមន៍ និង​តែងតែ​ឈឺ​ឆ្អាល​ពី​បញ្ហា​អយុត្តិធម៌​សង្គម៖ «ការ​ចោទ​ប្រកាន់​នេះ​អយុត្តិធម៌​ខ្លាំង​សម្រាប់​ប្រជាពលរដ្ឋ ​ឬ​សម្រាប់​សកម្មជន​ដីធ្លី​ទូទៅ ​ដែល​គាត់​ធ្វើ​ការ​ឈរ​លើ​គោល​ការណ៍​ច្បាប់​ បែរ​ជា​រង​ការ​ចោទប្រកាន់​ក្នុង​រូបភាព​បែប​គំរាម​កំហែង។​ ខ្ញុំ​សូម​ស្នើសុំ​ឲ្យ​តុលាការ​ទម្លាក់​បទចោទប្រកាន់ ​និង​ដោះ​លែង​ពួកគាត់ ឲ្យ​មាន​សេរីភាព​ឡើងវិញ ​ដើម្បី​រស់​នៅ​ជួបជុំ​ប្រពន្ធ​កូន»

កាល​ពី​ថ្ងៃ​ទី១៤ ខែមករា​កន្លង​ទៅ ក្រុម​អង្គការ​សង្គម​ស៊ីវិល សហជីព និង​សហគមន៍ ចំនួន៨៨ បាន​ចេញ​សេចក្ដីថ្លែងការណ៍​រួម​គ្នា ស្នើ​តុលាការ​ទម្លាក់​ចោល​បទ​ចោទ ប្រកាន់​តំណាង​សហគមន៍​ដីធ្លី​ទាំងអស់ និង​ដោះលែង​តំណាង​សហគមន៍​ដែល​ត្រូវ​បាន​ចាប់ខ្លួន​ឱ្យ​មាន​សេរីភាព​វិញ។

ក្រុម​អង្គការ​សង្គម​ស៊ីវិល​ទាំង​នោះ ពិនិត្យ​ឃើញ​ថា មួយ​រយៈ​ចុងក្រោយ​នេះ អាជ្ញាធរ​រដ្ឋាភិបាល​បាន​ធ្វើ​ទុក្ខ​បុក​ម្នេញ​ធ្ងន់ធ្ងរ ដូច​ជា ចោទ​ប្រកាន់ និង​ចាប់ខ្លួន​សកម្មជន​ដីធ្លី សកម្មជន​បរិស្ថាន​ជាច្រើន​នាក់​ដោយ​ចោទ​ពី​បទ «ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍» «ញុះញង់​ឱ្យ​មាន​ភាព​វឹកវរ​ដល់​សន្តិសុខ​សង្គម» និង​បទ​ល្មើស​ផ្សេង​ទៀត ដោយ​គ្រាន់​តែ​ពួក​គាត់​ប្រើប្រាស់​សិទ្ធិ​ស្រប​ច្បាប់​របស់​ខ្លួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles