រដ្ឋាភិបាល​ថា ការ​បង្កើត​ច្រក​ទ្វារ​អ៊ីនធឺណិត​ជាតិ​គ្មាន​គោល​ដៅ​រឹតត្បិត​សេរីភាព​បញ្ចេញ​មតិ

ដោយ មាន ឫទ្ធិ
2021-02-21
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

រដ្ឋាភិបាល​ថា ការ​បង្កើត​ច្រក​ទ្វារ​អ៊ីនធឺណិត​ជាតិ​គ្មាន​គោល​ដៅ​រឹតត្បិត​សេរីភាព​បញ្ចេញ​មតិ

​រដ្ឋមន្ត្រី​ក្រសួង​ប្រៃសណីយ៍​ និង​ទូរគមនាគមន៍ ​លោក ជា វ៉ាន់ដេត។ រូប​ពី​ហ្វេសប៊ុក


រដ្ឋាភិបាល​លោក ហ៊ុន សែន ​ ឆ្លើយ​តប​ថា ​ការ​ចេញ​អនុក្រឹត្យ​ស្ដីពី​ការ​បង្កើត​ច្រក​ទ្វារ​អ៊ីនធឺណិត​ជាតិ(National internet gateway ) គ្មាន​គោលដៅ​រឹតត្បិត​សិទ្ធិ​សេរី​ភាព​បញ្ចេញមតិ​ដោយ​យក​តាម​គំរូ​របស់​ប្រទេស​ចិន​នោះ​ទេ។ ការ​ឆ្លើយ​តប​នេះ​ ធ្វើ​ឡើង​បន្ទាប់​ពី​ក្រុម​អង្គការ​សង្គម​ស៊ីវិល​ជាតិ ​និង​អន្តរជាតិ ​ទាម​ទារ​ឱ្យ​រដ្ឋាភិបាល​លុបចោល​អនុក្រឹត្យ​មួយ​នេះ ​ដោយ​ពួកគេ​ ពិនិត្យ​ឃើញ​ថា ​វា​នឹង​ក្លាយ​ឧបករណ៍​ថ្មី​មួយ​ទៀត​របស់​រដ្ឋាភិបាល​ក្នុង​ការ​បង្ក្រាប​លើ​សំឡេង​រិះគន់​តាម​ប្រព័ន្ធ​អ៊ីនធឺណិត។

ក្រសួង​ប្រៃសណីយ៍​ និង​ទូរគមនាគមន៍​ថា សំណើ​របស់​ក្រុម​អង្គការ​សង្គម​ស៊ីវិល​ជាតិ​ និង​អន្តរជាតិ​ ជា​ការ​ចោទប្រកាន់ ​គ្មាន​មូលដ្ឋាន​ និង​មាន​ចរិត​នយោបាយ។ ក្រសួង​មួយ​នេះ ​លើកឡើង​ក្នុង​សេចក្ដី​ប្រកាស​ព័ត៌មាន​ចុះថ្ងៃទី១៩​ ខែ​កុម្ភៈថា​ ក្រសួង​ពិភាក្សា​ បាន​ពិគ្រោះ​យោបល់​ជាមួយ​អ្នក​ជំនាញ ប្រតិបត្តិ​ករ​ឯកជន និង​ស្ថាប័ន​ពាក់ព័ន្ធ​ជា​ច្រើន​លើក ហើយ​គ្មាន​បទប្បញ្ញត្តិ​ណាមួយ​ក្នុង​អនុក្រឹត្យ​នេះ ​ចែក​អំពី​ការ​ចាប់​យក​ទិន្នន័យ​អ្នកប្រើប្រាស់ ​និង​ការ​រឹតត្បិត​សេរីភាព​បញ្ចេញមតិ​ឡើយ។ ក្រសួង ​បកស្រាយ​ថា គោល​បំណង​នៃ​ការ​បង្កើត​ច្រក​ទ្វារ​អ៊ីនធឺណិត​ជាតិ​នេះ​ដើម្បី​បង្កើន​ប្រសិទ្ធភាព​ក្នុង​ការ​ប្រមូល​ចំណូល​ជាតិ​ដោយ​ផ្អែក​លើ​គោលការណ៍​ប្រកួតប្រជែង​ស្មើភាព ​ស្មោះត្រង់ ​និង​តម្លាភាព​រវាង​រដ្ឋ និង​ប្រតិបត្តិករ ​ព្រមទាំង​ជួយ​ស្កាត់​ការ​លួច​ត​ភ្ជាប់​បណ្ដាញ​ឆ្លង​ដែន​ខុស​ច្បាប់ ​ល្បែង​ស៊ី​សង​អនឡាញ​ខុស​ច្បាប់ ​ការ​គំរាម​កំហែង​តាម​អ៊ីនធឺណិត រូប​ភាព​អាសអាភាស ​និង​បទ​ល្មើស​ឆបោក​តាម​ប្រព័ន្ធ​អនឡាញ​ជាដើម។

អាស៊ីសេរី ​មិន​អាច​ទាក់ទង​រដ្ឋមន្ត្រី​ក្រសួង​ប្រៃសណីយ៍​ និង​ទូរគមនាគមន៍ ​លោក ជា វ៉ាន់ដេត ​ដើម្បី​សុំ​ការ​អត្ថាធិប្បាយ​បន្ថែម​ជុំវិញ​រឿង​នេះ​បានទេ ​ដោយ​ទូរស័ព្ទ​ចូល​ពុំ​មាន​អ្នក​ទទួល។

ទោះ​បី​ជា​មាន​ការ​បកស្រាយ​យ៉ាង​ដូច្នោះក្តី ​ក្រុម​អង្គការ​ សមាគម និង​សហគមន៍​មូលដ្ឋាន​ជាង​៦០​ រួម​ទាំង​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch)​ ​នៅ​តែ​ទាម​ទារ​ឱ្យ​រដ្ឋាភិបាល​ និរាករណ៍ ឬ​លុប​ចោល​អនុក្រឹត្យ​ជាបន្ទាន់។ ក្រុម​អង្គការ​ទាំងនេះ ​ចាត់​ទុក​ថា អនុក្រឹត្យ​នេះ ជា​ការ​គំរាមកំហែង​ដល់​សិទ្ធិ​ពលរដ្ឋ ជា​ពិសេស​សិទ្ធិ​និយាយស្តី​ដោយ​សេរី សិទ្ធិ​ទទួល​បាន​ព័ត៌មាន និង​សិទ្ធិឯកជន។

នាយក​ប្រតិបត្តិ​សម្ព័ន្ធ​អ្នក​សារព័ត៌មាន​កម្ពុជា ​ហៅ​កាត់ថា ​ខេមបូចា​ (CamboJa) លោក ណុប វី ​ថ្លែង​ថា ​ទោះបីជា​ក្រសួង​ប្រៃសណីយ៍ ​អះអាង​ថា ​ការរៀបចំ​អនុក្រឹត្យ​នេះ​ ត្រូវ​បាន​ធ្វើឡើង​ដោយ​បើក​ចំហ ​ហើយ​មាន​ការ​ពិគ្រោះ​យោបល់​បែប​ណា​ក្តី​ ប៉ុន្តែ​កន្លង​មក​ក្រុម​អង្គការ​សង្គមស៊ីវិល ​មិនដែល​បាន​ចូលរួម​ដំណើរការ​ពិគ្រោះ​យោបល់​នោះ​ទេ។ លោក​បន្ត​ថា ​ការ​ព្រួយ​បារម្ភ​របស់​ក្រុម​អង្គការ​សង្គម​ស៊ីវិល​ គឺ​មាន​មូលដ្ឋាន​គ្រប់គ្រាន់ ​ព្រោះ​បាន​ពិនិត្យ​មើល​យ៉ាង​លម្អិត​ទៅលើ​មាត្រា​នីមួយៗ​នៃ​អនុក្រឹត្យ​នោះ​ ហើយ​បាន​លើក​បង្ហាញច្បាស់ៗនៅ​ក្នុង​សេចក្តីថ្លែងការណ៍​មិន​ដូច​ការ​ចោទ​ប្រកាន់​របស់​រដ្ឋាភិបាល​ឡើយ៖ «ក្រសួង​ថា មិន​មាន​គោលដៅ​រឹតត្បិត​សេរីភាព​របស់​ប្រជាពលរដ្ឋ​ទេ ដូច្នេះ​ខ្ញុំ​ថា យើង​មិន​ចាំបាច់​ដាក់​រឿង​ប៉ះពាល់​ដល់​សន្តិសុខ​ជាតិ សណ្ដាប់ធ្នាប់ សាធារណៈ ទំនៀមទម្លាប់​ល្អ អាហ្នឹង​យើង​មិន​ចាំបាច់​ដាក់​ធ្វើអី ព្រោះ​វា​មាន​គោលដៅ​មួយ​ដែល​ទូលំទូលាយ​ពេក។ បើ​ចឹង​ទេ ខ្ញុំ​គិត​ថា​ខាង​ក្រសួង ពាក់ព័ន្ធ អាច​ពិគ្រោះ​ជាមួយ​ក្រសួង​ព័ត៌មាន ដើម្បី​ធ្វើ​ឱ្យ​ខ្លឹមសារ​ដែល​បាន​ដាក់​បញ្ចូល​នោះ​មាន​ភាព​កាន់តែ​ស្រូច​ជាងហ្នឹង ដោយ​យក​ខ្លឹមសារ​នៃ​មាត្រា​ហាមឃាត់​ដែល​ក្រសួង​ព័ត៌មាន ធ្លាប់​បាន​ពិគ្រោះ​ជាមួយ​សង្គមស៊ីវិល នៅ​ក្នុង​មាត្រា២០ នៃ​សេចក្តី​ព្រាង​ច្បាប់​ស្តីពី​សិទ្ធិ​ទទួល​បាន​ព័ត៌មាន»។

លោក​នាយករដ្ឋមន្ត្រី ហ៊ុន សែន ​បាន​ចុះ​ហត្ថលេខា​ដាក់​ឱ្យ​ប្រើប្រាស់​អនុក្រឹត្យ​មួយ​ស្ដីពី​ការ​បង្កើត​ច្រកទ្វារ​អ៊ីនធឺណិត​ជាតិ (National Internet Gateway) កាល​ពី​ថ្ងៃ​ទី១៦ កុម្ភៈ​។ អនុក្រឹត្យ​ថ្មី​នេះ ​នឹង​គ្រប់គ្រង​រាល់​ការ​តភ្ជាប់​បណ្តាញ​អ៊ិនធើណិត​ទាំងអស់​នៅ​កម្ពុជា ​ក្រោម​ហេតុផល​ថា ​ដើម្បី«កៀរគរ​ចំណូលជាតិ ការពារ​សន្តិសុខជាតិ និង​ការ​ថែរក្សា​របៀបរៀបរយ​សណ្ដាប់ធ្នាប់​សង្គម វប្បធម៌ និង​ប្រពៃណី​ជាតិ»។

ក្រុម​អង្គការ​សិទ្ធិមនុស្ស​ ពិនិត្យ​ឃើញ​ថា ​មាត្រា​មួយ​ចំនួន​ ជា​ពិសេស​មាត្រា៦ ​មាត្រា​១២ ​មាត្រា១៣ ​និងមាត្រា១៤ ​មាន​ខ្លឹមសារ​ទូលំទូលាយ ​និង​មិន​សូវ​ច្បាស់លាស់ និង​មាន​លក្ខណៈ​រឹតត្បិត​យ៉ាង​ខ្លាំង​ទៅ​លើ​សេរីភាព​ជា​មូលដ្ឋាន របស់​អ្នក​ប្រើប្រាស់​អ៊ីនធឺណិត​ និង​ភាព​ប្រកួតប្រជែង​ប្រតិបត្តិករ​នៃ​ទូរគមនាគមន៍​នៅ​កម្ពុជា។ ជាក់ស្ដែង មាត្រា៦ និងមាត្រា១២ នៃ​អនុក្រឹត្យ​នេះ បាន​ដាក់​កំហិ​ឱ្យ​ក្រុមហ៊ុន ឬ​ប្រតិបត្តិករ​នៃ​ច្រក​ទ្វារ​អ៊ីនធឺណិត​ជាតិ​ទាំង​អស់ ត្រូវ​សហការ​ជាមួយ​អាជ្ញាធរ​ ក្នុង​ការ​ធានា​សុវត្ថិភាព សណ្ដាប់ធ្នាប់​សាធារណៈ សីលធម៌ វប្បធម៌ ប្រពៃណី និង​ទំនៀម ទម្លាប់​សង្គម ព្រមទាំង​បង្ការ ​ទប់ស្កាត់​ និង​បង្ក្រាប​បទ​ល្មើស​នានា។ ក្រុម​អង្គការ សង្គម​ស៊ីវិល ​យល់ថា ​អត្ថន័យ​ដែល​មាន​លក្ខណៈ​ទូលាយ និង​ស្រពិចស្រពិល​នេះ នឹង​អាច​ត្រូវ​បាន​អាជ្ញាធរដ្ឋ បកស្រាយ​តាម​ទំនើងចិត្ត និង​អនុវត្ត​ទៅ​លើ​ក្រុម​មនុស្ស​ទាំងឡាយ​ណា​ដែល​បញ្ចេញ​មតិ រិះគន់​រដ្ឋាភិបាល​តាម​បណ្តាញ​អ៊ីនធឺណិត​និង​បណ្ដាញ​ទំនាក់ទំនង​សង្គម​ក្រោម​លេស​ថា ការ​រិះគន់​ទាំង​នោះ​ប៉ះពាល់​សណ្ដាប់ធ្នាប់​សាធារណៈ​ សីលធម៌ ​វប្បធម៌​ ប្រពៃណី និង​ទំនៀមទម្លាប់​សង្គម​ជាដើម។

ក្រុម​អង្គការ​ជាតិ ​និង​អន្តរជាតិ ​ទទូច​ឱ្យ​រដ្ឋាភិបាល​លោក​ ហ៊ុន សែន លុប​ចោល​អនុក្រឹត្យ​នេះ​ឱ្យ​បាន​ឆាប់រហ័ស​ ដើម្បី​ធានា ថា សេរីភាព​ជា​មូលដ្ឋាន ​និង​ធានា​ប្រសិទ្ធភាព​នៃ​ការ​ប្រើ​ប្រាស់​អ៊ីនធឺណិត​នៅ​កម្ពុជា​ប្រកប​ដោយ​សុវត្ថិភាព សម្រាប់​ពលរដ្ឋ​ខ្មែរ ​ត្រូវ​បាន​គោរព​ស្រប​តាម​រដ្ឋធម្មនុញ្ញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment