ដោយ មាន ឫទ្ធិ
2021-02-19
RFA
អគារកាស៊ីណូ របស់ក្រុមហ៊ុន ណាហ្គា វើលដ៍ (Naga World Casino) នៅភ្នំពេញ និងភ្ញៀវទេសចរចូលទស្សនាប្រាសាទអង្គរវត្ត កាលពីថ្ងៃទី១៨ ខែកញ្ញា ឆ្នាំ២០២០។ រូប៖ ពលរដ្ឋ និងហ្វេសប៊ុកក្រសួងទេសចរណ៍
អង្គការយូណេស្កូ (UNESCO) ព្រួយបារម្ភចំពោះគម្រោងវិនិយោគរបស់ក្រុមហ៊ុនណាហ្គា ឃ័រ (Naga Corp) ដែលស្ថិតនៅជិតតំបន់អង្គរ ខេត្តសៀមរាប។ចំណែកប្រជាពលរដ្ឋវិញ ពួកគាត់នៅតែមិនពេញចិត្តដែលរដ្ឋាភិបាលលោក ហ៊ុន សែន អនុញ្ញាតឱ្យក្រុមហ៊ុនឯកជនវិនិយោគនៅក្បែរតំបន់អង្គរ ដែលអាចបង្កផលប៉ះពាល់ធ្ងន់ធ្ងរដល់រមណីយដ្ឋានប្រវត្តិសាស្ត្រមួយនេះ។
គម្រោងវិនិយោគរបស់ក្រុមហ៊ុនណាហ្កា (Naga Corp) ដែលនៅជិតបង្កើយនឹងតំបន់អង្គរ ពិតជាមានផលប៉ះពាល់យ៉ាងជាក់ច្បាស់ដល់គុណតម្លៃជាសកលដ៏វិសេសវិសាលរបស់រមណីយដ្ឋានអង្គរ ដែលជាទ្រព្យសម្បត្តិបេតិកភណ្ឌពិភពលោក។ នេះបើតាមការវាយតម្លៃរបស់អង្គការសហប្រជាជាតិសម្រាប់ការអប់រំ វិទ្យាសាស្ត្រ និងវប្បធម៌ ហៅកាត់ថា យូណេស្កូ (UNESCO) ក្នុងសេចក្ដីថ្លែងការណ៍នៅថ្ងៃទី១៧ កុម្ភៈ។
អង្គការយូណេស្កូ បានទទួលពាក្យបណ្ដឹងជាច្រើនពីភាគីទីបី ដែលបង្ហាញពីកង្វល់របស់ពួកគេជុំវិញគម្រោងវិនិយោគខ្នាតធំរបស់ក្រុមហ៊ុនណាហ្កា ដែលនៅជិតតំបន់អង្គរ។
អង្គការយូណេស្កូ អះអាងថា សម័យប្រជុំពេញអង្គនៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ (ICC-Angkor) កាលពីចុងខែ មករា បានជជែកពីគម្រោងវិនិយោគនេះដោយយកចិត្តទុកដាក់។ មតិយោបល់បែបបច្ចេកទេសរបស់ក្រុមអ្នកជំនាញផ្នែកអភិរក្ស និងអភិវឌ្ឍន៍ដោយចីរភាព បញ្ជាក់យ៉ាងច្បាស់ថា ពួកគេមិនគាំទ្រឱ្យមានគម្រោងបែបនេះឡើយ។
អង្គការ យូណេស្កូ អះអាងទៀតថា អង្គការនេះកំពុងជជែកគ្នាយ៉ាងដិតដល់ជាមួយអាជ្ញាធរកម្ពុជា ដើម្បីការពាររមណីយដ្ឋានអង្គរ និងតំបន់នៅជុំវិញនោះ។ អង្គការដដែលបញ្ជាក់ថា រាល់ការអភិវឌ្ឍទាំងឡាយទាក់ទងនឹងតំបន់អង្គរនឹងត្រូវបានត្រួតពិនិត្យដោយគណៈកម្មាធិការបេតិកភណ្ឌពិភពលោក ក្នុងសម័យប្រជុំលើកទី៤៤ នៅខែមិថុនា និងខែកក្កដា ឆ្នាំ២០២១ នេះ។
អង្គការយូណេស្កូ (UNESCO) ជឿជាក់ថា អាជ្ញាធរកម្ពុជានៅតែប្ដេជ្ញាចិត្តពេញលេញក្នុងការអនុវត្តអនុសញ្ញាបេតិកភណ្ឌពិភពលោក និងធានាថា ការការពារតម្លៃជាសកលដ៏លេចធ្លោរបស់អង្គរនឹងនៅតែជាស្នូលនៃដំណើរការសម្រេចចិត្តទាំងឡាយ ទាក់ទងនឹងទ្រព្យសម្បត្តិបេតិកភណ្ឌពិភពលោកមួយនេះ និងតំបន់ទាំងឡាយដែលនៅជុំវិញនោះ។
នេះជាលើកដំបូងហើយ ដែលអង្គការយូណេស្កូ ចេញសេចក្ដីថ្លែងការណ៍បង្ហាញកង្វល់ និងដាស់តឿនរដ្ឋាភិបាលលោក ហ៊ុន សែន អំពីការផ្តល់សិទ្ធិវិនិយោគលើផ្ទៃដីដ៏ធំសម្បើមក្បែរតំបន់អង្គរ ទៅឱ្យក្រុមហ៊ុនណាហ្កា ដែលជាក្រុមហ៊ុនកាស៊ីណូ និងល្បែងស៊ីសងធំជាងគេនៅស្រុកខ្មែរ។
អាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីសុំការឆ្លើយតបចំពោះកង្វល់របស់អង្គការយូណេស្កូនេះបានទេ នៅថ្ងៃទី១៨ កុម្ភៈ។ ប៉ុន្តែលោក ធ្លាប់ប្រាប់អាស៊ីសេរីថា គម្រោងវិនិយោគរបស់ក្រុមហ៊ុនណាហ្គាខប (Naga Corp) នៅខេត្តសៀមរាប នឹងមិនប៉ះពាល់ដល់តំបន់អង្គរនោះទេ ព្រោះស្ថិតនៅក្រៅតំបន់ ដែលកំណត់ដោយអាជ្ញាធរជាតិអប្សរា។
លោកបន្តថា គម្រោងនេះរៀបចំឡើងក្នុងទិសដៅឱ្យភ្ញៀវទេសចរកម្សាន្ត និងបង្កើនចំណូលជូនប្រជាពលរដ្ឋ មិនមែនជាកន្លែងល្បែងនោះទេ។ មន្ត្រីជាន់ខ្ពស់រដ្ឋាភិបាលរូបនេះអះអាងថា រដ្ឋាភិបាលនឹងចាត់វិធានការ ប្រសិនបើក្រុមហ៊ុននេះ ប្រព្រឹត្តទង្វើណាដែលរំលោភច្បាប់៖ «រដ្ឋាភិបាលចាត់វិធានការមិនថា អ្នកនឹងវិនិយោគខ្នាតតូច ខ្នាតធំទេ ការព្រួយបារម្ភល្អ ហើយជាការគិតមួយ ជួយគិតទាំងអស់គ្នា ក៏ប៉ុន្តែចម្លើយរបស់ខ្ញុំគឺប៉ុណ្ណឹង ប្រសិនបើសិនមានការរំលោភសិទ្ធិ ប៉ះពាល់ទៅដល់អ្វីទៅទិដ្ឋភាពនៃវប្បធម៌របស់កម្ពុជាយើងចាត់វិធានការភ្លាម»។
រដ្ឋាភិបាលលោក ហ៊ុន សែន បានសម្រេចអនុញ្ញាតឱ្យក្រុមហ៊ុនណាហ្គា ឃ័រ ដែលជាក្រុមហ៊ុនធំ នៃក្រុមហ៊ុនកាស៊ីណូ ណាហ្គាវើល៍ (Nagaworld) ជួលដីរយៈពេល៥០ឆ្នាំ ទំហំ៧៥ហិកតារ ដែលមានចម្ងាយ ៥០០ម៉ែត្រ ពីឧទ្យានជាតិអង្គរ។ គម្រោងនេះមានទឹកប្រាក់វិនិយោគជំហានដំបូងចំនួន ៣៥០លានដុល្លារដោយក្រុមហ៊ុនគ្រោងរៀបចំសណ្ឋាគារផ្កាយប្រាំ កន្លែងកម្សាន្ត ឧទ្យានវប្បធម៌បែបប្រវត្តិសាស្ត្រ និងទីក្រុងចិនសៀមរាប ឬឆៃណាថោន (Siem Reap China Town)។ ក្រុមហ៊ុនដាក់ឈ្មោះគម្រោងវិនិយោគនេះជារួមថា «Angkor Lake of Wonder»។
ទោះជាយ៉ាងណា ប្រជាពលរដ្ឋមួយចំនួន មិនចង់បានគម្រោងវិនិយោគបែបនេះនៅជិតតំបន់អង្គរឡើយ ដោយសារបារម្ភពីផលប៉ះពាល់ធ្ងន់ធ្ងរលើរមណីយដ្ឋានអង្គរ។
មគ្គុទ្ទេសក៍ទេសចរណ៍តំបន់អង្គរ លោក សេង គឹមហួត ប្រាប់អាស៊ីសេរីថា ការលើកឡើងរបស់អង្គការយូណេស្កូ គឺជារឿងត្រឹមត្រូវ ដើម្បីការពារសម្បត្តិវប្បធម៌ និងអរិយធម៌ខ្មែរ។ លោកថា លោកបាម្ភចំពោះគម្រោងមិនច្បាស់លាស់មួយនេះ ព្រោះកន្លងមកអាជ្ញាធរមិនបាន ពិភាក្សា និងសិក្សាវាយតម្លៃ ឬស្ទង់មតិពីប្រជាពលរដ្ឋឡើយ។ លោកយល់ថា រដ្ឋាភិបាលហាក់មានភាពមិនស្មោះត្រង់ជាមួយប្រជាពលរដ្ឋ៖ «ជាការពិតហើយ ព្រោះថា ការអភិវឌ្ឍបែបតាមគម្រោងខាងយូណេស្កូ ឬក៏ខាងអាជ្ញាធរអប្សរាហ្នឹង រៀបចំឱ្យធ្វើការអភិវឌ្ឍណាហ្គា ឃ័រ ហ្នឹង ធ្វើជាលក្ខណៈប្រពៃណីខ្មែរ ហើយគោលការណ៍មិនឱ្យសាងសង់មិនឱ្យខ្ពស់ៗ ជាងប្រាសាទអង្គរវត្តផ្សេងៗ ជាការល្អ ធ្វើបានតាមប្រពៃណីខ្មែរយើង បើទាក់ទងទៅនឹងបើគេធ្វើខ្ពស់ជាង ឬក៏គេបើកជាល្បែងមិនល្អសម្រាប់តំបន់អង្គរទេ»។
ស្រដៀងគ្នានេះដែរ មគ្គុទ្ទេសក៍ទេសចរណ៍តំបន់អង្គរម្នាក់ទៀត លោក ថាន សុធី ព្រួយបារម្ភពីភាពមិនច្បាស់លាស់ ឬការអភិវឌ្ឍន៍ខុសទិសដៅនៅក្នុងខេត្តតំបន់ទេសចរណ៍ប្រវត្តិសាស្ត្រមួយនេះ៖ «សម្រាប់ខ្ញុំគិតថា គម្រោងរបស់រដ្ឋាភិបាលជារឿងមួយជាការព្រួយបារម្ភ វាជារឿងមួយល្អប្រសិនបើគម្រោងរដ្ឋាភិបាលគាត់ធ្វើទៅដោយតម្លាភាព គោរពតាមគោលការណ៍ ឬមួយធ្វើដូចក្នុងច្បាប់មាន ដែលរដ្ឋាភិបាលមានឱ្យមានតម្លាភាពជារឿងល្អដែរ»។
អង្គការយូណេស្កូ (UNESCO) បានដាក់ប្រាសាទទាំងឡាយនៅក្នុងតំបន់អង្គរទាំងមូល ព្រមទាំងបរិវេណ និងព្រៃព្រឹក្សានៅតំបន់អង្គរ ដែលមានទំហំប្រមាណ ៤០០គីឡូម៉ែត្រក្រឡា ចូលជាទ្រព្យសម្បត្តិបេតិកភណ្ឌពិភពលោក នៅខែធ្នូ ឆ្នាំ១៩៩២ និងជាកន្លែងបុរាណវិទ្យាដ៏សំខាន់បំផុតមួយនៅអាស៊ីអាគ្នេយ៍។
ប្រាសាទបុរាណ និងព្រៃព្រឹក្សាទាំងឡាយនៅក្នុងតំបន់អង្គរនេះ រកចំណូលឱ្យកម្ពុជាបានរាប់លានដុល្លារក្នុងមួយឆ្នាំៗ តាមរយៈការលក់សំបុត្រឱ្យភ្ញៀវទេសចរអន្តរជាតិចូលទស្សនា។ ប្រជាពលរដ្ឋ និងអ្នកសង្កេតការណ៍ស្នើទៅរដ្ឋាភិបាល គិតគូរឱ្យបានជាក់លាក់ពីផលប៉ះពាល់លើពលរដ្ឋ សោភ័ណភាព គ្រឹះប្រាសាទ និងបរិស្ថាននៅតំបន់អង្គរ មុននឹងសម្រេចឱ្យក្រុមហ៊ុនឯកជនវិនិយោគទីតាំងណាមួយនៅតំបន់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
វរះបុរសខ្មែរមានថ្វីដៃយ៉ាងអស្ចារ្យទុកមរតកដ៍មានតម្លៃខ្ពស់ខ្លាំងខ្លាលេីពីភពលោក។ឪឡូវអ្នកឃ្លាន”ដូល្លា” ឃ្លានបុណ្យស័ក្ត
លែងគិតហើយបុរាណមរតកខ្មែរទៀតហើយ លក់ខ្ទេចលក់ខ្ទី អោយតែបានលុយ”ដូល្លា”ដាក់ហោប៉ៅ។